¹ አኸቭ ኧቫሪቅ ሰቭ አአባኸ ትቨህርኩኸ ምህርኮዋ ባኸሬ ማአችተኸ በሩእ ቃር አትዜግኮዋ፤ወደያ ዴንጋቭ ኧኧሰማታኸኸ ተኧቨርኮዋ ። ² ባሪቅ እሽቻቭ አአዶዳኸ ትቨህርካኽኽ ምህርካ ፤እመኸ ዘየ ግርኤድቭ ኧኧተማኸኸ በጥርር ሂናኸ አገክርካ ³ ጪግቭ አጀገረና ምስ ኧዎንደና እሽቻ ህድምካ ። ⁴ አት ምስ ኧዎንደና ምሽት ጭን ዴንጋ ዌ ሜቸቤ ቢረቭርካ ዋ ዴንጋ ኧገግሁኖዋይ ቢደ ሰቭ በርጆት ኧቪደሰቭሁኖዋ አጅግ በዣዉርት ትእንእ አአር ኢፍቲ እምነትሁኖዋ በቬና አቶሽትኧትሟርት አኖዎዋ፤እም ዘንጋ እእግዜር ኢሽርኩዳ ዘንጋን ። ⁵ ጪግ ምስ ኧዎንደና ኦጣሻ ትረቭርካ ምሽት ተስፋሻ ብእግዜር ቲንአ ኧፀሎትቪ እግዜርቭ ትሰኧሪ እንእ ግዚየ ዋአናዪ ኧዳርቭ ጃድ ትቭር ። ⁶ ኧዋ አአለም ኧሳርት ኢሽርካዳ ምስ ኧዎንደና ምሽት ጭን ታትዎንድ ኧዎንደችዳኒያ አአር። ⁷ አትዎኋ ኢትቀንጥወዳ አአር አይረቭረኸ ዋ እዝዝ እንእ ሰቭ ኧዝዝ። ⁸ አት ሰቭ ኧዶቦኋ ኢረእቭ ኧቪደ ሰቭኃ አያአግዝ በኸረ አአመረን እግዜር ኧኸታ ታናአመረቭ ሰቭ ኧቫአሰ ቡሼእ ሰቭን ። ⁹ ምስ ኧዎንደና ምሽት በመዝገብ ትትጠፍካ እድሜሻ ተስልሳ ዘቨር በገዳ አይህር እመኸቭ እእማት ምስ ምሽት ኧረፐረች አአር ኧሁርት አነቫ። ¹⁰ ዴንጋ በጨር ባትራኡት፤ባዘራ በተኧዎርት ፤በክርስቶስ አአሞሩዋ ሰቭ ኧግር በእዉት ፤አጀገረኖዋ ሰቭ በርጆት፤ማንኝእ ወሄ ሜና ቦንኧት፤በወሄ ሜናሻ እንእ ዪኢጅናዳ ምሽት ኧሁርት አነቫ ። ¹¹ አቭር ምስ ኧዎንደና እሽቻ ጭን በዋኸ መዝገብ አትጣፍካ ህና በገግህና ተመኛት ኢቴኤማምታ ኧክርስቶስ አነናታ ንማጅነድ ቲቀቭርካ ምስ ያጋአይ ኢትሜኛ። ¹² ብእም ኧቫአ ባአወተረ ኧገፓይ ቃር አፈረሻይ ኧኸሬ ኢትፈንድቫ። ¹³ በሁድቭ ፎር ሜና ግፊተዉ ቢድ ቢድ ኧሆርት ኢርዎሻ ፤እማት ሜና ኧጉፉርት ታይኸርቭ ፤ኧዘጉት ኤነቫ አአር ቲዝረካ ኦአደኘ ኢኸራ ፤ባያጋአካ አአር በሰቭ ዘንጋ ኢጋአታ አአር ኢኸራ። ¹⁴ ህመኸ ኧኸረሜ ምስ ኧወንድና አቭር እሽቻ ያጋአኸዪ ዴንጋ ዪኢኛኸ ቢድመህና ይእራኸ ጠላትቭ ኢትቀንጫኮዳ አአር አይረህቭቫኸ ኧቨህርካ ። ¹⁵ ተዉረቭ እእም ኢፍቲ አታት ምስ ኧዎንደና እሽቻ ኧሴጣን ኢትሄትራይ ትእግዜሪ መያ ዋአም ኢኢ ተዠፐራም። ¹⁶ አማኝ ኧኸረች ማንኝእ ምሽት በቪደሰቭሻ ከስ ምስ ኧዎንደና እሽቻ ቢረቭራ በቤተ ክርስቲያን ባይታፐራይ ሂድቭ ትርዳካ ቤተ ክርስቲያንቭ አታአር ኢረዳካታ አአር ኤነና ህና ኢርዳሴ ። ¹⁷ ቤተክርስቲያን ጌከርሙ/በጨር/ ዩኡሮታ ኢረእ እእግዜር ቃር ባአዉጅትቪ ባትሞርትቭ ያትቫቁርታ/ ጃድ ዩዉርታ/ ባሪቅ ኖኦራ አእር ኧትኮቦርት አኖወዋ። ¹⁸ እእግዜር ቃር ኢኢድካ መጣፍቭ«በአዉድ ዝኝኧ ኢደርግካ ባዉራ አፉኋ አተኧግድ፤ ሜነኘቭ ኤፐወ ኡኡዛትኋ ኧኩዉት አኖወ »ይቭር። ¹⁹ ዉርኤት ዌ ሶኦስት ሰቭ ባኔኤዶዌ በቤተ ክርስቲያን ባሪቅ ኢቫአካ ክስስ አተኧቨር ። ²⁰ ኤኛሁኖዋ ኧዥተዉዋታ ኢትጬፑዋኸ ባጢር ኢንኧታ ሁኖዋ ብእን ሰቭ ኢፍቲ ማአችዎዋ። ²¹ ብእግዜርቪ በክርስቶስ ኢየሱስቭ በሾፖቺየዋ መላአይካ ኢፍቲ ዋ ትዛዝ አአት ሰቭ ታታደላ አአትቭ ሰብ ኢፍት ታታዥ ቲንአኸ አደራ እቭኸ። ²² ባአትቭ ሰቭ ፎር ኧጃኸ ታድጊ አትሃይንድ ቴኤኛ ሰብ ባጢር ባቲንአይ ተጤፕ ገግማኸ ተቩጥጥ አአር ኧየ ። ²³ ኧከስማኸዪ ኢትረሳቨኸዳቭ ባአሸ ትትቭር እሲየ ዌን ስጠይወ ባኸሬ ተዋቴ እማት እሃ አትስጤ። ²⁴ አአታት ሰቪ ባጢር ሰቻይ ኧዋአዳን አአር ተሁኖም በተረ ኧፍርዲ ያር።ኤኤኛሁኖዋይ ባጢር ጭን ኢትሄተርኮዋ ። ²⁵ ወሄ ሜናቭ እመኸ ሰቻይ ኧዋአዳን አአር ሰቻሜ አቧአ በኸረ ስርም አይደኧርካ ።