¹ ሳዉልቭ እስጢፋኖስ ኢዎንደኸ ተስምአምአ ባንደ ።በህም ቀረ በኢየሩሳሌም ባንዳ ቤተ ክርስቲያን ኑእ ምካት ተረሳ ባንደ ፤ኧክርስቶሲ ኪሸረኘ ሁኖዋ ባኸሬ ኤኛ በክርስቶስ አአሞሩዋ ሁኖዋ እንእ በዩሁዳዪ በሰማሪያቭ ገኘ እንእ ተብራጮም ባንደ ፤ ² አታት በመንፈስ ዘንጋ ጃድ ዩዉርታ ሰቭ እእስጢፋኖስ ቡሼኧኸ ቤከዉነታ ᎂከዊ። ³ ሳዉል ጭን ቤተ ክርስቲያን ያአዪ ታአከደ ተረሳታ ቢድ ቢድ ቲያር ዴንጋዪ ግርኤድቭ ሻቨ አዋአ ኦሁኔ ቢድ ያቲኢኪድ ባንደ። ⁴ እም ኧትዉራጮም ሁኖዋ በዎርኰ ኤኤዲ እንእ ቃርኋ ዝሬኮም ፤ ⁵ ፊሊጶስቭ አት ኧሰማሪያ ገኘ ወረታ ፤ ኣክርስቶስ አአር ኤኤደኖም ። ⁶ ኖኦራ ሰቭቭ ፊሊጶስ ኧዝሬከን ዘንጋዪ ኤፐንቭ ወግ ወግ ኧሆሩዋ መርኸት ቲያዥታ እንእቨሁኖዋ ፤ብእማት ሂን ሆሩም ኢሰቭኦይ ባንደ ፤ ⁷ ተረኦራቭ ሰቭ ሴጣን ኮ ቲቩሩዋ ዎኦም፤ ኖኦራቭ ጅረዪ ሰቭነድመሁኖዋ ኧሸተረዎዋ ሰቭ አፊያ ሆርሙ፤ ⁸ በህም ኧቫአ ከተማኋ እንእ ቡሼኧኸ ሳረን ። ⁹ ዘንጋኋ ጭን ኧሃ ኢፍቲ በከተማኋ እንእ በሽጎርነድኋ ኧሰማሪያ ገኘ ሰቭ እንእ ወግ ኧኸረወ አት ሲሞን ዩሪዳ አት ምስ ባንደ ፤ሁድቭ ገግኋ ኢያ ኑኡንሁ ባረ ይቭር ባንደ ። ¹⁰ እስቭ ኑኡሞኋ እንእ ሰቭ «ዋ ምስ ኑኡን ቧርሙ ዩሪዳ እእግዜሪ ደረግን» ቧርሙ ጭን ቧርሙ ኢሰቭኦይ ባንደ። ¹¹ ተሮኦራ ግዚየ ቆነሺታ በሸጎርነድኋ ወግወግ ዘንጋ ኤፐ አሸቴኖዋይ ኧኸሬ ተሂንሁኖዋይ ኢትሄተሪ ባንደ ¹² ዘንጋኋ ጭን ፊሊጶስ እእግዜር መንግስት አአርቪ ኢኢየሱስ ክርስቶስቭ ወሄ ዋራይ አአር ኤኤደኖምታ አሞርሙ አቴኤፖርዋይ ኧኸሬ ገማዪ እሽቻ ተጠሞቁም ። ¹³ ሲሞን ገግሞኋ ዳር ታይተርፍ አመረታ ተጠመቀ፤ሁድቭ ፊሊጶስ ተሄተረ ወረታ ዪንአኮታ መርኸትቪ ወግወግ ዘንጋቭ አሸታ ወግ ኸረወ ፤ ¹⁴ በኢየሩሳሌም ኧረፖሩዋ ኧክርስቶሲ ኪሸረኘ ፤፤ኧሰማሪያ ሰቭ እእግዜር ቃር ኧቴኤፖሩዋኸ በሰምኦዋጋ ጴጥሮስቪ ዮሃንስቭ ኧሁኖዋይ ኬሸቩዮም ። ¹⁵ ሁኖም ሰማሪያ ገኘ በሰንኦዋጋ ኧሰማሪያ ሰቭ መንፈስ ቅዱስ ኢቴኤፖሩዋኸ ጠሎት ኤፐዉኖም ፤ ¹⁶ እመኸቭ ኧኸረሁዳ ሰቭ ሁኖዋ ሃ ግዚየ በጎይታ ኢየሱስ ሹቭ ተጥገሞቁም ባንደ ባኸሬ ገና ባአትሞሁኖዋ ፎር መንፈስ ቅዱስ አምቦንደዎዋ ባንደ ። ¹⁷ ህመኸ ኧኸረሜ ጴጥሮስቪ ዮሐንስቭ ኧጅሁኖዋ አተግኮም ፤ሁኖም መንፈስ ቅዱስ ቴኤፖርሙ ። ¹⁸ ሲሞንቭ ኪሸረኘ ሁኖዋ ኧጅሁኖዋ በሰቭ ፎር ቲያድጎዋታ ሰቭ መንፈስ ቅዱስ ኢቴቨኸ አሸታ ፤ፈራክ በታአቫአኖምታ ፤ ¹⁹ «ኢያቭ ኧጅኛ አድግወዳ ሰቭ እንእ መንፈስ ቅዱስ ኢቴኤፐረኸ ዋ ዳኝነድ ኢያቭ አዉኝ»ባረኖም ። ²⁰ ጴጥሮስ ጭን «እእግዜር ስጥጦታ በዋጋ ትሲዬ አጫመጥሄ ኧኸሬ አኸ ተፈራክማኸ እማቲ እረዉዋ ! ፤»ባረን ። ²¹ ሂናኸ ብእግዜር ሚዬ ወሄ አአር አናጫመጤ ኧኸሬ አኸ በዋ አገልግሎት እድልቭ ኸረ ሟር ኤነነኸዳ ባረን። ²² ዋአካቭ ኧዋ ሙጥጥ ሜናኸ ንስሓ ግቭአ ፤እእግዜርሜ ጠሎት ኧንአ ፤ወይ አትንሽ እግዜር ፤ዋ ኧሂናሄ አሳብ አፉ ኢቫኸሴ ። ²³ እመኸቭ እቭኸዳ ሁዳ በቩጥጥ ባይትዠፐር ሂን ኸርኸ ባመጠኘ ቁጥቋጨ በታአከድሔ አዥሄ ኧኸረዴ ። ²⁴ ሲሞንቭ ዠፐረታ« በዋ በቫሁዮዋ ሁኖዋ እንእ አታአር አይሰርአቪኸ እእግዜር ሳአርኒ» ባረኖም ። ²⁵ ጴጥሮስቪ ዮሃንስቭ ፤ኧጎይታ ቃር ተሙሶኮርሚ ኮፎጁም ተዝሬከዉዋ ቀጥወ፤ በሮኦራ ኧሰማሪያ ቃያ ኧክርስቶሲ ወሄ ዋራይ ቲዪኢጁዋ ፤ኢየሩሳሌም ተዠፖርሙ። ²⁶ እእግዜር መላአይካ ኧፍሊጶስ «ተሳታ ተጉራ አጋድ ተኢየሩሳሌም ጋዛ ኤፐ ቢወስድካ ኧበረሃ መያ ሆር »ባረን ²⁷ ሁድቭ ተረሳ ወረ ።ህኩ አት ህንደኬ ዩሪያዳ ኢኢትዮጲያ ኑጝስ ኧዋጋመሻዪ ኧንቭረድመሻ እንእ አላፊ ኢኢትዮጲያ ገኘ [ዉጪባ] ጃንደረባ ምስ ነከቨ ። ምስቭ ሁዳ ኢሰግዲ ኢየሩሳሌም ገኘ ማአ ባንደ ። ²⁸ እም ምስ ገኘኋ ኢትዮጲያ ቲዘፐርካ በሰረገላ ቸና ኧነቢ ኢሳያስ መጣፍ ያረብብ ባንደ ። ²⁹ መንፈስ ቅዱስቭ ኧፍሊጶስ ሆር ኧሃ ሰረገላይ ተኧነቭ » ባረን ። ³⁰ ፍሊጶስቭ ካች ባረ ኧሰረገላ ሁዳይ ወረ ፤እም ዉጪባ ምስ ሁዳ ኧነቢ ኢሳያስ መጣፍ ቲያረብብካ ሰምአንታ «ተሁርትሞኋ ታረብብኩዳ ሁዳ ኢጋአሄ ?»ባረን ³¹ ዉጪባቭ ምስ ሁዳ «ያአግዜዳ ሰቭ ቤኔ ማሃ ኤፐ ኢጋአይ?»ባረን።ተሁድቭ በሰረገላ ሁዳ ፎር ወኤተ ኢቸናኸ ሳአረን። ³² ዉጪባቭ ምስ ሁዳ ያረብብኩ ኧረፐረ መጣፍ ፤ «ኧጣየኸ ያጪ ሻቩም ወሰጂ፤ ኧጣይ ሙቁወኘ ድገርኃ ቢሩኢዳ ሰቭ ምዬ እቁስ ይቭርመኸ ፤እመኸ አፍኋ አከፈደዳ ። ³³ ገግኋ አትዋረዴ ቂጥየ ፍርድ ሆንኧዪ፤ ነብስኋ ታአፈር ፎር አአፎዪ፤ ኧዘርኮኋ አአር ማን ዪኢዲ ኢኸነ?»ይቭርካ አዘር ባንደ ። ³⁴ ዉጪባቭ ምስ ሁዳ ኧፍሊጶ ፤«ሃበዳሽ አዉዴ ፤ዋ ነቢ ኢዝሬኩዳ ሁዳ ኧቫንተን አአር ?ኧገግነኋ አአርዪ ዌ ኤኤኛ ሰቭን አአር?ባረን ። ³⁵ ፊሊጶስቭ ሃአ ግዚየ አፉኋ ከፈደታ ኧዘጉት ቀነሰ ፤ትእም ቲኢሳያስ መጣፍ ቆነሺታ ኢኢየሱስ አአር ኤኤደን። ³⁶ በቭያቭ ቲያርሙ ታነዉዋ እሃ አኖዳ ኤኤዲ ሰንኦም፤ ዉጪባ ምስ ሁዳ «እኩ እሃ ዌእኤዲ አነ ፤ኣትጠመቂ ኢኸርአይዳ አአር ምር አነ »ባረን ። ³⁷ ፊሊጶስቭ «በዉረ ሂናኸ ባአመርኸ ትትጠመቂ ኢትቨቃነኸ»ባረን ። ዉጪባቭ ምስ ሁዳ «ኢየሱስ ክርስቶስ እእግዜር ትከ ኧኸረኸ አአቭር ባረ ዠፐረነ ። ³⁸ ሰረገላቭ ሁዳ ያትሸኩዊኸ ኤዘዘ ።ተህም ቀጥወ ዉርኤቸመሁኖዋ እማቲ እእሃ ሁዳይ ዎይኦምታ ፤ፊልጶስቭ ኧዉጪባ ምስ ሁዳ አጠመቀን ። ³⁹ ትእሃቭ ሁዳ ተዎኦዋ ቀጥወ ኧፊሊጶስ እእግዜር መንፈስ ነጠቀ ነሳ ወሰደን፤ዉጪባቭ ምስ ሁዳ ተሃ ቀጥወ አናሸንዳ ፤ቢኸርቭ ቡሼኧኸ ቲሽርኩ መያኋ ቀነሰ ። ⁴⁰ ተሃ ቀጥወ ጭን ፊሊጶስ በአዛጦን አሸዊ ፤ቂሳሪያቭ ቲሰርአ ስን በመያኋ አነዉታ ከተማ እንእ ኧክርስቶሲ ወሄ ዋራዪ ዪኢድኮዋ ባንደ ።