¹ አታት ሰቭ ተይሁዳ ገኘ ተረሾም እአንፆኪያ ከትማ ወንጁምታበክርስቶስ አአሞሩዋ ኧሰማት ፤«ኧሙሴ ቂጫኸ ዘገር ባናጎፖኩዋይ አተርፉታ» ፤ባርሙ አትሞርት ቆነሹም ። ² እም ዘንጋ ኧጳዉሎስቪ ኧበርናባስቭ ተሁኖዋ ኧዉጥጥ ክርክርመዪ ፥ኧመራክስሜ ስን አሰንአኖም ፤ህመኸ ኧኸረሜ ጳዉሎስቪ በርናባስቭ ኤኛቭ እታት ክርስቶስ አአሞሩዋ ሰቭ ዲቪተዉኮታ ኤየሩሳሌም ዌኤተዉዋታ፤እእግዜር ኪሸረኘዪ ኧቫሪቅቭ ሁኖዋ፤ ኧዋ ዘንጋ አአር ኢትሳአርዋኸ አትዋቾዪ። ³ ህመኸ ኧኸረሜ ሁኖም ኬሸዉዮምታ ዎርሙ፤ቲያርታቭ ህመመያሁዋ ተፊንቄዪ ተሰማሪያቭ አጋድ ሆሩዋ ቧርሙ ኬሸዉዮም። ሁኖም በሃአመያ ቲያርታ በሃይ አኖዉታ [በክርስቶስ አአሞሩዋ ኧሰማት} ፤{አረማዊ ሰቭ ኧክርስቶሲ ኧትዠፖሩዋኸ በክርስቶስቭ አአሞሩዋኸ ኤኤጂዮም}፤እም በክርስቶስ አአሞሩዋ ኧሰማት በዋ ዘንግጋ ቡሼኧኸ ሳረኖም ። ⁴ ኢየሩሳሌምቭ በሰንኦዋጋ ፤ኧሃይ ቤተ ክርስታን ሰቭ ፥እእግዜር ኪሸረኘዪ፥እመኸቭ ኧቤተክርስቲያንቭ ባሪቅ ሁኖዋ ቴኤፖሪዮም።ኧኬሸዉዮምቭ ሁኖዋ እግዜር ተሁኖዋ ኸረታ ኤፐን ሜና እንእ ኤኤጂዮም ። ⁵ በክርስቶስ አአሞሩዋ ኧፈሪሳ ሰቭ ተረሾም ተሸኮሙታ፤ «አረማዊ ሰቭ ዘገር ያጎኦዮመኸዪ፤ኧሙሴሜ ቂጫ ዩኡሮዋመኸ ኦንኧት ያትሲእ» ቧርሙ። ⁶ እእግዜር ኪሸረኘዪ፥ ኧቤተ ክርስታን ባሪቅቭ ሁኖዋ ዋ ዘንጋ ኧተኸ ኧኸረኸ ያዢ ተዶሞጁም። ⁷ ኖኦራ አአር ተኩራኮሪ ቀጥወ ፤ጴጥሮስ ተረሳ ተሸከትታ፤ዋኸ ባረኖም ፤ «ኧሰማቶ እግዜር ኢያ ተቀሪ ግዚየ ኢፍቲ ፤ባሁዋ ግት፤ ኢያ ሸፐተታ አረማዊ ሰቭ እእግዜሪ ያተርፍካ ወሄ ዋራይ ቲያ ሰምኦምታ ያአዉሩዋኸ ኤፐኖኸ ቲሂሩዋ ። ⁸ ሂንቭ ኢሂርካ እግዜር ፤ኢናቭ ቨንረመኸ ኧሁኖም መንፈስ ቅዱስ አቨኖምታ ኧቴኤፐረኖኸ ምሰከረኖም። ⁹ ሂንመሁኖዋ ክርስቶስ ቦኦዎርት ባጢርሁኖዋ አፈካኖምታ፤ ቢናዪ በሁኖም ግት አት ቡችርነድ ኢረቭረኸ አኔፐዳ ። ¹⁰ አካ ባቴ አቦመንራዪ ኢናቭ ንፌንግነዪ ኧኸረንረ ቀንበር በክርስቶስ አአሞሩዋ ሰቭ ባፎንጉት ኧቭር እእግዜር ንፈትንኔ? ¹¹ ኢናቭ ኧተነፍነ ሁዳ ኧሁኖመኸ በጎይታ ብእየሱስ ክርስቶስ ጠጋ ኧኸረ ናአቭርነ ። ¹² ሃአ ግዚየ ኧትደመደ ሰቭ እንእ ቅንቁስ ባረታ በርናባስቪ ጳዉሎስቭ እግዜር በሁኖዋ ኸረታ በአረማዊ ሰቭ ግት ኤፐኖውዋ ስርም አናሸዊ መርኸትቪ ወግ ኧሆርሙ ሜና አአር ቲዝረኩታ ጭንቧርሙ ኢሰቭ ኦዮዋ ባንደ ። ¹³ ሁኖዋ ዝሬኮም ቲጆፑርታ ያዕቆብ ተረሳ ተሸከቨታ ዋኸባረ፤«ኧሰማቶ ስቭኦኝ ፤ ¹⁴ እግዜር ታአረማዊ ሰቭ ኧተኸ ኧገግኋ ኢሆርታ ሰቭ ኢሸፕቲ በተረ ኧተኸ ኧትራከቨኖኸ ስምኦን ዩሪዳ ጴጥሮስ ኤኤደንረ ። እመኸቭ ባርሙ ኧጣፉይ ኧነቢ ሁኖዋ ቃር ተዋዳ እማትኖዋ፤ ¹⁵ እመኸቭ ባርሙ ኧጣፉይ ኧነቢ ሁኖዋ ቃር ተዋዳ እማትኖዋ፤ ¹⁶ «ተዋ ቀጥወ ኧትዠፐርኬ ፤ ኧትቫነረቭ ኧዳዊቲ ቢድ አረሽኬ ፤ ኧትባነረቭ ሁዳኋ ንሸተሁ አትሸኩኩዴ፤ አትቭ ሃአይተሁ አረሽኩዴ ። ¹⁷ ሁድቭ ኧተነፉዋ ሰቭ እግዜር ኢሱኡዋኸ ፤ ሹቭመኛ ኧፌነጉዋ አረማዊ ሰቭ ኢሱኡኝነኸ ፤ ዋሁኖዋ ኤፐ እግዜር ዋኸ ይቭር ፤ ¹⁸ ሁኖም ተድረ ቆነሹምታ ኧትሄርታኖዋ አአር።» ¹⁹ ህመኸ ኧኸረሜ፤ ኢያ ኧገግኛኸ፤ እእግዜሪ ኧትዠፖሩዋ አረማዊ ሰቭ አናርጠንቅነዮዋ እር። ²⁰ ባይኸር ኧቅርኘ አንጪታ ተሰነኸ ሸረድ፥ተረከዊ ሰቭ ሁጅር ተድሙጅት፥ አኖቊታ ተወንደ[ተቨከተ} ዋጋ በሰር ተዉርኧት ፥ደቭ ተዉርኧት ያረኡዋኸ ንጠፍኔኖይ ያትሲእ። ²¹ ኧሙሴ ቂጫሽ ተድረ ቆነሺታ ሰንበተሰንበት እንእ አይሁድ ቢደሞጅኮዳ ቢድ ቲያረቡᎅቪ በከተማ እንእ ቲኢጂም ኖፖሪ ²² በህም ግዚየ ኪሸረኘ ሁኖሚን ባሪቅቭ ሁኖዋ ታአንዳ ተቬተክሪስቲያንቭ ሰቭ እማቲ ሆርሙታ፤ተግትሁኖዋ አታት ሰቭ ሽፕችተዉዋታ ፤ተጳዉሎስቪ ተበርናባስቭ እማትሜ አንፆኪያ ያሩዋኸ አትዋቾም ፤ህመኸ ኧከረሜ በክርስቶስ ታአሞሩዋ ኧሰማት ግት ዋና ኧረፖሩዋ ፤በርስያን ዩሪዳ ይሁዳዪ፥ሲላስቭ ሾፖቹም ። ²³ በሁኖም ኧጅ ዋኸ ይቭካ ወረቀት ጣፉም ኬሾሙ ፤ ኢና ኧሁዋይ ኧሰማት ኧኸርነ ፤እእግዜር ኪሸረኘዪ፥ኧቤተክርስቲያን ባሪቅቭ፤እማትሜ፥ በአንፆኪያ ፥በሶሪያዪ፥አመኸቭ በኪልቂያቭ አነሁዋታ ኧሰማት እንእ ወጌምትንራ ኧስርአሁዋ ። ²⁴ አታት ሰቭ ኢናታንፈቅድኔኖም ፤ቲናይ ተረሾም አሁዋይ ሞኦምታበዝሬኮኩዋ ዘንጋ አጀጎርኩዋመኸዪ አድዋኞኩዋመኸ ሰምአነ ። ²⁵ ህመኸ ኣኸረሜ ቀሪ ሰቭ ሸፐትነታ ቲረጂዮታ [ኧሰማት] ተበርናስቪ ተጳዉሎስቭ እማቲ አሁዋይ ንኬሸነዮይ እንእቨንራ ተስማአምአነ። ²⁶ በርናባስቪ ጳዉሎስቭ ኧጎይታንራ ኢየሱስ ክርስቶስ ሹቭ ቲዩሩዋ ነብስሁኖዋ አዎኦም አአይፖርዋታኖዋ አአር። ²⁷ ህመኸ ኧኸረሜ ኢና በወረቀት ኧጣፍኔሁዳ በቃርሁኖዋ ገኪይተዉዋ በቃርሁኖዋ አጪግተዉዋ ዪኢጅኩዋኸ አኩ ይሁዳዪ ሲላስቭ ኬሸኔነኩም ። ²⁸ «[ንኬሽኔነኩዋታ] ሁድቭ ፤ኧቅርኘ ቧርሙ ህትቭ ቴፐዊ ተሰነኸ ሸረድ ፥ደቭ ተዉርኧት፥ኧኖቊታ ተወነደ ተቨከተ ዋጋ በሰርተዉርኧትቪ ፥ተረኮዊ ሰቭ ሁጅር ተድሙጅትቭ ታረኡዋነኸ ።ተዋሁኖዋ ብታሮኡዋ አሁዋ ወሄን አአር ። ²⁹ ትእም ቲያትሱኡታ ዘንጋ ኤኛ አአር ባሁዋ ፎር አንጨርኔኮኩዋኸ ፤ኧመንፈስ ቅዱስቪ፥ ኢናቭ ወሄ አአር ኸረ ተረከቨንረ ። ተወሄ አአር! በወገሬት! ³⁰ ኧኬሸዉዮም ሰቭ ተሃይ ተትስራፑዋ ቀጥወ ተረሾም አንፆኪያ ወርሙ ፤በህሜ በክርስቶስ አአሞሩዋ ሰቭ እእንእ ብእማት ስቨሶዉዮምታ፤ወረቀት ሁዳ አዎኦም አቡዮም ። ³¹ ሰቭቭ ሁኖዋ ወረቀት ሁዳ ታረቦቢ ቀጥወ ፤ሂን ቢያትሽርካ ምክርሁኖዋ ቡሼኧኸ ሳረኖም ። ³² ይሁዳዪ ሲላስቭ ገግሞሁኖዋ ነቢ ኧረፖሩዋይ ኧኸሬ በክርስቶስ አአሞሩዋ ኧሰማት ኖኦራ አአር ᎀኰርሙ አቁሟሞሪዮምቭ ። ³³ በህሜ ቀሪ ቀረ ቴኤከሹዋ ቀጥወ ተክርስቶስ ታአሞሩዋ ሰቭ በወሄ እአር ተሳፖቹምታ ኧኬሸዉዮዋ ሰቪ ተዠፖርሙ። ³⁴ ሲላስ ጭን ህሜ ኢቸናይ አንጠወ ። ³⁵ ጳዉሎስቪ በርናባስቭ ቴኤኛቭ ተሮኦራ ሰቭ እማትሜ ሆርሙታ ኧጎያት ቃር [ኢየሱስ ያሬፍኸ] ቲያትሞርምቪ ቲዝረኩም በአንፆኪያ ቸኖም። ³⁶ ኣዉሎስ ተቀሪ ግዚየ ቀጥወ ኧበርናባስ «ተሳ ኧዋ ኢፍቲእእእግዜር ቃር ኧዝሬከኔኮዋ ከተማ እንእ ንሆርነታ በሃይአነዉዋታ በክርስቶስ አአሞሩዋ ሰቭ በብር አነዉዋኸ ንሂርኔ ነዥነየዋ»ባረን ። ³⁷ በርናባስ ማርቆስ ዩሪዳ ዮሐንስ ተሁኖም ያሪ ሴኧ፤ ³⁸ ጳዉሎስ ጭን ኧሃአ ኢፍቲ ማርቆስ በጵንፍልያ ተሁኖዋ ተቫይተረታ ኧቬናታሁዋ አናርካ ኧቫሬ ኧኸሬ ሁዳ ጥጭተታ ያሪ አንሴኧዳ. ³⁹ ብእም ኧቫአ በግትሁኖዋ ኑእ መራክስ ኧትረሳዎይ ኧኸሬ ኧዋር ሟሪ ሆርሙ፤ በህም ቀጥወ በርናባስ ማርቆስ ጠበጠታ በመርከብ ቆጵሮስ ወረ ፤ ⁴⁰ ጳዉሎስ ጭን ሲላስ ሸፐተ ፤በክርስቶስ አአሞሩዋ ኧሰማት ኧጳዉሎስ እእግዜር ጠጋ አደራ አዊታ ወረ። ⁴¹ ጳዉሎስቭ በሶርያዪ በኪልቂያቭ ገኘ ቲያርካ በክርስቶስ አአሞሩዋ ሰቭ ያቁሟሙር ባንደ።