¹ ገግተገግማሁዋ ኧኧሰማተኸ ተራዎጁዋ። ² ባዘራ ኧተኧወርት አይተሳሁዋ ፤ኧቭር ብቱሩዋ አታትሁኖዋ ባዘራ ቲቴኤፖርታ ታይሂርሙ መላአይካቭ ተህም አቫይዘርሙ ። ³ ኧታአኮጁዋ ሁኖዋ ተሁኖዋ ኧታአከድሁዋ አአረኸ ኧንኦሙ አጫሙጩዋ፤እመኸቭ በሰቭ ኧጅ ኢዱዋኙዋታ ሁኖዋ ፤እመኸ አሁዋ ገጋሁዋ ስቃያ ቲቴኤፖርታ አአረኸ ኧንኦሙ አጫሙጩዋ ። ⁴ ጋቢቻ ብእንቭ ሰቪ ኧትከበረ አአር ኧህር ግዲየሞኋ ወሄ አአር ኧህር ፤ኧቭር ብቱሩዋ እግዜር ተቫንኝእ ሰቭ ሁጅር ቢዶሙጅታ ሁኖሚ እመኸቭ ታአበሩስህኖዋ ኤኛ አአር ዶኦርሙ አዎኖሙ ሁጅር ቢዶሙጅታ ሰቭ ኢፈርድኬ። ⁵ ዋጋ ተርዎጅት ገጋሁዋ ኧሮዋ ፤ባነነሁዋታ ሁዳ ድክ ቧርሙ ኑዎሩዋ፤ ኧቭር ብቱሩዋ እግዜር፤ «አቸ አቺእኸዳ ፤ ስርምቭ አቃሽኸዳ» ባረ። ⁶ ህመኸ ኧኸረሜ በቩርአ ሂን፤ «እገዠኛ ጎይታን ፤አንፈይካ ፤ ሰቭ ማሃ ዪንአንሬ ኢኸነ?» ንቭርነ። ⁷ እእግዜር ቃር ኤኤጅኩዋ ኢኢፍታሁዋይ ኧረፖሩዋ መሪያሁዋ አጫሙጩዋ፤ ሜናሞሁኖዋ ኦዡምታ ብእምነታሁዋ ሁኖዋ ሙሰሩዋ። ⁸ ኢየሱስ ክርስቶስ ትራኛዪ ኦኳ ኧዘላለምቭ አም ሁድምን አይትሽጋገርካ ። ⁹ በቩችር ቡችር አይነት ባዘራባዘራ ትምርት አትሞተቹዋ ሂንንራ ቲቭኧተ ኢትሸከካ ሁዳ ብእግዜሪ ጠጋን ባኸሬ ኧሸረድ ቂጫ ቦኦሮት አኸረዳ ፤እም ኧሸረድ ቂጫ ዩኡሮታ ሰቭ ዳር አታአር አናጔከረኖታ። ¹⁰ በድንኳንቭ ሁዳ ከስ ያጌኪርታ ሰቭ ተህትቭሁዳይ ሸረድ ኢዎርኦዋይ አትበቃኖዋ ህትቭ ዪንኦኮዳ ኤኤዲ አነንረ። ¹¹ ዋና ካህን ሁዳ ባጢር ኢትፋእወዳ ኧዋጋ ደቭ ጠበጠኧቅድስተ ቅዱሳን ሁዳይ ኢጋአ፤ኧዋጋ ሁዳይ በሰር ጭን ተቃያኋ ሰቻ አጋድ አዎኦሙ ኢቬኪሪ ። ¹⁴ እመኸቭ ኢየሱስ በገግኋይ ደቭ ሰብኋ እንእ ተቫጢርዃ ኢቀድሲ ተከተማኋይ ኢጎኦኮዳ ሳቃ ሰቻ አጋድ ስቃያ ቴኤፐረ። ¹³ ህመኸ ኧኸረሜ ኢናቭ ሁዳ ኧፌነገን ዉርደት ንፈንግነታተቃያ ሰቻ አጋድ ኧሁዳይ ናአነ። ¹² ኧቭር ቢዩሪ በዋይ ኧገግንራ ኧኸረ ከተማ ኤነንረዳ ፤ዘንጋኋ ጭን ቲኢፍት ኢፍት ኢቫአንረዳ ከተማ ንእየነ ። ¹⁵ ህመኸ ኧኸረሜ ብእየሱስ ክርስቶሲ አጋድ እንእ ግዚየ እእግዜር ኧሽኩርት ህትቭ ናተኧንቭነ፤እም ህትቭ እእግዜር ኧክብርኋ በከፈር ዪኢጅነዳ ኧሽኩርት ህትቭን ። ¹⁶ ባቴ አትብ ወሄ አአር ኦንኧትቪ ፤አነነሁዋታቭ ሁዳ ቴኤኛኋኧትሻጎጅት አይተሳሁዋ፤ኧቭር ቢዩሪ እግዜር ኢሽርኩዳ ሁዳ በዋኸ ህትቭ ኧኸረዴ ። ¹⁷ ኧመሪያሁዋ ታአዘዡዋ ፤ተጎዦኖምቭ ። ኧቭር ቢዩሪ ሁኖዋ ኑእ መትሳአየ አኖዎዋይ ኧኸረዴ፤ሁኖዋ ኧነቭሳሁዋ አአር ያትዋቁሩዋ።ህመኸ ኧኸረሜሜናሁኖዋ ቲሽርኮዋ ባኸሬ ቀጨ ቲቭኮዋ አዪንኦዋኸ ታአዘዢዮዋ። ሃም ባኸረ አይፈዝሁዋታ። ¹⁸ ባቴ ኢናቭ ጠሎት ኦንኧንረ ።ብእንቭ አጋድ ወሄ አአር ሂይተ ኢረቭሪ ኢትሜኝካ ጥርር ቀርብ አነንረኸ ናአቭርነ ። ¹⁹ ኢረእቭ አሁዋይ በፈኧረ ተዣቨይተሁ ኧቫአኸ እግዜር ያአግዜኸ ጠሎት ኦንኧኒ ፤አደራናሁዋ!። ²⁰ በዘላለም ኧጉርዳ ደቭ ኧጣይ እንእ ዜማቸ፤ ኧኸረ ኧጎይታንራ እኢየሱስ ክርስቶስ ተቩድ ኧረሳን ኧሽኛት እግዜር፤ ²¹ ኧፍቃድኋአአር እንእ ቲንኦዋኸ እግዜር በወሄ ዘንጋ እንእ አጥባብቅሁዋ ፤ ቢናቭ ፎር ብእየሱስ ክርስቶሲ አጋድ ኢሽርኩዳ ሁዳ እንእ ኧንአ፤ እስተ ዘላለም ስን ኑኡነድ ኧሁዳ ኧህር፤አሚን ። ²² ኧሰማቶ ኧጣፍነኩዋ ኪሸር እንሲየ አአር ኧኸረመኸ ፤ምክርኗ ትቴኤፖርኘኸ አደራ እቭሁዋ ። ²³ ኧሰምንራ ጢሞቲዮስ ኦፎቼኸ ቲሂሩዋይ ኧሲእ ፤በፈኧረ በቫአ ፤ተሁድቭ እምትሜ አዥሁዋይ አአሴ። ²⁴ እእንቭ መሪማሁዋዪ በክርስቶስ አአሞሩዋ ሰቭ እንእ ወጌም ቧርኒ።ኧጣሌያንቭ ገኘ በክርስቶስ አአሞሩዋ ሰብ ወጌም ይቭኩዋ። ²⁵ እእግዜሪ ጠጋ ትእንቫሁዋ ኧህር!አሚን።