¹ አአይሁድ ጎቸ ኧትደሞጁዋ ሰቭ እንእ እማቲ ተረሾሙታ ኢኢየሱስ ኧይሁዳ ገኘ ኧጲላንጦሲ ወሰጂ። ² ሁኖም«ዋ ምስ ሰቭንራ ቲሳስትካ ፥ዝኧንጕስ ቄሳር ጊብርኢኮሺ ቲኸርአካ ነከቭነዪ አትቭ እመከ ኢያ ክርስቶስንሁ ቲቭካ ሰምአነዪ ቧርሙ ኢኮስሺ ባንደ። ³ ጲላንጦስ «አኸ ኧይሁዳ ሰቭ ንጙስንሄ ? »ባረታ ኢኢየሱስ ተሳአረን፤ኢየሱስ ዠፐረታ «እከ አከ ኧቫኸምነኸ» ባረን። ⁴ ሃአ ግዚየ ጲላንጦስቭ ኧካህን አላቃ በህመኸ ኧትደሞጁዋ ሰቭ «በዋ ምስ አትቭ ኢፋድ አነከሁወዳ»ባረኖም ። ⁵ ሁኖዋ ጭን «ዋ ምስ ተገሊላ ቀነሰታ ዋይ ስን በይሁዳ ገኘ እንእ ቲያትመር ፤ሰቭ ኧመራክስ ኢሳሳ»ቧርሙ ኮሰሺ ። ⁶ ጲላንጦስ ገሊላ ይቭካ አአር ቢሰቭአ ዋ ምስ ኧገሊላ ገኘ ሰቭኒ?ባረ ታሳአረኖም ። ⁷ ሁድቭ ኢየሱስ ተሄሮድስ ግዛት ተገሊላ ገኘ ኧቫአኸ ሃረታ ኧሄሮድሲ ኬሸን ፤ህም ግዚየ ሄሮድስ ብእየሩሳሌም ከተማ ባንደ ። ⁸ ሄሮድስቭ ኢኢየሱስ ቢያዥኩ ኖኦራ አአር ሳረን፤ኧዋ ኢፍቲ ኧሁዳይ ዋራይ ኧሰምአይ ኧረፐሬ ኧኸሬ ኖኦራ ግዚየ ያዥኲ ኢሲእ ባንደ፤ሁድቭ አት ወግ ሜና ቲንአካ ታሸሁ»ኢቭር ባንደ። ⁹ ሄሮድስቭ ኖኦራ መትሳአየ ተሳአረን ኢየሱስ ጭን አታአር አዠፐረነዳ ቁስ ባረን ። ¹⁰ ኧካህን አላቃዪ ኧሙሴ ቂጫ አስተማሪቭ በህመኸ ተሸኮዉሙ ኢኮስሺ ባንደ ። ¹¹ ሄሮድስቭ ተወታደርሞኋ እማቲኸረታ በቅነጨ ባጭ ባጭ ኤፐን፤ያዙወኝካ ሁጅር አኸተረንታዠፐረ ኧጲላንጦሲ ኬሸንቭ። ¹² ህም ቀረ ሄሮድስቪ ጲላንጦስቭ አቦጎዳ ሆርሙ፤ ኧሃአ ኢፍቲ በግትሁኖዋ መራክስ ባንደ ። ¹³ ተህም ቀጥወ ጲላንጦስ ኧካህን አላቃዪ ዳኘቭ ሰቭ ሁኖዋ እማቲ ኸናኖምታ ፤፤ ¹⁴ ዋ ምስ ሰቭ ኧመራክስ ኢሳሳ ባሁም ኢያይ ኧቫአኊ ፤ኢያቭ ቢኢፍታሁዋይ ምረመርሁን ቢኸርቭ በከሰስሁይ ዘንጋ እማትቭ ኢፋድ አነኮሁወዳ ። ¹⁵ v 15 ሄሮድስቭ አትቭ ኢፋድ አነኮወዌ ኧኸሬ ኢናይ ዠፐረን፤ዋ ምስ ኧዉድ ያሰርአኩዳ ኢፋድ አኔፐዳ ። ¹⁶ «አካ ኢያ ቅጨተትሁንታ ኧገፍርኩዴ» ባረኖም። ¹⁷ በህርቭ ህርቭ በፋሲጋ ሙርአ ቀረ ጲላንጦስ አት እስረኘ ቶኦሁኔ ቢድ ኢገፍርኖዋ ባንደ። ¹⁸ በህም ኧቫአ ሰቭ እንእ እማቲ«ኢኢየሱስ እትርኩ በርባን ግፍርንረ»ቧርሙ አትኋኖሙ። ¹⁹ በርባንቭ በከተማ ለብሻ በሸትቪ ሰቭ ቡኡትርት ኧቫአ ቦኦሁኔ አኮጂ ባንደ ። ²⁰ ጲላንጦስ ኢኢየሱስ ኢገፍርኲ ዣቨታ ዠፐረታ ተሳአረኖም። ²¹ ሰቭ ሁኖዋ ጭን «ስእርኩ ስእርኩ ቲዩሩዋ አትኋኖሙ። ²² ጲላንጦስቭ ኧሶኦስተኘ ግዚየ እኧቭር ዋ ኢየሱስ አአፋን ኢፋድ ምርአፈድን?ኢያ ኧዉድ ያሰርአኩዳ ኢፋድ አነከሁዌ ኧኸሬ ቅጨተሁንታ ኧገፍርኩዴ»ባረኖም። ²³ ሰቭ ሁኖዋ ጭን «ስእርኩ»ቲዩሩዋ ኖኦራኸ አትኋኖም፤ህያድሞሁኖዋ ቲደቭር ወረ ። ²⁴ ጲላንጦስቭ «ባሂመኸ ኧህር»ባረ ፈንደኖም። ²⁵ ተህም ቀጥወ ለብሻ በሸትሞኋዪ ሰቭ ቡኡትርትኋ ቦኦሁኔ አአኮጂ በርባን ሰቭ ሁኖዋ በሳአሪ አይነት ፈታኖም።ኢኢየሱስ ጭን ሁኖዋ ኧዋሪመኸ ዮኦትሪ አዋአ አአይፐረኖም። ²⁶ ኢየሱስ ጠቦጩም ኢሶኡሪ ቲዎስቺዳ ፤ስምኦን ዩሪዳ ኧቀሬና ገኘ ምስ ተገኜ ከተማ ቲጋአካ ጠቦጪታ ኢየሱስ ኢሶኡርኬ አጣወሪ መስቀል ፈንግታ ኢኢየሱስ ተኸተር ቧርሙ በግርድ አፌኖጒ ። ²⁷ ኖኦራብ ሰቭ ኢኢየሱስ ኢትሄተሪ ባንደ ፤ተሁኖም ግት ተቨጠጫም ኢቨሃታ እሽቻ ባናተ ። ²⁸ ኢየሱስ ጭን ኧህናይ ኤፐ ተዥቫፐረታ«አሃ እእየሩሳሌም ከተማ እሽቾ ኧገግማሃዪ ኧዴንጋማሃ ብሃ ባኸሬ ኢያ አትካኒ»ባረናም። ²⁹ «አኔኤኛሚ ጡቭቭ አናጦፗ ዥገቫ እሽቻ ኧትዳራታና አአር ዩዉኮዳ ቀረ ኢቫአ» ³⁰ ህም ግዚየ <ቆቶ ቦፎርንራ ዉዶኡዋ >«አፈርቭ ዋኧንረ ዩዉርቴ» ። ³¹ አካ ቢኢራ ኤኧ ዋ ዘንጋ እንእ ብቤፖኰ በደርእ ኤኧሁ ምር ኢንኦኴ ኢህርሴ ባረኖም ። ³² ቡችር ዉርኤት ሽፍጣ ሰቭ ቲኢየሱስ እማቲ ዮኦትሪዮዋይ ወሰጂዮሙ ። ³³ ቀራኒዮምብ ዩሪዳ ቆቶይ ሰንኦሙ ፤ቀራኒዮ ኧዋርት ኧጉንኧር አእቭ ኧዋርትን፤ብህሜ ኢኢየሱስ ሶኦሪ ፤ዉርኤት ሽፍጣቭ አት ሁዳ በቀነሏ አት ሁዳቭ በጉራኋ ሶኦሪዮሙ። ³⁴ ኢየሱስቭ «አቦኛ ጎይቶ ዋ ሰቭ ኢንኧታ አአር አይሂሩዋይ ኧኸሬ አፉ ባኮዋ »ባረ ወታደርቭ ሁኖዋ ኢኢየሱሲ ሁጅር ኧርጥ አተጉሙ ተሻኮጂ ። ³⁵ በህመኸቭ ኧሮፖሩዋ ሰቭ ተሸከዉሙ ያዡዋ ባንደ፤አአይሁድ አላቃቭ «ኤኛ ሰቭ አተነፈ፤እህ ሁዳ ጎይታ ኧሸፐተን ክርስቶስ በኸረ ገግኋ ኧቭር አያተርፍካ ? »ቧርሙ ያፊዥኮ ባንደ። ³⁶ ወታደርቭ ሁኖዋ አኴሽኰ እኧሁድሜ ቴኤኖዉሙታ አቌ ኧቫረወይን አሰጨዊ ። ³⁷ «ዉረ አኸ ኧይሁዳ ሰቪ ንጉስ በኸርኸ ገጋኸ አትርፍ »ቧርሙ ያኴስከ ባንደ ። ³⁸ በጉንኧርሞኋይ ዋ ምስ ኧይሁዳ ሰቪ ንጕስን ቧርሙ ጣፉሙ ሶኦሪ ባንደ። ³⁹ v 39 ቲኢየሱስ እማቲ ተሶኦሪዮዋ ዉርኤት ሽፋጣ አትሁዳ «አኸ ክርስቶስ አኸርኸዳ ? እንዴ ገግማኸዪ ኢናቭ አትርፍ» ባረኢቀርኩ ባንደ ። ⁴⁰ አት ሁዳ ጭን ዠፐረታ «አኸ ኧዋ አይነት ፍርድ በትፈንደቨኸሜ ስርም ጎይታ አትፈይካ ? ⁴¹ ኢናሺ ቤፐኔ አአር ንትቄጣነ ፤ኢና አፎጅኮንረ ፍርድ ቂጢየን አአር ፤ዋ ምስ ጭን አት ሙጥጥ አአር አኔፐዳ»ባረታ፤ በቬሻኋ ማአቸወ ። ⁴² v 42 ኢኢየሱስቭ «ኢየሱሶ በመንግስታኸ ኧስቤ» ባረን። ⁴³ ኢየሱስቭ «ኧዉረመኛ እቭኸ ኦኳ በጀነት ቲያ እማቲ ትኸርኬ »ባረን። ⁴⁴ ኢየሱስቭ ኧሶኦኦሪ ዋአና በስድስት ሳአት ባንደ ፤ተስድስት ሳአት ቆነሺታ ዢኧ ሳአት ስን ባአራዳ እንእ ጠነቫ ወንደ ። ⁴⁵ አየድቭ ተደኧረ ፤ኧቤተ መቅደስ መዘኔት ተግትዃ ዉርኤቲ ተትረተረ። ⁴⁶ ኢየሱስ ቃርኋ ነሳታ «አቦኞ ኧነብስኛ አደራ በኧጃከ አቭከ»ባረታ ተህም ቀጥወ ሉኋ ዋአ ። ⁴⁷ በህመኸ ኧረፐረ ኧቨኧር አላቃ ዋዳ እንእ አሸታ «ዋ ምስ ኧዉረ ፃዲቅ ባንደ» ባረ ጎይታ አኸበደ። ⁴⁸ v 48 ኢኸርካ ዘንጋ ያዡዋይ ኧትደሞጁዋ ሰቭ እንእ ዋዳ ባሸዉዋ ቀጥወ በቭጥጥ ዳታሁኖዋ ቲጃኮዉዋ ቢድሁኖዋይ ተዦፖርሙ ዎርሙ ። ⁴⁹ ኢኢየሱስ ኢትሄተሪዳ ሰቭ እንእ ተገሊላ ኧትሄተራዪቭ እሽቻቭ ዋዳ እንእ በሮኢ ተሸኮዉሙ ያዡዋ ባንደ። ⁵⁰ ኧይሁዳ ከተማ በኸረ በአርማቲያስ ኢረቭርካ ዮሴፍ ዩሪዳ ምስ ባንደ ፤ሁድቭ ፃዲቅ ወሄ ሰቭ ባንደ ፤ አአይሁድቭ ኦኦጎት ባሪቅ ባንደ ። ⁵¹ ኧህር ባኸሬ ባአይሁድ ወዋዳቪ አድማቭ አንትስምአምአ ባንደ ፤ሁዳ ኧጎይታ መንግስት በተስፋ ኢኢየባንደ ። ⁵² ሁድቭ ኧፒላንጦሲ ወረታ ኢኢየሱሲ ኒሳ ኢኮኸ ሳአረን። ⁵³ ዮሴፍ ዩሪዳ ምስቭ ኢኢየሱሲ ኒሳ አወንደታ በወሄ ከፈን ከፈነን እማትቭ ሰቭ ባᎂኮኰ እቭር ፎቆሙታ በኸኘዊ ቀብር ᎂከን። ⁵⁴ እመዳ ኤፐ ሁዳ ሰንበት ኢጋአወዳ ኧሰንበት ኢኸርካ አአር ቁጥቁጥ ቢንኧኮዳ ግዚየ ባንደ። ⁵⁵ ቲኢየሱስ እማቲ ተገሊላ ገኘ ኧቫአ እሽቻ ኧዮሴፍ ቴሄተራዪ ወራም፤ሞገማሞኋዪ ኒሳማ ኧተኸ ኧዎኬዊኸ አሻም። ⁵⁶ ተዠፐራም ወራምታ ኧሪሳኢኸርካ ሽቶሚ ቅባትቭ ጌኬራም፤ኧሙሴ ቂጫ ቢዪኢዝዝካ አይነት በዉር ሰንበት ቀረ አፎኛም ዋአራም።