¹ ጳዉሎስቭ ኦኦጎት ኧትደመደ ሰቪ ኤፐ ቱኩ ኤፐ ቲያዝ፤«ኧሰማቶ ኢያ ዋጣህሪ ስን ብእግዜር ኢፍቲ በጥርር ሂን ተዥቫፐርሁ »ባረ ። ² ህም ግዚየ ዋና ካህን ሐናንያ ዩዉሪዳ ሁዳ በጳዉሎስ ምዬ ኧትሸኮዉዋ ሰቭ ኧዉሎስ አፉኋ ድርጒ ባረኖም። ³ ጳዉሎስቭ ኧዋና ካህን ሁዳ«አኸ በወዋረ ኦኦፖይ ዘግሮ እግዜር አኸቭ ኢደርግኸዴ፤ኧቂጫኋኸ ትፈርድቪ በቸናኸሜ ቂጫ አይቫር ኧደነግኸዪ ኧኸሬ አኸቭ ገጋኸ ቂጫ ጣስኸ »ባረን ። ⁴ ኧጳዉሎስቭ ምዬ ኧትሸውዉዋ ሁኖዋ ኧጳዉሎስ «ደፈርኸታ ኧዋና ካህንትቀርቪ?» ቧሪ። ⁵ ጳዉሎስቭ ፤«ኧሰማቶ ዋና ካህን ኧኸረኸ ባኋርትነኛ፤«በሰቫኸ ዳኘ ፎር ሙጥጥ ቃር አትዘይግ» ቧርሙ ጣᎉ። ⁶ ጳዉሎስቭ ሰቭ ሁኖዋ ግትሁኖዋ ኧሰዱቃ ሰቭ ግትሁኖዋ ኧፈሪሳ ሰቭ ኧሁሮዋኸ ኧሃሬ ኧኸሬ ፤«ኧሰማቶ ኢያ ተፈሪሳ ገኘ ሰቭ ኧቴኤኘሁ ኧፈሪሳ ሰቭንሁ፤እሜኤዲ ኧፍርድ አቴኤነዉኝ ሁዳ ኧዎጁዋ ሰቭ ኢትረሸቴ ባሁ ተስፋ ኤፐሁዴ »ባረታ በኦጎት በደመደ ሰቭ ምዬ አኸና። ⁷ እመኸቭ ባረ ቢዝሬክ በፈሪሳ ሰቭቪ በሰዱቃቭ ሰቭ ግት መራክስ ተረሳታ ፤ኦኦጎት ኧትደመደቭ ሰቭ ዉርኤቲ ተሻከደ ። ⁸ ኧሰዱቃ ሰቭ ኧዎጁም ሰቭ አይትረሾምቪ መላአይካቭ ኧህር መንፈስቭ ኤነዳ ቲዉሩዋታ ፤ኧፈሪሳ ሰቭ ጭን ዋሁኖዋ አነዉዋኸ ያአዉርታ አአር ባኖዉተ ። ⁹ ቡሼእ መራክስ ተረሳ ተፈሪሳ ሰቪ አጋድ አታት ኧሙሴ ቂጫ አስተማሪተረሾሙ ተሸኮዉምታ «በዋ ምስ ፎር እማት ኢፋድ አነከቭኔኮዳ መንፈስ ዌ መላአይካሁ ዜግተንታንዳሁ በኸረ በቭር ኋሪ ?ቧርሙታ ቡሼኧኸ ቴኤጁም። ¹⁰ መራክስሞኋ ቲትራእ ኧወሬ ኧኸሬ ጋዝ ዪኢዝዝካ ምስ ሁዳ ፤ ኧጳዉሎስ ሰቭ ሁኖዋ በቩጣጠሺ ባረ አታነኧታ ፤ኧወታደርኋ ዉረጁምታ ኧጳዉሎስ ተግትሁኖዋ ንጡቁም ኦኦዪታ ኢትዋኮኮዳ ኤኤዲ ዉስጂ ባረኤዘዘኖም። ¹¹ በቭረጋሞኋ ሱቢ እረርኧ ጎይታ ኧቭይየኋይ ተሸከቨታ «ጳዉሎሶ፤አይዞዋኸ ብእየሩሳሌም ኧምሰከርኸኒመኸ እመኸ ብእሮማ ከተማቭ ኧመስኩርት አነቨኸ »ባረን። ¹² ጋእ ቲቭካቭ አይሁድ ተደሞጁም አትቯቾምታ ጳዉሎስ ቲዎድ ስን እማት ሰቭ እሃቭ ኧህር ሸረድ ባይቀምሲ ተታኞሙ ። ¹³ እመኸ ቧርሙ አትዋቾዋ ሁኖዋ ታአርቭአ ሰቭ በፎረ ባኖዉተ ። ¹⁴ ሁኖም ኣካህን አላቃ ሁኖመዪ ኧቫሪቅቭ ሁኖዋይ ዎርሙታ ዋኸ ቧሙ፤«ጳዉሎስ ታነኧትርኔ አትአአር ባንቀምስኔ ቡሼእ ተየ ተታኘነ ። ¹⁵ ባቴ አሁዋ ቲደሞጅታቭ ሰቭ እማትሜ ቂጢየ ዘንጋኋ ምር ኧኸረኸ ተሁዳ አፉ ትሰቩኦዋይ ትሱኡታ አአረኸ ኦንኦምታ ጋዝ ዪኢዝዝካ ምስ ሁዳ ኧጳዉሎስ አሁዋይ ኢጌኪድነሁዋኸ ሳአሪ፤ኢናቭ ገና አሁሜ ታይሰርአ ነኣትርነዪ እንእ አርር ቁጥቁጥ ባርነ ንእየኔ ።» ¹⁶ ዘንጋኋ ጭን ኧጷዉሎሲ ኧኧተምኋ ኧች አትዋቾይ ሁዳ ኧሰምአይ ኧረፐሬ ኧኸሬ ፤ጋዝ ኢትዋኮኮዳ ኤኤዲ ገፓታ አንዳ ዘንጋኋ እንእ ኧጳዉሎስ ኤኤደን። ¹⁷ ጳዉሎስቭ ተቨኧር አላቃ ሁኖዋ እትት ሁዳ ኸናንታ፤«ዋ ኧች ኧጋዝ ዪኢዝዝካ ምስ ሁዳ ዪኢድኩዳ አአር አኔ ኧኸሬ ኧሁዳይ ዉስድኩ» ባረን። ¹⁸ ኧቨኧር አላቃቭ ሁዳ ኣኣች ሁዳ ጋዝ ዪኢዝዝካ ምስ ሁዳይ ወሰደንታ፤«አአኮጂ ጳዉሎስ ኸናዪታ ዋ ወዴያ ኧች ዪኢድኸዳ አአር አነኔ ኧኸሬአሄ ኧወስድነኸ ሳአረዪ»ባረን። ¹⁹ ጋዝቭ ዪኢዝዝካ ምስ ሁዳ ኣወደያ ኣች ሁዳ ኧጅኋ ጠበጠ ኦጣኋይ ሰቭ ኤኖወ ኤኤዲ ወሰደንታ፤ « ቲኢደዪ ትሲእኩዳ ምርአፈድን?ባረን። ²⁰ ኧችቭ ሁዳ ዋኸ ባረን፤«አይሁድ ኧሁዳ አአር ቂጥየ ዘንጋኋ ምር ኧኸረኸ ኢሂሩዋይ ኧሴኧዉዋአአርኸ ኧኝኧተዉዋታ፤ኧጳዉሎስ ነገ ኦኦጎት ኢፍቲ ታቲኢንቭነዋኸ ኢሶኦርኬ ተስምአምኦም። ²¹ ታርቭአ በፎረ ኢሆርታ ሰቭ ዮኦትሪ ችን ቧርሙ ቸኖም ዩኡሬ፤ቲዮኦትሪቭ ስንሸረድቭ ኧኽር እሃ ባይቆሙሹዋይ ተታኞሙ፤ዋአካቭ እንእ አአር ቁጥቁጥ ቧርሙታ አኸ ቲቭኮታ መልስ ቸኖም ዩኡሮዋ ፤ህመኸ ኧኸረሜ አኪያ እምባኸኖዋ ባረን። ²² ጋዝቭ ዪኢዝዝካ ምስ ሁዳ ኧኧችሁዳ«ዋ ኢያ ኤኤድሄ ዘንጋ እእማት ሰቭ እኔኤድኸ ባረ አትጬፐንቭታ ጔከደን። ²³ ተህም ቀጥወ ጋዝ ዪኢዝዝካ ምስሁዳ ተቨኣር አላቃሁኖዋ ዉርኤትሁኖዋ ኸናኖምታ ዋኸ ባረኖም ፤«ኧዳር ቂሳርያ ከተማ ያርታ አአር ዉርኤት በኧር ጋዘኘ ስቭአ ፈረዘኘ ፥ዉርኤት በኧር ጮኸ ኢተጭታጋዘኘ ቂጥቂቅጥ ኦንኦዋ ። ²⁴ እመኸ ጳዉሎስቭ ነኪቭተን ኧይሁዳ ገኘዳኜ ያርወዳ ኢሬኪካ አአር ሶኡነ ።»ባረታ፤ ²⁵ እመኸቭ ይቭካ ወረቀት ጣፈ ፤ ²⁶ ኢያ ቀላዉዴዎስ ሉስዩስንሁ፤ ኧትከበርኸ ኧይሁዳ ገኘ ንጕስ ፊልክስ ወገሬት አኸ ኧህር ። ²⁷ አይሁድ ኧዋ ምስ ጥጭተዉዋ ዮኦትሪ ባንደ ፤ዘንጋኋ ጭን እእሮማ ገኘ ሰቭ ኧኸረኸ ኧሃርኊ ኧኸሬ ፤ተወታደርኛ ወርሁ አተነፍሁን። ²⁸ በቭር ኢኮስሺ ኧሴኧዉዋኸ ኧሂሪ ኦኦጎትሁኖዋይ አዋአሁን፤ ²⁹ ኦኮሰሺቭ ሁዳ በቂጫሁኖዋ አአር ባኸሬ ኢታአከድሜ ኧህር ኧድድ ያሰርአኩዳ አአር አኸረኸ ሃርሁ። ³⁰ ዘንጋኋ ጭን አይሁድ ኧዋ ምስ ዮኦትሪ አትዋቾኰኸ በሃርሁጋ ህመጋ አሄ ኬሸሁን፤ ኢኮስሺዳቭ ሁኖዋ ተሁዳ ኢቴኤጅኮዳ ሁዳ በቭር ኧከረኸ አኸ ያቲኢንዉዋኸ ኤዘዘሁኖም። ³¹ ህመኸ ኧኸረሜ ጋዘኘቭ ሁኖዋ ኤኤዘዢዮመኸ በኧዳር ኧጳዉሎስ ጠቦጩም አንቲጳጥሪስ ስነጋ ወሰጂ። ³² በቭረገኘሞኋ እማት ፈረዘኘ ሁኖዋ ኢዎስጂኸ ኤፖሙታ ኤኛሁኖዋ ጋዝ ኢትዋኮኮዳ ኤኤዲ ተዦፖርሙ። ³³ ፈረዘኘቭ ሁኖዋ ቂሳርያ በሰንኦዋጋ ወረቀት ሁዳ ኧሃአ ገኘ ንጉስ ኣዊታ፤ጳዉሎስቭ አአይፖሪ። ³⁴ ህም ገኘ ኢገዛካ ንጉስ ሁዳ ወረቀትሁዳ ቴኤፐረኖምታ ታረበበን ቀጥወ ፤ኧጳዉሎስ ተኧት ገኘ ኧቫአኸ ተሳአረንታ ኧኪልቅያ ሰቭ ኧኸረኸ በሃረ ቀጥወ፤ ³⁵ «አሄ ዘንጋ ኢኮስሽከዳ ሰቭ ቲዎኦታ ኧዥሴ» ባረን።ተህም ቀጥወ ኧጳዉሎስ በሄሮድሲ ወረጀ ዩኡሬኸ ኤዘዘ።