¹ እምነት ኧዋርት በተስፋ ንኢየኔዳ ዘንጋ ኢኸረኸ ናጪግኔኮዳ ፤አናዥነዪቭ አአር ኧዉረ ኧኸረኸ ነቭርኔኮዳ አአር። ² እእም ኢፍቲ አቦንራ ኧምሶኮርኖዋ ሁዳ ብእመዳምን ። ³ አአለም ፍጥረት እንእ ብእግዜር ቃር ኧትፈጠረኸ ብእምነት ንሂርነ ፤ህመኸ ኧኸረሜ ኧኸረሜ ያዢዳ አአር እንእ ኧትፈጠረሁዳ ቲያዢዳ ሁዳ አንኸረኸ ኢጋአንረ። ⁴ አቤል ብእምነት ተቃየል ኢረእ ኧራኧ ህትቭ አአግዜር አቴኤነቨ ። እግዜርቭ አቴኤነቨን ህትቭ አአር በዝሬከነጋ ፤ ሁዳ ብእምነት ፃዲቅ ኧኸረኸ ተምሰከረነ ።ቢዎንድቭ ዳር ዋአካቭ ሰን ብእምነትኋ ኢዝሬይክ ። ⁵ ሄኖክቭ ሙድ አይረህቭኮኸ ብእምነት ተዋ አለም ወሰጂ፤እግዜርቭ ኧወሰደኒ ኧኸሬ አኖኮዊዳ ፤ታይዎስጂቭ ኢፍቲ እእግዜር አትሳረኸ ተምሰከረነ። ⁶ እምነትቭ አይቫር እእግዜር ኢሽርኩዳ አአር ዪንኧዪ አይኸርካ ፤ኧቭር ቢዩሪ እእግዜሪ ኢቴኤነቭካ እንእ እግዜር አነመኸዪ ተሂንመኋሜ ኢሱኢዳቭ ሁኖዋ ዋጋሁኖዋ ኢኮኸ ኦኦዎርት አኖወ ። ⁷ ኖህ ገና አቸ አያዢ አአር እግዜር በተረ ባትጬፐንጋ እእግዜር ፈኘታ ቢደሰቭኋ ያተርፊ እእግዜር አመረ ብእሃ ፎር ያርካ መርከብ አረሸ፤ብእምነትሞኋ አአለም ሰቭ እንእ ባጢረተኘ ኧኸረኸ አትሄረ አትቄንጠኖም ፤በታአሞርት ኢረህዊዳ ፅድቅ ወራሽ ኸረ። ⁸ አብራሃም ደረድ ኧኝኧተታ ኢቴኤፐርኩዳ ኤኤዲ በሆኔጋ በታአሞርት ቴኤዘዘ ፤ኧቲ ያረኸ ዳር ባዪሂርቭ አኪያ ባረ ቴኤዘዘ ወረ ፥ ⁹ በሰቭ ገኘ አንዳ አአት ሳናጫደኸ እግዜር ኢኸዴ ባረ ተስፋ በጎፖነ ኤኤዲ ብእምነት ቸና ፤ኧጎፖነ ተስፋ እማቲ ኢዎርሹዋታ ኢሳቅመኸዪ ኧያቆብመኸ በድኳን ከስ ነፐረ። ¹⁰ ኧቭር ቢዩሪ ፤አይትቫነር እግዜር አረሸንቪ ኧፈጠረንቭ ከተማ ኢጋአይ ይኢየ ባንደ። ¹¹ አብራሃምቭ ማንኝእ ቢገርዝቭ ፤ሳራቭ ገግሻ ዠገቫ ብትኸር፤ ትከ ኢኸዴ ባረ ተስፋ ኧገፓነ እግዜር ሙርቴ ኧኸረኸ ኧሃሬ ኧኸሬ ብእምነት ኧትከ አቦወ ኢኸሪ በቃ። ¹² ህመኸ ኧኸረሜ ተዋ ተወንደ ሰቭ ቲቲቬዘርካ ተዋ ታአት ሰቭ ፤ኧሳቫዪ ሆሆኸ ኧደበሰዪ ፤ኧቫር ሞሬ አሸዋመኸ መዝይተዊ አያርእ ኧሰቭ ዘር ነኮዊ ። ¹³ ዋሁኖዋ እንእ ኧቴቨኖዋ ኧተስፋ ቃር ታይረሁዉም እምነትሁኖዋ ትእራዉዋመኸ ሞጁም፤ ቢኸርቭ ጭን በሮኡሜ ኧሰቩም ወጌም ቧሪ፤በዋ አፈር ቲሮዉርታ ሳናጫድቪ ባዘራቭ ኧሆሩዋኸ ኋርሙ ባንደ ። ¹⁴ ዋኸ ዩዉርታ ሰቭ አገግሁኖዋ ኧኸረ ኤኛ ገኘ ዩኡሮዋኸ ያቲሹዋ ። ¹⁵ ቼኤዊታ ኧዎኦዋ ገኘ ቢያጫሙጩዋ ፤ሃአይ ኢትዠፖርኮዳ አአር ባነኖተ ። ¹⁶ ዋአካ ጭን ተሃአ ገኘ ኢረእካ በሳቫይ አንዳ ገኘ ኢትሜኙዋ ፤እግዜርቭ ኢረቩርኮዳ ከተማ ጔከረኖም፤ ህመኸ ኧኸረሜ እግዜር «ጎይታንራ» ባይተቩዋ ኢሆሮዪ አንቅቨጨዳ። ¹⁷ አብራሃም እግዜር በፈተነንጋ ብእምነት ኢኢሳቅ ህትቭ ኤፐ አቴኤነቨን፤ኧትስፋ ቃር ኧቴኤፐረ አብራሃም እማት ትትከኋ ህትቭ ዪንአኲ ቁጥቁጥ ባረ ባንደ፤ ¹⁸ እመዳቭ እግግዜር «ዘራኸ ቢኢሳቅ ኢትኸናኬ» ኧትቬረነ ሁዳ ኧሁዳ ባንደ። ¹⁹ አብራሃም እግዜር ኧዎንደ ሰቭ ኢረሳኸ ኢኸነኸ ሃረ ባንደ ፤አብራሃምቭ ኢኢሳቅ ተቩድ ኧትረሳ አአር ኤፐታ አሸንቭ። ²⁰ ኢሳቅቭተሃአ ቀጥወ ኢቫአካ ዘንጋ አአር አጫመጠታ፤ኧያቆብቪ ኤኤሳዉብእምነት ዳረኖም። ²¹ ያቆብቭ ቲዎንድካ ኧዮሴፊ ዴንጋ ኦጣኦጥሁኖዋ ዳረኖም፤ባአርመኋ ዊዲ ሙግ ባረታ እእግዜር ሰገደ። ²² ዮሴፍቭ ኢዎንዲ ማአ በሰንአጋ፤ብእምነት እእስራኤል ሰቪ ተግብፅ ኢዎኦዋመኸዪ ፤አአቭሞኋ ተሃይ ያዎኤኸ ኤዘዘ። ²³ ሙሴ ተቴኤኘ ቀጥወ ፤አቦ አዶድኋ ማርካማ ትከ ኧኸረኸ አሸዉዋይ ኧኸሬ ሶኦስት በኘዳር ብእምነት ዶኦሪ ፤ንጉስቭ ኧዋአን አዋጅ አፈኘዉታ። ²⁴ ሙሴቭ ተትራኧ ቀጥወ ፤ ኧፈረኦኒ ሜቸቤ ኤትቬሪ ብእምነት ባአይ ባረ ። ²⁵ በቫጢር ቲረሁዊዳ እእስየ ግዚየ ኧሳርት ኢረእ ትእግዜሪ ሰቨጋ ስቃያ ኧተኦዎርት ሸፐተ። ²⁶ ተግብፅ ገኘ ደገኝነድ ኢረእ ኧክርስቶስ ቲዩሪ ስቃያ ኧተኦዎርት ኢረእካ ደገኝነድ ኧኸረኸ ገፓንቭ፤ኧቀጥወቭ ኢቴኤፐርኩዳ አጅግ ተሮእሜ ኸረታ አሸቫ! ²⁷ ኧንጕስ ሁዳሜ ማአት ታይፈይቭ ብእምነት ግብፅ ገኘ ገፈረ ዋአ ፤አይትረከቭቭሁዳ አሸን አአረኸ ኤፐ ሜዘረታ ባአሳብኋ ተፓ ተሸከቨ ። ²⁸ ኧቭህር ዴንጋ የኧትርካ መላአይካቭ እእስራኤል ኧቨህር ዴንጋ ባየኧትርኮዋይ ብእምነት ኧፋሲካቭ ደቭ ኧፎቾት ቂጫ ጀፐረ ። ²⁹ ሰብሞኋ በደረእ አፍፈር ያርካ አአረኸ ብእምነት ቀይ ባር ወይኦሙ ዎኦሙ፤ኧግብፅቭ ገኘ ሰቭ ጭን ህመኸ ኒንአነዴ ቧርሙ ቢያትዋቁሩዋ አአንዳአአርሁኖዋ ስረሞጩም። ³⁰ ሰቭ ሁኖዋ ኢኢያሪኮ ግምብ ብእምነት ሳቭአት ቀረ ተዦሪ ቀጥወ ወተኧ። ³¹ ተረከቨች ሰቭ ሁጅር ትደምድ ኧረፐረች ረአብ ዩዉሪዳ ምሽት፤ከተማኋ ያታዉሩዋይ ትእስራኤል ገኘ ኧዎሩዋ ሰቭ በወሄ አአር ኧቴኤፐረቸኖዋይ ፤ታይቴኤዘዡዋ ሰቭ እማትሜ አነኧፋች ሁዳ ብእምነትን። ³² አትሁ ትእኩ ኢረእ ምር ንቫር?ኧጌዴዎን አአር፥ኧባርቅ አአር፥ኧሳምሶን አአር፥ኧዮፍታሄ አአር ኧዳዊት አአር፥ኧሳሙኤልቢ እመኸቭ ኧነቢ ሁኖዋ አአር ኖኦራ አአር አኒኢደኸ ግዚየ ኤነኒዳ። ³³ ዋሁኖዋ ብእምነትሁኖዋ ተመንግስት ተዋኮሙ ኤሞሙ፥ቂጥየ ፍርድ ፎጁም ኧቴቨ ኧተስፋ ቃርቴኤፖርሙ ፥ኧዠፕ አፉ ዞጎሙ፤ ³⁴ እእሳድ ደረግ አአፎሙ፥ ተሴፍ አሞሎጩም፥ ተቂጭናሞሁኖዋ ሃአዉሙ ተቁሟሞርሙ ፥በጋዝቭ ቆዋረ ሆርሙ፥ኤኤኛ ገኘ ጋዘኘቭ አዎኦሙ ቃሾሙ። ³⁵ እሽቻ ሁና ኧዎጁዋ ሰቭህና ተረሸናም ፤ ኤኛህናም እመኸ ኢፈዝካ ተቩድ ኣተሸት ቲቭሩዋበአያ ኧምቦርት አታአር አኸረ አአረኸ ቆንጩምታ፤ገግሁኖዋ ኧዉዲ ያሰርአካ ስቃያ አዎኦሙ አአይፖርሙ፤ተሁድብ ነጣ ኢዎኦዋይ አንሴኤዉታ ። ³⁶ አታት ሁኖዋ ኧቅነጨ ሆርሙ ፤ጎሮᎉዮምቭ ፤ኤኛሞሁኖዋ አኮጁም ኦሁኔ ቢድ አጎፖዮም። ³⁷ ብእቭር ዎኮዮም ፥በመጋዝ ዉርኤቲ ዦኦሪዮም ፥በሴፍቭ ዎኮሙ ኦተሪዮሙ፥ ቲድዋኙዋቲትሰተጁዋዪ ቲስቋዩዋቭ ኧጣዪቪ ኧፈኘእቭ ጎጛ ቶሆተሩሙ ዦርሙ። ³⁸ አለም ኧሁኖዋኢኸሪ አትቨቃኖታ።በቨረሃ በረሃ ፎር ፥በቆቶቆቶ ፎር፥ በኸየኸየዪ በጎጀቭ ጎጀ ከስ ተስቋዮሙ። ³⁹ ዋሁኖዋ እንእ እእምነትሁኖዋ አአር ቢሙሶኩርኖም፤ ቢኸርቭ ተሁኖዋ እማትሞሁኖዋ ኧጎፖነዋ ኧተስፋ ቃር ኧቴኤፐረ ኤነዳ። ⁴⁰ እግዜር ኢና ኢረእካ አአር ኤጔኴረንሬ ኧኸሬ ፤ኢና አይቫር ሙርአ ኢሆሩዋይ አይኸኖታ።