¹ ሳዉል ጭን ዋአካቭ በክርስቶስ አአሞሩዋ ሰቭ የኧትሪ ቲያጫቅስ ኧዋና ኧካህን አላቃ ሁዳይ ወረ፤ ² እኧጎይታቭ መያ ኢትሄተርታ እሽቻዪ ገማቭ በሃይ በረከቨ ኧግጅተ ኢየሩሳሌም ኢወስቲ ፤ኢኸነኸ በደማስቆ አነዉዋታ አአይሁድ ኧጠሎት ቢድ፤ ወረቀት ኢዊኸ ፤ኣዋና ኧካህን አላቃ ሁዳ ሳአረን ። ² b ³ ደማስቆም ኢሰርአይ ቀሪ ኤኤዲ ቲተርፍኩዳ ኧጠንቃር ተሳቫይ ኑኡየ ብርሃን በዙሪያኋ ብልጭ ባረወ፤ ⁴ ሁድቭ ባአፈር ወንደ ወተኧ፤ህም ግዚየ ፤«ሳዉል፥ ሳዉል ኧቭር ታትሳትዴ?» ይቭካ ቃር ሰምአ ። ⁵ ሳዉልቭ «ጎይታኞ አኸ ማንተንኸ ?»ባረ ተሳአረን ።ድድቭ «ኢያሽ አኸ ታትሳትዴዳ ኢየሱስንሁ ። ⁶ ዋአካቭ ተሳታ ፤ኧከተማ ሁዳይ ግቭአ፤ ኦንኧት አነቨኸዳ አአር ያአዉጅከሴ» ባረን። ⁷ ተሳዉልቭ እምቲ መያ ያሩዋ ኧረፖሩዋ ሰቭ ፤ቃርኋ ባኸሬ ኢዝሬካ አትቭ ሰቭ አናሸዉዋይ ኧኸሬ አፉሁኖዋ ጠቦጩም ተሸኮም ። ⁸ ሳዉልቭ ተወተኧወ ኤኤዲ ተረሳታ፤ ኤርኋ ቢከፍት ኤርኋ አናዥካ ባረን፤ህመኸ ኧዀረሜ ተሁዳ ኣረፖሩዋ ሰቭ ጠቦጩም ቲሾዊ ደማስቆ አጎፖዪ። ⁹ ሶኦስት ቀረ ስን ፈንጠ ፤ሸረድቭ ኧህር ፥እሃ አንቀመሰዳ ። ¹⁰ በደማስቆም ፤ ሀንኒያ ዩሪዳ አት ኧክርስቶስ ተማሪ ባነደ ፤ጎይታቭ ብራእይ «ሃናኒዮ »ባረ ኸናንቭ ።ሁድቭ «ጎይታኞ አነሁ »ባረ ። ¹¹ ጎይታቭ «ተሳታ ሰተድ መያ ቢዩሪዳ መያ ፤ ዩሁዳ ዩሪዳ ምሲ ቢድ ሆር ፤በህሜ ሳዉል ዩሪዳ አት ኧጠርሴስ ምስ ጠሎት ዪንአይ ኧኸሬ ሴእኩ ፤ ¹² እመኸቭ ቲንአካ ሁዳ ሐናኒያ ዩሪዳ ምስ ሁዳ አኖዳ ኤኤዲ ሜኧተ ኧጅኋ ያድግወመኸዪ ኤርሞኋ ኢትከፈድመኸ ፤ብራእይ አሼ ኧኸረዴ »ባረን። ¹³ ሐናይያቭ ዠፐረታ «ጎይታኞ ዋ ምስ ብኢየሩሳሌም ባነዉታ በክርስቶስ ባአሞሩዋ ስቭ ምርአህር ምካት አሰንአሕኸ በሮኦራ ሰቭ ሰምአሁ ፤ ¹⁴ እመይቭ ኧቫአ ሁዳ ሹዋኸ ኢሆሮታ ሁኖዋ እንእ ያአግዲ ተካህን አላቃ ሁኖዋ ዳኝነድ ቴኤፐረታነዳን »ባረን ። ¹⁵ ጎታቭ ኧሐናኒያ «ሆር ዋ ምስ ባአረማዊ ሰቭቪ በንጉስቭ ሁኖዋ ኢፍቲ እመኸቭ ብእስራኤል ሰቭ እንእ ኢፍቲ ሹቭኛ ኢፌንጒ ኧትሸፐተ ግቭርነኛ ። ¹⁶ ኢያቭ ኧሹቭኛ ቲቭር ምርአካ ምካት ኧተኧወርት አኖወኸ አተሽኩሴ»፤ባረን። ¹⁷ ሐናኒያቭ ወረ ኣዋሪ ቢድ ገፓታ ፤በሳዉል ፎር ኧጅኋ አተገወታ፤ ኧሰምኛ ሳዉሎ ዋይ ትትቫአካ በቨያ ኧትራከቨናኸ ኢየሱስ ፤ኤራኸ ኢትከፈድመኸዪ፥በመንፈስ ቅዱስ ትትቬንአመኸ ኬሸዪ »ባረን ። ¹⁸ ህመጋ ተሳዉሊ ኤር ፎር ሃራ ኢቨስርካ አአር ወንደ ወተኧ ፤ሐአቨ ኤርኋ ኦዥት ኸረነ ፤ተረሳቭታ ተጠመቀ ። ¹⁹ ሸረድቭ በንአታ ተቁሟᎀረ ።ሳዉልቭ በደማስቆ ታነዉዋታ ተክርስቶሲ ተማሪ እማቲ ኖኦራ ቀረ ስን ቸና ። ²⁰ ህመጋቭ ኢየሱስ እእግዜር ትከ ኧኸረ ባአይሁድ በጠሎት ቢድ እንእ አአዉጅት ቀነሰ ። ²¹ ኧሰምኦዪ ሁኖዋ እንእ «ዋ ምስ ብእየሩሳሌም ዋሹቭ ይሆሮታ ሁኖዋ ያአፋ ኧረፐረሽ አአር አሃረዳ ?አትቭ እሜ ኣቫአ ሁዳ ሁኖዋ ኧግጅተ ኧዋና ኧካህን አላቃ ሁኖዋይ ኢወስድኮዋይ አነፐራ?»ቧርሙ። ²² ሳዉል ጭን ቲትፓፓ ወረ ፤በደማስቆም ኢረዉርታ አይሁድ ፤ኢየሱስ ሁዳ ኢቫአኬ ኧዋሪ ክርስቶስ ኧኸረኸ በሮኦራ መርኸት አጬገ ቲዪኢድኮዋ አፉሁኖዋ ያተጥኮዋ ባንደ ። ²³ ተሮኦራ ቀረ ቀጥወ አይሁድ ኧሳዉል ዮኦትሪ አዶሙም ፤ ²⁴ ሳዉል ጭን አሳብሁኖዋ ሃረ፤ሁኖም ዮኦትሪ ዋአና ምሳአረ ፤ኧከተማሁኖዋ ዩዎኦኮዳ ኡፎቻ ዩኡሮዋ ባንደ ። ²⁵ ቢኸረቭ ኧገግኋይ፤ ተማሪ በቭሳአረ ትእቭር ግምብ ፉረ ተፉረ አስረነጩም በቀጫት አዎንጂ። ²⁶ ሳዉልቭ ኢየሩሳሌም በቫአጋ ፤ተክርስቶሲ ተማሪ ኢደመዲ አትቫቀረ፤ሁኖዋ ጭን ጪግቭ በክርስቶስ ኦኦዎርትኋ አናአሞርኰይ ኧኸሬ ፈኘዊ። ²⁷ ቢኸርቭ በርናባስ ኧክርስቶስ ኪሸረኜ በታ አቫአን ፤ሳዉልቭ ጎይታ በቨያ ቲያርካ ኧተኸ ኧትራከቨንመኸዪ፤ጎይታቭ ኧተኸ ኧዝሬከነኸ ፤በደማስቆም ብኢየሱስ ሹቭ ኧተኸ ታይፈይቭ ኧሰበከመኸ ኤኤደኖም ። ²⁸ ህመኸ ኧኸረሜ ሳዉል ተሁኖም እማቲ ቸና ፤ብእየሩሳሌምቭ ቲዦዉር በጎይታ ሹቭ ታይፈይቭ ኢዝሬክ ባንደ። ²⁹ ተግሪክቭ ገኘ ተዎኦዋ አይሁድ ቲዝሬክ ዉርጀ ኢቴኤድ ባንደ ፤ሁኖዋ ጭን ዮኦትሪ ያትዋቁሩዋ ባንደ ። ³⁰ በክርስቶስቭ አአሞሩዋ ኧሰማት፤ ዋ ዘንጋ በኋሩውዋጋ ፤ቂሳሪያ አወንጂታ ጠርሴስ ኬሸዊ። ³¹ ሃአ ግዚየ በይሁዳ፥በገሊላዪ፥በሰማሪያቭ አነዉዋታ ቤተ ክርስቲያንቭ በሽኛት ኦምቦርት ቆነሹም ፤ተትፗፖምቭ ።እመኸቭ እግዜር በፉረዉት ቲዥዋፖሩዋ ፤በመንፈስ ቅዱስ ፤ቲትቁሟᎀሩዋ ፤በቡዝር ቲደዉሩዋ ዎርሙ። ³² ጴጥሮስቭ ታአት ገኘ ኤኛ ገኘ ኢዝዋዎር ኣረፐረ ግዚየ ፤ልዳ ቢዩሪዳ ኤኤዲ ኢረዉሩዋ ኧረፖሩዋ በክርስቶስ አአሞሩዋ ሰቪ ያዥኮዋይ ወንደ። ³³ በህሜ ኤንያ ዩዉሪዳ ሱዉት ዘቨር እንእ በግዲየ ኢረቭርካ አት ሰቭነድኋ ኧሸተረወ ምስ ነከቨ ። ³⁴ ጴጥሮስቭ «ኤንዮ ፤ኢየሱስ ክርስቶስ አፊያ ዪንአኸዴ ተሳታ ኧትገተርኸወ ኤኤዲ ንሳ »ባረን ።ኤንያቭ ህመጋ ፈተክ ባረ ተረሳ ። ^{35 35} በልዳቭቪ በሰሮናቭ ኢረዉርታ ሁኖዋ እንእ ምስ ሁዳ አሸዉምታ ኧጌታ ኢየሱሲ ተዠፖርሙ። ³⁶ ብኢዮጴም ጣቢታ ዩሪያዳ አት ኢኢየሱሲ ተማሪ ባነቸ፤ጣቢታቭ ኧዋርት «ዶርቃ ዌ ጒይምበ »ኧዋርትን ፤ሂድቭ እንእ ግዚየ ጃድ ባረች ወሄ አአር ቦንኧትቪ ፤ኧዚጋቭ ትታአግዝ ትረቭር ባንደ ። ³⁷ በህም ግዚየ ኤመናታ ሞደች ፤ሰቭቭ ሁኖዋ ኒሳሻ አኦዉም በፎቅ ፎር ባንዳ ክፍል አወኖዪ። ³⁸ ልዳቭ እኢዮጴ ኢቴኤነቪ ኧረፐሬ ኧኸሬ ፤በክርስቶስ ሰቭ ፤ጴጥሮስ በልዳ አነኸ ብኋሩዋጋ ፤ዉርኤት ሰቭ ኬሾሙታ ፤ካች ባር ኢናይ የኸ ቧርሙ ሳአሪ። ³⁹ ጴጥሮስቭ ተሁኖም ተረሳ ወረ፤ ህሜ በሰንአጋ፤ በፎቅ ፎር አነዳ ክፍሊ አዎኦዪ ፤ገማቭ ኧዎንደና እሽቻ ህን ዶርቃ ተህና ኧረፐረች ግዚየ ኧትኸተረቸኖዋ ቃቢሳዪ ሁጅርቭ ቲያቲሻይ ሞረሞረኋ ኸፐቫዪታ ኢቨሃ ባንደ ። ⁴⁰ ጴጥሮስቭ እንእቨኋ ተክፍልሁዳ አዋአታ በጉርቨድኋ ሙግ ባረ ጠሎት ኤፐ ፤ኧሪሳቭ ሁዳይ ኤፐ ዦረታ «ጣቢታ ተሸ» ባረ ።ሂድቭ ኤርሻ ከፈደች ፤ጴጥሮስ ባሸች ቀጥወ ተረሳች ቸናች ። ⁴¹ ሁድቭ ኧጅሻ ጠበጠ ነሳና ፤በክርስቶስ አአሞርሙ ሰቭቪ ገማቭ ኧዎንደና እሽቻ ህና ተነብሲያመሻ አአይፐረናም። ⁴² እም ዘንጋ በዉርአ እዮጴ እንእ ተሄረ ፤ኖኦራቭ ሰቭ በክርስቶስ አሞርሙ። ⁴³ ጴጥሮስቭ ብኢዮጴ አት ስምዖን ቲዩሪዳ ጎጓ ቲፈእካ ምስ ኖኦራይ ስን ቸና።