¹ በዘቨር ያርእወዳ ያትጨንቅካ ቀረ ኢቫአኸ ሃር። ² በሃ ቀረ ሰቭ እንእ ገግኃ ኢረድካ አአር ኢኸርኬ ፤ዋጋ ኢረጅታ ፤ተⶔያጓዥ፥ቲቢተኛ ፥ያትቃንቩታ አአር፥አአቭ ታአዶድሁኖዋ አይታአዘዡዋ፥ አኸዳ ኤነድ፥ቅድስና ኤነኖዋ። ³ ንማጀ ኤነኖዋ፤ ተሰቭ አይትቊያሞጩዋ ፤ኦአደኘ ገግሁኖዋ አይጎዦዋ፤ቱኧ ፥ወሄ አአር ኧኸረ ሁዳ አይረጁዋ። ⁴ ኢሆጆታ አአር፤ኢትሃይጅታ አአር ፤አታአር ባኸረ በትቢት ኧትቬንኦዋ አአር፤ትእግዜር ኢረእ ደንገኝነድ ኢረጅታ አአር ኢሆርቴ። ⁵ እእግዜር ያኸቡጅታ/ሃይማኖተኘ / ሰቭ ኢዎስሩዋ ደረግኋ ጭን ሆቾም ፤ተዋሁኖዋ አረእ። ⁶ እመሁኖዋ በቪድ ቢድ ተደኦርሙ ጎፖም በሮኦራ ባጢር ኧታአከጃ በቡችር ቡችር ሙጥጥ ሙጥጥ ሜና ገፓም ኧሳረና ኧሳረናኸ ኢኸራታ ምንፈስህና ቂጨኘ እሽቻ ያጠሙጅዋታኖዋ አአር። ⁷ ኧዋኸ እሽቻ እንእ ግዚየ ኢትመራ ዘንጋኋ ጭን፤ኧዉረ አአርኋ ኧኋርቲ ስርም አይሰርአታ። ⁸ ኢያኔስቪ ኢያንብሬስ ኧሙሴ ኧትቃወሚኸ እም ቀርብሁኖዋ ኧኧፋወዋዪ ብእምነትቭ ኧወትኡዋ ሰቭ ኧዉረ አአር ኢትቃወሙዋ ። ⁹ ኧህር ባኸሬ አይቴፕኖታ፤ ኧሃአ ሰቪ ጋዉነድ ኧትሄረመኸ እእም ሰቪ ሁዳ እእንቨኃ ኢትሄርሴ። ¹⁰ አኸ ጭን ትምርትኛ፥ ሜናኛ ፥ተመኛትኛ ፥እምነትኛ፥ ኧፍረሁትኛ፥ንማጀመኛዪ፥ ትቭኤተዉ ኧትሰጎዉትመኛ ትሂር። ¹¹ ኧትሰደጅትመኛዪ መከራመኛ ፤በአንፆኪያ፥ቢኢቆኒዮንቪ በልስጥራቭ ኧሰንአቪ ሁዳ እንእ ፈነሁቭ ኧትሸከሁወ ኧትሰደጅት እንእ ትሂር፥ጎይታ ጭን ተዋሁኖዋ እንእ አተነፈዪ። ¹² ጪግቭ በክርስቶስ ኢየሱስ አመረ፤እእግዜሪ ሰቭ ሂይተ ኢረቭሪ ኢረድካ እንእ ኢትሰተድ። ¹³ ሙጥጥቪ ቄቃቭ ሁኖዋ ጭን ቲትቀቁሚ ቲቆቁም በቩጥጥ ሜናሁኖዋ ፎር ሙጥጥ ሜና ቲደዉርኰ ያሩዋ ። ¹⁴ አኸ ጭን ኧትማርኸ ተቫን ኧኸረኸ ቲሂሪ ኧኸሬ በትማርኸንቪ በገፓናኸቭ ሁዳ ትቭአ ተሰገቭ ። ¹⁵ ተትክነድማኸ ቀነስኸ በክርስቶስ ኢየሱስ ቦኦዎርት፤ኧትረፉት ኢረሁኮዳ ጥበብ ኢረሁኮታ ኧትቆደሹዋ መጣፍ ሃርኸ። ¹⁶ ኧትቆደሹዋ መጣፍ እንእ እእግዜር መንፈስ አኖወታኖዋ አአር፤ያትሞርኮይ ፥ኧትሳሰቹዋ ሰቭ ኢዥፑርኮይ፥መያ ኧገፈረ ሰቭ ኢጌኪርኴ፥ፅድቅ ኢረሁኮዳቭ መያ ኢዎሁርኴ ያጔኩሩዋ። ¹⁷ እመዳቭ እእግዜር ሰቭ ኧወሄ ሜና እንእ ኢቨቃመኸዪ በቂጢየ መያ ያረኸ ኢጌኩሩዋ።