¹ ኢየሱስ ቃርኋ ዝሬከ በጀፐረ ቀጥወ ቅፍርናሆም ከተማ ወረ ። ² በህሜ አት እእሮም ገኘ መቶ አላቃ ባንደ፤ሁድቭ ኢረድኩዳ ሜነኘኋ ቡሴኧኸ ኤመንታ ኢዎንዲ ሰንአ ባንደ ፤ ³ ሁድቭ ኢኢየሱሲ ዋራይ ሰምአታ ኧቬነኘኋ አፊያ ዪንአነኸ ኢሶኦርኔ ታአይሁድ ገኘ ባሪቅ አታትሁኖዋ ኢኢየሱሲ «ሜነኘኛ ቡሼኧከ ኤኤመኒ ኧኸሬ ሜኤተታ አፊያ ዪንአኒኸ ሳአርኒ ባረታ ኬሸኖም ። ⁴ ሁኖም ኢኢየሱሲ ሞኦምታ «ዋ እእሮም ገኘ ምስ ሜነኘኋ አፊያ ኧንአነ» ⁵ ሁዳ ኧገኘንራ ሰቭ ኢረምድ ንደመድኔኮዳቭ ቢድ አረሸንረ ሁዳን »ቧርሙታ አትዋጠጩም ሳአሪ ። ⁶ ኢየሱስቭ ተሁኖም እማትሜ ወረ ቢድሞኋይ ሞኦሙ ቲቲ ኢናኖዉታ ኧቨኧር አላቃ ሁዳ አቦጎዳኋ ኬሸታ ኢኢየሱስ «ጎይታⶉ አኸ ኢያትንየ ቦኦት አትቂጥአኸ ቢያይ ኡፎቻ ትጋአይ ኧቨቃካ ሰቭ አንኸርኃ ባረን ፤ ⁷ ኢያቭ አኸትኒየ ኧቫአይ ኧቨቃሁ ሰቭ አኸርኋ ህመኸ ኧኸሬ በህሜ ታነኸ ትረፍ ባኩ፤ ሜነኘመኛ ተቫአሸኋ ኢትረፍሴ ። ⁸ ኢያ ፎር አጋድ ዪኢዝዝኝዳ ሰቭ አኖዉዋ ቲያቭ ገዳ አጋድ ኖኦራ ጋዘነ አኖዉዋ አአት ሁዳ ሆር በቫሁን ያር ኤኤኛቭ ሁዳ የኸ በቫሁን ኢቫአ ፤ሜነኘመኛ ሃዳ ኧንአ በቫሁን ዪንአ »ባረን ። ⁹ ኢየሱስ ዋዳ ወግ ኸረወ ፤ተዥቫፐረታ ተሁዳ እማትሜ ኧዎኦዋ ሰቭ ብእስራኤልቭ ገኘ ቢከር ኣዋኸ በጎይታ ታአመረ ኧትሸከቨ ሰቭ አነከቭኋ »ባረኖም። ¹⁰ ኣኬሸዉዮም ሰቭ ኧቨኧር አላቃ ሁዳይ ቢድ ቢትዠፖሩዋ ሜነኘ ሁዳ አፊያ በኸሬ አሸዊ ። ¹¹ ኢየሱስ በቭረጋዃ ናይን ዩሪዳ ከተማ ወረ ፤ተማሪሞኋዪ ኖኦራቭ ሰቭ ተሁድቭ እማትሜ ዎርሙ ። ¹² ሁድቭ ኧከተማ ምዬ ማአ ቲሰርአካ ሰቭ ኒሳ በጨቨር ፌነጉም ተከተማ ቲዎኦታ አሸ ፤ኧዎደቭ ኧች አአዶድኋይ እማት ባንደ ፤አዶድሞኋ ዎዊት ባነቸ ኖኦራቭ ኧከተማኋ ሰቭ ተሂድቭ ባንደ ። ¹³ ኢየሱስቭ አሸ አትቫጠጠናታ አቲክዋ ባረና ። ¹⁴ ተህም ቀጥወ ቴኤነቨታ ጨቨርሁዳ በኧጅኋ ነከደን።ኤፌነጉም ሰቭ ተሸኮሙ፤ኧሪሳቭ ሁዳ «አኸ ዘርማ ተሳ ባከ ተሳ»ባረን ። ¹⁵ ኧዎንደቭ ኧች ተረሳ ቸናታ ኧዘጉት ቀነሰ፤ኢየሱስቭ ኧኧች ሁዳይ አዶድ «እኩ ትካሽ »ባረታ አቨና። ¹⁶ ሰቭቭ ሁኖዋ ተቭራኮጉምታ «ኑእ ኧኸረ ነቢ ቢና ግት ተረሳ እግዜር ሰቭኋ ያተርፊ ማአ»ቲዩሩዋ እእግዜር ሽኩርት አቴኖዉም። ¹⁷ እእም ኢኢየሱስሜ ዋራይ በይሁዳ ገኘቭ በዙሪያሞኋ ተሰምአ ። ¹⁸ ኧዮሐንስሜ ተማሪ ዋ ዋራይ እንእ ኧዮሐንስ ኤኤጂ ዮሐንስቭ ተተማሪኋ ዉርኤትሁኖዋ ከናኖምታ፤ ¹⁹ «ትቭአኬ ኧዋሪ ክርስቶስ አኸትንሄ ዌኤኟ አአር ነኧየነ ፤ቧርሙ ተሳአሪ »ባረታ ኧጌታ ሱሲ ኬሸኖም ። ²⁰ ኧኬሸኖም ሰቭ ኧጌታ የሱሲ ዎርሙታ «ትቭአኬ ኧዋሪ ክርስቶስ አኸትንሄ ዌ?ኤኛ ሰቭ ነኧየነ ቧርሙታ ተሳአሪ» ባረታ ያጠምካ ዮሐንስ አሄ ኬሸንረ ቧሪ። ²¹ ህም ግዚየ ኢየሱስ ኧሮኦራ ሰቭ ተቫአሸ ተሩዕ ኤማድቭ አተነፈኖም።ሴጣን አዋአ ኧሮኦራብ ፉርት ሰብ ኤር ከፈደ ። ²² አሱስቭ ዠፐረታ «ሆርሙታ አሸሁይቭ ኧሰምአሁይቭ ዘንጋ እንእ ኧዮሐንስ አዉጂ ፤ኤርኖዋ ኧፎጩዋ ሰቭ ኤርሁኖዋ ኢትከፈድ ፤ጅረ ሰቭ ተጌኬርሙ ያሩዋ ፤ኧደራ ባአሸ ኧወተኣዎዋ ሰብ አፊያ ኢሆሩዋ ጣቆራቭ ሰቭ ኢሶዉኦዋ ኧዎንጁም ሰቭ ተቩድ ኢትረሾዋ ኧዚጋቭ እእግዜሪ ኢተርፉኮዳ ወሄ ዋራይ ዪኢጂዮዋ ። ²³ ቢያቭ ተጥራጠረታ ኢኢኒየአይትዠፐር ሰቭ ኧትዳረ ሰቭን ባረኖም። ²⁴ ኧዮሀንሲ ኪሸረኘ ተዎሩዋ ቀጥወ ፤ኢየሱስ ኧዮሐንስ አአር ዋኸ ባረኧዘጉት ቀነሰን «ምር ታዙዋይ በረሃ ወርሁም? ንፋስ ያቅረርኩዳሸንቦቆና ? ²⁵ ዌ ምር ታዡዋ ወርሁም?ያዝዎኝካ ሁጅር ኧትኸተረ ሰቭ ታዡዋይ ወርሁሚ ? ያዙዎኝካሁጅር ኢትሆተርታ ኣዉራቆጫድ በኸረ በቨረሃ አይረዉርታ ! ሁኖዋ አኖዉታ ሁዳ በንጉስ ቢድን ። ²⁶ አካ ምር ታዡዋይ ወርሁም?ነቢታዡዋይ ወርሁሚ ? እከ ነቢን.ሁድቭ ተነቢ ኢረእ ። ²⁷ ሁድቭ ቲኢፍት ኢፍታሄ ብደይተ ሜያኸ ያጣዉርነኸዳ ኪሸረኘኛ ኤኬሽኬ ባርሙ ኧጣፉነ ሁዳን ። ²⁸ ኢያቭ እቭሁዋ እሽቻ ቴኤኛዮዋ ሰብ እንእ ቲያጠምቅካ ዮሐንስ ኢረእካ አት ሰብ ኤንዳ።ብእግዜር መንግስት ጭን ትእንቨኋ ያአስካ ሁዳ ኢረእኩ »ባረኖም። ²⁹ እመዳቭ ኧሰምኦዋ ሰቭ እንእ ቀረጥ ያጭታ ስቭ ስነጋ ታይተርፍ በዮሐንሲ ጥምቀት ተጦሞቁም ባንደ ።በህም ኧቫአ እእግዜር ሜና ቂጥየ ኧኸረኸ ኋርሙ ። ³⁰ ኧፈሪሳ ሰቭ ኧቂጫ አስተማሪም በዮሐንስ አንጠመቅነዳ ኧዋሩዋይ ኧኸሬ እግዜር ይቭኮታ አአር አንሰቭአነዳ ቧርሙ ። ³¹ ኢየሱስ ዠፐረታ «አካ ኧዋ ዘቨር ሰቭ ተቭርአፈድ ናትዋራኮዋ ምርሁ ኢዎስሩዋ ? ³² በጆፎረ ቸኖም ኢትጮጅታ ዴንጋ ኢዎስሩዋ ሁኖም ተሁኖም ተኋኖሙ አንድር ደነግኔነኩም አሁዋ አንጋሸሁዋታ» አዝማመርኔነኩም አሁዋ ጭን አቤከሁዋታ » ይዉሩዋ ። ³³ እመኸቭ ያጠምቅካ ዮሐንስ ሸረድ ታይቭርአ ወይንቭ ታይሰጭ ቢቫአ «ሴጣን አነወ »ባሁይ ። ³⁴ ኧሰቭ ትከቭ ቲቨርአዪ ቲሰጭቭ ቢቫአ ኢቨርአካ አአርቪ ኢሰጭካቭ አአር ኢሽርኩ፤ በህምቀረጥ ያጭታ ሰቭመዪ ኧቫጢረተኘ ሰቭሜ አቦጎዳን፤ ባኊ። ³⁵ እእግዜሪ ሃሪነድ እንእ ዉረ ኧኸረኸ ቢትሄተሪዳ ሁኖዋይ ተሄረ » ባረኖም። ³⁶ አት ስምዖን ዩሪዳ ኧፈሪሳ ገኘ ምስ ኢኢየሱስ እማቲ ሸረድ ኢቨርኦይ ሳአረን ሁድቭ ዋ ኧፈሪሳ ገኘ ምሲ ቢድ ወረ ሸረድ ኢቨርአይ ቸና ። ³⁷ በህም ከተማ አት ባጢረተኘ ምሽት ባነቸ ፤ኢየሱስ ሸረድ ኢቨርአይ ኧፈሪሳ ምሲ ቢድ ኧገፓቸኸ ሰምአችታነዳ አት አአልባስ ጢሮስ ዩሪዳ ብርቃት ሙርአ ሽርቶ ጠበተች ማአች። ³⁸ ሂድቭ ቢኢየሱስ ቢእኋይ በኧግርኋ ምዬ ተሸከቨችታ ኢኢ ኤፐ ኧዝራካን ኧግርኋትትቪህ ቢኢምባ ትታዝቨስቭኩ ብጉንኧርመሻ ትትዋሽኩዊ ኧግርሞኋ ትትሰኧቭኩ ሽቶ ትዋሽኩ ባንደ ። ³⁹ ኢኢየሱስ ኧሸረድ ኧኸናን ኧፈሪሳ ምስ ዋ ዘንጋ አሸታ «ዋ ኢኢየሱስ ኧዉረ ነቢ ተኸረ ዋ ትዋሽኩዳ ባጢረተኘ ምሽት ማን ኧኸረችመኸዪ ሜናመሻ ምር ኧኸረኸ ይሃር ባንደ »ቲቭር በሂንኋይ አጫመጠ ። ⁴⁰ ኢየሱስቭ ኧስምዖን «ስምዖን አት ኢኢድኸዳ ዘንጋ አነኒ ባረን» ሁድቭ «አኪያ አስተማሪዮ አዉዴ»ስ ባረን። ⁴¹ ኢየሱስቭ «አት ምስ ኧዉርኤት ሰብ አጅግ አቨኖምታ፤ባአት ሁዳ አምእስት በኧር ብር ባአትቭ ሁዳ አምእስት ባወንድ ባነነደ. ⁴² ሁኖም ኢኮሽታ አአር ቢዎሁሩዋ ኧዉርኤቸሞሁኖዋ ቸኧኖም ።አካ ተዉርኤቸመሁኖዋ ኧሃአ ምስ ኧተሁኖዋ ኢረእካ አአር አረጂዳ አአር ኢቨስርኸ ? ባረን ። ⁴³ ስምዖንቭ ዘፐረታ «ኖኦራ ብር ኧቼኧነ ሁዳ ኢረእካ አአር ኢረድኩዳ አአር ኢቨስሬ »ባረን ። ኢየሱስቭ «ኧዉረ አአር ሬከኸ »ባረን ። ⁴⁴ ተህም ቀጥወ ኢየሱስ ኧቭሽት ሂዳይ ተዝቫፐረታ ፤ኧስምኦን «ዋ ምሽት ታዥካ ? ኢያ ቢዳሄ ገፓሁ አኸ ኧኧግርኛ እሃ ዳር አናሄዳ ሂዳጭን ቢኢምባሻ ኧግርኛ አአቨችታ በጉንኧሻ ሟሸቸዪ ፤ ⁴⁵ አኸ አንሳአሄዳ እኩ ሂዳ ዳኸ ተገፓሁ ቀነሰችታ ኧግርኛ ትትሰኧቬ አነች ። ⁴⁶ አኸ ኧጉንኧርኛ ኧትዋሽካ አአር አናሄዳ ሂዳጭን ኧኧግርኛ ዳር ሽቶ ሟሸቸዪ ፤፤ ⁴⁷ አካ ኢያቭ እቭኸ ሂዳ ኖኦራ አአር ኧረመደቸዪ በሂዳ አነዳ ኖኦራ ባጢር እንእ ተፋኧና ፤እንሲየ ባጢር ኧትፋኧነ ሁዳ እንሲየ አአር ኢረንድ »ባረና ። ⁴⁸ ተህም ቀጥወ ኢየሱስ «ኣሂድቭ ባጢራሽ ተፋኧነሽ ባረና ። ⁴⁹ ተሁድቭ ሸረድ ኢዎርኦዋይ እማቲ ኧቸኖ ሰቭ በሂንሁኖዋይ «ባጢር ዳር አፉይቭካአአር ዋ ምስ ማንተን?»ኧዋርት ቆነሹም። ⁵⁰ ኢየሱስ ጭን ኧቭሽት ሂዳ ብቢያ አአመርሽዋይ ተነፍሽም በወሄ አአር ሆይዋ»ባረና ።