^{1 2} ኧሰማትመኛዪ አቦሞኞ ኢያ ዋአካ ኧጠርርወዳ ቃርኛ ትኒኢድሁዋታ ስቭኦኝ »ባረኖም። ሁኖምቭ ብእብራይስጥ ሰቪ አፉ ቲዝሬካ ቢሰቭኦይ ተጋህም ኢረእ እቁስ ቧርሙ።ጳዉሎስቭ ዋኸባረኖም፤ ³ «ኢያ ኪልቂያ ገኘ ባንዳ በጠርሴስ ከተማ ኧቴኤኘሁሰቭንሁ ፤ኧትራእሁ ሁዳ ጭን በዋ ከተማን ። አአቦመንራይ ቂጫ በገማልያሊ ኧግሪ ቸናሁታ ጔከርሁታተማርሁ፤ኦኳ አሁም ዋኸ ማአት ኧጠበጠናሁዋኸ አአህር ኢያቭ ህመኸ እእግዜር ማአት ኢጠጤ ባንደ ። ⁴ እም መያ ኢትሄተርታ ሰቭ ቲዎጁዋ ስን ትናሳትድኮዋ ፤ገማዪ እሽቻቭ ቦኦሁኔ ቢድ አቲኢክድኮዋ ባንደ። ⁵ እመኸቭ ኢንአ ኧረፐረኸ ዋና ካህንቭ ሁዳ ኧህር ኦጎትቭ ኢቸኖታ ሁኖዋ እንእ ዪኢጅኒ አንዳን አአር።ተሁኖዋ ወረቀት ቴኤፐርሁታ ደማስቆ ገኘ አኖዉታ ኧሰማትሁኖዋይ ወርሁታ ሰቭ ሁኖዋ አትቄጣኮዋይ አተኧግጅተሁ እየሩሳሌም አቫአኮዋይ አር ባንደ። ^{8 6} ትናርነዳቭ ግት ዋአና ኢኸርካቭ ግዚየ ደማስቆ ማአሁ ትንሰርአካቭ ኧጠነቃርቭ ተሳቫዪ ኤፐታ ኡዋየ ትእንብ አጋድ ብርቅ ባረ፤ ⁷ ኢያቭ ባአፈር ወንድሁ ወተእሁ ተህም ቀጥወ «ሳቁል ሳዉል ተቭር ታትሳትዴ?» ይቭካ ቃር ሰምአሁ። ኢያቭ «ጎይቶ አኸ ማንተንኸ »ባሁን ።ሁድቭ አኸ ታትሳትቴዳ ኧናዝሬት ኢየሱስንሁ»ባረዪ። ⁹ ቲያቭ ኧረፖሩዋ ሁኖዋ ኡዋየ ሁዳ አሸዉም ፤ዘንጋኋጭን ኢዝሬኬዳ ኧሁዳይ ቃር ጭን ጔኪተዉዋ አንሰምኦታ ። ¹⁰ ኢያቭ «ጎይታኞ ምር ነንአ?» ባሁ ተሳአርሁን «ጎይታቭ ተሳታ ደማስቆ ሆር በህሜ ኦንኧት አነቨኸዳ አአር ያአዉጅከሴ»ባረዪ። ¹¹ ቱኡዋየቭ ሁዳይ ብርቅት ኧቫአ ኤርኛ ኧፎንጩዋይ ኧኸሬ ቲያ ኧረፖሩዋ ሰቭ ኧጅኛ ጠቦጩም ቲሾዉኝ ደማስቆ አሰንኧኝ ። ¹² ተህም ቀጥወ ሐናንያ ዩዉሪዳ ምስ ያዤዪ ኢያይ ማአ ፤ሁድቭ ቂጫ እንእ ጔከረ ዪኢየካ በህሜ አኖዉታ አይሁድ እንእ ያኮቡሪዳ ምስ ባንደ ። ¹³ ሁድቭ በቭየኛይ ተሸከቨታ«ኧሰምንራ ሳዉሎ ኤራኸ ኧትኮፎጅነከ! » ባረዪ፤፤ኢያቭ ህም ተህም ኤርኛ ተኮፎጁምታአሸሁ ። ¹⁴ ሁድቭ ሃአቭ ዋኸ ባረኖም፤አአቦንራይ እግዜር ፍቃድኋ ቲሂረኸ ፤ፃዲቅኋታ ዥመኸዪቃርሞኋ ታአፉኋ ትሰቭአመኸ ሸፐተናኸ ፤ ¹⁵ አሸኸንቪ ኧሰምአኸን ሁዳ አአር በሰቭ እንእ ኢፍቲ ምስክር ትህርኩሴ ። ¹⁶ አህአካ ባቴ ዋአካ ምር ትእየ ?ተሳታ ሹዉኋ ትትኸራ ተጠመቅ ፤ባጢርማኸ ታኧቭ ።» ¹⁷ ኢየሩሳሌም ተዥፐርሁዉታ ጠሎት ትኒንአካ ፤ ብርዕይ ጎይታ ቲዝሬኬዳ አሸሁ ፤ ¹⁸ ሁድቭ ዋአካሞኋ ተሳታ ትእየሩሳሌም ካች ኧንአታ ዋአ !ኢያ አአር ትምሰክርኩዳ ሁዳ አይቴኤፖርከዳ» ባረዪ። ¹⁹ «ኢያቭ ዋኸ ባሁን ፤«ዋ ሰቭ ባኸ ያአቩርታ ሰቭ እንእ ኧደርግመዪ አአግድሜ አይሁድ ቢደሞጅኮዳ ቢድ እንእ ኧዥዉር ኧረፐረኸ ኢሂሩዋ ። ²⁰ እመኸቭ አኸ ዪኢድነኸ ኧረፐረ እእስጢፋኖስ ደቭኋ ቲሁኢዳ ኢያቭ በቬናሁኖዋ ተስምአምአሁታ ተሸከሁታ ዮኦትርታ ሰቪ ሁጅር ኢኢየ ባንደ ። ²¹ ጎይታቭ ሆር «በሮኢ አነዉዋታ አአረማዊ ሰቪ ኤኬሽኸዴ» ባረዪ። ²² ሰቭቭሁኖዋ ዋ ቃር ቲዝሬክ ስን እራዊታ፤ተዋ ቀጥወ ጭን ቃርሁኖዋ ነሾሙታ «እሸዳ እትርኩ ባአያ ኦምቦርት ኤኖዳ! »ቧርሙ ኮ ቧኯ። ²³ ሁኖም ቲያሆሮሚ ሁጅርሞሁኖዋ ቲርኩምቪ ጉተቭ ቲዉራጩም ታነዉም፤ ²⁴ ጋዝ ዪኢዝዝካ ሁዳ ኧጳዉሎስ ፤ኢትዋኮኮዳ ኤኤዲ ያጔኤመከዪ ሰቭቭሁኖዋ ዋኸ ተቭር ያሆሮኮመኸ ፤ትትጎርፉዋ ሞርሙሪ ባረ ኤዘዘ ። ²⁵ ጳዉሎስቭ በጠፍር ዉጢተዉዋታ ኢጎርᎉ ቢያዡዋ ጳዉሎስ ኧቭይየኋይ ኧትሸከቨ ኧቨኧር አላቃ «አት እእሮማ ገኘ ሰቭ ታይፎርጅኰቂጫ ኢፈቅድነሁዋ?» ባረን። ²⁶ ኧቨኣር አላቃቭ ሁዳ ዋ ዘንጋ በሰምአጋ ጋዝ ዪኢዝዝካ ሁዳይ ቴኤነቨታ «ቲንአኩዳ ሁዳ ምርአፈድን!ቲንአኩዳ ሁዳ ሃርኸንቪ ?፤ምስ ሁዳ እእሮማ ገኘ ሰቭንሽ !»ባረን። ²⁷ ጋዝቭ ዪኢዝዝካ ሁዳ ኧጳዉሎሲ ቴኤነቨታ፤«ምሶ እንዴ አዉዴ አኸ እእሮማ ገኘ ሰቭንሄ? »ባረን።ሁድቭ «እከ እእሮማ ገኘ ሰቭንሁ» ባረን። ²⁸ ኢኢዝዝካቭ ስስ ሁዳ ዠፐረታ «ኢያ ኧዋ እእሮማ ገኘ ሰቭ ኧትቬሪ ኧረከሁን ሁዳ ኖኦራ ዋጋ ካስሁታንዳን»ባረ።ጳዉሎስ ጭን «ኢያ ተቴኤኘሁ ቆነሺታ እእሮማ ገኘ ሰቭንሁ»ባረን። ²⁹ ህመኸ ኧኸረሜ ኢሙረሙሪ ኧጫሞጩዋ ሰቭ ህመጋ ተሁዳ ምዬ ሴኮሙ፤ጋዝቭ ያአዝዝካ ሁዳእእሮማ ሰቭ ኧኸረኸ ተሃረ ቀጥወ በሰንሰነድ አአከደኒ ኧረፐሬ ኧኸሬ ፈኘ ። ³⁰ በቭረጋሞኋ ጋዝ ዪኢዝዝካ ምስ ሁዳ ፤አይሁድ ኧጳዉሎስ ቂጢየ አአርኋ በቭር ኧኮሰሺኸ ኢሂሪ ኧሴኤ ኧኸሬ ፈታን ፤ተህም ቀጥወ ኧክህን አላቃ ሁኖሚ አአይሁድቭ ኦኦጎት ኢደሞጅታ ሰቭ እንእ ኢደመደኸ ኤዘዘ ፤ጳዉሎስቭ ተደረጃ ሁዳ አወንደታ በቭየሁኖዋይ አትሸከቨን።