¹ አአወተራቸ ጉርዳ ያጔኪርኮዳ ቂጫ ታአፈሪ ኣኸረ መቅደስ ባነነደ ። ² ድንኳን አረሸዊ ባንደ፤በአወተራቸ ባንዳ ክፍል መቅረዝ ሁዳ ፤ጠረጴዛቭ ሁዳዪኧህትብሞኋ ያቲኢኑዊዳ ሸረድ ሁዳ ባኖወደ ፤እም ኤኤዲ «ቅድስት» ዩዉሪ ። ³ ተዉርኤተኘቭ መዘኔት ኢኢ አጋድ ቅድስተ ቅዱሳን ዩዉሪዳ ኤኤዲ ባንደ ። ⁴ በሁድቭ ከስ ኢጣን ኢቶኩሽኮዳ ኧወርቅ ኢኢጣን ግቭርቪ፥እንእ አጋድኋ በወርቅ ኦኦፖይ ኧጉርዳ ታቦት ባነዉኮደ ፤እም ታቦትቭ ሁዳ በከስኋ መና አኖዳ ኧወርቅ መሶብ ፤አፍረፈረ አአሮኒ አአርቪ ጉርዳቭ ሁዳ ኧጣፉኰ [ኧፅላት] እቭር ባኖወደ ። ⁵ በታቦትቭ ሁዳ ፎር ባጢር ኢትፋእወዳ ሁዳይ ኡፎድ ኢዠንሩዋታ አአር ኧክብር ኪሩቤል ባኖዉዋተ ፤ዋአካ ጭን ኧዋሁኖዋ አአርእማትእማት ንዝሬክኔ አይኸንረዳ። ⁶ እንእ አአር በዋ አይነት ቁጥ ቁጥ ቤፐዊ ቀጥወ፤ካህናት ሁኖዋ እንአገልግሎትሁኖዋ ያጉሎጉሉዋይ እንእ ግዚየኧድንካን ሁዳ አአአወተረ ክፍል ኢጎኦዋ። ⁷ ዘንጋኋ ጭን ኧድንኳን ሁዳይ ኧከስሪ ክፍል ኢጋአካ ሁዳ እማት ዋና ካህን ሁዳ ባንደ፤ኢጋአካቭ ሁዳ እማት በህርቭ አት ግዚየ ኸረታ፤ኧገግሞኋይ ባጢርቪ ሰቭሞኋቭ ታዪሂርቭ ኤፐን ባጢር ቲቭር ያቲኢንቭኩዳ ደቭ ታይተጥ ስርም ባይጋአካ። ⁸ አአወተራቸ ድንኳን በትሸከቨመኸ ታንዳ አአህር ኣቅድስተ ቅዱሳኒ ኢዎስድካ መያ አች ገና አንትሄረኸ መንፈስ ቅዱስ ያቲሽ ። ⁹ ሁድቭ ኧዋአካ ዘቨር መሰሮ ቲኸርካ ያቲኢኑዉዮታ መባዪ ህትቭቭ ያቲኢንቭካ ሰቢ ሂን ሙርአ ዪንኦዋይ አኸረኖታ። ¹⁰ ዋሁኖዋ እንእ ወያ ቂጫ ቲቫአ ስን ዪንኧዮታ እማት ኧሸረድ፥ ኢሰጪዳቭ አአርቪ፤ እመኸቭ ጨር ኢጠጭኮዳ ቂጫን። ¹¹ ክርስቶስ ዋአካ አኖዉታ ወሄ ዘንጋ ዋና ካህን ኸረ በቫአጋ በሰቭ ኧጅ አኔፐዊ ትእም አፈር አኸረ ሙርአ አኸረ ኑኡየ ድንዃን ከስ ገፓ ። ¹² ኧገፓቭ ሁዳ ኧፈኘእቭቢ ኧመገራቭ ደቭ ጥጭተታ አኸረዳ ዘንጋኋ ጭን አዘላለም ያተርፈንሬ አት አይደዉርኰ አአር እእማተጋ[አአጅባትኃ] ኧገግኋይ ደቭ ጠበጠታ ቅድስተ ቅዱሳን ገፓ። ¹³ ኧሰነሁዋ ሰቭ ኧፎር ሰቭነድሁኖዋ ኢጠርረኸ ፤ኢሁኡኮታኧፈኘእቪ ኧዋዉራቭ ደቭ እመኸቭ ኧፈኘእቪ አአዥቭ አቨድ ኢቀድስኮዋ በኸረ፤ ¹⁴ በዘላለም መንፈሲ አጋድ ገግኋ አወር ኤኖወ ህትቭ ኤፐ እእግዜርኢፍቲ አቴኤነቨ ኧክርስቶሲ ደቭ እንእ ግዚየ ኢረቭርካ እግዜር ናጔኪርነኸ ኧተኸ ሂንንራ ተዎንደ[ተትብላሸ]ሜና ኢረእቭ ያጠርርኩ ኢህርሴ! ¹⁵ ህመኸ ኧኸረሜ ኧሆኖዮዋ ሁኖዋ ተስፋ ኧቴቨኖዋ ኧዘላለም ደረድ ኢቴኤፖሩዋኸ ፤ክርስቶስ ኧገደር ጉርዳ ዋና ኸረ ። ባአወተረ ጉርዳ ከስር ታነዉሙ ቴፐዊ ባጢር ያጠርርኮዋይ ሱጉያ ኸረ ተሸገረ ሞደ ። ¹⁶ አት ኣትራዘችዢ አአር ቲረቭርካ ኧትራዘዢሁዳ ኢኸሪ ኧግርድቭ ሃአ ኧትራዘዘ ሁዳ ቲዎንድ ስን ኦኦሮት ያትሲእ። ¹⁷ እመኸ ኢኸርካ ሁዳ ኑዛዜ ሁዳ ኢኸርካ ፤እማት ምስ ሁዳተወደ ቀጥወን ፤ዘንጋኋጭን ኧትራዘዘ ምስ ባሞዴ ኑዛዜ ሁዳ አታአር አያጔኪርካ። ¹⁸ ህመኸ ኧኸረሜ አአወተረ ጉርዳ ስን ደቭ አይቫር ሙርአ አነፐራ ። ¹⁹ ሙሴ ኧቂጫ ሁዳይ እዝዝ ኧሰቭኋ እንእ እማት እማት ተዝሬከ ቀጥወ ኧመገራ ፤ደቭ ትእሃ ፤ተቭሻ ኧጣይ ጉንኧርቪ ተሂሶፕ እራኧረታ ወሰደ በመጣፍቪ በሰቭ ሁኖዋ ፎር ሆኧንቭ፤ ²⁰ እመኸቭ ባረኖም «እግዜር ቱኡሮይኸ እኤዘዘናሁዋ ኧጉርዳ ሁዳይ ደቭ ዋዳን።»ባረታ፤ ²¹ እመኸቭ ድንኳን ሁዳዪ ያጉሎጉልኮታቭ ግቭር ሁኖዋ እንእ ደቭ ፍረታዎም። ²² ኧዉረቭ በሙሴ ቂቻ አይነት ተቅሪ ዘንጋ አይቫር እንእ አአር በደቭ ኧጥረርት አኖኸ ዪኢዝዝ ፤ደቭ ታይትሁእ ባጢር አይትፋእካ። ²³ አካ ዋ ኧሳቫዪ ዘንጋ መሰሮ ኧሆሩዋ ሁኖዋ ኣግድሞሁኖዋ በዋ ዘንጋ ኧጥረርት ባኖዎተ ፤ዘንጋኋ ጭን በሳቫይ አኖዉታ ሁኖዋ በዋ ቢረእካ ህትቭ ኧጥረርት አኖዎዋ። ²⁴ ክርስቶስ ኧዉረሚየ ድንኳኒ መሰሮ ኧኸረዪ፤ በሰቭ ኧጅ አረሸዊ ቤተ መቅደሲ አገፓዳ፤ዘንጋኋ ጭን ዋአካ ኢና ቲቭር ብእግዜር ኢፍቲ ኢትረከቪ፤ኧዉረሚ ድንኳኒ ኧሳቫዪ፤ገፓ። ²⁵ ዋና ካህን ሁዳ ኧገግኋ አአር አኸረ ደቭ ጠበጠታ ኧህርቭ ህርቭ ፤ቅድስተ ቅዱሳን ኢጋአመኸ ፤ህመኸ ክርስቶስ ገግኋ ህትቭ ዪንአይ ኖኦራ ግዚየ ኧሳቫዪ አገፓዳ። ²⁶ ሃኸ ኧኸረ አአር ተኸረ ክርስቶስ አለም ተትፈጠረ ቅርሽተዊታ ኖኦራ ግዚየ መከራ ኧተኦወርት ባትኬሸን ባንደ። ዋአካ ጭን በዘቨረ ያርእወዳ ገግኋ ህትቭ ኧኝኧተታ ባጢር ኢፈኢ አት አይደቭሩቨ አአር እእማተጋ ተረከቨ ። ²⁷ ብብ አት ግዚየ ኢዎንድመዪ ተህም ቀጥወ በፍርድ ኢፍቲ ኢትሸከቪ ተፈንደወ ። ²⁸ እመኸቭ ክርስቶስ ኧሮኦራ ሰቪ ባጢር ኢፌንጊ እማተጋ ህትቭ ኸረ፤ኧዉርኤተኘቭ ገዚየ ኢቫአኬ ፤ኢቫአካቭ ሁዳ ባጢር ኢፌንጊ ታይኸር ኧሁዳይ ኦኦት ዩኡሮታ ሁኖዋ ያተርፍኮኔ።