1 2 ጎይታበምረትኋ ዋ አገልግሎት አቨንሬ ኧኸሬ ቀጨ አይረንረዳ። 2. ዘንጋ ጭን ኧዶኦሩዋ ያቁወጭታ ዘንጋ እንእ ቸኧነ፤ኧጎይታቭ ቃር ታንኸራአር አንራእነዳ፤ ኢረእ አውረአአር ኧየሞኋ ዜግተነታ በሰቭ እንእ ኢፍቲ ወሄያአር ሂንተነ ንትረከቭነኸ ኧጎይታአር ሂንተነ ንረቭነዴ። 3 4 3. ኧሰቭ ኤኤድኔ ወንጌል በደኧረ ፥ኧደኧሮዎዋ ቢዮኦፎታ ሁኖትን። 4. ኧጎይታ መርኸት ኧኸረ ኧክርስቶስ ኧክብር ወንጌል ብርሀን አያዡዋኸ አያአውርዋኸ ሴጣን ኧቀርብ ኤርሁኖዋ አፈንጠኖም። 5 6 5. ኢና ንኢድነዳ ሁዳ ክርስቶስ ጌታ ኧኸረነኸ ባሀሬ ኧገግንራአር አኸረንዳ፤ኢናቭ ገግመንራ ኧክርስቶስ ትንነ አሁዋ ናጌኪነዳአር ኸነ። 6. ጎይታ ጠነቫ እዋየ ኧህር ኧቫረመኸ እም በክርስቶሲ ኢፍት ያዢዳ ኧጎይታ ክብር ንሂኔኔ ጎይታ ብርህእንኋ በሂንራ አወና። 7 8 9 10 7. ዘንጋ ጭን ዋ ኑእ አርዋ ኧጎይታናአር ባሀሬ አሂርትኋ ኢትሄረኸ ዋ ወሄ ዘንጋ ኧሸህላ ግቭረኸ ኸነ ጠበጥነዪ። 8. እም አጋድቪ ህም አጋድ ቢጎፎንረቪ ውጋ ውጋቭ ቢይረንረ ስርም ቀጨ አይረንረዳ። 9. ቢያሳኩንረቭ ገኘ አንወኧነዳ፤ ድርጊቶ ቢቋሽንረ አሞድነዳ። 10. ኧኢየሱስመኸ ኢናቭ አያ ሂንተነ ንትረሳነኸ እንእ ቀረ ኧኢየሱሲ ሙድ ቦፎንራ ፌነግነ ንዠውነ። 11 12 11. ኧኢየሱሲ አያ ኧሁርት ቢዎድካ ምስየንራ ኢትረክብቨኸ ዋአካ ባአያንራ አነነዳ ኢና እንእ ቀረ ኧውድ አዎም ያአይፑንረ። 12. ባቴ ኢና ተውድ አደጋ እማቲ ትነቭነዳ አሁዋ አያ ኸርሁም ትረውርዋ። 13 14 15 13. «ቧርም ኧጣᎉመኸ ኢናቭ ፣ ኢናቭ ሀ አት እእምነት መንፈስ አነንሬ ኧኸሬ ናአቭነ አአመነዪ ሁዳ ንኢድነ። 14. ብእም ኧቫአ ጌታ ኢየሱስ ክርስቶስ ተውድ ኧረሳ ጎይታ ኢናቭ ተኢየሱስ እማቲ ተውንድ ንሸተንረታ ታሁም እማቲ ተሁዳ ያረቭረንረኸ ንሂነ። 15. ዋ አሁዋ ጥቅም ኧኸረ ኧጎይታ ኧዋቢነድ ሜና ኧሮኦራ ሰቭ በሰንኣጋ ኧጎይታ ኧክብርኋ ሽኩርት ኢደፕስነነኸ። 16 17 18 16. እመኸ ኧኸሬ ቀጨ አይረንረዳ፤ ማንእየ ኧፎር ምስየንራ የኧፋካአር ቢኸርቭ ኧከሲ ምስየንራ እንእ ቀረ ወያ ኢኸር። 17. ብእመዳ ኧዋአካኋ ኢሰርአቨንረዳ ቀሪ ጅጓረ ልክ ኤነነ ኧዘላለም ክብር ንቴኤፐኔኮዳናአር። 18. እመኸ ኧኸሬ ሂንንራ ናወራነዳ ሁዳ እማት ቤኤር ቢያዢዳ ሁዳ ታይኽር ፥ ቤኤር ባያዢ ሁዳን ፤ ቤኤር ያዢዳ ሁዳ እማት ኧዋአካኖኋ፤ ቤኤር አያዢ ሁዳ ጭን ኧዘላለምን።