¹ .አት ቀረ ቀረጥ ያጭታ ባጢረተኘ ሰቭ እንእ ተደሞጁታ ኢየሱስ ኢዝሬካአር አሶአዋይ ኧኹዳይ ሞኦም ባነደ፡፡ ² .ኧፈሪሳ ገኘ ሰቭቪ ኧሙሴ ቂጫ አስተማሪ ጭን ዋዳ አሾምታ ‹‹እሽታዳ ባጢረተኘ ሰቭ ኢቴኤፐር ተኹኖም እማቲ ኤቬርአ›› ቧርም ኹኖም ተኽኖም በኧየስ እቁመጨጭተቆነሹም፡፡ ³ .ኢየሱስ ዋኸ ባሬ ሟሟካ ኤኤደኖም፤ ⁴ አት ሰብ ተቨኧር ጣይኋ አት ኹዳ ቢየኧይኩ ዠኧራ ዠኧኹኗ በኸብር ቴኤተነዋታ ኧኧኘአት ጣይ ቲረኹክ ስን ኢሲኢ አያር ሰቭ ማንተን? ⁵ ጣይኹዳ ቲረኹኩዳ ሳረንታ በመመርኋ አወና ቢድኋይ ያባአኩ፡፡ ⁶ 6.ቢድሞኋይ ተዠፐረ ኢቫአ ናማጂሞኻ ወነኸሞኻ እማቲ ኢኸራታ ኧኧኘ ጣይኛ ኧረከኹኒ ሳረዪ አኹም ቲያ እማቲ ኧሳርኹዋ ›ዩኮዋ፡፡ ⁷ ኧውረመኛ እኹዋ ኽመኸ ባጢር ቴነዎዋ ተዠኧራ ዢኧ ፃዲቅ ሰቭ ኢረእ አት ባጢረተኘ ሰቭ ንስኻ ጊቨኧተ ኧጐይታይ ቢድዠፐር በሳቫይ ኑእ መትራርእ ኧኪር፡፡ ⁸ ዠፐረታ አስር ግራም ወርቅ አነናዳ ምሽት አት ግራም ወርቅ ቢየአይካ ኩራዝ አተከሰች ቢድሻ ኧሸሸተች ትትረኹክ ስን ገኪተች አትሲካ? ⁹ ወርቅሻ በረከቨቸንጋ አቦገዳመሻይ ወነኸመሻ እማቲ ትኸራታ ‹ኧኧኜ ወርቅኛ ኧረከቭኹኒ ሳረዪ አኻም ቲያ እማቲ ኧሳርኸ ትካ ¹⁰ ኢያ ናአውትኹዋ ኽመኸ አት ባጢረተኘ ንስኻ ጊቨኧተ ኧጐይታይ ቢድ ዠፐር ኧሳቫይ መላአይካ ኢሽርኰዋ›› ባረ፡፡ ¹¹ v 11.ኻአቨታ ኢየሱስ ዋኸ ባረኖም፡፡ ‹‹አት ምስ ውርኤት ዴንጋ ባነውነዳ፤ ¹² እንስ ኧች አአባኋ ‹አቦኞ ተረቭረዳኸ ኢሰርአይዳ ሟርኛ ሻግድ አቬ ባረን፡፡ ኹድ ኧውርኤችመኹኗ ሻከደ አቨኖም፤ ¹³ ቀረ ቀጥወ እንስ ኧች አባኋ ሻከደ አቨን ንብረድ እን አስየ ዋጋኋ ጠበጠታ ኖኢ ገኘ ወረ፡፡ በኽሜ ኧጠበጠን ዋጋ እን አስየ እሳረን እሳረንኸ ኤፐ አአፋን፡፡ ¹⁴ ንብረድኋ እን በጀፐረ ቀጥወ በኻ ጋኘ ቡሼእ ጋጀ ገፓ፡፡ ኹድ ኢቨርአካአር በከረታ ተጨነቀ፡፡ ¹⁵ በኽም ኧቫአ ተኻ ገኘ ሰቭ አአት ምሲ ቢድ ወረ፤ ምስኹዳ አአቨጌር ዜማቸ ኤፐን፡፡ ¹⁶ እም ኧች ጋደንታ አቤጌር ኢወሬኤዳ አተላ ኢቨርአይ ዙገ ይርባነዳ፡፡ ቢኸር ኹድ ስን ኢኩዳ ሰቭ አነከቨዳ፡፡ ¹⁷ ኹዳ በኺኅኋ በገፓጋ ዋኸ ባረ‹‹በአባኛይ ቢድ ሸረድ ቦንኦም ኧተነፈኖዋ ሜነኘ ኖኦራኖዋአር፤ ኢያ በዋይ በጋጀ ኧዎድ›› ባረ፡፡ ¹⁸ ንተሳ አአካኛይ ንኾርታ ‹‹አባኞ ኧጐይታቭ አኸ በደልኹ ¹⁹ ቀጥወ አኸ ኧችን አይዋርኝ፤ ቢኸር ተቬነኛኸ አአት ኹዳኸ ንትቨዘር›› ንቫኹ ባረ፡፡ ²⁰ ተረሳታ አአባኋይ ወረ፤ ገና በሮኢታነ አባኋ ኧኧችኋ አሸንታ አቨጠጠን፤ ተራወ ወረታ ኤኤንፈ ሳአቨን፡፡ ²¹ ኹዳ አባኞ ኧጔይታቭ አኸቭ በደልኹ ተዋ ቀጥወ ትከ አይዋርኛ ባረን፡፡ ²² አባኋ ጭን ኧቬነኘኋ ‹ካች ቧርም ኾርምታ በቪድ ታነውታ ኹጅር ኢፈዝካ ኹዳ ኦኦም አኹድሪ፤ አጤሞኻ ሻሰራ ኧኧግሞኻ ጫማ አዊ ባረኖም፡፡ ²³ ኧቄኘ ባውራ ኦኦም ኦጩዋ፤ ንቭርአነታ ኧሳረንረ፤ ²⁴ ትከኛ ሞደባ ዋአካ ጭን አያ ኸረ ኧኘባ ተረከቨ›› ባረኖም፡፡ እማቲ ሳረኖምቭ ተቭራኖኡም፡፡ ²⁵ እን ቲኸርካ ኑእ ኧች ኧቹጃይ ወረታ ቃያ አነፐረዳ፡፡ ተኽሜ ኧቢድ ማአ ቲቲኢራነካ አንድርቪ እጫወዳ ቃር ሰማአ፤ ²⁶ ተቬድኽኖዋ ሜነነ አትኹዳ ኸናንታ ‹‹ዋ ዘንጋ ምርአፈድን?›› ባረ ተሳአረን፡፡ ²⁷ ኧኧኘ ኧሰማኸ ቦኼ ያአር ማአ፤ አባማኸ ዋ ኧች ቦኼአር ኧቫይ ኧቄኘ ባውራ አጠነ ባረን›፡፡ ²⁸ ኧችቭ ማአቸታ ቢድ አንጋአካ ባረ፤ አባሞኻ ወረጀ ዋታ ቢድ ግቫአ ሳአረን፡፡ ²⁹ ኑእ ኧች ዠፐረታ አአባኋ ‹ኢያ ዋጣካ ዘቨር አቤነኝኸ አጌኳርኬ ኤኤዞዝ ኼአር አታር ባይ አባኋ፤ ኢያ ጭን ተአቦገዳኛ ኢሽሪዪ አት ኧፈኘእ ነውሻሸ ዳር አናኼዳር›› ባረን፡፡ ³⁰ ጭን ዋ ኧቻኸ ዋጋኸ እን ተረከቫ ሰቭ ኹጅር ቲደምጃታ እሽታ ኧሳረነኸ ኸረ ዱንያ ጀፐረ ቲቫአካ ባውራ አንጥኸነ› ባረን፡፡ ³¹ አባኋ ጭን ‹አኸ እንእ ግዝየ ቲያ አነኸ፤ ኢያ አኸረአአር እን ኧኸት ናአር ባረኖም፡፡ ³² ኧሰማኸ ሞደ ባነደ አያ ኧኸሬ አኘ ባነደ ኧረኮዊ ኢናቭ ኧትወራረኡት አነቨንረ› ባረን›› ባረ፡፡