¹ ተህም ቀጥወ ኢየሱስ ኤኛ ሳቭአዪ ዉርኤት ሰቭ ሸፐተ ዳኝነድብ አቨኖምታ ያርወዳ ኤኤድቪ ከተማቭ እንእ ብደይተዊ ያሩዋኸ ኧዉርኤት ዉርኤትሁኖዋ ኬሸኖም ። ² እመኸቭ ረኖም «ጎርኋ ኖኦራን አአር ሜና ኢንኧታ ሰቭ ጭን ዉጢካኖዋ አአር አካ ኧጎሪ ጎይታ ሜና ኢንኧታ ሰቭ ዲዊተወታ ኢኬሸኸ ሳአሪ።» ³ ባቴ ሆሩዋ ኧጣየኸ ብእጎረጉየ ግት ኤኬሽሁዋቴ። ⁴ ትታርታቭ ኧፈራንክ ሞነ ቀረጢት፥ጫማቭ አትጥጩዋ ፤በቨያቭ ኧማኝእ ሰቭ ትታዝራኩዋ ግዚየ ትጀፑሩዋይ አትሰጎዉዋ ። ⁵ ትጎኦኮዳ ቢድ እንእ ቡደርሙ ወገሬት ኧዋ ቢድ ኧህር ቧሩዋ ። ⁶ በህሜ ወገሬት አይቴኤፐረ ሰቭ በረፐረ እእግዜሪ ወገሬት ያፉይወሴ ባንቴኤፖርኩዋ ወገሬት ኢትዛቨርነሁዋሴ ። ⁷ ሜና ኤፐ ሰቭ ሜና ኤፐወ ኧኩዉት አነዌ ኧኸሬ አሁዋ በገፓሁኰ ቢድ አቭኩዋ አአር ትትዎርኦሚ ትትሰጩም በህም ቢድ ቸሮዋ ባኸሬ ኤኛ ቢድ አትሆሩዋ ። ⁸ ማንኝእ ከተማ ትትጎኦዋታ በቴኤፖርኩዋ አኩዋ አአር ቡርኦዋ፤ ⁹ በህም ከተማ አነዉታ ኧቫአሺየ አፊያ ትቲንኦዋ እእግዜር መንግስት ማአ ቴኤነቨ ቧርሙ አዉጅየዋ። ¹⁰ ዘንጋኋጭን አት ከተማ ገፓሁምታ ኧገፓሁኰ ከተማ ሰቭ አንቴኤፖርኩዋ በኸረ በጀፎረ [በወረፐድ]ዎኦሙታ ዋከ ቧሪዮዋ ፤ ¹¹ «በከተማሁዋ ታነነ በኧግርንራ ኧቸና ጉተ ዳር ቲና ባያሪባሁም ምስክር [ሄቶ ] ኢኸረኸ ንጥቨጥቭኔ አሁዋ ጭን እእግዜር መንግስት ማአ ኧቴኤነቨኽ ኋሩዋ»ቧሪዮዋ ። ¹² ኢያቭ እቭሁዋ በፍርድ ቀረ ኧሃአ ከተማ ቅጣት ተሰዶም ከተማ ቅጣት ይቨኧስኬ »ባረኖም። ¹³ ሃአቨ ኢየሱስ ዋኸ ባረ «ግርዳሽ ኮራዚን ከተማ ግርዳሽ ቤተሳይዳ ከተማ ባሁዋ ኧቴፐ እእግዜሪ ወግ ሜና ድረ በቲሮስቪ በሲዶና ከተማ ተቴፐ በሃአ ከተማ ይረዉርታ ሰቭ ድረቭ ተቫጢርሁኖዋ ኢትዣዎሩዋ ባንደ፤ አአዘን ሁጅር ተኸደይተዉዋታ በአቨድ ኩረይተዉዋአፉ ዩዉሪዮዋይ ዮኦዋ ባንደ። ¹⁴ ህመኸቭ ኧኸረሜ በፍርድ ቀረ ተጢሮስመዪ ተሲዶናሜ ፍርድ አሁዋይ ፍርድ ኢቨኧስኬ ¹⁵ አኸቭ ቅፍርናሆም ከተማ ኧሳቫይኒየ ከፍ ከፍ ትቭሪ አሸኸዪ አካ አአዛብ እሳዲ ትዎይአኬ ፤ ¹⁶ የሱስቭ ኧተማሪኋ «አሁዋ ትትዝረኩታ ኢሰቭአሁዋታ ኢያ ኢሰቭአ ፤አሁዋ ኧቀንጠ ኢያ ኢቀርጥ ኧዋርትን ኢያቭ ኧቀንጠ ኧኬሼ እግዜር ኢቀርጥ ኧዋርትን »ባረኖም። ¹⁷ ኢየሱስ ኧሸኖዋ ስቭአዪዉርኤት ተማሪኋ ተኬሸኖዋ ኤኤዲ ሳረኖም ሞኦምታ« ጎይታንሮ ሴጣን ዳር ኧሹዋኸ ተጎዦሙታ ቴኤዠዥንረቧሪ ፤ ¹⁸ ሁድቭ «ሴጣን ኧዎዠኸ ተሳቫይ ወንደ ቲዎድእካ አሸሁ ባረኖም። ¹⁹ አሁም ጭረቭ ሱዉት ጠፍር ትረጉኡየዋይ በጠላት ደረግ ፎር እንእ ዳኝነድ አቭኩም ኢጎዳሁዋታ አአር አታአር ኤንዳ ። ²⁰ ቢኸርቭ ጭን ሴጣን እንእ ኧትጎዠኖኩዋይ በዋዳ አይሳርሁዋ ፤ሹዋሁዋ በጎይታይ መዝገብ ኧጣᎉ ጭን ኧሳርሁዋ። ²¹ ህም ግዚየ ኢየሱስ በመንፈስ ቅዱስ ሻይቀ ሻይቀ ባረታ ኧሳባዪ አአፈር እግዜር አባኞ ዋ ኧኋርት እንእ ኧትሟሩዋ ሁኖዋ ደኧርኸዎምታ አታአር አይሂሩዋ ሁኖዋ አቴሸኸኖዋይ ሽኩር ኧስርአኸ ፤ኦ አባኞ ዋዳ ቲንአይአሄ ወሄ ፍቃድ ኸረ። ²² አባኛ እግዜር እንእ አአር አቨዪ፤ ኢያ ትከኋ ማን ኧኸርሁኸ እማት አባኛ ኢሂር አባመኛ ማን ኧኸኸ እማት ኢያ ትከኋ ኧሂር ኢያቭ በፍቃድኟ አትሄርኩዳ ሁዳ ባኸሬ አባኛ ማን ኧኸረኸ ኢሂርካ ኤንዳ»ባረ። ²³ ኧተማሪሞኋይ ተዝቫፐረታ እማት ኦጣሞሁኖዋ ዋኸ ባረኖም፤ ዋ ታዢዳ ሁዳ እንእ ያዥታ ሰቭ ኧትዳርታኖዋ አአር ። ²⁴ ኢያቭ እቭሁዋ አሁዋ ታዢዳ ሁዳ ኖኦራ ነቢቭ ንጉስቭ ያዢ ቢሱኡዋ አናሸዊዳ ብእዝራሁዋ ትሶቩኤዳ ሁዳ ኢሶዉኦዋይ ቢሱኡም አሰምኦታ ባረኖም። ²⁵ አት ኧሙሴ ቂጫ ኢሂርካ ምስ ኢኢየሱስ ኢፈትንኲ ተረሳታ ፤«አስተማሪዮ ኧዘላለም አያ ሂንተሁ ኧረቭረኸ[ኧዘላለምሂዎት ኧረህቪ] ምር ነንአ?ባረን ። ²⁶ አየሱስቭ በሙሴ ቂጫ ኧጣᎉምርአፈድን ? ታረብብኩዳ መጣፍ ምር ይቭር ባረን። ²⁷ ምስቭ ሁዳ ዠፐረ «እግዜራኸ በቩርአ ሂናኸ፥በቩርአ ነብሳኸ ፥በቩርአቭ ደረግማኸቭ በቩርአቭ አሳብማኸ ንቭድኩ፤አቦጎዳኸ እንእ ኧገጋኸኸ ንቨድ ይቭር »ባረን። ²⁸ ኢየሱስቭ «ኧዉረ አአር ባኸ አኸቭ ዋ ዘንጋ እንእ ኧንአ ዘላለም አያ ሂይተኸ ትምበርሴ ፤[ኧዘላለም ሂዎት ትኸቭሴ]»ባረን። ²⁹ ምስቭ ሁዳ ገግኋ ያቨጥሪ ሴኧታ ቦጎዳሆኛ ማንተን ?ባረን ። ³⁰ ኢየሱስቭ ዠፐረታ «አት ምስ ትእየሩሳሌም ከተማ ተረሳታ ኢያሪኮ ከተማ ያር ባንደ ፤ቲያርካቭ በቨያ ስፍጣ ጠቦጪታ ሁጅርኋ ሞጩም አይዎንድመኸዪ አይተርፍመኸ ደነጉም ቃሸዊታ ቸኣዉም ዎርሙ። ³¹ ህም ተህም አት ካህን ተሃአመያ ቲያርካቸኧንታ ወረ። ³² እመከቭ አት ኧሌዊ ጥቭነድ አነንዳ አት ምስ ማአ እም ምስ ደነጒታ በወተኧ ኤዲ አሸንታ ሁድቭ ቸኧንታ ወረ። ³³ አት ኧሰማሪያ ገኘ ምስ ጭን ሃአመያ ቲያርካ ኧቭስ ሁዳይ ማአ አሸንታ አትቫጠጠን፤ ³⁴ ኧሁድሜ ቴኤነቨታ መዛኋ ዘይትቪ ወይንቭ ሆኦነታ በጨርቅ ጥቫነረን ተህም ቀጥወ ኧገግኋይ እቫር አሬከቨንታኧቫዘራ ቢድ ወሰደታ ኸደመን። ³⁵ በቭረጋሞኋ ዋ ኧሰማሪያ ገኘ ምስ ኧቪድ ምስ ሁዳ «ዉርኤት ብር አዋአ አቨንታ አደራ ዋ ምስ አታምምኩ ተዋ ኢረእ ባዋአኸ አዋአኸን ዱንያ እንእ ትንዠፐርካ ኧካስኸሴ» ባረን። ³⁶ አካ ተዋ ተሶኦስቸ ሰቭ ዋ ደነጉም ኧቃሸዊ ምስ አቦጎዳ ኧኸረን ማን ኢቨስርኸ ? ባረ ተሳአረን። ³⁷ ቂጫቭ ኢሂርካ ምስ «አትቫጠጠን ምስና! አቦጎዳኋ ኧኸረን ባረን፤ ኢየሱስቭ ዠፐረታ ሆር ካ አኸቭ ህመኸ ኧንአ ባረን። ³⁸ ኢየሱስ ተተማሪሞኋ ኢየሩሳሌም ቲያርታ አት ቃያ ገፓ ማርታ ዩሪያዳ አት ምሽት በቪድሻ ቴኤፐረቸን። ³⁹ ሂድቭ ማሪያም ዩሪዳ አት ኧተም ባነቸናደ ማሪያምቭ ኢኢየሱስ ይቭካ አአር ትሰቭአይ በኧግርኋይ ቸናች ባንደ ። ⁴⁰ ማርታ ጭን ሸረድ ታፈእሪ ትርኩᎀ ትቭር ባንደ ፤ማርታቭ ኢኢየሲ ቴኤነቨችታንዳ «ጎይታኞ ኧተምኛ ኦጣኛ ቸኧቸዪታ ትንቂጥካ አናቨጥጥኸዳ ? ሃበዳሽ ኧግዢያ ባካ ባረቸን ። ⁴¹ ኢየሱስ ዠፐረታ «ማርታ ሲቭኧ ማርታ አሻ በሮኦራ አአር ትትጨኔቂዋ ትርኩመቭ ትቪዋ ፤ ⁴² ቢኸርቭ ያትሲእካ እማት አአርን፤ማሪያም ወሄ አአር ሸፐተች ተሂድቭ አይዎስጅኳዳ »ባረና።