¹ እሽቻ ህና ዉርሰንበትሱቢ እረርኧ ኧጌከራይ ሽቶ ጠበጫምታ ኧዎገማይ ወራም ። ² ህናም ኧዎገማይ ኤኤፎዊ እቭር ተዎገማ ሁዳ ፎር ክቨነረ በፈካ ኤኤዲ አሻም። ³ ከስሪ ቢጋአ ጭን ኧጌታ ኢየሱሲ ኒሳ በከራዪ። ⁴ እመዳ አሻምታ ይቭራታ አአር በከራም ፤ህም ግዚየ ጥርጥር ይቭካ ሁጅር ኧትሆተሩዋ ዉርኤት ሰቭ ኧጠነቃር ቢኢፍትህናይ በትሸኮዉዋይ አሻም ። ⁵ እሽቻ ህና ፈኛምታ አፈር ቲያዣታ «ሰቭ ሁኖዋ አያ ኧኸረ ሁዳ በዎጁዋ ሰቭ ግት ኧቭር ትስአይ?ባረናም። ⁶ v 6 ሁዳተዉድ ተረሳ ባሃሬ ዌኤዲ ኤንዳ ፤በገሊላ ገኘ ታነ አሃ ኤኤደናሃ ቃር ዝግጃ ፤ ⁷ ሁድቭ ኧሰቭ ትከ <በቫጢረተኘ ኧጅ ኤኤቶ ያአይፑሪዴ ፤ኢሶኡሪዴ ፤በወንደቭ በሶኦስት ቀረኋ ኢትርሳኬ>ባረናምባ »ቧሪያም። ⁸ ህናም ኢየሱስ ኧዝሬከና ቃር ዘከጃም። ⁹ ተሞገማይ ተዠፐራምታ አሻይቭ ኧሰምአይቭ አአር እንእ አአስረአቸ ተማሪሞኋዪኤኤኛሞሁኖዋ ኤኤጃም። ¹⁰ እም ዘንጋ ኢኢየሱሲ ኪሸረኘ ኤኤጃዮዋ መግደላዊት ማሪያም ዮሐና ኧያእቆብሜ አዶድ ማሪያምቪ ተህናም እማቲ ኧረፐራ እሽቻ ባናተ። ¹¹ ሁኖዋ ጭን ቢዪኢጃዮዋ ኢቋጃታ አአር መሰረኖምታ አናአሞሪያታ። ¹² ጴጥሮስ ጭን ተረሳታ ሞገማኋ ያዢ ተራወኧ፤በህሜ ሙግ ባረታ ቢያዥ፤እማት ኧከፈን ሁጅር አሸታ በኸረ ዘንጋ ወግ ኸረወታ ቢድኋይ ተዠፐረታ። ¹³ በህም ቀረ ተኢየሱሲ ተማሪ ዉርኤትሁኖዋ ኤማሁስ ዩሪዳ ቃያያሩዋ ባንደ።ኤማሁስ ተኢየሩሳሌም ከተማ አስረ ዉርኤት ኪሎሜትር አአህር ያርእ ባንደ ። ¹⁴ ሁኖም በዋ ግት በኸረ ዘንጋ እንእ ሁኖም ተሁኖም ኢዝራኩዋ ባንደ። ¹⁵ ሁኖሙ ቲጮጁሚ ቲዝረኩም፤ቲያርታ ኢየሱስ ገግኋ ማአታ ተሁኖም ተዠፐረ ያር ባንደ። ¹⁶ ቢከርብ አይሂሪኸ ኤርሁኖዋ አጭራነቨኖም። ¹⁷ ኢየሱስ «ትታሩዋታ አሁም ታሁም ትዝረኲዳ ሁዳ ምርአፈድን ?» ባረ ተሳአረኖም፤ ሁኖም በምጥጥ ደነኧኖምታ ተሸኮሙ። ¹⁸ ተሁኖም አት ቀለዮጳ ዩሪዳ ምስ ዠፐረታ «ቢኢየሩሳሌም ከተማ ታነኸ በዋ ግት በዋይ ኧኸረ ዘንጋ ኧተኸ እማት አኸ አሃርኸዳ ?ባዘራንሄ ?ባረ »ተሳአረን ። ¹⁹ ኢየሱስቭ ምርአፈድን? ባረ ተሳአረን፤«ሁኖም በጎይታዪ በሰቭ ኢፍቲ በቃርሞኋዪ በቬናሞኋ ኑእ ደረግ ኧረፐረን ነቢ ኧረፐረ ኧናዝሬት ኢየሱስ አአር አሃርኸዳ? ²⁰ ኧካህን አላቃዪ ዳኘመንራ ኧሆሩዋ ሰቭ ኢኢየሱስ ሙድ ኢትፈንድዌ አዎኦሙ አአይፖሪ፤ሶኦሪቭ ። ²¹ ኢና ጭን እእስራኤል ሰቭ ሃአይተ ያተርፍኬ ባርነ ተስፋንራ በሁዳ አወናነ ባንደ ፤ዘንጋኋ ጭን በዋ አይነት ሁዳ ሶኦርሙ ቶኦተሪኦኳ ሶኦስተኘ ቀረን። ²² አትቭ እመኸ ቲናይ ጋአት እረርኧ ኧሞገማይ ኧወራ አታት እሽቻ አዳአንረ። ²³ ኢኢየሱሲ ኒሳኋ ቢቨህራይ «ኧመላአይካ መርክ ብርኢ አሸነ» ባራም ማአም፤<አሻይ መላአይካ « ኢየሱስ አያ ኸረ ተረሳ » ባረ ኤኤደናኸ ኤኤጃንረ ። ²⁴ ቲናቭ እማቲ ኧረፖሩዋ አታት ሰቭ ዎርሙታ እሽቻ ህና ኤኤጃይ ሁዳ አጬጉም ሞኦሙ፤እሽቻ ኤኤጃይ ሁዳ እኧዉረምን ቧርሙ፤ኢኢየሱስ ጭን አናሸዊ. ²⁵ ኢየሱስቭ አሁዋ ስርም አትዌስሩዋ ነቢም ኤኤጅኩዋ ቃር በሂናሁዋ አታወሮዋ ስቭ ፤ ²⁶ ክርስቶስ ዋዳ እንእ መከራ ኧተኧወርትቭ፤ ኧክብርሞኋይ ኧጉዉኦት ኤኖዳ ? » ባረኖም። ²⁷ ተሃአ ቀጥወ ተሙሴ ቀነሰታ በነቢ መጣፍ ኧጣፊ አአር እንእ ኧሁዳ አአር ምር ይብረኸ ጌከረ ኤኤደኖም። ²⁸ ሁኖም ይርኮዳ ኤኤማሁስ ቃያ ሰንኦም፤ኢየሱስ ጭን ተህም በዲየ ያርካ አአረኸ ኸረ ኧግር አቨተረ ፤ ²⁹ ሁኖዋ ጭን አፈር ኧቨሼ ኧኸሬ ፤«አፈር መሸ ቲና ኔእ »ቧርሙቡሼኧኸ ሳአሪ ኢየሱስቭ ተሁኖሙ ኢሪኢ ገፓ። ³⁰ v 30 ተሁኖም ሸረድ ኢቨርአይ ቸና ሸረድቭ ነሳ ኧጎይታ ሽኩር በቫረ ቀጥወ ፍረነቨ አቨኖም። ³¹ ሁኖም ህምጋ ኤርሁኖዋ ተከፈደታ ኢየሱስ ኧኸረኸ ኋርሙ፤ኢየሱስቭ ህመጋ ኧወረኤኤዲ ቦኮሪ። ³² ሁኖም ተሁኖም፤«በቨያ ቲያዝራይከንረዳቭ መጣፍ ይቭካ አአር ቲዪኢደንረዳ ሂንንራ እእሳደኸ ኢረድድ ባንደ»ተቬቬርሙ። ³³ ህም ግዚየ ሁኖም ተረሾሙኢየሩሳሌም ከተማ ተዠፖርሙ ዎርሙ፤በህሜ አስረአቸ እኢየሱስሜ ተማሪቭ ተሁኖም እማቲ ኧረፖሩዋ ሰቭ በደሞጁዋይ ነኮዉዮም። ³⁴ ሁኖም «ጌታ ኢየሱስ ዉረተውድ ተረሳ፤ስምኦን ቤኤርኋ አሸን»ቧርሙ ሁኖም ተሁኖም ኢትዝራኩዋ ባንደ። ³⁵ ዉርኤቸ ተማሪኋ በቨያ ኧኸረ ዘንጋዪ ዳቦኧቭ ቲፍረንቭካ ኢኢየሱስ ኧተኸ ኧኋሪኸ ኤኤጂዮም። ³⁶ ኢኢየሱሲ ተማሪ ኧሁዳ አአር ቲጮጅታ ኢየሱስ ገግኋ ማአ በግትሁኖዋ ተሸከቨታንዳ «ወገሬት አሁዋ ኧህር ባረኖም። ³⁷ ሁኖዋ ጭን መንፈስ አሸዉዋ አአር ኧቨሰረኖዋይ ኧኸሬ በድሪእት አራአደኖም። ³⁸ ኢየሱስቭ «ኧቭር ኢደርእሁዋ?በሂናሁዋ ኧቭር ትጥራጠሩዋ? ³⁹ ኧጅመኛዪ ኧግርመኛ ኦዡዋ ፤እኩ ኑጉጅምቭ ኦዥኝ ፤መንፈስ ኢያኸ ዋኸ አእቭቪ በሰርቭ ኤነነዳ ። ⁴⁰ እመኸቭ ባረኖምታ ኧጅሞኋዪ ኧግርሞኋ አቴሸኖም ፤ ⁴¹ ሁኖምቭ ቡሼኧኸ ኧትዉራነኡዋይ መዪ ወግቭ ኧኸረዎዋይ ኧኸሬ ያአዉሩዋይ አኸረኖታ፤እም ቲዩሪ ኢየሱስ በዋ ኤኤዲ ኢዎርኤዳ አአር አነነሁዋ? ባረኖም ። ⁴² ዉጢካ አቆቆሺ አሳ አዊ ፤ ⁴³ ኢእየሱስቭ ቴኤፐረኖምታ ቢኢፍትሁኖዋይ በንአ። ⁴⁴ ሁድቭ «ዋዳ እንእ ታሁዋ ታነሁ በሙሴ ቂጫቪ በነቢ በመዝሙርቭ መጣፍ ኢያ አአር ኧጣᎉ ሁዳ እንእ ኧዉረ ኢኸርኬ ባሁ ኤኤድኩዋ ቃርን »ባረኖም። ⁴⁵ ተሃአ ቀጥወ ሁኖም መጣፍ ይቭካ አአር ኢቬስሩዋኸ ኧቀርብ ኤርሁኖዋ ተከፈደ፤ ⁴⁶ እመኸቭ ባረኖም«ክርስቶስ መከራ ኢቴኤፐርኬ በሶኦስተኘ ቀረሞኋ ተዉድ ኢትረሳኬ »ቧርሙ ጣᎉ። ⁴⁷ «ተኢየሩሳሌም ከተማ ቅርሽተዊታ ሰቭ እንእ በሁዳ ሹቭ ንስሃ ኢጎኦዋመዪ ሁኖም ተቫጢርሁኖዋ ኢቬጥሩዋይ ኢኢጂዮቴ »ቧርሙ ጣᎉ። ⁴⁸ ኧዋ ዘንጋ እንእ አሁዋ ምስክርንሁዋ ። ⁴⁹ ኢያብ አባኛ ጎይታ <ኢቭሁዋቴ>ኧቫረናሁዋ ተስፋ ኢያ ኧኬሽነሁዋቴ ፤አሁዋ ጭን ደረግ ተጎይታይ ቲቫአነሁዋ ስን ብእየሩሳሌም ከተማ ኦኩሹዋ»ባረኖም። ⁵⁰ ተህም ቀጥወ ኢየሱስ ተማሪኋ ተእየሩሳሌም አዋአኖምታ ቢታኒያ ቃያ ወሰደኖም እኧጅሞኋ ዝራካ ዳረኖም። ⁵¹ ቲደርኮምቭ ታነ ተሁኖዋ ተቬተረ ኧሳቫይኒየ ዋአ ። ⁵² ሁኖም ሶጎጅነታ ኖኦራ አአር ቲሽርኮዋ ኢየሩሳሌም ከተማ ተዠፖርሙ። ⁵³ በቀረ ቀረ በቤተ መቅደስ ሆርሙታ ጎይታ ያትሼኩሩዋ ባንደ።