¹ ብእግዜር ኢፍቲ ፤እመኸቭ በአያ ባነዉታቭ በዎጁም ሁኖዋ ኢፈርዲ ቢቫአካ ፤በክርስቶስ ኢየሱስ ኢፍቲ፤ ኧሁዳይ ተዣቨይተዉ ኦኦትቪ፤ መንግስትሞኋ ትናጫምጥ ዋ ዘንጋ አደራ እቭኸ ። ² ቃርኋ አዉድ ቢትመችካቭ ባይትመችቭ እንእ ግዝየ ተጥቫቨቅ በሩእ ፋራይሂነድቪ ባትሞርትቭ ገክር ኢኢፋደኘ ቢፋድኋ ማአችወ ፤አቁሟሙርቭ። ³ እመኸ ኢኸርካሁዳ ሰቭ ኧዉረ ኧኸረ ትምርት አይቴኤፐርወ ጊፐ ኢቫአይ ኧኸረዴ፤ ኢረእ ኧገዛ ምኞትሁኖዋ ኢትስማማአኮታ ሃአ ያቲኪካ አአር ኧሰምኦኮ እንዝርሁኖዋ ኢትስምአምአካ ኢሰቩኦዪ ኢሱኢዳ ሁዳ ዪኢድኮታ በዙሪያሁኖዋ ኖኦራ አስተማሪ ኢስቨሱዉዋቴ። ⁴ ኧውረ አአር ተሱዉኦት እንዝርሁኖዋ ኢዠፑሩዋቴ ፤እቊትሜ ኧኝኧተዉ ኢትዥዋፖሩዋቴ ። ⁵ አኸ ጭን ቢቫአቨኸዳ ዘንጋ እንእ ታድራከድ ገጋኸ ኧየ ፤ቢሰርአቨኸዳ መከራ እንእ ፍረህታ ትብአ ተሰገቭ ፤ወንጌል አአዉጅት ሜናኸ ኧንአ፤ እእግዜር አገጎልጉልት ሜናኸ ጃቭር። ⁶ ኢያ ኢሰጪዳ ቁርባን ህትቨኸ ኧትሁኢ ማአ ሰንአ፤ተዋ አለም ተቫተይተሁ አርወዳ ኧዎንድወዳ ግዚየ ሰንአ። ⁷ ወሄ አርቭ ተዋካሁ፤ ኑጫመኛ ጀፐርሁ ሃይማኖትመኛ ኢየሁ ። ⁸ ተዋ ቀጥወ ኧፅድቅ አክሊል ተጔከረ ይእዬ፤እመዳቭ ቂጥየ ኢፈርድካ እግዜር በሃ ቀረ ኢቬዴ፤እማት ኢያቭ ታይኸርቭ ኧሁዳይ ተዣቨይቶ ኦኦት ተቭራኖኡም ዩኡሮታ ሁኖዋ እንእ ዪውዮቴ ። ⁹ በፈኧረ ኢያይ ትቫአኸ አትቫቅር። ¹⁰ ዴማስ ዋ አለም ነመደ ቼኧዪተሰሎንቄ ወረ ።ቂርቂስ ገላቲያ፤ቲቶም ድልማጢያ ዎርሙ። ¹¹ ዋአካ ቲያ አነዳ ሁዳ ሚቲየ እማት ሉቃስን ።ማርቆስ ባአገልግሎትኋ ያጔኲረዪ ኧኸሬ ትትቫአካ ታኸቭ አአኩ ። ¹² ቲኪቆስ ኤፌሶን ኬሸሁን። ¹³ ትትቭአካ በጢሮአዳ ባአክርጳይ ኧቼኧሁን ካባ አአኒ ፤መጣፍመኛ ኢርእካሞኋ ኧብራና መጣፍኛጥጥኒ የኸ ። ¹⁴ ናስ አረጠረ ጌጥ ያጣዉርካ እስክንድሮስ ኖኦራ ጉዳት አሰንአቪ ፤ጎይታ ጭን ኧቬናኋ ያኩሴ ። ¹⁵ ንዝሬኪኔዳ ዘንጋ ቡሼኧኸ ተቃወመ አኸቭ ተሁዳ ተጤፕ ። ¹⁶ በትከሰስሁወ ዘንጋ አአወተረ ቃርኛ ትናአይፕርካ እንእወኃ ቼኧ ሴከ ባኸሬ ፤እማት ሰቭ አናአከዜዳ ፤እም ባጢርሁኖዋ አይቨዝርወዋ። ¹⁷ ቢኸር እእግዜሪ ወሄ ዋራይ ቢያ ኢቴኤዲ፤ አለማዊ ሰቭ ኢሶዉኦዋኸ ጎይታ በቭየኛይ ተሸከቨ አትፓፓዪ ተዠፕቭ አቃ አዋአዪ ። ¹⁸ ጎይታ ተቩጥጥ አአር እንእ ያተርፌዴ ፤ኧሳቫዪ መንግስትመኃ በወገሬት ያሰርአይዴ ፤ተዘላለም ዘላለም ስን ክብር ኧሁዳ ኧህር አሚን። ¹⁹ ኧጵርስቅላዪ አአቂላ ፥ኧሄኔሲፎሩም ቢደ ሰቭ ወገሬት ባርኒ ። ²⁰ ኤርስጦስ በቆሮንቶስ ከተማ ኤከሰ ፤ፕሮፊሞስቭ ኤኤመኒ ኧኸሬ በሚሊጢን ቸኧሁን። ²¹ ዘር ታይጋአ ኢያይ ትቫአኸ ኢኸነኸዳ ሁዳ እንእ ኧንአ ።ኤዉግሎስቪ ጱዴስቭ እመኸቭ ሊኖስ ቅላዉዲያዪ ኧሰማት እንእመሁኖዋ ወገሬት ዩከ ። ²² ጎይታ ታኸ ኧህር ።እእግዜር ጠጋ ታሁዋ ኧኽር።