¹ ተዋኢኢ ቢዎኦታ ዘቨር አታት ሰቭ እምነትሁኖዋ ህጀተዉዋታ አአታላይ መንፈስቪ ኧሴጣንቭ ኢትሄተሩዋኸ መንፈስ ቅዱስ ኧዉየሞኋ ዝሬከ። ² እእም አይነት ትምርት ኢቫአካሁዳ ቀርብሁኖዋ በጋረ ብረድ ኧተኮሺ አአህር ተድነዘዘወዋ ተኸጣዪ ኤነ አአር ቲዪኢጅታ ተዋራይወ ሰቭን። ³ ሁኖም ኧሰቭ ጋቢቻ ኢሆርኦዋ አሞርሙ ዉረ አአር ኧኋሩዋ ሰቭ እግዜር ኧፈጠረን በሽኩርት ኧቴኤፖሪ ሁዳ ኢዎርኦዋይ ኢሆርኧየዋ ። ⁴ እግዜር ኧፈጠረን ሁዳ እንእ ወሄን አአር በሽኩርት ተቴኤፖሪ ሁዳ ኢቋሺዳ አአር አታአአር ኤነዳ ፤ ⁵ ብእግዜር ቃርቭ በጠሎትቭ ኧትቀደሰዳን አአር። ⁶ ዋ ትምርት በክርስቶስ አአሞሩዋ ኧሰማት ብቲኢድ ብእምነት ቃርቪ በትማርኸንቭ ወሄ ትምርት ኧትሸገርኸ ኧክርስቶስ ኢየሱሲ ወሄ አገልጋይ ትህርሴ። ⁷ እእግዜር ክብር ታይኸር አታአአር ታያጌኪር ሟሟካዪ ተቫሪቅ እሽቻሜ እንቊት አረእ ፤ተሃ ይረእ በመንፈሳዊ ዘንጋ ገጋኸ አርወሽ ። ⁸ ምሲየ ያተዉኦኮዳ ትምርት ኧርዎሽት ኧቀሪ አአር ያጔኪር ኧዉረሚየ ኧመንፈሳዊ ትምርት አአር ገግ አርወሽት ኧዋአካቭ ኧዋ አርዳ ኸረ ቢቫአካ ሂዎት ተስፋ አነኒ ኧኸሬ ኧዉርኤቸ ኤኤዲ ኢጠቅም። ⁹ እምቃር ኧታአመረዪ ሰቭ እንእ ሙርአሞኋ ኢቴኤፐርኲ ያትሲእካን አአር፤ ¹⁰ ኧዋዳ ባርነ ጃድ ንቭርነ ንቂጥነቭ ሁድቭ ኧሰቭ እንእ ኢረእካሞኋ አናአሞርዋ ሁኖዋ፤ ኢናቭ ዋኸ ኒንአንእዳ ሁዳ እንእ ግዝየ ቢረቭርካ እግዜር ተስፋ ኒንአኔ ኧኸረዴ። ¹¹ አኸቭ ዋ ዘንጋ ኧዝዝ አትመርቭ ¹² ዴንግነዳኸ ኧዥተ አትቭ ሰቭ እንቀንጠናኸ ፤ዘንጋ ጭን ብትዝሬኩዳ ዘንጋ ብትረቭርኩዳ ኑሮ በርመጀ ብእምነት በንጡሁነድቭ በክርስቶስ አአሞሩዋ ሰቭ ወሄ መሰሮ ህርነዋ ። ¹³ ኢያቭ ትንቫአ ስን እእግዜር ቃር ኢኢጅታ መጣፍ እንእ ኧሰቭ እንእ ባምቡብት በቩሁርትቪ ባትሞርትቭ አትቫቅር። ¹⁴ ኧቤተ ክርስቲያን ባሪቅ ሁኖዋ ባኸ ፎር ኧጅሁኖዋ ኧጫርኮከ ግዚየ በትንቢት ኧዝሬኮከ ጠጋ አይተሳኸ ። ¹⁵ ሰቭ እንእ ኧትራእኸኸ ኢሂረኸ እንእ ግዝየ ሂናኸ በዋ ዘንጋ ኧንአታ አትቫቅር ኧንአኮዋ። ¹⁶ ኧገግማሄ ሂዎትቪ ታትመርኩዳቭ ትምርት አአር ተጤፕ፤ብእመሁኖዋ ትቭአ፤ዋሁኖዋ ቤፐኸ ፤ገግማኸዪ ኢሰቭኦኮዳቭ ሁኖዋ ታተርፍ።