¹ በአንፆኪያቭ ባንዳ ቤተ ክርስቲያን ነቢሚ አስተማሪም ባነዉተ ፤ሁኖም ፤በርናባስ፥ኔጌር፥ዩሪዳ ስምኦን ፤ኧቀሬና ገኘ ሉኪዮስ ፥ተንጕስ ሄሮድስ እማቲ ኧትራኧ፤ምናሄሚ ሳዉልቭ ባነዉተ። ² እመሁኖዋ ቲጠሊይᎁ ቲጦሙም ታነዉዋ ፤መንፈስ ቅዱስ፤« በርናባስቪ ሳዉልቭ ኢያ ኧኸናሁኖዋ ሜና ሞጥርኒ »ባረ። ³ ሁኖም ተጠለይᎁ ተጦሙም ቀጥወ ኧጅሁኖዋ አተግኮምታ አስራፖቺዮም ። ⁴ በርናባስቪ ሳዉልቭ መንፈስ ቅዱስ ኬሸኖምታሴሌዉቅያ ዩሪዳ ኤኤዲ ወንጁም፤ተህም ቀጥወ በመርከብ ቆጵሮስ ዎርሙ ። ⁵ ስልማናዩሪዳ ኤኤዲ በሰንኦዋጋ በአይሁድ ሰቪ ኧጠሎት ቢድ እእግዜር ቃር አትሞርሙ፤ ዮሐንስቭ ተሁኖም እማቲ ያአግዝኮዋ ባንደ ። ⁶ ኧቆጵሮስ ደሴት ታአትአጋድ አታእግድ ዳር ስን ጆፖርሙ ፓፋ ዩሪዳ ኤኤዲ በሰንኦዋጋ በሪያሱስዩዉሪዳ አት አአይሁድ ገኘ ሸጎረዪ አአሰት ነቢ ነኮዉም ። ⁷ ሁድቭ ሰርጊዮስ ጳዉሎስ ቲዩሪዳ ታአት ተሃሪ ኧገኘ ዳኘ እማቲ ባንደ ፤እም ኧገኘ ዳኘ እእግዜር ቃር ኢሰቭአይ ሴኧታ ኧበርናባስቪ ኧሳዉልቭ አትሄናኖም። ⁸ ቢኸርቭ ጭን በግሪክ አፉ ኤልማስ ዩሪዳ ዋ ሸጎረ ፤ኧገኘ ዳኘ ሁዳ አያአቭረኸ ዪንአይ ኧሴኤ ኧኸሬ ተጋፋኖም። ⁹ ጳዉሎስ ዩዉሪዳ ሳዉልቭ በመንፈስ ቅዱስ ተቬንአታ ቱኩ ኤፐ አሸንታ ዋኸ ባረን ፤ ¹⁰ «አኸ ኣወሄ ሜና እንእ ጠላት ሸርቪ ሙጥጥነድቭ እንእ ኧቬንአቨኸ ኧሴጣን ትከ!እእግዜሪ መያ አአፎት አትቺእካ? ¹¹ ዋአካቭ እእግዜሪ ደረግ ባኸ ፎር ማአ ፤ፉርጥ ትኸርኬ ፤ትእም ቀጥወ አት ግዚየ ስን ኡዋየ ስርም አታዥካ ።»ህመጋ ጎቨዪ ጠነቫ በፎርኋ ወንደወ ፤ኣጅሞኋ ጥጭተ ኢመራኩዳ ሰቭ ሴኧታ እመዪ ህሜ ኧዋርት ቀነሰ ። ¹² ህም ግዚየ ኧገኘ ዳኘ ሁዳ በሸጎረ ሁዳ ኧኸረ ዘንጋ አሸታ ፤እእግዜርቭ ቃር ወግ ኸረወታ በክርስቶስ ኢየሱስ አመረ ። ¹³ ጳዉሎስቪ ቤሻሞኋ ተጳፋ ተረሾምታበጵንፍሊያ ገኘ አንዳ ጴርጌን ዩሪዳኤኤዲ ዎርሙ፤ዮሐንስ ጭን ተንኖዋ ተቫይተረ ኢየሩሳሌም ተዠፐረ ። ¹⁴ ሁኖዋ ጭን ተጰርጌን ተረሾምታ ብጲስዲያ ከስ እንዳ አንፆኪያ ዩሪዳ ኤኤዲ ዎርሙ፤ በሰንበት ቀረቭ አት አአይሁድ ኧጠሎት ቢድ ፤ጎፖም ቸኖም። ¹⁵ ኧሙሴ ቂጫዪ ኧነቢም ሁንዋይ መጣፍ ታረᎄᎅ ቀጥወ ኧጠሎት ቢድ አላቃ ሁኖዋ እኧሰማቶ ኧሰቭኋ ምክር ኢኸርካ አአር አጨፈድ ትዝረኩታ አአር በረፐረነሁዋ ዘጉዋ» ቧርሙ ኬሸኮሙ። ¹⁶ ጳዉሎስቭ ተረሳ በኧጅኋ ቋቆሰኖምታ ዋኸ ባረኖም«እእስራኤል ሰቮ፤ እመኸቭ አሁም እግዜር ትፎርታ ሰቮ ፤ጭን ባርሙ ሱቭኦኝ ፤ ¹⁷ እም እእስሬል ሰቪ እግዜር አአቦንራ ሸፐተኖም ፤በግብፅ ገኘቭ ታነዉዋ ኑእ አአር ኤፐኖም፤በሩእ ደረግሞኋ ተሃይ አዋአኖም ፤ ¹⁸ አርቭአ ዘቨር አአህርቭ በቨረሃ ፈነኸኖም፤ ¹⁹ በከነዓን ገኘቭ አነዉዋታ ኧሳቭአት [ቢድ ጥቭ] መንግስት እንእ አአፋ አፈርሁኖዋ ኧገግኋይ ሰቭ ደረድሁኖዋ ኤፐ አቨኖም፤ ²⁰ እመዳ እንእ ኧኸረሁዳ ባርቭአት በኧር ታአምሳ ዘቨር ቢኸርካ ግዚየ አአህርን።ተህም ቀጥወ ነቢ ሳሙኤል ኢገዛወዳ ዘቨሪ ስን እግዜር መሳፍንት አቨኖም። ²¹ ተህም ቀጥወ እግዜር ንጕስ ያረግስኖዋኸ ሳአሪ ፤እግዜር ኧቢኒያሚ ዶᎄ ኧኸረ ኧቂሲ ኧች ሳዖል አቨኖም ፤ሁድቭ አርቭአ ዘቨር ስን ገዛኖም። ²² ሳዖልቭ ተሻረን ቀጥወ ፤ዳዊት አረገሰኖም፤ኧሁድቭ አአር፤«ኧሂንኛኸ ኧኸረኒ ኧሲእኩዳቭ ሁዳ እንእ ዪንአኒዳ ፤ኧኧሰዪ ትከ ዳዊት ነከሁ»፤ባረ ምሰከረነ። ²³ እግዜርቭ ቃር ኧገፓመኸ ተዋ ምስ ዘር እእስራኤል ሰቭ ዉዛ ኧኸረ ያተርፍካ ኢየሱስ አቫአ ፤ ²⁴ ኢየሱስ ቶኦትኋ ኢፍቲ፤ዮሐንስ እእስራኤል ሰቭ እንእ ንስሃ ጊቭኧተዉዋ ኢጠሞቁዋኸ ኤኤደኖም ባንደ። ²⁵ ዮሐንስቭ ኪሸርኋ ቲጀፕርቭ ታነ፤ኢያ ማን መሰርኩም? ኢያ ሁዳ አኸርኋ ፤ዘንጋኋ ጭን ኧኧግርኋ ጫማ ክር ስን ኧፈዳኔ አይትቨቃይ አአር ቲያ ኢኢ ኢቫአኬ ይቭር ባንደ። ²⁶ ሁሁዋ ታአብርሃም ዘር ኧቴኤኘሁዋ ኧሰማት ፥እመኸቭ በግትማሁዋ እግዜር ኢፎርታ ሁኖዋ እንእ ፤ዋ ያተርፍካ ወሄ ዋራይ ኧኬሸዊ ሁዳ ኢና እንእምነንራ ። ²⁷ እእየሩሳሌም ሰቭቪ ዳኘመሁኖዋ እእየሱስ አኋሪዳ ፤ኧህር ባኸሬ ሰንበት ሰንበት ቀረ እንእ ያረቡቢዳ ፤ኧነቢሁኖዋ ቃር ዉረ ኢኸሪ ፤በሁዳ ፎጅኰ። ²⁸ ኧዉድ ያሰርአኩዳ አት ኢፋድ ስን ባይረሁኰቭ ዳር ኧጲላንጦስ ኧዉድ ፍርድ ኢፈርድዎኸ ሳአሪ ። ²⁹ ኧሁዳ አአር ኧጣፊይ ሁዳ እንእ ቴፐዉኰ ቀጥወ ፤ተሰኦርኰ ኤኧ አዎንጁምታ፤በወገማ ከስ ሆንኧዪ። ³⁰ እግዜር ጭን ተዉድ ነሳን ፤ ³¹ ተገሊላ ቆነሺታ እየሩሳሌም ስን ተሁኖዋ እማቲ ኧረፖሩዋ ሁኖም ኖኦራ ቀረ ተረከቨኖም ፤ሁኖም ዋአካ ኧሰቭኋ ምስክርኖዋ። ³² ኢናቭ እግዜር አአቦንራ ተስፋ አቨኖዋ ወሄ ዋራይ አሁዋ ንኢድነ ፤ ³³ ኢየሱሱ ተዉድ በሸትኋ አአቦንራ ኧገፓኖዋ ተስፋ ኢና ኧዴንጋኋ ኤፐንረ፤ሁድቭ በመዝሙር ዉርኤት፤ «አከ ትከነኛ ፤ ኢያ ኦኳ ኤኘከ »ቧርሙ ጣᎉ። ³⁴ እመኸቭ አትቭ ሁዳ ሙጅተ አንብሰበሰኸዪ እግዜርቭ ተቩድ ኧረሳንመኸ ፤ያጪጊ፤ «ኧትቀደሰዪ ኧታአመረቭ አአር ኧኸረ፤ ኧዳዊቲ ተስፋ ኢሁዋቴ »ቧርሙ ጣᎉ። ³⁵ ህመኸ ኧኸሬ ቤኤኛቭ ኤኤዲ ፤ «ቅዱስ ትካኸ ኢብሰብሲ አቲቭኩዳ »ይቭር። ³⁶ ዳዊት በገግኋይ ዘቨር እእግዜር ፍድድ ቤተ ቀጥወ ፤ሞደ ታአቦሞኋ ዶፖርሙ ᎂከዊታ በሰርኋ ብሰበሰ ። ³⁷ እግዜር ተቩድ ኧረሳን ሁዳ ጭን አንብሰበሰዳ ። ³⁸ ባቴ ኧሰማቶ ፤ባጢር ኢትፋእካ ሁዳ እማት ብኢየሱሲ አጋድ ኧኸረኸ ኤኤጅኩዋኸ ኋሩዋ። ³⁹ በሁዳ ያአቭርካ እንእ በሙሴዪ ቂጫ አነከቨን ተቫጢር አፉ ኧትቬርት ኢረህቭ። ^{40 41} « አሁዋ ትቆርጭታ ሰቭ ፤ኦዡዋ፤ ወግ ኧህርዎሁዋ ፤ሙጁምቭ፤ ማንኝእሞኋ ቢዪኢድሁዋ ፤ አታአቩሪ ሜና ፤ በዘቨራሁዋ ኢንአኬ።» ቧርሙ ኧዝሬከዊ ዘንጋ አይሰርአወሁዋኸ ተጠፑዋ ፤ቧርሙ ዝሬኮም ። ⁴² ጳዉሎስቪ በርናባስቭ አይሁድ ቲደሞጅኮዳ ቢድ ቲዎኦታ ፤ሰቭ ሁኖዋ ቢቫአካቭ ኧይሁዳ ሰንበት ቀረእእም ዘንጋ አአር አትቭ ዲዊተዉኰ ዪኢጂዮኸ ሳአሪዮም ። ⁴³ ኧትደመደብ ሰቭ ተትቭራጨ ቀጥወ ፤ኖኦራ ኧይሁዳ ሰቭቪ፤በይሁዳ ሰቪ ሃይማኖት ኧጎፖዋ፤በመንፈስ አአር ያትውቁርታ ሰቭ ፤ኧጳዉሎስቪ ኧበርናባስቭ ተሄተሪዮም ፤ሁኖም አዝራይከዉዮም ፤ብእግዜርቭ ጠጋ ቲቭኧተዉዋ ኢረዉሩዋኸ ሞኰሪዮም ። ⁴⁴ ቢቫአካቭ ኧይሁዳ ሰንበት ቀር ፤ዉጢካ ሰቭ ቲተርፍ ኧከተማኋ ሰቭ እንእ እእግዜር ቃር ኢሰቭአይ ቁጥቁጥ ባረ። ⁴⁵ ኧዩህዳ ሰቭቭ ኖኦራ ሰቭ ቢያዡዋ ቅናት ጠበጠኖምታ ጳዉሎስ ኢዝሬኩዳ ቃር ቲያአፎኰ ኢቀሩዊ ባንደ ። ⁴⁶ ጳዉሎስቪ በርናባስቭ ጭን ታይፎርሙ«እእግዜር ቃር ትእንዎኋ ኢፍቲ ባአወተራቸ አሁዋ ዪኢጅኩዋይ ያትሲእ፤አሁዋ ጭን ቀንጥኊ ፤ብእመዳ ኧዘላለም አያ ሂተዉ ኦምቦርት ኤነወሁዋኸ አሁዋ በገጋሁዋ ኧፈንድሁዋይ ኧኸሬ ፤ኢናቭ አአረማዊ ሰቪ ኧኝኧተነ ንዦዉርነዴ። ⁴⁷ አትቭ ፤እግዜር፤ «ሰቭ እንእ ባሄ አጋድ ኢተርፍኸ ፤ አአረማዊ ሰቭ እንእ ብርሃን ኤፐከ።»ባረ ኤዘዘንረ፤ቧርሙ ዝሬኮም። ⁴⁸ አረማዊ ሰቭቭ ዋ ዘንጋ ቢሰቭኦዋ ቡሼኧኸ ሳረኖም፤እእግዜርቭ ቃር አሆቦጁም ፤ኧዘላለምቭ አያ ሂተዉዋ ኢረቩሩዋይ ኧሰፖቺዮዋ ሁኖዋ እንእ አሞርሙ። ⁴⁹ እእግዜርቭ ቃር በሃኸ ባነዉታ ገኘ እንእ ቲቬትድ ወረ። ⁵⁰ ኧይሁዳ ሰቭ ጭን ባአይሁድ ሃይሞኖት አአመራ፥ደንገኘቭ ኧኸራ እሽቻ፥ እመኸቭ ኧከተማሞኋ ኑእኑእ ገማ ንሻሾምታ፤ኧጳዉሎስቪ ኧበርናባስቭ ቡሼኧኸ ሰተጂዮምታ ተገኘመሁኖዋ አዎኦዮም። ⁵¹ ጳዉሎስቪ በርናባስቭ ጭን አንቴኤፖሪዮኸ ያቲሹዋይ [ምስክር ኧህርዎሁዋባርሙ] ኧኧግርሁኖዋ ጉተ ጥዎጠዉምታ ቸኧዉም ኢቆኒዮን ዩሪዳ ኤኤዲ ዎርሙ። ⁵² ኧክስስቶስሜ ተማሪ ቡሼኧኸ ሳረኖም፤ በመንፈስ ቅዱስቭ ተቬንኦም ።