¹ ኢየሱስ መመርኋ ነሳታ ቢያዥደንገኘ ሰቭ በቬተ ቅደስ መባ ቢሱዎሱቩኮዳ ሳጥን መባሁኖዋ ቲሆርኧታ አሸ ። ² አት ምስ ኧዎንደና አት ምሽትቭ ዉርኤት ሜዞ በሁዳ ከስ ትትኸርአካ አሸ ። ³ እመኸቭ ባረ ኧዉረመኛ እቭሁዋ «ዋ ምስ ኧዎንደና ዚጋ ምሽት ትእንቨሁኖዋ ኢረእካ አአር አቨች፤ ⁴ ዋ ሰቭ እንእ ተትርፍሁኖዋ ቁረጮሙ አቩም ሂዳ ጭን በዚጋ ደረግሻ አነናዳ ትረቭርዎዳ ሁዳ እንእ አቨች»ባረኖም ። ⁵ ተተማሪሞዃ አታትሁዋ «ዋ ቤተ መቅደስ ኧተኸ ያዙዎኝ በወሄ እቭርቭ ኧጎይታቭ ቧርሙ ባዎኦይ ጌጥ አረሸዊ ቧርሙ ቲዝሮኩታ ኢየሱስ ዋኸ ባረ ። ⁶ ዋ ታዢዳ እቭር እንእ ብእቭ ፎር አይቸናወ ግዚየ ኢቫአኬ እቭር እንእ አት ቀረ ኢትዳስኬ »ባረ። ⁷ ሁኖም «አስተማሪዮ አካ ዋ እንእ ኢኸርካ ሁዳ ምረጋን ? እኩ ዘንጋሁ ኢኸሪ ሜኤተታ ቲሰርአካሁ መርኸኋ ምርአፈድን ? ቧርሙ ተሳአሪ። ⁸ ኢየሱስቭ «እሳደናሁዋ ተጦፑዋ ኖኦራመሁኖዋ ዘቨርኋ ሰንአ ባይተዉ ቢያ ሹቩ{ኢያ ክርስቶስንሁ} ባይተዉዋ ኢዎኦቴ ኧሁኖም ተኸተይተሁዋ አትሆሩዋ ። ⁹ አአርቭ ኧቨራክስቭ አአር ትትሶዉኦታ እንደነኧናሁዋ ዋዳ ብደይተ ኧሁርትኋ አይዎኧር ዘንጋን ፤ዘንጋ ጭን ያርእወዳ ህም ተህም አይኸርካ ባረ። ¹⁰ ሃአቨ ኢየሱስ « ሰቭ በሰቭ ፎር መንግስት በመንግስት ፎር ተሸተ ኢታካኬ ፤ ¹¹ ቤኤድ ኤኤዲ አፈር ኢቅረቅርኬ፥ ጋጀቭ ባአሸቭ ያትቬይአስኬ ፥ያትፈኝካ ዘንጋቭ ኑእ ኑእ መርኸትቭ ተሳቫዪ ያዢዴ ። ¹² ዘንጋኋ ጭን ዋዳ እንእ ተሁርትኋ ኢፍቲ ሰቭ እንእ ኢትረሳቨሁዋቴ ፥ያትሳትጅኩዋቴ ፥አይሁድቭ ቢደሞጅኮዳ ቢድቭ ኧፍርድ ያቲኢኑቩኩዋቴ፥ ቦኦሁኔም ያቲኢኪጅኩዋቴ በሹዉኛ ኧቫአ ኧዳኘቭ ኧንጕስቭ ኢፍቲ ይቲኢኑዉኩዋቴ ። ¹³ እ ግዚየ ኢያ አተርፈኸ ቲኢጅኮዳ ወሄ መያ ኢክፍትነሁዋሴ ። ¹⁴ ብእም ኧቫአ ቢያቲኢንቭኮኩዋታ ክስስ ምር ኧዠፕርኬ ባይተሁዋ ብደይተሁዋ አትጠረቁዋ ። ¹⁵ ማንኝእ ጠላታሁዋ መልስ ኢኩዋሜኸረ ኢዝሮኩዋይ አይኸኖኸ ሃይተሁዋ መልስ ቲቩዮኸ ሃሪነድ ኢያ አሁዋሴ። ¹⁶ አቦዳሁዋ ዶባሁዋ ኧሰማሁዋ አቭ ታአዶሁዋ ዳር ኤኤቶ ያአይፑርኩዋቴ ታሁም አታታሁዋ ዮኦትርኩዋቴ ። ¹⁷ ኢያቭ ሹቭ ትቱዉሩዋ ሰቭ እንእ ኢጠራሁዋቴ። ¹⁸ ዘንጋኋ ጭን ተጉንኧራሁዋ ድገር እማት ሁዳ ዳር አየኧይካ ፤ ¹⁹ ቲቭኧተዉ በትሶጎትማሁዋ ነብሳሁዋ ታተርፉዋ »ባረኖም። ²⁰ ሃአቨ ኢየሱስ ዋኸ ባረኖም«እየሩሳሌም ከተማ በጠላት ኧጅ በትኸፐቨቺ ትታዥታ በሃአ ግዚየ ኧሃአ ከተማ ኡኡፎትኋ ኧሰንአኸ ኋሩዋ ። ²¹ በሃአ ግዚየ በይሁዳ አነዉታ ሰቭ ኧሱሁሙ ቆቶ ኦኦዋ በከተማኋ ግት አኖዉታ ሰቭ ተሃአይ ኦኦዋ በገጠርሞኋ አኖዉታ ሰቭ ኧከተማኋይ አይጉዉኦዋ ። ²² ኧዋ ኢፋድ አአር እንእኧታᎉ ትንቢት ኢኸሪ ሃአ ግዚየ ኧቩጥጥ አጅግቭ ኧቅጣትቭ ግዚየን ። ²³ በሃአ ግዚየ ኧዉርኤት አርዋዪ ያጠዋታቭ እሽቻ ግርድህና ባአፈር ፎር ኖኦራ ጅጓረ ኢቫአኬ ብእም ሰቭ ኧጎይታ ማአት ኢዎትኬ ፤ ²⁴ ተሁኖም ኖኦራሁኖዋ በሴፍ ዮኦትሪዮቴ ፤ኤኛመሁኖዋ ማኒህተዉ ተገኘ ገኘ ኢዎስጂዮቴ ፤ አረማዊ ሰቭ እንእ ኢቸኖኮዳ ግዚየሁኖዋ ቲያርእ ዳር ኢየሩሳሌም ከተማ አረማዊ ሰቭ ኢትራኮእኮዴ ። ²⁵ ተህም ቀጥወ ኢየሱስ«ቡኡዋየብ በበኘቭ በሆሆምወግ ኧሆሩዋ መርኸት ያዢዴ ባአፈርቭ ፎር ሰቭ እንእ ኧቫር እሃቭ ቲያዥታ አደንገቭ እሃቭ ህያድ ቲሰቩኦታ ምር ማአ ባይተቩ ፍረይተዉ ኢትጨነቁቴ። ²⁶ ኧሳቫይ ፍትረት እንእ ቃሽቃሽ ይቩርቴ ህም ግዚየ ሰቭ እንእ በፍረዉት በዋ አፈር ምር ኢቫአዪ ኢህርሴ በዋርት ያታንኡቴ ። ²⁷ በሃአ ግዚየ ኧሰቭ ትከ በሩእ ክብርቭ ደረግ በዳቨራ ቲቫአካ ያዢዴ ። ²⁸ አሁም ዋ ዘንጋ ኧሁርት ቲቀርስካ ትተርፉኮዳ ግዚየ ማአ ኧሰንአይ ኧኸሬ ቱዉኦሙ ተሰጎዉም መመራሁዋ ንሾዉም ፎረኒየኦዡዋ ባረ ። ²⁹ ሃአቨ ኢየሱስ ዋ ሟሟካ ኤኤደኖም«ሸቭራዪ ኤኛቭ ኤኧ መኬኧ ቧርሙ ኦዡዋ ። ³⁰ አጤሁኖዋ ባፍረፈሬ ትታዥታ ሃአ ግዚየ አቫር ኧቫአኸ ገግማሁዋ ቲሂሩዋ ። ³¹ እመኸቭ ዋ ዘንጋ እንእ ቲኸርካ ትታዥታ እእግዜር መንግስት ማአ ኧሰንአኸ ኋሩዋ ። ³² ኢያቭ ኧዉረመኛ እቭሁዋ ዋዳ እንእ ቲኸር ስን ኧዋ ዘቨር ሰቭ ኢረቭርኬ። ³³ አፈር ተቫይ ዮኦርቴ ቃርኛ ጭን ስርም አየኧይካ። ³⁴ አካ ሃአ ቀረ ኧጠነቃር ኢጠጥካ ሽካኸ አይቫአቨሁዋኸ ተጠፑዋ በሸረድቢ ቢሰጪዳቭ አአር ኖኦራቭ አአር በስሆርት ሂናሁዋ አይትዛገግ ፤ውዋ አለም ንቭረድ አአር ክቻ አይጥጥሁዋ ። ³⁵ ሃአ ቀረ ባአፈር ፎር ባኖዉታ ሰቭ እንእ ኧጠነቃር ኢቫአዎቴ ። ³⁶ አካ ተዋ ቲቫአካ ማአት እንእ ትተርፉዋይ ኧሂናሁዋኸ በሰቭ ትከ ኢፍቲ ትትሸኮዉዋይ እንእ ግዚየ ጠሎት ቦንኧት ተቁሟሞርሙ ኧሮዋ »ባረ። ³⁷ ኢየሱስቭ ዋአና ዋአና በቤተ መቅደስ ያትመርታ ኧዳር ኧዳር ጭን ደብረ ዘይት ዩዉሪዳ ቆቶዋአታ ኢሪእ ባንደ ። ³⁸ ሰቭቭ እንእ ኧሁዳይ ኢሶዉኦዪ ጋአት ተረሾሙ ቤተምቅደስ ያሩዋ ባንደ።