¹ በኢቆኒዮንቭ ጳዉሎስቪ በርናባስቭ እማቲ አይሁድ ኢደሞጅኮዳ ቢድ ጎፖም ፤በህሜ ጌከርሙ አትሞሩዋይ ኧኸሬ ኖኦራ ኧይሁዳ ሰቭቪ ኧግሪክቭ ሰቭ አሞርሙ ። ² አናአሞሩዋ ኧዩሁዳ ሰቭ ጭን አአረማዊ ሰቭ ንሻሾምታ ኧዋ ኧሰማት ኢጠረዮኸ ኤፖሙ ። ³ ጳዉሎስቪ በርናባስቭ ኧጎይታ አአር ታይፎርሙ ቲዝረኩዋ ኖኦራይ ስን በህሜ ኤከሹም ፤ጎይታቭ ኢዝረኲዳ ኧጠጋ ቃር ወግ በኸረ መርኸትቪ ወግ በኸረቭ ሜና ፤ኢዝረኲዳ ቃር ዉረ ኧኸረኸ ያጪግኖዋ ባንደ ። ⁴ ኧከተማሞኋ ሰቭ ተሻከደታ፤ ግትኋ ተይሁዳ ሰቭ ኸረ፤ ግትኋ ተክርስቶሲ ኪሸረኘ ኸረ። ⁵ በህም ግዚየ አረማዊ ሰቭቪ ኧይሁዳ ሰቭ ታአላቃሞሁኖዋ እማቲ ሂተዉዋታ አይኧተዉ ያዎችህዮመዪ ኢዎጎዮሜ አትዋቆርሙ። ⁶ ሁኖዋ ጭን ዋ ዘንጋ ኋርሙታ ልስጥራንቪ ደርቤንቭ ዩሪዮታ ሊቃኦኒያከተማዪ በሁኖም ምዬ አነዉታገኘ ሴኮም ፤ ⁷ በህሜ ኧክርስቶሲ ያተርፍካ ወሄ ዋራይ አአዉጅት ቆነሹም። ⁸ በልስጥራቭ ኧግርኋ ጅረ ኧረፐረ ተቴኤኘ ቆነሺታ ስርም በኧግርኋ ሆይተ አይሂር አት ሰቭነድኋ ኧሸተረወ ምስ ቸና ባንደ ። ⁹ እም ምስ ጳዉሎስ ቲዝሬካ ጭን ባረ ኢሰብአ ባንደ ።ጳዉሎስቭ ኧሁዳይ ኤፐ ቱኩ ኤፐ አሸታ ኢተርፍኸ አአመረኸ አሸታ፤ ¹⁰ በሩኡየ ቃር «ቀጥ ባር ተሳታ በኧግራኸ ተሰገቭ» ባረን፤ህም ግዚየ ዘከረ ተረሳ ተሸከቨታ ኧሆርት ቀነሰ። ¹¹ ሰቭ ሁኖዋ ጳዉሎስ ኤፐን ዘንጋ ባሸዉዋጋ በሊቃኦንያ አፉ «መላአይካ ሰቭ ሞሰርሙ ኢናይ ወንጁም»ቧርሙ አሆኖም ፤ ¹² ኧበርናባስ <ድያ>ቧሪ ፤ኧጳዉሎስቭ ዋና እኢዝሬክ ኧረፐረ ሁዳ ኧረፐሬ ኧኸሬ <ሄርሜን>ቧሪ፤ ¹³ ተከተማሞኋ ሰቻ አጋድ ኧረፐረ ኧድያ ቤተ መቅድስ ቅርኘ ያጌኲርካ ካህን ቧዉራዪ አአኮጂዮም ማማቭ ኧከተማ ሁዳ ኢጎኦኮዳ ኡፎቻዪ ኤኤተታ ተሰቭ ሁኖዋ እማትሜ ህይተ ፈቸድ ዪንአኖዋይ ሴኧ። ¹⁴ እእግዜር ኪሸረኘ ጳዉሎስቪ በርናባስቭ ዋ ዘንጋ በሰምኦዋጋ ሁጅርሁኖዋ ዦኦርሙታ ቲያሆሮዋ ተራወኡም በሰቭ ግት ጎፖም ።ቃርመሁኖዋ ነሾምታ፤ ¹⁵ «አሁዋ ሰቮ ኧቭር ኧዋኸ አአር ቲንኦዋ? ፤ኢናቭ አሁመኸ ሰቭንረሽ! ። አሁም እመኸ ተዋኸ አታአአር ታኸረ አአር አሬእተሁዋታ አፈሪ ሳቫይቭ ፥ባርቭ በቫርቭ ከስ አነዉዋታ ሁኖዋ እንእ ኧኸለቀ፤ እንእን ግዚየ ይረቭርካ፤ እግዜሪ ትትዠፖሩዋኸ ኧክርስቶሲ ወሄ ዋርይ ኒኢድኔኩዋ ። ¹⁶ ሁድቭ ኧዋ ኢፍቲ ዘቨር ሰቭ እንእ ብአጃሁኖዋ መያ ያርዋኸ እቁስ ባረ ቸኧኖም። ¹⁷ ቢኸርቭ ጭን ተሳቫይ ዲየ እመኸቭ ሙርት ያፎይወዳ ወሄ ወቅት ባዉትኋ እመኸቭ ሂናሁዋ ሸረድ ባዉት ተመኛታሁዋ መኝኧተዉዋ ባትሳርትኋ ወሄ ሜና ቦንኧትኋ ገግኋ ምስክር አይቫር አንቸኧዳ ። ¹⁸ ጳዉሎስቪ በርናባስቭ እመጣካአአር ዳር ፈቸድ ሁዳ አዪንኤኸ ፤ ዝሬኮሙታ ፈቸድ ሁዳ ጭን አዪንኧኖኸ አትቼውዉዋ ሁዳ ተሮኦራ መራክስ ቀጥወን ባንደ። ¹⁹ ኣይሁዳ ሰቭ ጭን ታአንፆኪያዪ ተኢቆኒዮንቭ ሞኦምታ፤ኧሰቭኋ በገግሁኖዋ አጎፖምታ ፤ኧጳዉሎስ ብእቭር ተዎኮይ ቀጥወ ፤ኧዎንደ አአር መሰረኖምታ ሻዉም ወሰጁሙ ተከተማኋ ሰቻ አጋድ አዎኦም ቃሸዊ ። ²⁰ ቢኸርቭ ጭን ኧክርስቶሲ ተማሪ ኸፖዊ በትሸኮዉዋመኸ ተረሳታ፤ኧከተማ ሁዳይ ገፓ፤በቭረጋሞኋ ተበርናስስቭ እማትሜ ደርቤን ዩሪዳ ኤኤዲ ወርሙ። ²¹ ጳዉሎስቪ በርናባስቭ በደርቤን ኧክርስቶሲ ኧትርፉት ወሄ ዋራይ ኤኤጁምታ ኧሮኦራ ሰቭ በክርስቶስ ያአቩሩዋኸ ቴፐዉዋ ቀጥወ ልስጥራ ፥ኢቆኒዮንቪ ፥አንፆኪያቭ ፤ተዦፖርሙ። ²² በክርስቶስ እአሞሩዋ ሰቭ ሂን ቲያትፓፖምቪ ብእምነትሞሁኖዋ ቲቭኣተዉዋ ኢትሸኮዉዋኸ ቲዎሁሪዮዋ ፤«እእግዜር መንግስት ኢጎኦዋይ ፤በሮኦራ ፊትና ከስ ጊቭኧተዉዋ ኦኦት አነቨንረ» ቧሪዮም ። ²³ ተህም ቀጥወ ክርስቶስ አአሞሩዋ ሰቭ ባነዉኮዳ ኤኤዲ አነዉዋታ ቤተክርስታን እንእ ባሪቅ ይሆርታ ሰቭ ሸፖችኖምታ በጦምቪ በጠሎትቭ አአሞሪ እግዜር አደራ አዊ ። ²⁴ ተጲስዲያቭ ሄንጁም ጵንፍሊያ ዩሪዳ ኤኤዲ ሞኦም ፤ ²⁵ በጰርጌንቭ ቃርኋ ቴኤጁዋ ቀጥወ ኢጣሊያ ወንጁም። ²⁶ ቲኢጣሊያቭ [ተረሾም] ዋአካ ስን ኤፐዊ ሜና ፤እእግዜር ጠጋ በአደራ ኧቴዉኮ አንፆኪያ ከተማ በመርከብ ተዠፖርሙ ዎርሙ ። ^{28 27} ህሜ በሰንኦዋ ቀጥወ እእንእ ቤተ ክርስቲያን ሰቭ እንእ ብዝማት ቁጥ ቁጥ ኤፖዉምታ እግዜር በህኖዋ ኸረታ ኤፐን ዘንጋ እንእ ፤እመኸቭ አአረማዊ ሰቭ ፤ኧተኸ ያአቩርኮዳ በር ኧትከፈደኖኸ ኤኤጁም። ²⁸ በህሜ ክርስቶስ ታአሞውዋ ሰቭ ኖኦራይ ስን ቸኖም።