¹ ባቴ እእግዜሪ ኧፎያድ ኤኤዲ ኢጎኦዪ ኧቴቨ ተስፋ አይዎኧር አአር ኧኸሬ ፤ታሁዋ ማንኝእማሁዋ ኧዋ ተስፋይ ታይጋአ አይወኧረኸ ኧትጤፕ ። ² ኧሃአሁኖዋ ኤኤጂዮመኸ ኢናቭ እእግዚወሄ ዋራይ ኤኤጅንረ ። ዘንጋኋጭን ቃርኋ ኧሰምኦዋ ቃርኋ ብእምነት አንቴኤፖሪ ኧኸሬ አናጌኴረኖታ ። ³ እግዜርቭ ፤«ኢያ ኢኮታ ኧፎያድ ኤኤዲ ስርም አይጎኦታ ባሁ በቫአትኛ ተኘሁ» ባረ ። አአመርነ ኢና ጭን ኧሃአ ፎያዲ ንጋአነዴ ፤ቢኸረቭ ጭን አለም ተትፈጠረ ቆነሺታ ኧሁዳይ ሜና ቴፐ። ⁴ ኧሳቭአተኘ ቀረ አአር ባአት ኤኤዲ «እግዜር ተቬናኋ እንእ በሳቭአተኘ ቀረ አፎኘ» ይቭር ፤ ⁵ እመኸቭ ተሁዳ ኢፍቲ ባንዳ ኤኤዲ፤«ኧፎያድ ኤኤድኛይ ስርም አይጎኦታ»ይቭር ። ⁶ ገና ኧፎያድ ኤኤዲ ኢጎኦታ አአር አታት አኖዉዋ ፤አአወተራቸ እእግዜሪ ወሄ ዋራይ ኤኤጂዮዋ ሰቭ ባንታአዘዥትሁኖዋ ኧቫአ ኧፎያድ ኤኤዲ አጎፖታ ። ⁷ ህመኸ ኧኸሬ እግዜር ሃአአቨ «ኦዃ»ባረ አት ቀረ ወሰነ ፤እም ዘንጋ ተሮኦራ ዘቨር ቀጥወ ፤በዳዊት ኸረታ ፤ «ኦኳ ቃርኋ ብትሶዉኦዋ ሂናሁዋ አታቱዉኤ »ቧርሙ ቦተርሙ ኧዝሬከዊምነኸ ። ⁸ ኢያሱ ፎያድ አቨኖዋ አአር ተኸረ ፤ተሃአ ቀጥወ እግዜር ሃአይተ ኤኤኛ ቀረ አአር ባዝሬከዳ። ⁹ ህመኸ ኧኸረሜ እእግዜሪ ሰቭ በዋ ቀጥወ ኧሰንበት ፎያደኸ አአር ኢቀቭርኩ። ¹⁰ እግዜር ተቬናኋ አፎኘመኸ ፤እእግዜሪ ኧፎያድ ኤኤዲ ኢጋአካ እንእ፤ ሁድቭ ተቬናኋ እንእ ያፎይኬ። ¹¹ ባቴ አትዎኋ ዋ ኧሁኖዋይ አንቴኤዘዥት ተኸተይተታ አይወድእኸ ሃአ ኧፎያድ ኤኤዲ ንጋአኔ ጃድ ንቫርነ። ¹² እእግዜር ቃር እንእ ግዚየ ኢረብርካዪ ዪንአካምን አአር ፤በዉርቸቭ አጋድኋ ሽን ታነንዳ ሴፍ ኢረእ ቄቃን ፤ነፍስቭ፥መንፈስቭ ፥ወተርቭ አንጠ ፤ባእቭ ኢጋአታ ቲቫይትር ስን ኢዎጋካን አአር፤ኧሂንቭ ጭሞጨዪ፥ተመኛትቭ ኢምረምር። ¹³ ትእግዜሪ ኤር ኧትደኧረ አትቭ ፍጥረት ኤንዳ፤ኢናቭ ኧገግንራ አአር ኧዘጉት ባነቨንረዳ አአር እንእ፤በሁዳ ምዬ እንእ አአር ኧትሄረዪ ሰቻቭ ኧዋአዳን አአር። ¹⁴ ባቴ ኧሳቫዪ ኧዋአ፤ ኑኡየ ዋና ካህን እእግዜር ትከ ኢየሱስ አነንረ ኧኸሬ ምምትትንራ ጥቅ ንንአነ ንጥጥነ ። ¹⁵ ኢና አነንረዳ በቂጭናንራ ኧዥተ ቁስ ይቭረንረዳ ዋና ካህን አኸረዳ ዘንጋኋ ጭኝ በቨንኝእ አአር ኢናመኸ ኧትፈተነ ዋና ካህን አነንረ፤ ቢኸርቭ ጭን አትቭ ባጢር አኔፐዳ ፤ ¹⁶ አካ ባቴ ምረት ንቴኤፐርነኸ ቢያትሲኧንረዳቭ ግዚየ ያአግዘንረዳ ጠጋ ንቴኤፐርነኸ ጠጋ ኢረሁዉኮዳ እእግዜር ዙፏኒ ብእምነት ንተኧቭነ ።