¹ ዋና ካህን እንእን ተሰቭ ግት ኢሾፖቺ፤ብእግዜርቭ አአር ኧሰቭ ወኪል ኸረ ኧቫጢር አፉ ዩዉኮዳ ፤መባዪ ህትቭ ያቲኢንቪ ኢትሾም ። ² ሁዳ ገግኋ ኧቫንኝእ ባጢር ዪንአይ ኧኸሬ አይሂርሙቪ ኖኦራቭ አአር ኢሶጅታ ሁኖዋ ያትቫጥጥኮዋይ ኢኸርነ ። ³ ሁድቭ ኧገግሞኋዪ ኤኤኛቭ ሰቪ ባጢር ቲቭር ህትቭ አቶኦኑዉት አኖዳ ሁዳ ብእም ኧቫአደ ። ⁴ አአሮን ኧሆኔመኸ እግዜር ኢኸራኲ ባኸሬ ፤ዋ ክብር ኧገግኋ ኢዎስድካ አትሞኋ ኤንዳ። ⁵ እመኸቭ ክርስቶስ ዋ ዋና ካህን ኧሁርት ክብር ኧገግኋአቦሰደዳ ፤ዘንጋኋጭን እግዜር «አኸ ትከነኛ ኢያ አቦ ኸርከ»ባረን። ⁶ እመኸቭ በኤኛቭ ኤኤዲ ፤ «ኧኸ ኧመልከ ፀዴቂ ሹመተኸ፤ አኸ ኧዘልለም ካህንንኸ»ይቭር ። ⁷ ኢየሱስ በዋ አርዳ በረፐረወ ዘቨር ተዉድ ኢረሳኲ ኢኸርነዳ እግዜሪ፤ጠሎትቪ ሳአየቭ በሩእ ኮትቪ ኢምባቭ አቴኤነቨ ፤ተቩረቭ ሂንኋይ በገርነድ ኧቴአዘዜ ኧኸሬ ጠሎትኋ ተሰምአ። ⁸ እእግዜር ተከቭ ዳር ቢኸርቭ ተቴኤፐረን ስቃያ ኧቴኤዘዥት ተማረ ። ⁹ ሁድቭ ቴኤዘዘ ሙርአ ኸረታ ተትረከቨ ቀጥወ ፤ ኢቴኤዘዥታ ሁኖዋ እንእ ተሁዳ ኧትረሳ ኧዘላም አያ ሂተዉዋ ኢረቩሩዋይ ተነፉም፤ ¹⁰ ኧመልከ ፀዴቅሜ ሹመትመኸ ዋና ካህን ተቬረ ብእግዜር ተሾመ። ¹¹ ኧዋ ዘንጋ አአር ኖኦራ ንዝሬኲኔዳ አአር አነንረ፤ ቢኸርቭ ትትሞሩዋይ ትስለቹዋይ ኧኸሬ አሁዋ ኢጋሁዋኸ አአዉጅት ቡሼኧኸ ያጀግርካ ዘንጋን ። ¹² አሁዋ ዋአካ አትሞርት ባነቨሁዋታ ግዚየ ገና አአወተረ እእግዜር ቃር ኢኢድሁዋታ ሰቭ ያትሲእሁዋ ዋአካቭ ያትሲእሁዋታ ሁዳ ቱኧ ሸረድ ታይኸር አይቭን። ¹³ አይቭ ኢሰጭካ እንእ ትከ ኧኸሬ ፤ትእግዜሪ ተፅድቅ ትምርት ገና አንትሄሄረዳ ። ¹⁴ ቱኧ ሸረድ ጭን ወሄ ተቩጥጥ ሁዳ ባቲይተዉ ኢሂሩዋይ ገግሁኖዋ አትርዋሸዉዋ ኧዎሰሩዋ ሰቭን አአር።