¹ አካ ባቴ ዋሁኖዋ ያአሁርታ ኖኦራ ምስክር ትእንቭ አጋድንራ በሆፖዉንረመኸ በሮፖሩዋጋ፤ፉንግ ኧኸረቨንረ አአር እንእ ኧሲያሞኋቭ አክታተፈ ኢጠጠንረዳ ባጢር ናፍካነታ፤ ቢኢፍትንራይ አነዳ ኑጫ ከፈርንራ ንክስነታ ንትራዉእነ ። ² እእምነትንራ ኧቀነስንቪ ያርእወዳቭ ኢየሱስ ነዥነ ፤ሁዳ ተሃአ ቀጥወ አነዳ ኧሳርት ቲቭር፤መስቀል ሁዳ ፈነኸ ፌነገኧመስቀልቭ ሁዳይ ዉርደት ቀንጠታብእግዜር ዙፋን ቀረ ቸና። ³ አካ ተዛጌግተሁዋታ[ችላ ባይተሁዋ] ተስፋ አታጩዋኸ ፤ተቫጢረተኘ ሁኖዋ እዋኸ ጊፋን ሰንአወታ ኧፈነኸ ሁዳ አጫሙጩዋ ። ⁴ አሁም ተቫጢር ጃድ ትታዎኦዋ ገና ደሁዋ ኧትኋኡቲ አአህር አንትጋፋሁይዳ ። ⁵ ዴንግንነድቭ አነቨሁዋይ ኧኸሬ «ትከኞ፤እእግዜሪ ቅጣት እንሲየ አእአር ኧኝኧተኸ አተዥ፤ ቲቨኧችቨኸዳቭ ተስፋ አተጥ ፤ ⁶ ጎይታ ቢረድኩዳ ትከኋ ኢቨኧች፤ አትከመኸቭ ኢቴኤፐርኩዳ ሁዳ ኢቀጣ፤» ባሁም ኧዝሬከሁይ ሁዳ ተረሳናሁም። ⁷ እግዜር ኧዴንጋኋኸ ኧጠበጠናሁዋይ ፤ኧኸሬ ኧቫአት ምክርኋፍሮሁዋ ፤ ተሁርትሞኋ አቦኋ አይቀጣኩ ዴንጋ ማንደን ? ⁸ እንእ ዴንጋ ኢቆጮዮኸ አሁም ተህም ባቆጮኩዋ አሁዋ እንጭረቬንሁዋ ባሬ ዴንጋ አኸርሁዋታ። ⁹ ተህም ቦፎረ ኢና እንእቨንራ ኢቆጮንረዳ አአር ኤኤኘዉንረአቦንራ ባነዉንረደ፤ናኸብድኔዮም። ባንደ አካ ባቴ አያ ህይተነ ንረቭርኔ ኧተኸ ኧሳቫዪ [ኧመንፈስ አባንራ] ኧተኸ አናኸብድኔዳ? ¹⁰ አቦንራ ኧሁኖዋ ወሄ አአር መሰረ ኧትረከቨኖኸ ኧቀሪመጋ ኢቆጮንረ ባንደ ፤እግዜር ጭን ተቅዱስነድኋ ንትሻከድነመኸዪ ኢናቭ ያጌኪረንረኸ ባረታ ኢቄጣንረ። ¹¹ ቅጣት እንእ ኧግዚየኋ ያቲእ ባኸሬ ያትሽርካ አአር አትቨስርካ፤ኧርወሸዊ ሰቭ ጭን ኧቀጥወኋ ፅድቅቪ ሽኛትቭ ኢረህዉኰ። ¹² ህመኸ ኧኸረሜ ኧትተረ ኧጅማሁዋዪ ቄጠቭ ጉርቨዳሁዋ አቱዉኤ ። ¹³ ጅረ ሁዳ አፊያ ኢኸረኸ ባኸሬ ኢረእቭ አይጀኘኸ «ኧኧግራሁዋ ወሄ መያ ጎኩሩዋ።» ¹⁴ ተሰቭ እንእ በሽኛት ትረዉሩዋይ ትቱሩዋ ኢኸነሁዋታ ሁዳ እንእ ኦንኦዋ ፤ትትቆደሹዋሜ ሶኡዋ ፤ ቅድስና አይቫር አትቭ ሰቭ እግዜር ያዢ አይኸርነዳ። ¹⁵ ታሁዋ ማንኝእመኋ እእግዜሪ ጠጋ አይቀቭሩቨኸ እመኸቭ አትቭ ኢቨርርካ ኧስር ኒቭኧተታ ችግር አያሰርአመኸዪ ፤ኧሮኦራሞሁኖዋ አያደፈኸ ተጦፑዋ። ¹⁶ እእማት ግዚየ ሸረድ ቲቭር በህርነድኋ አሲየ ኤኤሳዊ ሁዳኸ ማንኝእሞኋ ቴኤኟ ሰቪ አበሩስ ሁጅር ኢዶሙጅታ አአር ዌ እግዜር አያከብር አአር ሂይተአይትረከቨኸ ተጦፑዋ። ¹⁷ ኤሳዉ ኧቀጥወ ዋ በህርነድኋ ኢዎርሲ ቢሲእቭ ኧሆንኤኸ ቲሂሩዋ፤ደረትኋ ዠፐረቭ ቲቤይህ ቢሲእኩ ዣቪተታ ኢረሁኵ አኸረነዳ። ¹⁸ በኧጅ ቢረጉጂ ቢኸርካ ብእሳድቭ ኢረድድካ ኧሲና ቆቶዌ ፥ኧጠነቫይ፥ኧዳቭራመዪ ኡኡቡርቢትሜ፥ኧሰንአሁዋታ፤ ¹⁹ ኧመለከት ዩሪዳ ኧጡሩምቧኸ ኢሮፌዳ ሁዳይ ቃሪ፤ ኢትሰምአካ ቃሪ፤አማአሁዋታ ፤ሁዳ ኧሰምኦዋ ሰቭ ዲቪተወ ኤኛቃር አያትሴምአኮዋኸ ሳአሪ። ²⁰ ኧቭር ብቱሩዋ «ዳታ ፉኡቭ ዳር ቆቶወ ሁዳ በረከደ ብእቭር ኧጎዪ ኧዉንድ »ይቭካ እዝዝ ኢእፌኑጉዋይ አኸረኖታ። ²¹ በሃኸ ያዢ ኧረፐረ ሁዳቡሼኧኸ ያትፈኝካ አአር ባንደ፤ሙሴቭ«ፈኘሁታ አራአደዪ» ባረ ። ²² አሁዋ ጭን ኧፅዮን ቆቶዌ፥በሳቫይ አነዳ ኢየሩሳሌሚ እንእ ግዚየ ኢረቭርካ እእግዜሪ ከተማይ፤በሳርት ኧትደሞጁዋ ሙዝር ኤነኖዋ መላአይካይ፤ ²³ ሹዉሁኖዋ በሳቫዪ ኧጣፉዮዋ ኧቨህር ሁኖዋይ ማቨሪ ቴኤነሁም፤እንእንቭኋይ ዳኘ ኧኸረ እእግዜሪ ፤በሁድቭ ሙርአ ኧሆሩዋ ኧፃዲቅ መንፈስ ሁኖዋይ ፤ ²⁴ ኧገደር ጉርዳ ዋና ኧኸረ ኢኢየሱስመዪ እመኸቭ ታአቤሊ ደቭ ኢፈዝካ ቃር ኢዝሬካ ባጢር ያእቪ ኧሮቼ ደቪ ሰንአሁም። ²⁵ ኢዝሬካ ሁዳ ባአይ አቱሪኸ ተጦፑዋ ። ዋሁኖዋ ባአፈሪ ኸረታ ያትጬፕኮዋ ኧረፐረ ሁዳ ባአይ ኧዋሪ ግዝዚየ ሲህተዉዋ ባንተነፉዋጋ ፤ኢና ተሳቫዪ ኧቫአ ሁዳ ቲያትጬፐንረዳ ተሁዳ ብናረእነ ኧተኸ ሲህተነ ንተርፍኔ ኢኸንረዴ። ²⁶ ሃአ ግዚየ ቃርኋ አአፈር ባንደ አቅረቀረ ሁዳ ፤ዋአካ ጭን፤«እማት አፈር ታይኸርቭ አት ግዚየ ዲቪተሁወታ ሳቫይቭ አቅረቅርኬ» ባረታ ቃር ገፓ ። ²⁷ «አት ግዚየ ዲቪተሁወታ»ይቭካ ቃር ያቲሽካ ሁዳ አይቁረቁሩዋ ሁኖዋ ቲቭኧተዉዋ ኢረቩሩዋኸ ፤ኢቁሮቁርታ ሁኖዋ ሁድቭ ኧትፎጠሩዋ ሁኖዋ ያአፎዮታ አአር ኧሆሩዋነኸ ። ²⁸ ህመኸ ኧኸረሜ ስርም አይቅረቅር መንግስት ንቴኤፐርኔ ኧኸሬ እእግዜር ሽኩርት ናተኧንቭነ፤እመኸቭ ኧሁዳ ቢሽርኩዳ መያ ኢሽርኩኸ ትናኸብድነይቪ፤ትንፈይነቭ ንስግድኔነ። ²⁹ ኧቭር ብቱሩዋ ኢናይ እግዜር ያአፋካ እሳድን።