¹ ባቴ ትከኞ አኸ በክርስቶስ ኢየሱሲ ባነዳ ፀጋ ጃድ ባር/አትቫቅር/ ። ² በሮኦራ ሰቭ ኢፍቲ ቲያ ኧሰምአኸን ትምርት ኤኤኛ ያትሞሩዋይ ኢኸኖታ ኧታአሞሩዋ ሰቭ አደራ አቭ ። ³ ኧክርስቶስ ኢየስሱሲ ወሄ ወታደርኸ ህር ቲያቭ እማቲ መከራ ተኧቨር። ⁴ በወታደርነድ ያጔኪርካ ሰቭ አአላቃኋ ሂን ያትሽሪ ጃድ ይቭር/ያትቫቅር /ባኸሬ ተወታደር ሜና ኤኛ አአር አዪንአካ ። ⁵ እመኸቭ በሩጫ ያትዋትርታ ሰቭ ኧሩጫ ሁዳይ ደንብ ኧየተዉዋ ባትራወኡዋ ሽልማት አይረሁዉታ። ⁶ ቆዋረ ቻዋጅቭ ቄጠ ተረከቨን ወማ ሟርኋ አወተራቸ ኧኩዉት አኖወ። ⁷ ኢያ እቭኸዳ ሁዳ በሂናኸ አዉራ ጎይታ ኢሂርካ ሂን አኸ። ⁸ ተቩድ ኧትረሳ ኧዳዊት ዘር ኧኸረ ኢየሱስ ክርስቶስ ዝግድ ኢያቭ ኢኢድኩዳ ወሄ ዋራይ ዋዳን ። ⁹ ብእም ወሄ ዋራይ ኧቫአ ኢኢፋደኘኸ ቲያአጉጅኝ ስን መከራ ኧቴኤፐር፤እእግዜር ቃር ጭን ስርም አይታአከድካ። ¹⁰ ህመኸ ኧኸሬ በክርስቶስ ኢየሱስ ኢረሁዊዳ ኧትረፉትዊ ኧዘላአለም ክብር እማትቬ ኢረሁዉዋይ እግዜር ኧሸፐተኖዋ ሰቭ ትንር ብእን ዘንጋ ፈነህሁ ኧትሸከቭ ። ¹¹ ዋኸ ይቭካ ቃር ዉረ አንዳን አአር፤ «ተሁዳ እማትሜ በዎድነ ፤ ተሁድቭ እማትሜ አያ ሂተነ ንበርነሴ፤ ¹² ቲቭኧተነ ብትሸከቭነ፤ ተሁድቭ እማትሜ ንግስነሴ። ብንኸዳኔይቭ ሁድቭ ኢኸዳንረ ፤ ¹³ ሙርቴ ሂንተነ ባትረከቭን ፤ሁዳ እንእ ግዚየ ሙርቴ ኸረ ኢረቭር ፤ኧገግኋ ኢኸዳይ አይኸነዳ» ። ¹⁴ ህመኸ ኧኸሬ ዋ ዘንጋ አዝጉጅት አቴእኩ በቃር ባይኩራኮሩዋይ ብእግዜር ኢፍቲ አጤፕኮዋ፤እመዳ አት ጥቅም ኤነን ኢሶዉኤዳብ ሁዳ ያፈርስካን አአር ። ¹⁵ አይቅቨጭቪ ኧዉረ ኧኸርቭ ቃር አጬገ ያትመርካ ኧትምሰከረነ ሜነኘ ህርታ ተፈተነ ኧዋአነ ገግነዳኸ ብእግዜር ኢፍቲ ታቲኢንቨኸ አትቫቅር። ¹⁶ እእግዜር ክብር ታይኸር አታር ታያጌኲር ዠረኝነድ አርእ፤ብእም ዘንጋ ኧትጠቦጩዋ ሰቭ ትእግዜር ቲያረኡዋ ያሩዋ። ¹⁷ ትምርትመሁኖዋ አይደርእ መዛኽ በቭሲየ ኢትቭራጭ ሄሜኖዎስቪ ፊሊጦስቭ በሁኖዋ ግት አነዉዋ። ¹⁸ እመሁኖዋ ተዉረ አአር ዎኦም ዣዠ ዩዉርታ ሁኖተ፤ሁኖም «ተዉንድ ኧተሸት ኧዋ ኢፍቲ ኸረ »ተዋ ቀጥወ ተዉንድ ኧተሸት ኤንዳ ቧርሙ አአታትሁኖዋይ እምነት ያትቹኡዋ ። ¹⁹ ኧህር ባኸሬ ጎይታ ኧሁዳ አአር ኧሆሩዋ ሁኖዋ ኢሂር እመኸቭ «ኧጎይታ ሹቭ ኢኸራካ እንእ ተቩጥጥ አአር አረእ» ይቭካ ማተም አኖዳ አይቅረቅር እእግዜር ቃር ተፓ ተሸከቨ ። ²⁰ በአት በሩኡየ ቢድ ከስ እማት ኧወርቅቪ ኧቭርቭ ግቭር ታይኸር ኤኧቭ ኧሸህራቭ ግቭር ኢረቭር፤ ተሁኖም አታትህኖዋ ኧከበረ አአር እታትሁኖዋ ኧትዋረደ አአር ያጔኩሩዋ ²¹ ባቴ ማንኝእመኋ ተዋ ተዝሬከሁኖዋ ዘንጋ ገግኋ ቢያጠርር ኧከበረ አአር ያጔኪርካ ኧትቀደሰ፤ኧጎይታሞኋ ያጔኪርካ ኧወሄ አአር እንእ ኧትዝጋጀ አአር ኢኸር። ²² ተወዴይነድ ሙጥጥ ተመኛት ሲህ ፤በጥርር ሂን ጎይታ ቲሆሮታ ሰቭ እማቲ ህርታ ፅድቅ፥እምነት፥ንመጀዪ ሽኛትቭ ተኸተር። ²³ መራክስ ያቫአኸ ቲሂሪ ኧኸሬ፤ አታአር ታያጔኪር ማንኝእ አአር ተኸረ ዉርጀ ሲህ። ²⁴ ኣጎይታ አገልጋይ ኢትራከሲ አይትቨቃኩዳ፤ ኢረእ እንእ ሰቭ ገር፥ አትሞርት ኢኸርነዳ አአር፥ፋራይህቭ ኧሁርት አኖወ። ²⁵ ኧውረ አአር ኧኋርቲ ኢሰርኦዋኸ እግዜርቭ ንስሃ ኢጎኦዋይ እድል ዪኮኸ ተስፋ ቦንኧት ኢትቃዎምታ ሁኖዋ በገርነድ ኢዠፕርካ አአር ኧሁርት አኖወ። ²⁶ እመዳቭ በቀርብሁኖዋ ኢጎኦቴ፤ ኧሂንኃ ሙርአድ ያቲፕኮዋይ ባሪያ ኤፐ ተጠበጠኖዋ ተሴጣን ሽካ ኢትጎፎሩዋሴ በዋርትን።