¹ ህመኸ ኧኸረሜ ተስሰምአኔ ዘንጋ ሳጅተነ ባንወድእኔ ኧሰምአኔ ሁዳ አአር ገኲተነ ኧትጦፑት አነቨንረ። ² እመኸቭ ኢኸርካ ሁዳ ተመላአይካይ አጋድ ኤኤጂ ቃር አይትሻር አአር በኸረጋዪ ማንኝእ አድዋዉርትቪ አንታአዘዥትቭ ያቭአኩዳ ቅጣት በቴኤፐረ ፤ ³ ኢናሁ ኧዋኸ ኧትረፉት ብንቀርጥነ ኧተኸ ናምልጥነሴ? እም ኑእ ኧተረፉት አወተራቸ በጎይታ ቴኤደ ፤ተሁድቭ ኧሰምኦዋ ሰቭ ኢና አጬጉም ኤኤጅንረ። ⁴ እግዜርቭ በመርኸት ፥በወግቪ በዉችር ቡችርቭ በሩእ ኑእ ሜናቭ እመኸቭ ኧፍቃድኋኸ በቴቨኖዋ ኧመንፈስ ቅዱስ ስጦታ ኧዋ ዘንጋ አአር ሙሶኮርሙ። ⁵ ዋ ንዝሬክኔነዳ ኢቭአካ አለም ኧመላአይካ አናትጌዛንዳ፤ ⁶ ዘንጋኋ ጭን አትሁዳ ባአት ኤኤዲ ዋኸ ባረ ፤ምሰከረ፤ « አኸ ኧሁዳ ትዘግድኲ ሰቭ ምርአፈድን? ትትጬፕነዳሁ አአር ኧሰቭ ትከ ምርአፈድን?» ⁷ ተመላአይካ ቀሪ አአር ገዳ ዠፐርኸን [አቴኤነስኸን] ፤ ኑእ ማእረግቭ ኑእ ክብርቭ አኸን፤ በኧጅማኸ ሜና እንእ ዳኘ ኤፐኸን፤ ⁸ እንእ አአር ተኧግርኋ ገዳ አጋድ ኤፐኸ አትጌዛኸነ። እግዜር እንእ አአር ተኧግርኋ ገዳአጋድ ቲያትጌዛነዳ አናትጌዝነ አአር አታአር ኤነዳ፤ኧህር ባኸሬ ዋአካ እንእ አአር በትገዛነ ኤኤዲ አናዥነዳ። ⁹ ዘንጋኋ ጭን ብእግዜር ጠጋ ኧሰቭ እንእ ቲቭር ኢዎንዲተመላአይካ ቀሪ አአር ያአሰኸ ኤፐዊ ኧረፐረ ኢየሱስ ኧዉድ ስቃያ በተኧዎርትኋ ዋአካ ኧክብርቪ ኧሽኩትቭ ዘዉድ በዶፎኔ ናዥኔ ። ¹⁰ እንእ አአር ኧሁድቪ በሁድቭ ኢረቭርካ እግዜር ኖኦራ ዴንጋ ኧክብርኋይ ያቫአይ ኢተርፍኮዳ መሪ ኧኸረ ኢየሱስ በመከራ ሙርአ በቩርአሞኋ ኤምተታ ኢትሸከቨኸ ዪንአኲ ያትሲእካ አአር ባንደ። ¹¹ ሰቭ እንእ ኢቀድስካዪ፤ኢትቆደሽታቭ ሰቭ አት ቢደ ሰቭኖዋ ፤ህመኸ ኧኸረሜ ኢየሱስ ኧሰማት ባይተ ኢኸራኮዋይ አንቅቨጨዳ፤ ¹² ህመኸ ኧከረሜ ፤ዋኸ ይቭር፤ ሹዋኸ ኧኧሰማትኛ ኢኢድኮቴ በትስቨሰቨ ሰቭ ግት ኧሰኩርት ኧዘምርኬ ። ¹³ ህመኸቭ ፤ «ኢያ በሁዳ ኧታአመር ።» አትቭ ዋኸ ይቭር፤ «እኩ ኢያ እግዜር አቬ ዴንጋ።»ይቭር። ¹⁴ ዴንጋ በቨሰርቪ በደቭ[ ታአቦአዶድሁኖዋ ]ኢትሻኮጁዋመኸ ኢየሱስቭ ገግሞኋ ተቨሰሪ ተደቭ ተሻከደ ፤አመኸቭ ኧኸረሁዳ በቩድ ፎር ደረግ አነንዳ ሴጣን በቩድኋ ደረግ ኢሸርኩኔን። ¹⁵ እመኸቭ ቢረቩርኮዳ ዘቨር እንእ ሙድ ፈኞሙታ ኧዉድ ብባሬያ ሆርሙ ኢረቩርታ ሰቭ ነጣ ያዋአኔን። ¹⁶ ሁድቭ ኧቫአ ሁዳ መላአይካ ያአግዚ ታይኸርቭ አአብራሃም ዘር ያአግዚ ኧቫአኸ ኧትሄረዳን አአር ። ¹⁷ ህመኸ ኧኸሬ ብእን አአር ኧሰማት ኧዉሰርት አኖዳ አአር ኸረ ፤እመዳ ኤፐን አፉ ይቭካዪ ሙርቴም ዋና ካህን ኸረታ እግዜር ያግለግልመዪ ኧሰቭ ሞኋ ኧዋጢር አፉት ኢረህዋኔን ። ¹⁸ ሁዳ ገግሞኋ በትፈተነጋ ስቃያ ኧቴኤፐሬ ኧኸሬ ኢትፎተንታሁኖዋ ያአግዝኮዋይ ኢኸነ።