¹ አት ቀረ ኢየሱስ በቤተ መቅደስ ኣሰብ ያትመርቭ ወንጌልቭ ኢኢድ ባንደ ፤ህም ግዚየ ኣካህን ሁኖዋይ አላቃዪ ኣሙሴም ቂጫ አስተማሪም ፥ኧገኘቭ ባሪቅ ኧሁዳይ ሞኦም። ² ሁኖም ኢኢየሱስ ዋ ዘንጋ እንእ በቭር ዳኝነድ ቲንአኸ እንዴ አዉደንረ ዌ ኧዋኸ አአር ኧንአባረ ኧሾመናኸ ማንተን ? ቧርሙ ተሳአሪ ። ³ ኢየሱስ ዠፐረታ ኢያቭ አት ዘንጋ ኧትሳአርሁዋቴ ? አሁም አዉጅኝ ፤ ⁴ ዮሐንስ ያጠምቅ ኧረፐረ በጎይታ ፍቃድ ባንደዪ ዌ በሰቭ ፍቃድ ? ባረኖም። ⁵ ሁኖም ዋኸ ቧርሙ ሁኖም ተሁኖም አትዋቾሙ «በጎይታ ፍቃድን በቫርኔ ባቴ ኧቭር አናአመርዂዳ ይቭረንረዴ ። ⁶ በሰቭ ፍቃድን በቫርኔ ሰቭ እንእ ዮሐንስ ነቢ ኧኸረኸ ያአቭሪ ኧኸሬ ብእቭር ኢዎጎንረዴ »ባርሙ ። ⁷ ሁኖም ዠፖርሙታ « በቫን ፍቃድ ኧኸረኸ አንሂርነዳ »ቧሪ ። ⁸ ኢየሱስቭ ዠፐረታ «አካ ኢያቭ በቫን ፍቃድቪ በቫን ደረግቭ ዋዳ እንእ ኢንአኸ አኒኢድሁዋታ »ባረኖም ። ⁹ ተህም ቀጥወ ኢየሱስ ዋኸ ባረ ኧሰቭ ሟሟካ አአዉጅት ቀነሰ «አት ምስ ኧወይን ኤኧ ኧፐረታ ኧቻዋጅ ሰቭ አክራኘንታ ኤኛ ገኘ ቸኧታ ወረ በህሜ ኖኦራ ግዚየ ቸና ። ¹⁰ በጎርኋ ተኧፐረን ዌይንኋ ቡስር ኢዊ አአት አገልጋይኋኧቻዋጅ ሁኖዋይ ኬሸን ቻዋጅ ሁኖዋ ጭን ኧሃአ አገልጋይ ደነጉም ጠረረ ኧጅኋ ጌኬጂ ፤ ¹¹ ዠፐረ ቡችር አገልጋይኋ ኬሸ ሁኖም ኧሃአ አገልጋይ ደነጒታ አቅቨጮሙጠረረ ኧጅኋ ጌኬጂ ። ¹² ዠፐረ ኧሶኦስተኘ አገልጋይኋ ኬሸ ቻዋጅቭ ሁኖዋ አትቭ እእመዳ ደነጉም መዘኘ ኤፖሙ ሰቻ አጋድ አዎኦሙ ቃሸዊ ። ¹³ ተህም ቀጥወ እም ኧወይን ኤኧ ኧኸረን ምስ « ምር ነንአ ? ዋአካ ኧረድኩዳ ኧችኛ ኧሁኖዋይ ንከሽኩ ኧሁድሽ አመኛት ዮንኧነሴ » ባረ ¹⁴ ቢኸርቭ ቻዋጅሁኖዋ ጭን ኧች ሁዳ ቲቫአካ አሸዊታ ሁኖም ተሁኖም፤«ዋዳ ወራሽ ሁዳን የሁዋ ንእትርኔ ደረድኋ ኢና አአር ኢህርሴ »ተቬቬርሙ ። ¹⁵ በህም ኧቫአ ኧኧችሁዳ ወይን ቶኦፖርኰ ኤኤዲ ሰቻ አጋድ አዎኦሙ ኦተሪ ።ባቴ ኧወይን ኤኤዲ ኧከረን ምስ ኧዋ ቻዋጅ ማሃ ኢንአኮታ አአር ኢቨስርሁዋ ? » ¹⁶ ገግኋ ማአታ ኧዋ ኧቻዋጅ ሁኖዋ የኧትርኮዋ ፤ኧኧፐረንቭ ወይን ኤኤኛ ቻዋጅ ኢቭኮዋ ቧሪ፤ሁኖዋ ዋዳ ቢሶዉኦዋ ኧውዋኸ አአር ባይኸሪ ሰላም ቧሪ። ¹⁷ ኢየሱስ ጭን ዋ ሟማካ ኢኢድኮታ ሰቭ አሸኖምታ «አካ ግምብ ያረሽታ ሰቭ ኧቆጪ እቭር ኧቪድኋ ዋና ኸረ » ቧርሙ ኧጣᎉ ቃር ምር ኢቨስርሁዋ? ¹⁸ ብእም እቭር ፎር ኧወተኧእንእ ኢትሰፐርእም እቭር በፎርኋ ኧወተኧወ እንእ ኢትፌእ »ባረኖም። ¹⁹ ኧሙሴ ቂጫ አስተማሪሚ ኧካህን አላቃ ዋ ኢየሱስ ኧዝሬከን ሟሟካ ፤ሁኖዋ ኢረግደኸ ገፓኖምታህም ግዚየ ኢኢየሱስ ኢጠጪ ሴኤዉም፤ባንደ ዘንጋኋ ጭን ሰቭ ፈኘዉምታ ቸኧዊ። ²⁰ በህም ኧቫአ ኢየሱስ ኢጠጪ ኢትመችካ ግዚየ ይኡሮዋ ባንደ ኧዳኘ ኧፍርድ ኤኤቶዉዋ ያአይፑሪዝርፍ አአር ተሁዳ ኢረሁዉዋ ኢሱኡዋ ባንደ ፤ፃዲቅ ሰቭ ሞሶርሙታ ኢየሱስ ኢየሱስ በቃርኋ ኧቫአ ያኩታቱᎉ ዘንጋ ኢረሸታ አታላይ ሰቭ ኧሁዳይ ኬሾዉም። ²¹ እም ቄቃ ሰቭ ኢኢየሱስ «አኸ ኧዉረ አአር ትቲኢድካዪ ትታስተምርካ ኧሰቭ ኢፍት ኧዝተኸ አታትቂያቀኸ ንሂርነ ፤አኸ ኧጎይታ መያ በቂጢየ ታትመር ፤ ²² ተሁርትሞኋ እንዴ አዉደንረ በቂጫንራ ኧቄሳር ጊብር ኧጎቡርት ኢትፈቀዲ ዌ አይትፈቀድካ?»ቧሪ። ²³ ኢየሱስ ጭን ሸርሁኖዋ ሃረታ ፤ ²⁴ እንዴ ፈራክ ሁዳ አቶሽኝ መርክሞልኋዪ ጥፈትሞኋ ኧቫንተን አአር ? ባረኖም።ሁኖም «እእሮማ ንጕስ ኧቄሳርን አአር» ቧሪ። ²⁵ ኢየሱስቭ «አካ ኧቄሳር አአር ኧኸረ ሁዳ ኧቄሳር አዉዋ ፤ኧጎይታ አአር ኧኸረ ሁዳ ኧጎይታ አዉዋ »ባረኖም። ²⁶ ሁኖም በሰቭ ኢፍቲ በቃርኋ ያክታትᎉ አኸረኖታ ሁዳ በቫረኖዋ ቃር ወግ ኸረ ዎምታ ቁስ ቧርሙ ። ²⁷ ኧሰዱቃ ሰቭ ኧዎንደ ሰቭ አይትረሳካ ዩዉርታ ሰቭ ባነዉተ፤ተሁኖም አታትሁኖዋ ኢኢየሱሲ ሞኦሙ ተሳአሪ። ²⁸ «አስተማሪዮ ሙሴ ዋኸ ባረ ጣፈንረ«አት ምስ ምሽት አገፓታ ትከ ታዪኢኝ ኧዎንደ በኸረ ኧሰምኋ ምሽትኋ አግቭአካታ ዘር ኧትካነ ባረ ። ²⁹ አካ ሳቭአት ኧሰማት ባነዉተ በኽር ሁዳ ምሽት አገፓታ ትከ ታዪኢኝ ሞደ ፤ ³⁰ ዋ ምት ኧዉርኤተኘ ኧሰማ ሁዳ አገፓና፤ ³¹ ኧሶኦስተኘቭ ኧሰማ አገፓና ህመኸ ሳቭአቸመሁኖዋ ባአጋ አጋ አጎፖያታ ትከ ታዪኢኙም ሞጁም ፤ ³² እንእመሁኖዋ ተዎጁዋ ቀጥወ ምሽት ሂዳ ሞደች ። ³³ ሳቭአቸ ኧሰማት ባአጋአጋ አጎፖያ አካ ሃአ ምሽት ኧዎጁዋ ሰቭ ቲትረሸታ ግዚየ ተሳቭአቸሁኖዋ ኧኧተሁኖዋ ምሽት ትኸርኬ ባሪ። ³⁴ ኢየሱስ ዠፐረታ ዋኸ ባረኖም«ኧዋአለም ሰቭ ያጎኦዋ ያዎጆዋ ፤ ³⁵ ተዉድ ተሸተዉዋታ በጎይታ ፍቃድ ኧሳቫይ ምብንግስቲ ኢጎኦታ ሰቭ አነዉዋ ሁኖዋ ፤ጭን አያጎኦታቭ አያዎጆታቭ ። ³⁶ ኧመላአይካመኸ ኧሆሩዋይ ኧኸሬ ተህም ቀጥወ ሙድ ኤኖዎታ ሁኖም ሞጁም ኧትረሾዋይ ኧኸሬ ኧጎይታ ዴንጋኖዋ ። ³⁷ v 37 ኧዎጁዋ ሰቭ ኧተሸት አአር ጭን ፤ሙሴ ኧቆዛ እሳድ አአር በዝሬከን ታሪክ ከስ ጎይታ «አአብራሃም ጎይታ እኧይሳቅ ጎይታ ፥ኧያእቆብቭ ጎይታ»ባረ ኸናን ። ³⁸ ጎይታ አያ ኧሆሩዋ ሁኖዋይ ጎይታን ባኸሬ ኧዎጁዋ ሁኖዋይ ጎይታ አኸረዳ ፤እንእቨኋ በሁዳ ኢፍቲ አያን። ³⁹ ተሙሴ ቂጫ አስተማሪ አታትሁኖዋ ዠፖርሙታ «አስተማሪዮ ወሄ አአር ባኸ ቧርሙ። ⁴⁰ ተሃአ ቀጥወ ኢኢየሱስ እማት ዘንጋ ደፈረ ኧትሳአረንሰቭ አነፐረዳ ። ⁴¹ ተሃ ቀጥወ ኢየሱስ ሰቭ እንእ «ክርስቶስ ኧተኸ ኧዳዊት ትከን ዩዉሪ ? ባረኖም ። ^{42 43} ዳዊት ገግሞኋ በመዝሙር መጣፍ<ጌታ ጌታኞ፤ ጠራኸ ኧኧግራከ ከስሪ ትንቃሽነኸ ሰን በቀነኛ ቸራ >ባረን ። ⁴⁴ አካ ባቴ ዳዊት ገግኋ ጌታ ባረ በኸናንጋ ኧተኸ መሲህ ኧሁዳይ ትከ ኢኸሪ »ኢችል ባ። ⁴⁵ ሰቭ እንእ ቲሰቭአኩ ኢየሱስ ኧተማሪኋ ዋኸ ባረኖም ። ⁴⁶ «ዴካ ሁጅር ተኸደይተዉ እመዪ ህሜ ኧዘቩርትቭ በጀፎረ ተሸቶ ኢቴኤፖሪዮይ፤አይሁድ ቢደሞጅኮዳ ቢድ ወሄ ኤኤዲ በድግስቭ ቢድ ኢኢፍቲ ያዎሮዮይ ኢሽርኮታ ተሙሴ ቂጫ አስተማሪ ተጦፑዋ ፤ኢዊዮይ ቲሽርኮታ ተዋኸ ሰቭ ተጠፑዋ ። ⁴⁷ ሰቭ ያዝኖዋኸ ተሎትሁኖዋ ያዴኩዋምስ ኧዎንደና እሽቻይ ቢድ ያትዜጉዋ ፤ሁኖም ኧቫአሰ ፍርድ ኢቴኤፖርቴ »ባረኖም ።