¹ ጣሊያንቭ ገኘናርኔ በፎጅኮንረ ቀጥወ ፤ጳዉሎስቪ ኤኛቭ ኧታክኮጁዋ ሰቭ ተንጉስ ሁዳይ ውታደር ግት አአት ዩሊዮስ ዩሪዳ ኧቨኧር አላቃ አአይፖሪዮም። ² ታአድራሚጢስ ተረሳነታ ብእስያ ገኘ ባር ሞሬ አኖዉታ መርከብ ኢትሸኮኮዳ ኤኤዲ ቢያርታ መርከብ ተሳፈርነታ ኧቫር ፎር መያ ቀነስነ ፤በተሰሎንቄ ኢረቭር ኧረፐረ ኧሜቅዶኒያ ገኘ አርስጥሮኮስ ዩሪዳ ምስ ቲናቭ እማቲ ባንደ። ³ በዉርኤተኘቭ ቀረ ሲዶና ሰንአነ ፤ዩሊዮስቭ ኧጳዉሎስ ወሄ ኢዎኦርኲ አሸታ ፤«ኧራማጂያሄ ሆርታ ያትኬሽኸዳ አአር ተኧቨር » ባረን።። ⁴ ተህሜ ተረሳነታ በቫር ፎር ወርነ፤ቲኢፍት ኢፍትንራይ ንፋስ አትቻይከንሬ ኧኸሬ ተቆጵሮስ ገኘ ብእሃ ግት ታንዳ አፈር ተጥራር ጥራር ወርነ። ⁵ በኪልቂያዪ በጵንፍልያቭ ሞረሞሬ አንዳ ባር ወይአነ ተዋአነ ቀጥወ በሉቅያ ገኘ አንዳ ሙራ ዩሪዳ ኤኤዲ ሰንአነ ። ⁶ ተህም ቀጥወ ኧቨኧር አላቃሁዳ ፤ጣሌያን ገኘ ያርካ እእስክንድርያ ገኘ መርከብ ነከቨታ በሁዳ አትሳፈረንረ። ⁷ ኖኦራ ቀረ ተሂንራ ትናርነ ፤ቀኒዶስ ዩሪዳ ኤኤዲ በቩድንራ ሰንአነ፤ንፋስቭ ሁዳ ኢኢፍትኒየ ኧኝኧተነ ናርኔ ቢኸርአንረ ፤ተሰልሙና ሚዬ ኤፐነታ በቀርጤስ ጥራር ጥራር ወርነ፤ ⁸ ሞረ ሞረ ትናርነ ኧላሲያከተማ ምዬ አንዳ <ወሄ ወደብ>ዩሪዳ ኤኤዲ በቩድንራ ሰንአነ ፤ ⁹ ኖኦራቭ ግዚየ አነኧታ ኧጦሙ ግይየ አለፌ ኧኸሬ ፤በመርከብ ኦሆርት ቡሼኧኸ ያትፈኝካ አአር ኧረፐሬ ኧኸሬ፤ጳዉሎስ ፤ ¹⁰ «አሁዋ ሰቮ ዋ ናርኔዳ መያንራ ቡሼእ አአር ኧኸረ ፤በመርከብ ሁዳዪ በጫሪም ጨረትሞኋ እመኸቭ ቢናቭ ዳር ታይተርፍ ኑኡ አደጋ ኢሰርአቨንረኸ ኢትረከቬ»ባረታ አትጬፐኖም። ¹¹ ኧቨኧር አላቃ ሁዳ ጭን ጳዉሎስ ቲቨህርኩዳ ምክር ኢረእ መርከብ ኢመራካ ምስመዪ ኧመርከብ ሁዳይ አቦ፤ ዩሪዳ ሁዳ ኢረእ ኢሰቭአ ባንደ። ¹² ኧዘር በኘ በሃይ ኢዎኦዋይ አይትመቺ ኧረፐሬ ኧኸሬ፤ኖኦራሁኖዋ ፍንቄ ዩሪዳ መረከብ ኢትሸኮኮዳ ኤኤዲ ስይኧተዉዋታ በሃአይ ኢኸሩዉዋይ ተስፋ ኤፐነታ መያንራ ናርነኸ ዉሳኔ አዎኦዪ፤መርከብቭ ኢትሸኮኮዳ ኤኤዲ ሁዳ በቀርጤስ በጉራ አጋድ ተራአኘኒየ ኢፍት ቲኢፍት ባንደ። ¹³ ቀሪ ኧጉራ ንፋስ ቢረፍስ ኧሂንሁኖዋኸ ኧኸረኖዋ አአር መሰረኖምታ፤መሐልቅዩሪዳ ምርከብ ንፋስ አይረሳኮኸ ኢጠጥካ ግቭርሁኖዋ ነሾሙታ ኧቀርጤስ ሞረሞረ ዎርሙ፤ ¹⁴ ዘንጋኋ ጭን ኖኦራቭ አአር ታዪኢክስ አራአኘኒየ እምቡርቢት ትእሃ ግት ታንዳ አፈሪ ተረሳታ አገዳኒየ ማአዎም ። ¹⁵ መርከብቭ ሁዳ ኡምቡርቢት ኧጠበጠኒ ኧኸሬ ኧርፋስ ሁዳይ ኧኝኧተታ ያሪ አኸረነዳ ህመኸ ኧኸረሜ መያ ሁዳ ገፈርነዪታ ንፋስ ሁዳ ኧወሰደንረ ኤኤዲ ወርነ ። ¹⁶ ቄዳ ዩሪዳ እንሲየ ብእሃ ግት ባአንዳ አፈር ጥራር ጥራር ትናርነ ኧመርከብ ሁዳይ ነብስ ያተርፍካ እንሲየ መርከብ በሮኦራ ክቻ አተነፍነዪ፤ ¹⁷ እንስቭ መርከብ ሁዳ ኧፎረኒየ ሻዉሙ ታዎኤ ቀጥወ ኑእ መርከብ ሁዳ አይትቫነረኸ እንእ አጋድኋ በወደረ ጥዎጦዉም አኮጂ ፤ስርቲስ ቲዩሪዳቭ አሸዋ ታኖዳ ፈሰስ ሆይተ በትጣበጠ ቧርሙ፤፤ ኧፈኘውዋይ ኧኸሬ ኧመርከብ ሁዳይ ኦፎር ሸራአዎንጂታ እምኧኸ ናርነኸ ኤፖሙ። ¹⁸ እምቡርቢትቭ ሁዳ ቡሼኧኸ አትድዋኘንሬ ኧኸሬ ፤በቭርጋኋ ጨረትኋ ቲረሾዋ በቫር ፎር ኧቋሽት ቆነሹም ። በሶኦስተኘቭ ቀረ ፤ኧመርከብ ሁዳይ ሸረ አኖዳ ጨረት ያዎችኮዳ ግቭርኋ በገዛ ኣጅሁኖዋ ኖኦርሙ አውዎምም በቫር ፎር ቃሸዊ። ኖኦራቭ ቀረ ኡዋይየቭ ኧህር ሆሆ አናሸኔ ኧኸሬ ፤እምቡርቢትቭ ሁዳ አትድዋኘንሬ ኧኸሬ ንተርፍነዴ ዩሪዳ ተስፋ አንጥነ ። ¹⁹ በሶኦስተኘቭ ቀረ ፤ኧመርከብ ሁዳይ ሸረ አኖዳ ጨረት ያዎችኮዳ ግቭርኋ በገዛ ኣጅሁኖዋ ኖኦርሙ አውዎምም በቫር ፎር ቃሸዊ። ²⁰ ኖኦራቭ ቀረ ኡዋይየቭ ኧህር ሆሆ አናሸኔ ኧኸሬ ፤እምቡርቢትቭ ሁዳ አትድዋኘንሬ ኧኸሬ ንተርፍነዴ ዩሪዳ ተስፋ አንጥነ ። ²¹ ሰቭ ሁኖዋ ሸረድ ኧኸረ አአር አታአአር ባአፍሁኖዋ ታይቾፉሩዋ ኖኦራ ቀረ ቴኤኬሹዋ ቀጥወ ጳዉሎስ በግትሁኖዋ ተረሳ ተሸከቨታ ዋኸ ባረኖም፤«አሁዋ ሰቮ ኤኤድኩዋ ሁዳ ተሰምአሁኝ ተቀርጤስ ባትረሳሁሚ እመጣካቭ ጥፋት ባሰንአቨሁምቭ ። ²² ዋአካቭ ቢኸር አትፍረዉዋ! መርከብ ሁዳ ባኸሬ ታሁዋ እማትማሁዋ አትቨኸ አትሆርታ ። ²³ ትራኛ አረርኧ ኧሁድቭ አአር ኧኸርሁነዪ ኧሰግድነዳቭ እግዜር ኧኬሸን መላአይካ በቭየኛይ ተሸከቨታ ²⁴ «ጳዉሎሶ አትፍሬ በቄሳር ኢፍቲ ኧትሰጎዉት አነቨኸ፤ታኸቭ እማቲ ያርታ ሰቪ ነብስ እግዜር አተነፈነኸ » ባረዪ። ²⁵ ህመኸ ኧኸረሜ አሁዋ ሰቮ፤«አትፍረዉዋ ሁዳ ኧዝሬኬሜኸ ህመኸ ኢኸረኸ ኢያ ብእግዜር አአቭር ። ²⁶ ቢኸርቭ ጭን በርፋስ ሆይተነ ባአት ብእሃ ግት ባንዳ አፈር ፎር ኧዶኡትንራ አይወኧር ዘንጋን ።» ²⁷ ባአስረ አርቭአተኘ ምሳአረ ባአድሪያ ባር ፎር እሜዪህሜ ትንድዋኝነዳ ግት ምሳአረ ኢኸርካ ግዚየ ኧመርከብ ሁኖዋይ አቦ አፈር አኖዳ ኤኤዲ ሞኦሙ ኧሰንኦዋ አአር መሰረኖምታ ፤ ²⁸ ኧገዳኒየ ኢሶፉርኮዳ ወደረ ኧገዳኒይየ ቋሾዉምታ ቢያዢ እእሃ ሁዳ ኧገዳኒየኋ ሱዉራ ህንኧ አአህር ኸረ ተቀሪም ግዚየ ቀጥወ ሃአዉም ቢቋሹዋ ገዳኒየኋ ስልሳ ህንኧ አአህር ኸረ። ²⁹ ሆይተነ ተቆዛ ንጃከቭነዴ ባርነ ኧፈኘኔ ኧኸሬ አርቭአቸ ኧመርከብ ንፋስ አይረሳኮኸ ያአግዝካ መልሕቅ ዩሪዳ ሁዳ ተመርከብ ሁዳ ኢኢ አጋድ ቃሸዊ እማት ጋእ ተቫረንረ ቧርሙ ኢሶኦሩዋ ባንደ ። ³⁰ ኧመርከብሁኖዋይ አቦ ተመርከብ ሁዳ ኢፍቲ ኧመርከብ ሁዳ ንፋስ አይረሳኮኸ ያአግዝካ መህልቅ ዩሪዳሁዳ ያዎችታ አአረ ኤፖሙታእንሲየ መርከብሁዳ አዎንጁም ታ ተመርከብ ሁዳ ወኤተዉዋ ኢሶሁዋይ ያትዋቁሩባንደ፤፤ ³¹ ጳዉሎስቭ ኧቨኧር አላቃዪኧወታደርቭ ሁኖዋ «ዋ ሰቭ በዋ መርከብ ባኔኤከሹዋአሁምቭ አተርፉዋታ»ባረኖም። ³² ሃአ ግዚየ ወታደር ሁኖዋ እእንሲየ መርከብ ሁዳይ ወደረ እንጩም ጎፎሪታ ብእሃ ፎር አዣሪተ ኢዎኧረኸ ኤፖሙ ቸኧዊ። ³³ እማት ጋእ ይቭሪ ቲያዥካ ጳዉሎስ እንእቨሁኖዋ ሸረድ ኢዎርኦዋኸ ዋኸ ባረ ሳአረኖም፤«አስረዪ አርቭአት ቀረ እንእ አታአር ታትቾፉርሙ ሂናሁዋ በጥረጠረመኸ ስረፐትሁም፤ ³⁴ ህመኸ ኧኸረሜ ያቁሟሙርሁዋኸ ዋአካ ሸረድ ትቸፉሩዋይ ኧሰኧርሁዋ ታሁዋ ግት አአታሁዋይ ጉንኧርኋ ዳር ኢትረከድወዳ ኤንዳ ።» ³⁵ ህመኸቭ ተቫረ ቀጥወ ሸረድ ነሳታ ብእንቨኋ ኢፍቲ ነሳታ እእግዜር ሽኩርት አቴኤነቨ ፤ፈነቨቭ ኧዉርኧት ቀነሰ ። ³⁶ እንቨሁኖዋ ተቁሟሞርሙታ ገግመሁኖዋ ሸረድ ነሾሙ ቦንኦሙ። ³⁷ በመርከብቭ ሁዳ ፎር ፤ኧረፖውዋ ሰቭ አአንዳአአርሁኖዋ ዉርኤት በኧር ስቭአዪ ስድስት ሰቭ ባኖዉተ ። ³⁸ ቦንኦምቭ ቶኦፎዉዋ ቀጥወ ስኔኧሁዳ በቫር ፎር ኤረኮዊታ ኧመርከብ ሁዳይ ጨረት ቆነሽነ ። ³⁹ ጋእ ቲቭካቭ ኧደረእ አፈሪ ኧቴኤነዉዋኸ አኋሩዋ ባንደ፤ዘንጋኋ ጭን ሞረሞረኋ አሻዋ እኖዳ ኧቫር ሞሬ አሸዉምታ በኸረኖዋ መርከብ ሁዳ ጊፈቶዉዋታ ሃአይ ኢዎስጂ አንጭኰ። ⁴⁰ ተህም ቀጥወ መልሕቅ ዩሪዳ መርከብ ያአጉጅኮዳ ኑእየ ብረድ አንጩም በቫር ፎር ቃሸዊታ ቸኧዉምታ ዎርሙ። ህም ግዚየ ኢሞሮኮዳቭ መቅዘፊያዩሪዳ እሃ ኢደርጉኮዳ ኤኧ ያአጉጅኮዳ ወደረ ፎቾሙ ፤ኢኢፍትሜ ሸራ ኧርስስ ከፍ ኤፖዉነታኧቫር ሞሬ ኤፖሙ ዎርሙ። ⁴¹ ዘንጋኋ ጭን መርከብ ሁዳ ኧገዳኒነ ታአሻዋ ተጃከቨታ አፈር ነከደ ፤ኢኢፍትሜ አጋድ ክፍልኋ ባአሻዋ ከስ ገፓ ተጥረቀቨታ እንቅረቅርካ ባረ።ኢኢእሜ አጋድ ክፍልኋ እምቡርቢት ቡሼኧኸ ኧደነገኒ ኧኸሬ ኧስዎዎርት ቀነሰን ። ⁴² ወታደርቭ ሁኖዋ ታአኮጂዮዋ እስረኘ እማትሞሁኖዋ ዌኤተዉዋ ያሩዋይ ባትዋቆሩዋ ዮኦትሪዮይ ተስምአምኦሙ ። ⁴³ ኧቨኧር አላቃ ሁዳ ጭን ጳዉሎስ ኢተርፊ ኧሴኤ ኧኸሬ አሶᎅ ሁዳ ዪንኦዋይ ኸንአኖምታ፤ዳራይገ ኢደርጉታ ሁኖዋ በዳራይገ ቲዞጉሩዋ ብደይተዉዋ ተቫር ሁዳ አአፈሪ ኧኝኧተዉዋ ኢዎኦዋኸ ፤ ⁴⁴ ኧተኖፉም ሁኖዋ በበሳንቃሁኖዋ ዌ በመርከብ ሁዳይ በስፓፐረ ግቭር አጠርጢተዉዋ ኢዎኦዋኸ ኤዘዘ ።በዋ መያ እንእቨሁኖዋ በወገሬት አአፈሪ ሰንኦሙ።