^{1 2} 1 ህም ዘቭር ንጕስ ሄሮድስ አታት ክርስቶስ አአሞሩዋ ሰቭ ስድጅተዉ አጠርቁት ቀነሰ ። 2ኧዮሐንስሜ ኧሰም ኧእም ያዕቆብ በሴፍ አቴኤተረን ። ^{3 4} 3ብእም ሜናኋ አአይሁድ ሰቭ ኧሳረኖዋኸ ባሸጋ፤ ኧጴጥሮስቭ ደፐረወ ኧትጤበጠንቭ ፤ወቅትሞኋ አአይሁድ ቂጣ ኢዎርኧኮዳ ሙርአ ጊፐ ባንደ። 4ጴጥሮስቭ ኦሁኔ ቢድ ባገፓን ቀጥወ ፤አርቭአት አርቭአት ሂተዉዋ ዩኡረይኸ አርቭአት ግዚየ ኧሻኮጂዮዋ ጋዘኘ አአይፐረኖም እመዳ ኤፐ ሁዳ ኧፋሲጋ ባአል ቀጥወ በሰቭ እንእ ኢፍቲ ኤኤተ ያትፌንድዌ አጫመጠታንዳን። ^{5 6} 5 ጴጥሮስ ዋኸ ኤፐዉም ኦሁኔ ቃሸዊ ፤ኧቤተክርስታን ሰቭ ጭን ኧጴጥሮስ አአር ብእግዜር ኢፍቲ አጠቦቁም ጠሎት ዪንኧዋ ባንደ። 6ሄሮድስቭ ኧጴጥሮስ በሰቭ እንእ ኢፍቲ ኤኤተ ያትፌንድዌ ቲያጫምጥቭ ታነ ፤በህም ምሳአረ ጴጥሮስ በዉርኤት ቁጥቋጨ አኮጂታ በዉርኤት ጋዘኘ ግት ተገተረ ባንደ ፤ኦሁኔ ቢድቭ ዩኡሮታ ኧራደኘ ሁኖዋ በኦሁኔ ቢድ ኡፎቻ ተሸኮሙ ዩኡሮዋ ባንደ ። ^{7 8} 7 ኧጠነቃርቭ ኧጎይታ መላአይካ ተረከቨ ፤ሁኖም አኖኮዳ ቢድ ብርሃን ብርቅ ባረ ፤መላአይካቭ ሁዳ ኧጴጥሮስ ምየኋ ደነገ ቃዠ አቴፐንታ «ካች ባርታ ተሳ!»ባረን።ተህም ቅጥወ ኧኧጅኋ ሰንሰነድ ተኧጅኋ ተፎቾም ወተኡም ። 8መላአይካቭ ሁዳ ፤«ሁጅራኸ ተኸደር ፥ጫማማኸ ህርአ ባረን።ጴጥሮስቭ መላአይካ ሁዳ ኤኤዘዘንመኸ ኤፐ።መላአይካቭ ሁዳ ሃአቭታ፤ኧፎር ሁጅርማኸ በፎራኸ ቃሽታ ተኸተሬ ባረን ። ^{9 10} 9 ጴጥሮስቭ ተሄተረንታ ተኦሁኔ ቢድ ዋአ ፤ዘንጋኋ ጭን ኢኸርካ ሁዳ እርእይ ያዥካ እአር መሰረንባ ባኸሬ መላአይካ ሁዳ ዪንአኩዳ ሁዳ ኧዉረሞኃ አንዳ አአር ኧኸረኸ አሃረ ባንደ ።10አአወተራቸዪ ኧውዉርኤተኘ ኣራደኘ ባሎፉዋ ቀጥወ ኧከተማኋይ ኤፐ ቢዎስድካ መያ አነዳ ኧቭረድ ሳንቃይ ሰንኦም ።ሳንቃቭ ሁዳ ገግሞኋ ሃረ ተከፈደኖም፤ሁኖም ኡፎቻ ሁዳ ዎኦምታ ወርሙ ፤አት ኧታንጠ መያ አታአህሪ ተዎሩዋምመኸ መላአይካ ሁዳ ህመጋ ተጴጥሮስ ተቫይተረ ። ^{11 12} 11 ጴጥሮስቭ በሂንኋ ገፓታ ባትዣፐረጋ ፤«ጎይታ መላአይካኋ ኬሸታ ተሄሮድሲ ኧጅቪ አይሁድ ታጫሞጭኮኝ ሁዳ እንእ አዋአየኸ ዋአካ ሃርሁ» ባረ። 12እመዳ በሃረ ቀጥወ ፤ኖኦራ ሰቭ ተስቨሶዉም እማቲ ሆርሙ ጠሎት ዪንኧኮዳ ማርቆስ ዩሪዳ ኧዮሃንሲ አዶዲ ኧማሪያሚ ቢድ ወረ። ^{13 14 15} 13 ህሜ ሰንአታ ኧወረጀ ሳንቃ ቢደርግ ሮዳ ዩዉሪያዳ አት ኧቪድ ሜና ቲንአካ ገረድ ማን ኧከረኸ ቲሂሪ ኧሳንቃ ሁዳይ ወረች። 14ኧጴጥሮስሜ ቃር ኧኸረኸ በሃረችጋ ተሳርትሻ ኧትረሳ ሳቃ ሁዳ ታትከፍትኩ ትትራዉእተዠፐረች ወረችታ ጴጥሮስ ቡኡፎቻ ኧትሸከቨኸ ኤኤደች ። 15ሰቭ ሁኖዋ ጭን «ሂናሽ ገፈርሽሚ ዌ !»ቧሪያ ፤ሂዳ ጭን እም ዘንጋ ሁድ ሁድ ደፐረቸወ ቤኤደቸኖጋ ፥«ህሸኸ በኸረጋ ኧሁዳይ መላአይካን ኧዋርትን » ቧርሙ። ^{16 17} 16ጴጥሮስ ጭን ሳንቃ ኧድርጉትኋ አንቸኧዳ ፤ሃአ ግዚየ ሁኖም ሳንቃሁዳ ኮፎጁም ባያዢ ወግ ኸረዎም። 17ሁድቭ እቁስ ዩዉሩዋኸ ባጤኋ ቋቆሰኖምታ፤ጎይታ ተኦሁኔ ቢድ ኧተኸ ኤፐ አዋአነኸ አጬገ ኤኤደኖም ፤«እም ዘንጋ ኧያዕቆብቪ፥ኤኤኛቭ [በክርስቶስ አአሞሩዋ] ኧሰማት አዉጂዮዋ»ባረኖምታ፤ተሃአ ቀጥወ ሁዳ ቸኧ ኤኛ ኤኤዲ ወረ ። ^{18 19} 18በቭረጋሞኋ እረርኧ ጋዘኘሁኖዋ «ጴጥሮስ ኧቲወረ?» ቲዩሩዋ በግትሁኖዋ ኑኡ መራክስ ተፈጠረ። 19ሄሮድስቭ ኧጴጥሮስ ሴኧ በቨከረንጋ ዩኡሮታ ኧኧራደኘ ሁኖዋ ጌከረ በምረመረኖዋ ቀጥወ ዮኦትሪዮኸ ኤዘዘ ።ተህም ቀጥወ ሄሮድስ ተይሁዳ ተረሳ ቂሳሪያ ዩሪዳ ኤኤዲ ወንደታ በሃይ ቸና። ^{20 21} 20ሁድቭ ተጢሮስቪ ተሲዶናቭ ሰቭ መራክስ ባነደ፤ገኘመሁኖዋ ሸረድ ኢረህቭ ኧረፐረ ሁዳ ንጉስ ቲገዛኩዳ ገኘ ኧረፐሬ ኧኸሬ ፤ኧንጕስ ሁዳይ ሹም ኧረፐረ ኧብላስጦን ያአግዝኮኸ ቴፐዉዋ ቀጥወ ፤እማቲ ቁጥቁጥ ቧርሙታ ተንጕስ ሁዳ ኢትቊያሞቹዋይ ሳአርሙ። 21ኧጎቸ ቀረ ንጕስ ሄሮድስ ኧንጕስ ሁጅርኋ ተኸተረ በፍርድ ዙፋን ቸናታ ኧሰቭ ሁኖዋ ዝሬከኖም ። ^{22 23} 22ሰቭ ሁኖዋ ንጕስ ሁዳ ቲዝሬካ «እሸዳ እእግዜር ቃርን ባኸሬ ኧሰቭ ቃር አኸረዳ»ቧርሙ ኮ ቧርሙ። 23ሄሮድስቭ እእግዜር አናኸበዴ ኧኸሬ ኧጎይታ መላአይካ ህመጋ በቫአሸ ደነገንታ ፍርፍር በንአንታ ሞደ ። ²⁴ እእግዜር ቃር ጭን ቲትራእቪ ቲቬትድቭ ወረ። ²⁵ በርናባስቪ ሳዉልቭ ኪሸርሁኖዋ ጀፖርሙታ ትእየሩሳሌም ተዠፖርሙ፤ቲዎኦታቭ ማርቆስ ዩሪዳ ዮሐንስ ተሁኖም ቦቾም አዎኦዪ።