¹ ባቴ እግዜር ኧሳቫይ ቢድኋይ ሜጠረ ኧኸናናሁዋ በክርስቶስ አአመርሁዋ ኧሰማት፤ምምምነትንራ ኪሸረኘዪ ዋና ካህንቭ ኧኸረ ኢየሱስ አጫሙጩዋ ። ² ሙሴ ብእግዜር ቢድ እንእ ግዚየ ሙርቴ ኧረፐረመኸ ፤ኢየሱስቭ እመኸ ኧሾመን እግዜር ሙርቴ ባንደ ። ³ ቢድ ያረሽካ ተቪድ ሁዳ ኢረእ ክብር አነንመኸ ፤ኢየሱስቭ ተሙሴ ኢረእካ ክብር ኢቴኩዳ አአር ኸረ ተረከቨ፤ ⁴ እንእ ቢድ ኦጣ ኦጣኋ ያረሽኩዳ አነን ፤እንእ አአር ኤፐ ጭን እግዜርን። ⁵ ሙሴ ተዋ ቀጥወ ኢዝሮኲዳ ዘንጋ አአር ቲምሰክር ፤ብእግርር ቢድ ከስ እንእአአት ኧሙርቴ አገልጋየኸ ባንደ ፤ ⁶ ክርስቶስ ጭን ብእግዜር ቢድ ከስ አአት ኧሙርቴ ኧችነኸ ።ኢናቭ ንታአመርኔኮዳዪ አነንረ ባርነ ንትሻመህኔኮዳ ተስፋንራ ጥቅ ኧንኧተነ ብንጠጥነ አሁዳይ ቢድነኋ ። ⁷ ህመኸ ኧኸረሜ መንፈስ ቅዱስ ይቭርመኸ ፤ «ኦኳቃርኋ ብትሶዉኦዋ ፤ ⁸ በምድረ በዳ በፈተና ቀረ፤ ባአይ ባሁም ኤፐኊመኸ ፤ ሂናሁዋ አታቱቩኤ ። ⁹ አቦማሁዋ በሃይ ተፉታተንኝ ፤ ሙረሞርኝቭ ኤፐሁንቭ ሁዳ እንእን አርቭአ ዘቨር አሾዉሙ። ¹⁰ በህም ዘቨር ሰቭ ኧቫአቸሁ ሁዳ ኧሁዳ ባንደ <እንእ ግዚየ ሂንሁኖዋ፤ መያ ኢገፍር፤ መያመኛ አኋርታ ።> ¹¹ ህመኸ ኧኸሬ በቫአትኛ «ኧፎያድ ኤኤድኛይ ሰርም አይጎኦታ።» ባሁታ ተኘሁ፤ ¹² ኧሰማቶ ታሁዋ ማንኝእማሁዋ እንእን ግዚየ ቲረቭርካ እግዜር ኢኢንየ ያዋአካ ባጢረተኘዪ አያአቭርቭ ሂን አይረቭርሁዋኸ ጥጠፑዋ ። ¹³ ዘንጋኋ ጭኝ በግታሁዋ ማንኝእሞኋ በቫጢር ተቄቅተታ ሂንኋ አይተቭአኸ ፤«ኦኳ»ቲዩሪታኖዊ {ኦኳ ተኦዃ} እንእ ቀረ ገግተገግማሁዋ በትሟኮርት ተጥናኖዋ ። ¹⁴ አወተራቸ ኧረፐረ እምነት ቀረ ያርእወዳ ስን አጢብቅተነ ብንጠጥነ ተክርስቶስ እማትሜብእንቭ አአር ወራሽ ንኸርነዴ ፤ ¹⁵ ሁድቭ ፤ «ኦኳ ቃርኋ ብትሰቩኦዋ ፤ ባአይቭ ባሁም ኤፐኊኸ ፤ዋአካቭ ሂናሁዋ አታቱዉኤ »ኧዋሪምነኸ ። ¹⁶ ሰምኦሙ ባአይ ኧዋሩዋ ማን ማን ባኖዉተ ? ሙሴ ተግብፅ ገኘ መራ አዋአኖዋ ሁኖሽ አሆርታ? ¹⁷ አርቭአ ዘቨር እንእሁ ኧቫአቸወዋ ማንማንተነዋ?ባጢር ኤፖሙታ ኒሳሁኖዋ በምድረ በዳ ወተኧ ኧኧኘ ሁኖሽ አኸረዳ ? ¹⁸ አንታአዘዡዋ ሁኖዋ በኸረ ባኸሬ ኧፎያድ ኤኤዲ ባይጎኦዋይ ኧተኘዎዋማን ማንተነዋ? ¹⁹ ባቴ ኢጎኦዋይ አኸረኖዋ ሁዳ ታኖኦዎርትሁኖዋ ኧትረሳ ኧኸረኸ ኢጋአንረ።