¹ ቂጫ ሁዳ ተዋ ቀጥወ ኢቮኦዋታ ሁኖዋይ ጥራርን ባኸሬ ፤ጪግቭ ኧኸረ ገግኋአሃራ።ህመኸ ኧኸረሜ ኧህርቭ ህርቭ እንእ ግዚየ ዪንኤዳ ህትቭ ህትቭ ሁዳ ያቲኢኑዉታ ሰብ ስርም ሙርአ ዪንአኮዋይ አይኸርነዳ ። ² ሙርአ ዪንአኮዋይ ኧኸረነ አአር ተኸረሁ ህትቭ አቶኦኑዉት ባንቸኧዊዳ ? እመኸቭ እም ህትቭ ኢንኧታ ሰቭ አተጋ ስርም አይደቩርኰኸ ኢጠሩሩዋይ ኧኸሬ በቀርብሁኖዋይ ኧባጢረተኘኸ ባሆሩዋታ። ³ ዋ ህትቭ ጭን ኧህርቭ ህርቭ ባጢር ያዞጉጅታኖዋ አአር። ⁴ ኧቭር ቢዩሪ ኧዋዉራዪ ኧፈኘእቭ ደቭ ባጢር ኢፈኢ አይኸነዳ። ⁵ ህመኸ ኧኸረሜ ክርስቶስ ዋ አለም በቫአጋ ዋኸ ባረ፤ «ህትቭቪ መባቭ አንሴኤኧኸዳ ፤ በሰር ጭን ቂትቂጥ ኤፐኸኒ፤ ⁶ ቢረድድካ ህትቭቪ ፤ ኧቫጢርቭ ቲዩሪ ቢያቲኢኑዊዳ ህትቭ፤ አሳረናኸዳ ። ⁷ ሃአ ግዚየ ዋኸ ባሁ፤"ኢያ አአር በመጣፍ ኧጣᎉይመኸ ፤ አምላክኞ እኩ ኢያ አነሁ፤ ኧፍቃዳኸ አአር ኢንአይ ማአሁ።» ⁸ ቂጫ ሁዳ ዋ ዘንጋ ዪንኧዪ ቢዪኢዝዝቭ ፤ሁዳ ጭን አወተረ ፤«ህትቭቪ መባቭ ኢረድድካቭ ህትቭ ኧቫጢርቭ ቲዩሪ ያቲኢኑዊዳ ህትቭ አንሴኤኸዳ ፤በሁድቭ አሳረናኸዳ »ይቭር ። ⁹ ህመኸ ተቫረ ቀጥወ ፤«እኩ ኧፍቃዳኸ አአር ኢንአይ ማአሁ» ባረ ፤ኧዉርኤተኘ ሁዳ ያትሽክቪ አአወተረ ሁዳ ሻረ። ¹⁰ ብእም «ፍቃድ» ኢየሱስ ክርስቶስ ስርም አይደዉርኰ አአር እእማትጋ በቨሰርኋ ህትቭ ህይተዉ በተኧኖዉትኋ ኧቫአ ተቀደስነ ። ¹¹ እንእ ካህን ባጢር ኢፎኡዋይ አይኸርኖዋ ሃአ ህትቭ እንእ ግዚየ ባቶኦኑዉት እንእ ቀረ ተሸከቨ አገልግሎትኋ ያግለግል። ¹² ዋ ካህን ጭን አዘላለም እማት ህትቭ ሁዳ አቴኤነቨታ ፤ብእግዜር ቀነ ቸና ፤ ¹³ ተህም ግዚየ ቆነሺታ ጠራትኋ እንእ ተኧግርኋ በገዳ ቲሆሩዋ ስን ዪኢየ ¹⁴ ኧቭር ቢዩሪ በሃአ ብእማት ህትቭ ሃአ ኢትቆድችሽታ ሁኖዋ ኧዘላለም ሙርአ ኤፐኖም ። ¹⁵ መንፈስ ቅዱስቭ ኧዋ ዘንጋ አአር ኢምሰክርንረ ፤አወተረ ዋኸ ይቭር ፤ ¹⁶ «ተህም ቀጥወ ተሁኖዋ ኧጋአኩዳ ፤ ጉርዳ ዋትነዳ ፤ ይቭር ጎይታ ፤ ቂጫኛ በቀርብሁኖዋ በሂንሁኖዋ አረቭርኩዴ፤ በሂንመሁኖዋ ኧጠፍኩዴ፤ይቭር ¹⁷ እመኸቭ አትቭ ፤ ባጢርሞሁኖዋዪ አመጥሞሁኖዋ ፤ ተዋቴ አናስብካ» ይቭር። ¹⁸ ዋሁኖዋ አ ተዋሪዮዋ ቀጥወ ተዋቴ ኧቫጢር ቲዩሪ ያቲኢኑዊዳ ህትቭ አይረቭርካ። ¹⁹ አካ ኧሰማቶ ብእየሱስ ክርስቶሲ ደቭ ኧቅድስተ ቅዱሳኒ ንጋአኔ ኢኸርንረኸ ንትማመርኔኮዳ ደርግ ነከቭነ ። ²⁰ ንጋአነዳቭ ሁዳ በመዘኔት ሁዳ ህመኸቭ ኧዋርት በቨሰርኋይ አጋድ በከፈደንረ ወያቭቢ ሙድ ኤኖወ መያን። ²¹ ብእግዜር ቢድ ፎር ኧትሾᎀ ኑዕ ኧኸረ ዋና ካህን አነንሬ ኧኸሬ ፤ ²² ተቩጥጥ ቀርብ ንጠርርነኸ ፤ ሂንንራ ተዝረጭተነታ፥ምሲየመንራ በንጡሁ እሃ ታኤቭተነ ፤በቩረ ሂንቪ ሙርአ ተቩርአቭ በታአሞርት እእግዜሪ ንተኧነቭነ። ²³ ተስፋ ኧገፓንረ ሁዳ ኧታአመረ አአር ኧኸሬ ፤አመርነታ ንዝሬኪኔነዳ ተስፋ ጥቅ ነንአነ ንጥጥነ። ²⁴ ገግተገግመንራ ኧርመጀዪ ወሄ ሜናቭ ኦንኧት አአር ኧተኸ ቃዠ ቃዠ ኧዋርት አነቨንረኸ ናጫምጥነ ። ²⁵ አታትሁኖዋ ኦንኧት ኧቸኧዊመኸ ኢናቭ እመኸ ኧትሰዉሶዉትንራ አንቴእኔ ፤ኢረእቭ ቀረኋ ኢሰርአይ ማአ ኧቲኢናነቨኸ ትታዥታ ገግ ተገግመንራ ንትቁሟሞርነ። ²⁶ ኧዉረቭ አአርኋ ተሃርነ ቀጥወ ኸረ ባይተነ ድፈይተነ በቫጢር ቲቭኧተነ ብንዥቫፐርነ ፤ተዋ ቀጥወ ኧቫጢር ኢኸርካ ኤኛ ህትቭ አይረቭርካ ፤ ²⁷ ተሃአ ቀጥወ ኢተርፍካ ሁዳ ጭን እማት ያትፈኝካ ፍርድቪ እእግዜርሜ ባራ ጋራ ኢቨርአካ ጦናᎀ እሳድን። ²⁸ ኧሙሴዪ ቂጫ ኧቀንጠ ማንኝእ ሰቭ ኧቀንጠኸ ዉርኤት ዌ ሶኦስት ሰቭ ሄቶ ቤኤጅኰ ታይቮሪ ዮኦትሪ ባንደ። ²⁹ እህ ባቴ እእግዜር ትከ ኧረከኧ፤ኧትቀደሶወቭ ኧጉርዳ ደቭ ማንኝእማአር ኤፐ ኤቬዘረ፤ኧጠጋቭ መንፈስ ቀጨቀጨ አቴፐ ምርአካ ኧቫአሰ ቅጣት ኧትቆጮት አኖዳ አአር ኢቨስርሁዋ? ³⁰ «ኧቩጥጥ አጅግ ኧዣዉርት ኢያትን አአር ፤ኢያ አጅግ ኧዠፕር፤»ኧቫረ ሁዳ ማን ኧኸረኸ ኒሂርኔ ፤ እመኸ እትቭ «ጎይታ በሰቭኃ ፎር ኢፈርድ»ይቭር። ³¹ በሩኡየ እንእ ግዚየ ቢረቭርካ እግዜር ኧጅ ኧዶኡት ቡሼኧኸ ያትፈኝካን አአር ። ³² ኡዋየ ተዋአነሁዋ ቀጥወ በስቃያ ከስ ኖኦራአአር ጃድ ባሁምታ ተፓሁም ኧትሸከሁኰ ኧድረ ዘቨር ዙጉጁዋ። ³³ አታት ግዚየ በጆፎረ ኧትሰደጅትቪ ኧቂናቨቭ ኸርሁም ባንደ፤ቤኤኛቭ ግዚየ ኧዋኸ ስቃያ ተሰንአዎዋ ሰቭ እማቲስቃያ ቴኤፐርሁም። ³⁴ አሁዋ ገጋሁዋ እእን ግዚየ ኢኸርካ ኧፈዘ ንቭርረደ አነነሁዋታ አአር ኧኸርሁዋኸ ቲሂሩዋይ ኧኸሬ አአኮጂዮዋ ሁኖውዋ ኧጅ ፈታሁም ንቭረድማሁዋ ቲዠርፉኮዋታ በሳርት ቴኤፐርሁም። ³⁵ ህመኸ ኧኸረሜ ኑኡ ዋጋ አነነዳ ኧታአሞርታሁዋ አትቋሹዋ። ³⁶ እእግዜር ፍቃድ መኝኧተሁዋ ቦንኧት ፤ኧተስፋ ቃርኋ ትቴኤፖሩዋኸ ቲቭኧተሁዋ ኧትሶጎዉት አነቨሁዋ፤ ³⁷ ኧቭር ብቱሩዋ ፤ ተቀሪ ግዚየ ቀጥወ ፤ «ኢቫአካ ሁዳ ኢቭአኬ፤አያቲርካ። ³⁸ ፃዲቅ ጭን በታአሞርት ኢረቭር፤ ኢኢኒየቭ ቢያር ነብሲያኛ በሁዳ አይሽርኩዳ።» ³⁹ ኢና ጭን አሞርሙ ቲተርፉታ ሁኖተ ባኸሬ እኢኢኒየ ተዠፖርሙታ ቲዮኦርታ ሁኖዋ አኸርነዳ ።