¹ ተድረ ቆነሺታ እግዜር በሮኦራ አይነት በቩችር ቡችር መያ በነቢ ሁኖዋ ኸረታ አአቦንራ ዝሬከታ ፤ ² ብእም ዘቨር ቢያርእወዳ ጭን እንእ አአር ኢዎርሰኸ ቤፐንቪ አለምቭ እንእ በፈጠረወ በትኮኋ ኢና ዝሬከንረ። ³ ሁዳ እእግዜር ክብር ኢታሽወዳዪ አአመርሞኋ ኧዉርረምዬ መሰሮ ኸረታ ፤በሩኡየ ቃርኋእንእቨኋ ፌነገ ጠበጠ፤ሰቭ እንእ ተቫጢርኋ ባጠነረ[ባተነፈ] ቀጥወ በሳቫይ በሩእ እግዜር ቀነ ቸና። ⁴ ህመኸ ኧኸረሜ ኧወሰደን ሹቭ ተመላአይካይ ሹቭ ኢረእመኸ እንእ ፤ሁድቭ ተመላአይካ ኖኦራ አአር ኧራኧአአር ኸረ ። ⁵ እግዜር ፤ «አኸ ትከነኛ፤ ኢያ ኦኳ ኤኘከ፤» ሃም ባኸረ ፥ «ኢያ አቦ ኧኸርኩዴ፤ ሁድቭ ትከ ኢኸሬዴ» ኧቫረን አአርሁ ተመላአይካ ግት አቸ ኧቫንተን ? ⁶ እመኸቭ እግዜር ኧቨህርኋ አአለሚ ቲያጋአካ ፤ «እእግዜሪ መላአይካ እንእ ኢሶጉጅነዴ » ይቭር ። ⁷ ኧመላአይካቭ አአር ቲዝሬካ፤ «መላአይካኋ ንፋስ፤ አገልጋይሞኋ እእሳድ ላባ ዪንአኮቴ» ይቭር። ⁸ ኧትኮኋ አአር ጭን ዋኸ ይቭር፤ «አምላኮ ፤ዙፋናኸ ተዘላለም ፤ ዘላለም ስን ፤ ቲቭኧተ ኢረቭርኬ፤ መንግስትማኸ ቂጥየ ፍርድ ኢኸርኬ፤ ⁹ ፅድቅ ነመድኸ ፤ ባጢርቭ ጠናኸ፤ ህመኸ ኧኸረሜ እግዜር፤ ታአቦጎዳኸ ፎረ አጋድ አወናናኸ ፤ ኧሳርትቭ ዘይት ሟሸናኸ ። ¹⁰ አትቭ ዋኸ ይቭር፤ «እግዜሮ አኸ ባአወተራቸ ፤ አፈር ፈጠርኸ ፥ ሳቫይቭ ሁኖዋ ኧኧጃኸ ሜናኖዋ፤ ¹¹ ሁኖዋ ዮኦፎቴ አኸ አኸ ጭን እንእን ግዚየ ትረቭርኬ ፤ እንእቨሁኖዋ ኧሁጅረኸ ኢጎርዥቴ፤ ¹² ኦፎር ሁጅረኸ ትጥቫንርኮቴ ፤ እኧሁጅርመኸ ኢሸጉሪዮቴ። አኸ ጭን አም አኸምንኸ ፤ ኧዘቨርማኸ ያርእወዳ ኤነንዳ።» ¹³ እግዜር ፤ «ጠራታኸ ኧኧግራኸ ትትራከእወዳ ሁዳ ትኒንአነኸ ስን ፤ በቀነኛ ቸራ » ኧቫረን አአር እንዴ ተመላአይካ ግትኧቫንደን? ¹⁴ መላአይካ እንእ ኢተርፉዋታ ሁኖዋ ያጉሎጉሉዋይ ኢኬሺዮታ አገልጋይሽ አሆርታ ?