¹ እግሪጳቭ ኧጳዉሎስ ፤«ኧገጋኸ አአር ትዝሬኪ ተፈቀደነኸ»ባረን፤ህም ግዚየ ጳዉሎስ ኧጅኋ ዝራካታ ፤ዋኸ ባረ ኢቴኤድወዳ ቃርኋ አአይፐረ፤ ² ንጕስ አግሪⶑ አይሁድ ቢያ ፎር አቴኤነዊ ክስስ እንእ ኦኳ ቢኢፍታሄኧቴኤድወዳ ቃርኟ አቴኤንቪ ኧቨቃሁይ እያ ኑእ አአር አኸረኒ አአህር ኤፐሁ አዥኩ፤ ³ እመዳቭ ኢረእካሞኋ አኸ አይሁድ ኧርወሸዊ ሁዳዪ ክርክር ሞሁኖዋ ምር ኧኸረኸ ጌከርኸ ቲሂሪ ኧኸረዴ ፤ህመኸ ኧኸረሜ ጭን ባይተኸ ትሰቭአዪ ኧሰኧርኸ ። ⁴ ተዴግነድኛ ቆነሺታ በገኘመኛ ኧህር ብእየሩሳሌም ገኘ ኧተኸ ኧረፐረሁኸ አይሁድ እንእ ይሂሩዋ ፤ ⁵ እመኸቭ ተሮኦራ ግዚየ ቆነሺታ ኢሂርኚ ኧኸርሬ ኢኢጁዋይ በሴኧዉዋ ኧሃይማኖትንራ አአር ቡሼኧኸ ቢያጠቡቁታ ሰቭ ዶቦ ግት ኸርሁታ አአት ኧፈሪሳ ሰቨኸ ኸርሁ ኧረፐርሁኸ አአዉጁዋ። ⁶ ዋአካቭ ኮሰሽኝታ ዌኤዲ ኧትሸከሁ ሁዳ እግዜር አአቦንራ ኧገፓን አአር ተስፋ ኤፐሁዴ ። ⁷ አስረ ዉርኤቸ ጥቭ ዋአናዪ ኧዳርቭ እግዜር ተሂንሁኖዋይ ቲያጔኪሪ፤ ቲኸርካ ያዢ ያትዋቁርነዳ ሁዳ ዋዳን። ንጕሶ አይሁድቭ ኢኮስሽኝዳ ሁዳ እእም ተስፋን ። ⁸ ሁድሞኋ እግዜር ኧዎጁዋ ሰቭ ኦሸት አይኸነ አአረኸ ኤፐሁም ታጫሞጭታ ሁዳ ኧቭርአፈድን? ⁹ «ኢያቭ ገግመኛ ኧናዝሪት ኢየሱሲ ሹቭ ቢኸርኒዳ መያ እንእ ኧትጋፋይ አንጥሁወ ባንደ፤ ¹⁰ ብእየሩሳሌምቭ ኤፐሁን ሁዳ እመዳምን፤ተካህናት አላቃይ ዳኝነድ ቴኤፐርሁታ ኖኦራ በክርስቶስ አአሞሩዋ ሰቭ በኦሁኔ አቴኤከድሁ ፤ቲዮኦትሪዮታቭ ተስማአምአሁም። ¹¹ ኖኦራቭ ግዚየ አትቄጣኮዋይ ታአት አአይሁድ ኧጠሎት ቢድ ኤኛ አአይሁድ ኧጠሎት ቢድ ዦርሁበግርድ ኢትቃኖዉዋኸ ኢንአ ባንደ ፤ቡሼኧኸቭ ማአቸሁታ ኤኤኛቭ ገኘ ከተማይ ስን ተሄተርሁኖምታ አትሳትድኮዋ ባንደ። ¹² እመኸቭ ኢንአይ ትናርካ አት ቀረ ተካህናት አላቃ ሁኖዋይ እእዝዝ ወረቀት ቴኤፐርሁታ ደማስቆ ትናርካ ፤ ¹³ ንጕሶ በግት ዋአና በቨያ ታነሁቭ ቢያዪ ቲያቭ እማቲ ቢያርታ ሰቭ ትእንቭ አጋድንራ ቱኡዋየ ኢረእካ ያበራካ ኡዋየ ተሳቫዪ ቲያበራካ አሸሁ። ¹⁴ ህም ግዚየ እንእቨንራ ባአፈር ወንድነ ወተእነ ፤ኢያቭ ብእብራይስጥ ሰቪ አፉ«ሳዉል ሳዉል! ኧቭር ታትሳትዴ?ኢዎጎኮዳ ሁዳ ብትገፋኩ አኸ ኢረእ ትትጎዳኬ »ይቭሬዳ ቃር ሰምአሁ። ¹⁵ «ኢያቭ ጎይታኞ አኸ ማንተንኸ ?»ባሁን።ጎይታቭ ዋኸ ባረዪ«ኢያ አኸ ታትሳትዴዳ ኢየሱስንሁ!። ¹⁶ ፤ዋአካቭ ተሳታ በኧግራኸ ተሰገቭ ፤ኢያአአር አሸኸንቭ ሁዳዪ ትእም ቀጥወቭ ታዥኩዳ ሁዳ አአር አገልጋይ ትኸርመዪ ስስክርቭ ትኸሪ ኧሾምሄ ተራከከ ¹⁷ ተገግማሄ ሰቭቪ ኧሁኖሜ ኧኝአተሁ ትንኬሽኸዳ ሰቭ አተርፍኸዴ፤ ¹⁸ አኸቭ ኤርሁኖዋ ትከፍትኮቴ ፤ተጠነቫቭ ኡኡዋዬ፤ ተሰይጣንቭ ዳኝነድ እእግዜሪ ትዠፕርኮቴ ፤ሁኖም ባጢርሁኖዋ አፉ ኢትቬርቴ ቢያቭ አሞርሙ በትቆደሹዋ ሁኖዋ ግት ደረድ ኢረሁዉቴ። ¹⁹ « ባቴ ንጕስ አግሪጶ ፤ተሳቫዪ አሸሁን እራእይ ባአይ አምባኋ ፤ ²⁰ ዘንጋኋጭን አወተረ በደማስቆ ከተማ ኢረዉርታ ሁኖዋ ተህም ቀጥወ ብእየሩሳሌምቪ በይሁዳአነዉታ ሁኖዋ እንእ ፤ተህም ቀጥወ አአዛብ፤ንስሃ ኢጎኦዋመኸዪ እእግዜርሜ ኢትዠፖሩዋመኸ ኧንስሃቭ ቡስር ያፎሮዋኸ [ንስሃቭ ኦጉዉኦትሁኖዋ በቬና ያቲሹዋኸ] ከፈድሁ ዝሬኮሁኖም። ²¹ በህም ኧቫአን አይሁድ በቤተ መቅደስ ጠቦጩም ዮኦትርኝ ኧረፐረሁዳ። ²² ኧጎይታቭ እገዠ ዋአካቭ ስን ቲያ አናራኤ ኧኸሬ እኩ ዌእኤዲ ተሸኮሁታ እእስ ኧሩኡሞኋ ኧምሰክር ፤ነቢያትቪ ሙሴም ኢኸርኬ ቧርሙ ተዋሪ ሁዳ ኤኛ አአር አታአር አኔኤድኋ ፤ ²³ ሁድቭ ክርስቶስ መከራ ኢቴኤፐርመኸዪ ተዎጁም ሁኖዋ ኢኢፍቲ ብደይተ ተሸተኣሰቭምኋዪ አአዛብቭ ብርሃን ኢሰብክምነኸ ።» ²⁴ ፊስጦስቭ ኧጳዉሎሲ ዘንጋ በዋከ ያትሸክቨኸ ኤፐንታ ፤ቃርኋ ነሳታ «ጳዉሎሶ ሂናኸ ባረናኸዪ? ኖኦራ አአር ኧትሟርት ሽርርር ኤፐናኸ»ባረን ። ²⁵ ጳዉሎስ ጭን ዠፐረታ «እኧትከበርኸ ፊስጦሶ ኧዝሬኩዳ ሁዳ ኧዉረ አንዳ አአር ባኸረሼ ሽረኘሽ አኸርኋ ። ²⁶ እም ኧዝሬኩዳ ዘንጋ ንጕስ ሁዳ ኢሂርኩ ኧኸሬ ቢኢፍትኋይ አፉኛ ሜንአሁ ኧዝሬክ።አትቭ ዶኦርሙ ኤፐዊ አአር አታአአር ኤኔ ኧኸሬ እም ዘንጋ እማትቭ ታይተርፍኩ ኢሂርኩኸ ኧሂር። ²⁷ ንጕስ አግሪጶ በነቢ ሁኖዋ ታአቭርሽአሃራ?እከ ታአቭረኸ ኧሂር!» ²⁸ አግርሪጳቭ ኧጳዉሎስ ዋኸ ብእሲየ ግዚየ ክርስታን ቲንአይዳ አአር ኢቨስርሄ?»ባረን። ²⁹ ጳዉሎስቭ «ብእሲየቭ ግዚየ ኧህር በሮኦራ ግዚየ እማት አኸ ታትኸርቭ ኢሶዉኦኝዳ ሁኖዋ እንእመሁኖዋ እማት ኢያኸ አይታአጎጁዋ ባኸሬ ኢያመኸ ኢሆሩዋኸ ኧሰኣር »ባረ። ³⁰ ተህም ቀጥወ ንጕስቭ ሁዳ፥ኧህም ገኘ ዳኘሁዳ ፥በርኒቄም፥ተሁኖም ኧቸኖዋ ሁኖዋ እንእተረሾሙ። ³¹ ተህሜ ተረሾሙ ዎኦሙ ቲያርታ «እሽ ምስሽ ኧዉድ ያሰርአኩዳ አአር አታአአር አኔፐዳ»ቴቬርሙ። ³² አግሪጳቭ ኧፊስጦስ «ዋ ምስ ዘንጋኛ ቄሳር ኧዥኩ ባይተ ባይር ቢጎፉሪ አትቭ አነፐሮዳ»ባረ።