¹ ፊስስጦስ ገኘኋ ተገፓ ተሶኦስት ቀረ ቀጥወ ቂሳርያ ተረሳ ኢየሩሳሌም ዋአ ። ² ኧካህን አላቃ ሁኖሚ ኧይሁዳቭ ዳኘ ኧፊስጦስ ኢፍቲ ሞኦም ኧፓዉሎስ ኮሰሺ ። ³ ኧጳዉሎስ በቨያ ተደኧይተዉዋ ዮኦትሪ ኧሴኧዉዋይ ኧኸሬ ፊስጦስ አሁኖዋ ያድባፕርኖዋመኸዪ፤እየሩሳሌምኢቫአኸ ዪንአኸ ቡሼኧኸ ሳአሪ ። ⁴ ፊስጦስቭ ዋኸ ባረ ዠፐረኖም፤«ጳዉሎስ በቂሳርያ ኦሁኔ ቢድ አኮጂ ሃይ አነ ፤ኢያቭ በዋ ግት ሃአይ አርኬ፤ ⁵ ህመኸ ኧኸረሜ ተዳኛሁዋ ግት አታትሁኖዋ ቲያቭ ኦኦምታ ምስ ሁዳ አአፋን ኢፋድ በረፐረ ክስሳሁዋ በሃይ የሁም አተኧንዉዋ።» ⁶ ፊስጦስ ተሁኖም ሱዉት ቀረ አአህር ተቸና ቀጥወ ፤ቂሳርያ ወረ በቭጋጋሞኋ ቢፎርጅድዳ እድዲ ቸናታ ኧጳዉሎስ ያዎኣይኸ ኤዘዘ። ⁷ ጳዉሎስ በቴኤነቨጋ ትእየሩሳሌም ኧዎኦዋ አይሁድ ትእንቭ አጋድ በግት አጎፖሙ ሆፖዊታ አታአር ኤነ አአር ኖኦራ ክስስ አቴኤነዉኰ ። ⁸ ጳዉሎስቭ ፤«ኢያ ባአይሁድቭ ቂጫ ኧህር በቤተ መቅደስሁኖዋ ዌ በቄሳር ፎር አአፋሁን ኢፋድ ኤንዳ »ባረታ ኢቴኤድወዳ ቃርኋ አአይፐረ ። ⁹ ፊስጦስቭ አአይሁድ ሁኖዋ ወሄ ኢዎኦርኮዋይ አሸታ ፤ኧጳዉሎስ «ኧዋ ዘንጋ አአር እየሩሳሌም ሆይተኸ ቢያ ኢፍቲ ትቴኤድሰዪ ?»ባረን። ¹⁰ ጳዉሎስቭ ዋኸ ባረን፤«ዋአካቭ ቢኸር ኢያ ቂጥየ ፍርድ ቢረሁኮዳ በቄሳር ወንበር ኢፍቲ ተሸከሁ ፤አኸ ገግማኸ ቲሂርኩመኸ ባአይሁድ ሰቭ ፎር አቴ ኢፋድ አናአፋኋ ፤ ¹¹ ቢኸርቭ ጭን ኧዉድ ያሰርአካ ኢፋድ ባአፋሁ አንዉድ አንቭካ፤ዋ አአይሁድ ሰቭ ያቲኢንዉኮኝዳ ክስስ ጭን አንዳ አአር አኸረ በኸረ ኢያ ኧሁኖዋ ኤኤተ ያአይፒሬዳ አትቭ ሰቭ ኤንዳ ፤ቄሳር ኧፍርዴ ባሁ።» ¹² ፊስጦስቭ ተመካሪኋ ተትምካከረ ቀጥወ ፤ቄሳር ኧፍርዴ ኧቫሄ ኧኸሬ ኧቄሳሪ ታርኬ»ባረን። ¹³ ተቀሪ ቀረ ቀጥወ ንጕስ አግሪጳዪ በርኒቄም ኧፊስጦስ ቦሄም ገፓኸ ዩዉሪ ቂሳርያ ዎጅም። ¹⁴ በህሜ ኖኦራ ቀረ ቸኖም ፊስጦስቭ ኧጳዉሎሲ ዘንጋ ነሳታ ኧንጕስ ሁዳ ዋኸ ባረ ትትጮደን፤«ንጉሽ ፊሊክስ ቦሁኔ ቢድ ኧቸኧን አአር አት ምስ ዋይ አነ ፤ ¹⁵ እየሩሳሌም በወርሁጋ ኧካህን ሁኖዋይ አላቃዪ ኧይሁዳቭ ባሪቅ ኧፈርድወኸ ኮሰሺባንደ ። ¹⁶ «ኢያቭ ኦኮሰሺሁዳ በኮሰሺ ሰቭ ኢፍቲ ተሰጌተ መልስኋ ታይዠፕር[ቃርኋ ታያአይፕር] ኤኤቶዉ አአይዉርት ብእሮማ ገኘ ስርም ኧርወሸዊ አአር አኸረኸ ኤኤድ ሁኖም። ¹⁷ ህመኸ ኧኸረሜ ኧኮሰሺ ሰቭ ቲያቭ ዋይ በዎኦዋጋ ፤ዘንጋኋ ኖኦራ አአር ነገ ሰስተ ታንኩ በቭርጋኋ ብንፈርዱወዳ ኤኤዲ ቸናሁታ ሃአ ምስ ያዌኤኸ ኤዘዝሁ ። ¹⁸ ኧኮሰሺም ሰቭ ተረሾሙ ተሸኮሙታ ቲዝሮኩኩታ ሃኸ ኢያ አጫመጥሁንኸ ኖኦራ ኢፋድ አኔኤጅኮዳ፤ ¹⁹ ኢረእካሞኋ ኧገዛ ሃይምኖትሁኖዋ አአርቪ ሞደቭ ኧረፐረ ጳዉሎስ ጭን አነ ይቭኩዳ እእየሱስ አአር ኢትኩራኮሩዋ ባንደ። ²⁰ ኢያቭ ዋ ዘንጋ ኧተኸ አዥኩኸ ግራ ኧገፓዪ ኧኸሬ እየሩሳሌም ሆይተ ኧዋ ዘንጋ አአር ኢቴኤዲ ኢረድ አይረድ ተሳአርሁን። ²¹ ዘንጋኋ ጭን ጳዉሎስ ዘንጋዃ ንጙስ ቄሳር ኧዥኩ ኧቫሬ ኢያቭ ኧቄሳሪ ቲያር ስን ኦሁኔ ቢድ ኢእክሰኸ ኤዘዝሁ።» ²² አግሪጳቭ ኧፊስጦስ «ኢያቭ ዋ ምስ ቲዝሬካ ኧሰቭአኲ ኧሲእ ባንደሽ !»ባረን።ሁድቭ «አካ ሁድሽ ነገ ትስቭአኩሴ!» ባረን። ²³ በቭረጋሞኋ አግሪጳዪ በርንቄም በሩእ ክብር ሞኦሙታ ፤ተሩእ ኑእ ዳኘዪ ተከተማሞኋ ኑኑእ ሰቭ እማትሜ ኢሱዎሶዉኮዳ አዳራሺ ሞኦሙ ጎፖሙ፤ፊስቶስቭ ኤዘዘታ ጳዉሎስቭ ኢቫአኸ ኤፖዊ። ²⁴ ህም ግዚየ ፊስጦስ ዋኸ ባረ፤«ንጕስ አግሪጶ እመኸቭ ዌኤዲ ቲናቭ እማቲ አነሁዋታ አሁዎ፤ዋ ምስ ታዢዪ? ብእየሩሳሌምቪ እሜበቄሳርቭ ኢረዉርታ አይሁድ እንእ፤ዋ ምስ ተዋቴ ኧዉጅት ባኸሬ ኦምቦርት ኤኖዳ ቧርሙ ኮ ቲዩሩዋ ሳአርኝ ። ²⁵ ኢያቭ ኧዉዲ ያሰርአኩዳ አአር አታአአር አኔፐኸ ሃርሁ፤ቢኸርቭ ጭን ዘንጋኛ ንጕስ ቄሳር ኧዥኩ ኧቫሬ ኧኸሬ እሮማ ገኘ ኤኬሽኲ አንጥሁ። ²⁶ ዘንጋኋ ጭን ኧሁዳ አአር ጪግቭ ሃዳን ባይተሁ ኧጌታኛይ ኧጠፍካ አአር በከርሁ።ህመኸ ኧኸረሜ ተትሳአሪ ቀጥወ ኧጠፍካ አአር ኧረህቨኸ ብእንቫሁዋ ኢፍቲ ኢረእካሞኋ በንጕስ አግሪጳ ባኸ ኢፍቲ አቴኤነሁን፤ ²⁷ ሁድቭ አት ኣታአከደ ሰቭ በቭር ኣቫአ ኧኮሰሺኸ አናአዉጅት ፤ወሄ አአር ኣረዳ ባሁ አጫመጥሁዴ።»