¹ በህም ግዚየ ፋሲካ ዩሪዳ ኧቂጣ ሙርአ ዬዉኮዳ ቀረ ማአ ቴኤነቨ ባንደ ። ² ኧካህን ሁኖዋይ አላቃዪ ኧሙሴ ቂጫ አስተማሪም ኧሰቭ ሁኖዋ ፈኘዉዮይ ኧኸሬ ኢኢየሱ በዱኡራቸ ጥጭተዉዋ ዮኦትርኮዳ ብላት ኢሱኡዋ ባንደ። ³ በህም ግዚየ ታአስረዉርኤቸ ኪሸረኘኋ ባአት ሁዳ ባአስቆርቱ ይሁዳ ሴጣን ገፓወ ። ⁴ ይሁዳቭ ወረታ ኢኢየሱስ ኧተኸ ኤኤተ ያአይፕርኮዋኸ ተካህን ሁኖዋይ አላቃዪ ተቤተ መቅደስቭ አላፊ ሁኖዋ እማቲ አትቫታ ። ⁵ በዘንጋኋ ሳረኖምታ ኧይሁዳ ዋጋ ዪዊ ተስማምኦሙ ፤ ⁶ ሁድቭ በዘንጋዃ ተስምአምአታ ሰቭ ታይሂርቭ ኢኢየሱስ ኤኤተያአይፕርኲ ወሄ ግዚየ ኢሲእ ባንደ ። ⁷ ተህም ቀጥወ ኧፋሲጋ ጣይ ያጭኮዳዪ ኧቂጣቭ ሙርአ ዬዉኮዳ ቀረ ሰንአ። ⁸ ኢየሱስ ኧጴጥሮስቪ ኧዮሐስ ሆርሙታኧፋሲጋ ኧርቫድ ንቨርአኔ ኦንኧንረ ባረታ ኬሾኖም። ⁹ ሁኖም «ኧፋሲጋ ኧርቫድ በኧቲ ነንአኔነከ? ቧርሙ ተሳአሪ ¹⁰ የሱስቭ «ከተማ ትትጎኦታ በትንኪየ እሃ ኧፌነገ ምስ ትረሁዉቴ ኢጋአወዳቭ ቢድ ተሆተሪ ሆሩዋ ፤ ¹¹ ኧቪድቭ አቭ ሁዳ «አስተማሪ ሁዳ ተተማሪመኛ እማቲ ኧፋሲጋ ኧርቫድ ኧቭርአዌ ኧቫዘራ ቢ ኧትኤኤድኔን» ይቭኸ ቧሪ ። ¹² ሁድቭ በፎቅ ፎር አሸሺ በተድ ክፍል ያተሽሁዋሴ ብበህም ኤኤዲኧቫድንራ ጎኩርንረ»ባረኖም። ¹³ ዉርኤቸ ተማሪኋ ኤደኖመኸ ቢድ ሁዳ ኖኮዉምታ ኧፋሲጋቭ ኧርቫድ ሁዳ ኤፖዉም። ¹⁴ ኧርቫቭ ኢዎርእኮዳ ግግዚየ ትሰርአካ ኢየሱስ ተተማሪሞኋ እማትሜ ኢቨርአይ ቸና ። ¹⁵ ኢየሱስቭ ቲቫአቪዳ መከራ ኢፍቲ ታሁዋ እማትሜ ዋ ኧፋሲጋ ኧርቫድ ኧቨርአይ ኑኡ አአር ተመኛት ባነኒደ። ¹⁶ እም ኧፋሲጋ ሸረድ ኧዉረ ኧኸረ ኧከሲ ዘንጋ [ሚስጢር]በጎይታ መንግስት ቲቲሄር ስን አትተዋ ቀጥወ ኧፋሲጋ ኧርቫድ አንቨርአካ »ባረኖም። ¹⁷ ተህም ቀትወ ኢየሱስ ጥዋ ነሳታ ኧጎይታ ሽኩር ባረታ«እኩ ዋዳ አሁዋ እንእማሁዋ ተጎጁም ስጠዊ፤ ¹⁸ ኧዉረመኛ እቭሁዋ ኧጎይታ መንግስት ቲቫአ ስን ተዋ ቀጥወ ተዋ ወይንአት ስርም አንሰጭካ ብባረኖም ። ¹⁹ ሃአቨቭ ዳቦኧ ነሳ ኧጎይታ ሽኩር ባረታ ፈነቨ ኧተማሪኋ «የሁዋ እመዳ አሁዋ ኢሁዋታ በሰርነኛ እምዳኢያ ትዘጉጅኮዳ አአር ኦንኧይ »ባረኖም። ²⁰ ኧርባድቭ ተዎንኤ ቀጥወ ኢየሱስ ጥዋ ነሳታ አቨኖም፤«በዋ ጥዋ አነዳ ወይን አሁዋ ቲቭር ኢትሁእ በደቭኛ ኢቴፕካ ወያ ጉርዳን» ፤ ²¹ ኸርቭ ኤኤተ ያአይፒሬዳ ምስ ዋአካ ቲያቭ እምቲ ሸረድ ኢቨርአ፤ ²² ኧሰቭ ትከ ጎይታ በተረታ ኧቫረንመኸ ኢዎድኬ ቢኸርቭ ጭን ኧሰቭ ትከ ኤኤተ ያአይፒርካ ኧዋ ምስ ግርድኋ »ባረኖም። ²³ ሁኖም ዋ ዘንጋ ኢንአካ ቢና ግት ማንተን? ቧርሙ ሁኖሙ ተሁኖም ኧትሳአርት ቆነሺ፤ ²⁴ ኢኢየሱሲ ተማሪ ትእንመንራ ኢረእካ ማንተን ? «ኢያ ኧርእ ኢያ ኧርእ»ተቬቬርሙ። ²⁵ ኢየሱስ ጭን ኧዋ አለም ኑጉስ በሰቭ ፎር ዳኝነድ አነኖዋ ሰቭ ያቲኢትርታ ሁኖዋ ወሄ አአር ኢንኦዋ ዩሪዮዋ ፤ ²⁶ አሁዋ ጭን ዋኸ አትሁሩዋ ቢኸርቭ ታሁዋ ኑእ ኧኸረ እእሰኸ ኧህር አላቃቭ ኧኸረ ሁዳ እእንቭዐኋይ አገልጋይ ኧህር ። ²⁷ ቸና ሸረድ ቲቨርአካዪ ሸርድቭ ቲያቨርአካ ሁዳ ኧተዳ ኑእን?ቸናታ ኢቨርአካ ሁዳ አይረእካ ዌ ? ኢያ ጭን በግታሁዋ አአገልጋይናሁዋኸ ። ²⁸ አሁዋ በመከራኛ ግዚየ እንእ ቲያ እማቲ ተቁሟሞርሁም ተሸከሁም። ²⁹ በህም ኧቫአ አባኛ ጎይታ ኢያ ንጉስ ኤፐታኧሾሜመኸ ኢያቭ አሁዋ ህመኸ ኧሾሙሁዋቴ ። ³⁰ በመንግስትኛ ቲያቭ እማቲ ቸየተሁዋታ ትዎርኧቴ ትሰጩዋቴይቭ በዙፋንቭ ቸየተሁዋታ ባአስረዉርኤቸ እእስራኤል ጥቭ ትፎርጁዋቴ »ባረኖም። ³¹ ኢየሱስቭ ዠፐረታ«ስምኦን ስምኦን ቻዋጅ ስኔኧ ተጋቫኋ ኢቫይትረኸ እመኸቭ ሴጣን አሁም አዝሪተታ ኢፈትንሁዋይ ሳአረቭ ። ³² ኢያ ጭን እምነታኸ ባትችእኲ ሳአርነከ ፤አከ ተዉዜገቭተኸታ ኢያይ ትትዠፐርካ ኧኧሰማታኸ አቁሟሙርኮዋ »ባረን። ³³ ስምኦንቭ «ግጎይታኞ ታኸ እማትሜ ኧታአከድሜ በኸረ ኧዎንድሜ አንጥሁወ »ባረን። ³⁴ ኢየሱስቭ «ጴጥሮሶ አካ ኦኳ ኩታራ ቲሮእ ስን <አንሂርኩዳ ባይተኸ >ሶኦስተጋ ትኸዳይዴ ባረን። ³⁵ ኢየሱስ«አሁዋ ኧፈራክ ሞነ ቀረጢትቭ ጫማቭ አይቫር በኬሸኩዋይ ኧቀፐረቨሁዋ አአር ባንዴ ? »ባረኖም።ሁኖም አታአር አንቀፐረቨንረዳ ቧርሙ ዠፖርነ ። ³⁶ ኢየሱስቭ «ዋአካ ጭን አፈራክ ሞነቭ ኸረ ቀረጢትቭ አነንዳ ሰቭ ኧጥጥ ሴ ኤነነሁዳ ሁጅርኋ አሴየታ ሴፍ ኧሰየ ፤ ³⁷ ኢያ እቭሁዋ ቲኢፋደኘ እማቲ ተቬዘረ ቧርሙ በመታፍ ኧጣᎉ ቃር ቢያ ኧሁርት አኖወ ፤ኢያ አአር ኧጣᎉ ሁዳ እንእን ኢኸርወዳ ጪግቭ ግዚየኋ ሰንአ ። ³⁸ ተማሪሞኋ «ጎይታንሮ እኩ ዉርኤት ሴፍ ዌኤዲ አኖዉዋ»ቧሪ። ኢየሱስቭ «ኢቃሴ»ባረኖም። ³⁹ ኢየሱስ እእም ኢፍቲመኸ ደብረ ዘይት ቆቶ ዋአ ፤ተማሪሞኋ እማትሜ ተሄተሪ ዎኦሙ። ⁴⁰ ኤሞኋይ በሰንአ ቀጥወ ኢየሱስ ኧተማሪኋ« መከራ ባይሰርአቨሁዋይ ጠሎት ኧንኦዋ ባረኖም። ⁴¹ ኢሱቭ ተተማሪኋ እቭር ኤረኮሙ ያስሰርኦኮዳ አአህር አራኧታ በህመኸ በጉርቨድኋ ስጁድ ወካታ ጠሎት ኢአ ባንደ ። ⁴² እመኸቭ ባረ ኢጠልይ ባንደ « አቦኞ ፍቃዳኸ ቢኸር ዋ ኧመከራ ጥዋ ኧፍካኒቢኸርቭ ባኸ ፍቃድ ኧህር ባኸሬ ቢያ ፍቃድ አይህር »ባረ። ⁴³ ህመጋ መላአይካ ተሳቫዪ ማአታ ኢኢየሱስ ኧቁሟሞረን፤ ⁴⁴ ኢየሱስ ጨነቀንታ ቡሼኧኸ ተሎት ኢንአ ባንደ፤ዉዛትሞኋ ኢትሁእካ ደቨኸባአፈር ተክተክ ኢቭር ባንደ ። ⁴⁵ ሁድቭ ተተሎት ተረሳታ ኧተማሪኋይ ማአ ሁኖም ቀጪት ጠበጠኖምታ በሬኧዉዋይ አሸኖምታ ፤ ⁴⁶ «ኧቭር ትሩኡዋ ? በስቃያ ባትጎኦዋይ ተሾሙታ ኧጎይታ ሳአሪ »ባረኖም። ⁴⁷ ኢየሱስ እመኸ ቲዝሬክቭ ታነ ኖኦራ ሰቭ ሞኦሙ ፤ተአስረ ውርኤቸ ተማሪኋ አት ሁዳ ይሁዳ ኧሰቭ ሁኖዋ ያቲሽኮዋይ ያር ባንደ፤ ሁድቭ ኢኢየሱስ ኢሰኧቭኲ ቴኤነቨ ፤ ⁴⁸ ኢየሱስቭ ኧይሁዳ «ይሁዳ በሳአዉት ኧሰቭ ትከ አዋአኸ ታአይፕሪ ? ባረን። ⁴⁹ v 49 ቲኢየሱስቭ እማትሜ ኧረፖሩዋ ተማሪ ኢከርካ አአር ባሸዉዋ ቀጥወ «ጎይታንሮ በሴፍ ንጋነየዋ ?ቧሪ ። ⁵⁰ ተተማሪኋ አት ሁዳ ኧካህን አላቃ ሁዳይ አገልጋይ ኧቀነአጋድ እንዝርኋ በሴፍ አንጠን። ⁵¹ ኢየሱስ ጭን «ተኡዋ ዋኸ ኦንኧት ወሄ አአር አኸረንዳ»ባረታ አንጪ አአገልጋይ ሁዳይ እንዝርኋ ሙሻሸታ አተነፈን። ⁵² ኢኢየሱስ ኢጠጪ ኧሁዳይ ኧዎኦዋ ኧካህን ሁኖዋይ አላቃዪ ኧቪደ መቅደስቭ አላፊ ባሪቅቭ ሁኖዋ«ኢያ ኧሽፍጣኸ ትጠቹዋይ ሴፍ ቪጉምአቭ ጠበጥሁምታ ማአሁሚ ? ⁵³ በቤተ መቅደስ እንእቀረታሁም ታነሁ በህም ግዚየ አንጠበጥሁኝዳ ዋአካ ጭን ዋ ግዝየ አሁምቪ በጠነቫ ዬካ ኧሴጣን ግዚየን »ባረኖም። ⁵⁴ ተሃአ ቀጥወ ሰቭ ሁኖዋ ኢኢየሱስ ጠቦጩሙታ ወሰጂ ፤ኧካህን አላቃይ ቢድ አጎፖዪ ፤ጴጥሮስቭ በሮኢ ኸረታ ኢትሄተርኩ ባንደ። ⁵⁵ ሰቭ ሁኖዋ በወረጀ ኢዎእኮዋኸ እሳድ ᎂከርሙታ እማትሜ ቸኖሙ ባንደ ፤ጴትሮስቭ ኢዎእኲ በሰቭ ሁኖዋ ግት ቸና ባንደ ። ⁵⁶ ጴጥሮስ ብእሳድ ሚዬ ቸናታ ቲዎእኩ ታነ አት ኧቪድ ሜነኘ መኬኧ ባረች አሸቸንታ ፤ዋምስ ቲኢየሱስ እማትሜ ባነደ ባረቸን። ⁵⁷ ሁድቭ «ምሽቶ ቲዪንዳ ምስ ኢያ ስርም አሂርኩዳ »ባረታ ኸታና ። ⁵⁸ ትእሲየ ግዚየ ቀጥወ ኤኛ ምስ አሸንታ «አኸቭ ቲኢየሱስ እማትሜ ባነኸደ»ባረን፤ጴጥሮስቭ ዠፐረታ «ምሶ ኢያ አንሂርኩዳ »ባረን። ⁵⁹ አት ሳአት አአህር ቤኤኬሺጋ ኤኛ ምስ «ሁድቭ ኧገሊላ ገኘ ሰቭን ኢያ ኧዉረምነኛ ዋ ምስ ቲኢየሱስ እማትሜ ባነደ » ባረታ አጬገታ ኤኤደ። ⁶⁰ ጴጥሮስ ጭን «ምሶ ትቭኩዳ ምስ ሁዳ አንሂርኩዳ »ባረን። ህመኸቭ ቲቭር ኩታራ ኖኧ። ⁶¹ ብህም ግዚየ ጎይታ ኢየሱስ ኧጴጥሮስ ተዝቫፐረታ አሸን ፤ጴጥሮስቭ «አካ ኧዳር ኩታራ ታይሮእ ሶኦስት ግዚየ ትኸዳይዴ»> ኧቫረን ኧጌታ ኢየሱሲ ቃር ተዘከደን ። ⁶² ጴጥሮስብ ወረጀ ዋአታ ቡሼኧከ ተቨጠተታ ቤከ ። ⁶³ በህም ግዚየ ኢኢየሱስ ኧጠቦጪ ሰቭ ያᎊዥኰ ፥ኢደርጒቭ ባንደ ። ⁶⁴ ኤርኋ አህሮዊታ ቲደርጒ «ኧደንድገናኸ ማንተን?እንዴ ነቢ በከርኸ ሃር »ቧርሙታ ኢሳአሪ ባንደ። ⁶⁵ ኤኛቭ ኖኦራ አአር በዘጉት ኢቀሩዊ ባንደ ። ⁶⁶ አፈርቭ ጋእ ቲቭካ ኧገኘ ባሪቅ ኧካህናት አላቃዪ ኧቂጫ አስተማሪም ተደሞጁምታ ኢኢየሱስ ኢፎርጅኮይ አይሁድ ኢደሞጅኮዳ ቢዲ ወሰጂ። ⁶⁷ ሁኖም «ሙሴ ዩዉኮዳ አኸትንሄ?በኸርኸ አዉደንረ» ቧሪ።ሁዳ ጭን «ብኒኢድሁም አታአዉርኝዳ»ባረኖም። ⁶⁸ «ብንሳአርሁም አትዠፑርኒዳ ። ⁶⁹ ቢኸርቭ ጭን ተዋ ቀጥወ ኧሰብ ትከ እንእ አአር ቢኸርነዳ ጎይታ ቀነ ኢቸናኬ » ⁷⁰ እንእመሁኖዋ እማትሜ «አካ አኸ ኧጎይታ ትከንሄ ? » ቧሪ። ⁷¹ ሁኖም እኩ ታአፍኋ ኧዋአን ቃር ኢና ገግመንራ ሰምአነዪ ተዋቴ ሄቶ ያቲሲኧንረዳ ሁዳ ኧቭርአፈድን »ቧርሙ።