¹ በቂሳሪያ ከተማ በጣሊያን ወታደር ግት፤ኧቨኧር አላቃ ኧኸረ አት ቆርነሌዎስ ዩሪዳ አት ምስ ባንደ ፤ ² ሁድቭ ታአንዳ ቢደ ሰቭመኋ እንእ በመንፈስ ዘንጋ እንእ ያቱዋቁርታዪ፤እግዜርቭ ኢፈይካ ፥ተዋጋሞኋ ኧሰቭቭ ዪቭካዪ እንእ ግዚየ እእግዜሪ ጠሎት ዪንአካ፤ሰቭ ባንደ። ³ አት ቀር ዋአና ዢኧ ሳአት ኢኸርካ ግዚየ ፤እእግዜር መላአይካ ብራእይ ኧሁዳይ ማአታ ፤«ቆርነሌዎስ !»ባረ ቲኸራኩዳ ኧዉየሞኋ አሸ ። ⁴ ቆርነሌዎስቭ በድሪእት ቱኩ ኤፐ አሸንታ«ምር አፈድን ?»ባረን ።መላአይካቭ ሁዳ ፤ጠሎትማኸዪ ኧዚጋቭ ቲቭኩዳ ሁዳኸ እንእ ግዚየ ኢትዘከደኸ እእግዜሪ ሰንአነኸ። ⁵ ዋአካቭ ኢዮጴ ሰቭ ከሽታጴጥሮስ ዩሪዳ ኧስምዖን ቢዳሄ አትቫአኩ፤ ⁶ ሁድቭ በቫር ሞሬ ባንዳ ጎጛ ቢፈእካ በስምዖኒ ቢድ ኧቫዘርነድ ቸና ። ⁷ ቆርነሌዎስቭ አዝራይከን መላአይካ ተሁዳ ተቫይተረ ተወረ ቀጥወ ፤ተቬነኘኋ ዉርኤትሁኖዋዪ ፤እመኸቭ በመንፈስ ዘንጋ አትቫቀረዪ ፤ኧሁድቭ ሙርቴ ኧኸረ አት ጋዘኘኋ ኢሆሮዮኸ ኤፐ ፤ ⁸ ኧኸረቭ ሁዳ እንእ ተኤደኖዋ ቀጥወ ኢዮጴ ኬሸኖም ። ⁹ ኧኬሸዉዮም ሰቭ በቭረጋኋ ኧከተማሁዳይ ሞኦም ቲሰርኧታ፤ጴጥሮስ ግት ዋአና ኢኸርካ ግዚየ ጠሎት ዪንአይ ኧፎቂ ዋአ ። ¹⁰ ህም ግዚየ ኧጋደኒ ኧኸሬ ኢቨርአካ አአር ሴኧታ፤ሸረድቭ ቲጌኪርነታነዊ ኧዊኢንደኸ ቃብጭ ኤፐንታ እርዕይ ኦዥት ቀነሰ ። ¹¹ ሳቫይ ተከፈደታ አት ኑኡየ ጨርቅ ኢቨስርካ አአር ፤አርቭአቸ አጋድ ዊድኋ ጠቦጪታ አአፈሪ ኤፐ ቲዎትካ አሸ ። ¹² በሁድቭ ባርቭአት ኧግርሁኖዋ ያርታ ቡችር ቡችር እንሰሳ ፥በዳታሁኖዋ ኢትሻዉታ ፍጥረትቪ፥በሳቫይቭ ኢዎርርታ አፉ ባነዉኮደ ። ¹³ ብህም ግዚየ «ጴጥሮሶ ተሳታ ዋሁኖዋ ኧጥ ብርአ »ይቭካ ቃር ኧሁዳኒየ ማአ ፤ ¹⁴ ጴጥሮስ ጭን «ጎይታኞ እሸኸ አይኸርካ ፤ኢያ ኧዋ ብኢፍቲ አንትቀደሰ ፤ዌ ኧንነከ አርር ስርም ብይኧተሁ አሂርካ» ባረ ። ¹⁵ ህም ቃር አት ኧዉርኤተኘ ግዚየ ኧሁድሜ ማአ ፤«እግዜር ንጡሁ ኤፐን አአር አኸ አኸ ኧሰነኸ አአር ኧኝኧተኸ አትቨዝር» ባረን ። ¹⁶ እም ቃር አትቭ ኧሶኦስተኘ ግዚየ ደፐረወ ማአ፤ጨርቅቭ ሁዳ ህመጋ ኧሳቫይኒየ ወሰጂ። ¹⁷ ጴጥሮስቭ አሸን በርዛዝ አአር ምር ኧኸረኸ ተጨነቀ ቲያጫምጥቭ ታነ ፤ቆርነሌዎስ ኧኬሸኖዋ ሰቭ ኧስምዖኒ ቢድ ሴኧዉም በረኮዊ ቀጥወ ፤ሞኦም ቡኡፉቻ ተሸኮም ¹⁸ ቃርሞሁኖዋ ነሾምታ ጴጥሮስ ዩሪዳ ስምኦን ዋይ አነ ዌ ቧርሙ ተሳአርሙ ። ¹⁹ ጴጥሮስቭ እርዕይሁዳ አእር ቲጫምጥ ታነ ፤መንፈስ ቅዱስ « እኩ ሶኦስት ሰቭ ኢሱኡኰ»ባረን፤ ²⁰ ህመኸ ኧኸረሜ ተሳታ ዉረድ ኧኬሸሁኖምቭ ኢያ ኧኸርህኊ ኧኸሬ ታትቭራከግኮም ተሁኖም ሆር ባረን። ²¹ ጴጥሮስቭ ወንደታ «እኩ ትሱኢዳ ምስ ኢያትንሁ ኧቫአሁኰ ሁዳ ምርአፈድን ?ኧቫአሁኮ ሁዳ አዉጅኝ »ባረኖም ። ²² ሰቭ ሁኖዋ «ኧቫአነ ቆርነሌዎስ ቲዩሪዳ ተቨኧር አላቃኔን ሁድቭ ፃዲቅቪ እግዜርቭ ኢፈይካ ባአይሁድ ሰቭ እንእ ኧትከበረዳን አአር።አኸ ቢድኋይ ያቫአኸመኸዪ አኸቭ ትቭኩዳ ሁዳ ኢሰቭአይ ቅዱስ መላአይካ ኤኤደን» ²³ ጴጥሮስቭ ሰቭ ሁኖዋ ያቫይዝርኮይ ቢድ አገፓኖም ።ጴጥሮስቭ በቭረግጋኋ ተረሳታ ተሁኖም እማቲ ወረ፤ትኢዮጴም ኧዎኦዋ አታት ኧሰማት ተሁድቭ እማቲ ዎርሙ። ²⁴ በሶኦስተኘቭ ቀረ ቂሳሪያ ገፓ፤ቆርነሌዎስቭ ኧሰማትሞኋዪ ኤኛቭ ዶቦኋ ስቨሰቨ ይእየኮዋ ባንደ ። ²⁵ ጴጥሮስቭ ኧቆርነሌዎሲ ቢድ በገፓጋ ፤ቆርነሌዎስ ቴእኤፐረን ፤በኧግርሞኋይ ወተኧ ሰገደነ ። ²⁶ ጴጥሮስ ጭን «ኢያቭ አኸመኸ ሰቭንሁ ተሳ» ባረታ ነሳን። ²⁷ ጴትሮስቭ ተቆርነሌዎስ ቲዝረኩዋ እማቲ ቢድ ቲጎኦታ በቪድ ኖኦራ ሰቭ በደመደ ኤኤዲ ነከቨ ፤ ²⁸ ጴጥሮስቭ «አት አአይሁድ ሰቭ ቴኤኛ ሰቭ እማትነድ ኤነነኸ ፤ኢቲኢናነቭሜ ቂጫንራ አዪቭመኽ አሁም ቲሂሩዋ ፤ዘንጋ ጭን ኢያ ማንኝእሞኋ ኧትቀደሰዳን አአር ዌ ኧሰነኸዳን አአር አንረኸ እግዜር አቴሸዪ ። ²⁹ ህመኸ ኧኸረሜ በሆኖኝጋ እኩ ፤ንሆር አንሆር፤ ታንርቭ ማአሁ፤ባቴ ኧቭር ኧሴኧሁኘኸ ኧሂሪ ኧሲእ»ባረኖም ። ³⁰ ቆርነሌዎስቭ «ነቭኧትራ ህም በዋ ሳአት ዋአና ዢኧ ሳአት ኢኸርካ ግዚየ በቪድኛይ ጠሎት ትኒንአካ ኧጠነቃር ቡሼኧኸ ጓድ ሁጅር ኧትኸተረ ሰቭ ኢኢፍትኛይ ማአ ተሸከቨታ፥ ³¹ «ቆርነሌዎሶ ጠሎታኸ ተሰምአነኸ ፤ኧዚጋቭ አዉታኸ ትትዘከድወኸ ብእግዜር ኢፍቲ ሰንአ ። ³² ኢዮጴ ሰቭ ከሽታ ጴጥሮስ ዩሪዳ ስምኦን ህራ አትቫአ ፤ሁድቭ በቫር ምዬ ባንዳ ፤ጎጛ ቢፈእካ በስምኦኒ ቢድ በቫዘርነድ ቸና። ³³ ኢያቭ ህመጋ ኬሸቨከ ፤አኸቭ ኦኦታኸ ወሄ አአር ኤፐኸ ።ባቴ ኢና እንእቨንራ ጎይታ ኤኤዘዘናኸ ሁዳ እንእ ቲኢደንሬ ብእግዜር ኢፍቲ አነነ»ባረን ። ³⁴ ጴጥሮስቭ ዋኸ ቲቭር ኧዘጉት ቀነሰ «እግዜር እእማትቭ ሰቭ ኢፍት አያዠኸ አጬግሁ ሃርሁ፤ ³⁵ ዘንግጋኋ ጭን ኧሁዳ ኢፎርታዪ ወኸዪቭ ሜና ዪንኧታ ሁኖዋ እንእ ማንኝእ ዶቦ ቢሆሩዋ ኢቴኤፐርኮዋ። ³⁶ እግዜርቭ እእንቨኋ ጎይታ በኸረ ብእየሱስ ክርስቶሲ አጋድ ኧኬሸንኧወገሬት ወሄ ዋራይ እመዳምን ። ³⁷ ዮሐንስ ተዝሬከን ጥምቀት ቀጥወ ተገሊላ ቆነሺታ ብአንዳበይሁዳ እንእ ኧኸረሁዳ እንእ ቲሂሩዋ ። ³⁸ እግዜር ኧናዝሪት ኢየሱስ በመንፈስ ቅዱስቪ በደረግቭ ቅባት ኧፓንቭ ፤ሁድቭ እግዜር ተሁዳ ኧረፐሬ ኧኸሬ ፤በወረወ ኤኤዲ እንእ ወሄ አአር ቲንአ በሴጣንቭ ኧታአኮጁዋ ኧረፖሩዋ ሁኖዋ እንእ አፊያ ኤፐ ። ³⁹ ሁዳ ባአዩህድ ገኘዪ ብእየሩሳሌምቭ ኤፐነዋ ሁኖዋ እንእ ኢና ሄቶንረ። ሰቭ ኧሁዳ ቤኧ ሶርሙ ኦተሪ ። ⁴⁰ እግዜር ጭን በሶኦስተኘ ቀረ ተቩድ ነሳን፤ያዢመኸ ኤፐ ።ተድድቭ ተትረሳ ቀጥወ ፤አሸንቭ እንእቨኋ ታይኸር ፤ተሁድቭ እማትሜ በንአነ ኧሰጨነ ፤እግዜር በተረ ኧሸፐተንረ ኧምስክር ኢናትን ። ⁴¹ ኧሰቭ እንእ ንዝሬክነመኸዪ በአያቭ ባንዳ ሁዳዪ በዎንደቭ ሁዳ ኢፈርዲ እግዜር ኧሾመን ሁዳ ኧኸረኸ ንምሰክርነኸ ሁዳ ገግመኋ ኤዘዘንረ ። ⁴² « በሁዳብ ያአቭርካ እንእን ባጢርኃ እንእ በሹቭኋ አፉ ኢትቬረኸ ነቢ ሁኖዋ እንእ ዪኢጅነ ።» ⁴³ ጴጥሮስቭ እመኸ ባረ ቲዝሬክ ታነ ቢሰቩኦታ ሁኖዋ እንእ መንፈስ ቅዱስ ወንደዎም። ⁴⁴ ጴጥሮስ ዋ ዘንጋ ቲዝሬክቭ ታነ ቃርኋ ቢሰቭኦታ ሁኖዋ እንእ መንፈስ ቅዱስ ሜንአኖም ። ⁴⁵ ተጴጥሮስ እማቲ ኦዎኦዋ ብእየሱስ አአሞሩዋ አአይሁድ ሰቭ በክርስቶስ ባናአሞሩዋ አረማዊ ሰቭ ፎር መንፈስ ቅዱስ ኧቬንአኖዋይ ወግ ኸረዎም ። ⁴⁶ እመዳቭ ኧኋሩዋ ሁዳ በልሳን ቲዝረኩታዪ እእግዜርቭ ሽኩርት ቲያቲኢንዉታ ኧሰምኦዮቴ ። ⁴⁷ ህምግዚየ ጴጥሮስ «ዋ ሰቭ ኢናመኸ መንፈስ ቅዱስ ኧቴኤፖሩዋይ ኧኸሬ ኢጠሞቁዋይ ኢኸርአኮታ ሁዳ ማንተን ?»ባረ ተሳአረ። ⁴⁸ ህመኸ ኧኸሬ ብእየሱስ ክርስቶስ ሹቭ ኢጠሞቁዋኸ ኤዘዘኖም ።ተህም ቀጥወ ኧጴጥሮስ ኧቀሪ ቀረ ስንተሁኖዋ እማቲ ኢቸናኸ ሳአሪ።