¹ ታአምእስት ቀረ ቀጥወ ዋና ካህን ሐናንያ ሁዳ፤አታት ባሪቅቪ ጠርጡለስ ቲዩሪዳቭ አቦካቶ እማቲ ቂሳርያ ወንጁም። ገኘኃ ኢገዛካ ንጕስ በጳዉሎስቭ ፎር ዪኢጅኮዳ ሁዳ እንእ አቴኤነዉነ። ² ጳዉሎስቭ ሆኖዪታ በቴኤነቨ ቀጥወ ፤ጠርጡለስ ዩዉሪዳ አቦካቶ ሁዳ ዋኸባረ ክስስኋ አቴኤነቨ «ኧትከበርኸ ፊልክሶ ባኸ ዘቨር ኧሮኦራ ሰቭ ወገሬት ኸረነ ፤ኧሮኡይ አአር ኧኋርትማኸ ኧዋ ሰቭ ኢፈዘኸ ኤፐን ። ³ ዋ ኤፐኸን ውሄ ሜናኸ እንእ ግዚየ ቤኤድ ኤኤዲ ተወሄ ምስጋና ንቴኤፐርኔነከ። ⁴ ዘንጋኋ ጭን ኖኦራ አአር አናቂጥኸኸ ቀሪ አአር ቲሽርኸ ትሰቭአየኸ ንሰኧርኔከ። ⁵ «ዋ ምስ በአለም ባነዉታ አይሁድ እንእ ግት ባአሸ ኸረታ መራክስ ኢረሳካዪ፤እመኸቭ ናዝራዊ ዩሪታ ሰቪ ዋና መሪ በኸሬ ነከቭነዪ ። ⁶ ተሁድቭ በፎረ ቤተ መቅደስንራ ያሰንሂ ቲያትቫቅርካ ነከቭነ ጠበጥነዪኧቂጫመንራኸ ንፈርድኔኴ አሸነ ባንደ፤ ⁷ ዘንጋኋ ጭን ጋዝ ዪኢዝዝካ ሉስዮስ ማአታ በሩእ ደረግ ተኣጅንራ ነጠቀ ወሰደን፤ኢኮስሺዳቭ ሁኖዋ አሄ ኢዎኦዋይ ኤዘዘኖም ። ⁸ ባቴ አኸ ገግማኸ መርምርኩታ ኧከሰስኔኰ ዘንጋዉረ ኧኸረኸ ትሃርሴ።» ⁹ አይሁድቭ ዘጋኋ ኧዋሪምነኸ ቧርሙታ አኮዡምታ በኰሰሺሁዳ ተስማምኦም። ¹⁰ ገኘሞኋ ኢገዛካ ንጉስ ሁዳ ኧጳዉሎስ ኢዝሬኪ አጋ ባቨንጋ «ጳዉሎስ ዋኸ ባረ ዝሬከቃርኋ አቨ ፤«ተሮኦራ ዘቨር ቆነሺታ ኧዋ ሰቭ ትፈርደኸ ኧሂር ፤ህመኸ ኧኸረሜ ኧቴኤድወዳ ቃርኛ አአይፒርካ ሁዳ ቲሽሬን። ¹¹ ኢያቭ እእግዜር ኧሰግዲ እየሩሳሌም ኧወርሁ ሁዳ ታአስረ ዉርኤት ቀረ ኢፍቲ ኧኸረከ አኸ ገግማኸ ኖራ አአር ታትቂጥ ታጪግኲ ኢከነኸ። ¹² ኢኮስሽኝዳቭ ሰቭ በቤተ መቅደስ ታአትሞኋ ትንክራከርካ ዌ አይሁድ ቢደሞጅኮዳ ቢድ ከስ ኧህር በቭኝኧ ኤኤዲ ሰቭ ትንሳሳካ አናሽዉኝዳ ። ¹³ ዋአካቭ ኧትከሰስሁወ ዘንጋ ያቲኢሙርኮዳ አአር ያቲኢኑዉታ አአር ኤነኖታ ። ¹⁴ ቢኸርቭ ሁኖዋ ኑፋቄ ቢዩሪዳ ፤በጎይታ መያ አአቦኛ እግዜር ኧሰግድ። ¹⁵ ኢያቭ ኧዋ ሰቨኸ እንእ ፃዲቅቪ ባጢረተኘቭ ሰቭ ተዉድ ኢትረሾዋኸ ብእግዜር ተስፋ አነኒ። ¹⁶ ህመከ ኣኸረሜ በሰቪ ብእግዜርቭ ኢፍቲ ጥርር ሂን ኢረቭሬኸ እንእ ግዚየ ጃድ እቭር። ¹⁷ «ተሮእኦራ ዘቨር ቀጥወ ኧዶቦኛ ኢቪ እእግዜር ዪዊዳ መባ ጠበጥሁ እየሩሳሌም ማአሁ። ¹⁸ ሁኖም በቤተ መቅደስ ኢጠርርኮዳ ቂጫ ትንጀፕርካ ነኮዉኝ ኧሰቭ መራክስቭ ኧህር ቃሽቃሽትቭ አታአር አነፐራ። ¹⁹ ዘንጋኋ ጭን ትእስያ ገኘ ኧዎኦዋ አታት አይሁድ ቲያ ዘንጋ አነኖዋ በኸረ ባኸቭ ኢፍቲ አአዉጅኮኝ፤ ²⁰ ዌ በዋኸ አኖዉታ ዋሁኖዋ ቦኦጎት ኢፍቲ በቴኤነሁጋ ኧረኮኮኝ ኢድድ በረፐረ አአዉጁዋ ፤ ²¹ በግትሞሁኖዋ በትሸከሁጋ ተዝሬከሁን ኧዎጁዋ ሰቭ ኧተሸት አአር ባኸሬ ኤኛ አአር ኧትከሰሰሁወ አአር እንዳ። ²² ፊልክስ ጭን እእግዜር መያ ጀፐረ ኧሀሬ ኧረፐሬ ኧኸሬ፤«ጋዝ ዪኢዝዝካ ሉስዮስ ቲቭአካ ዘንጋሁዋ አሸሁንኸ አአውድሁዋሴ»ባረታ በጎቸ አሬኧን። ²³ ተህም ቀጥወ ኧቨኧር አላቃሁዳ ኧጳዉሎስ ቀሪ አአር ቲግፈፍርነ ይእየኩመኸዪ ናማጂሞኋ ቲዎኦታ ጊቭኣተዉዋ ኢትሳአሪኸ ኢፈቅድነኸ ኤዘዘን። ²⁴ ተቀሪ ቀረ ቀጥወ ፊልክስታአይሁድ ገኘ ምሽትሞኋ ተድሩሲላ፤እማቲ ሞኦሙ፤ኧጳዉሎስቭ ኢሆሬየኸ ኤፐታ በክርስቶስ ኢየሱስ ኦኦዎርት አአር ቲዝሬካ ሰምአን። ²⁵ ጳዉሎስ ኧፅድቅ አአር፥ገግ ኧጉዦት አአር ፥ኢቫአካቭ ፍርድ አአር ቢዝሬክ ፊልክስ ፈኘታ«ኣዋአካኋ ዋዳ ኢቃሴ ቲትመቼዳ አትሄራኸሴ ዋአካ ጭን በሳረናኸ ሆር»ባረን። ²⁶ ተጷዉሎስ እሹዋ ኢቴኤፐሪ ዙጐ ባረታ እንእ ግዚየ ኢሆሮነታ ያዝራይኩ ባንደ። ²⁷ ተዉርኤት ዘቨርቭ ቀጥወ ፤በፊልክስ ኤኤዲ ጶርቅዮስ ፊስጦስ ተሸገረ ፤ፊልክስቭ አአይሁድ ኢሽርኮዋኸ ቲቭር በታአከደመኸ ቸኧንቭ።