¹ እእግዜር ሹዉዊ ትምርትሞኋ ባይትቀነቪ አገልጋይ ኧሆሩዋ ሁኖዋ ያረቭርኮታ ምስ ሙርአ ክብር አቩት አኖዎዋኸ ኧኋሩዋ ። ² ያረቩሪዮታቭ ስቭ በክርስቶስ አአመሩዋ አአር በሆሩዋ ኧሰማትሁኖዋ ኧሆሩዋይ አይቁርጪየዋ ፤ኢረእ በአገልግሎትሁኖዋ ያጌኪርዮዋታ በክርስቶስ አአሞሩዋ ናማጂሁኖዋ ኧሆሩዋይ ኧኸሬ አኩቡርት አኖወዋ፤ዋ ዘንጋ አስተምርቭ ምህርቭ። ³ ማንኝእሞኋ አአሰት ትምርት ቢያትመር ተጎይታንራ ቲኢየሱስ ክርስቶሲ ጤነኘ ቃርቪ፤ ዉረ ኧኸረ መንፈሳዊነድ ቲያትራእካ ትምርት አይስማምአ በኸረ፤ ⁴ ሃአ ሰቭ በቲቢት ኧትቬንአይ ኧኸሬ አታአር አያጫምጥካ ፤ በቃርቭ ኧቫአ ዉርጀ ኢቴኤድመዪ ኢትራከስሜ ኑኡ ተመኛት አነን ፤እመሁኖዋ ቅናት መራክስ ቂናቨቭ ሙጥጥ ጥርጥርቭ ያዎኦዋ። ⁵ ቀርብሁኖዋ በኧፋዎዋ ዉረቭ አአር በጎፎሩዋ መንፈሳዊ አአርቭ ትርፍ ኢረሁኮዳ መያ ቢቨስርኮታ ሰቭ ግት ስርም አይትሸከቭ ዉርጀ ኢረሾዋ ። ⁶ ዘንጋ ጭን እእግዜር ሰቭ ኧሁርት አነኒዳ ሁዳ ኢቃይሴ ተዋርት እማትሜ ኑእ ትርፍን። ⁷ እመኸቭ ኢኸርካ ሁዳ ዋ አርዳ ትንቫአነዳ አቫአነ አአር አታ አአር ኤነዳ ፤ትናርንነዳቭ አታአር ጥጭተነ ናርኔ አይኸርንሬ ኧኸረዴ ። ⁸ ህመኸ ኧኸሬ እማት ንቨርአኔዳ ሸረድቪ ንትኸተርኔዳቭ ሁጅር በረፐረንረ ኢቃንረሴ። ⁹ ደንገኘ ኢሆሩዋይ ኢሱኡታ ሰቭ ጭን በፈተናዪ በሽካቭ ኢጎኦዋ፤ ኧሰቭ ቢያብላሽካዪ ቢያአፋካ አታር ባኸረ ባያጔኪር ተመኛት ኢጠቦጩዋ ። ¹⁰ እመኸቭ ኢኸርካ ሁዳ ኧቫጢር እንእ ኧስር ኧፈራክ ንማጀ ኧኸረዴ ፤አታትሁኖዋ ደንገኘ ኢሆሩዋይ ታነኖታ ኑእ ተመኛት ኧትረሳ አአሞሪ ክርስቶስ ሆቾምታ ሂንሁኖዋ በሮኦራ ስቃይ ዎኮም። ¹¹ እእግዜሪ ሰቮ አኸ ጭን ተዋሁኖዋ እንእ ሲህ ኧፅድቅ መያ፥ እእግዜሪ ሰቭ ኧሁርት፥ እምነት፣ ንማጀ፥ ፋራይህነድ፥ እምነትቪ ገርነድቭ ተኸተር። ¹² በታአሞርት ጃድ ባር ወሄ አርብ ተዋጋ ፤በሮኦራ ሄቶ ኢፍቲ በወሄ ሙርቴነድ ኧምሰከርኸነዪ ኧትሸፐትኸወ ኧዘላለም ሂዎት ጥጥ። ¹³ እእን አአር አያ ቢዪንአካ ብእግዜር፤በጳንጢዮስ ጲላንጦስ ኢፍቲ ኧዉረ አአር በምሰከረ በክርስቶስ ኢየሱስ ኢፍቲ አደራ እቭከዳ አአር ቢረቭር፤ ¹⁴ ጎይታንራ ኢየሱስ ክርስቶስ ቲቫአ ስን አት ኢፋድቭ ቅነጨቭ እይቫር ዋ እዝዝ አየ ። ¹⁵ እም ኧክርስቶሲ ኦኦት ኧትዳረዪ ኦጣሞኋ ዳኘ ኧኸረ ኧንጕስ እንእ ንጕስ ኧጔታ እንእ ጎይታ ኧኸረ እግዜር በቫረን ቀረ ያቲሽኩዳን አአር ። ¹⁶ አይዎንድ አአር እማት ሁዳን፤አትቭ ሰቭ ኢቴኤነቭኩይ ባይኸነ በሩእ ኡዋየ ከስ ኢረቭር ፤ሁድቭ አሸን እማትቭ ሰቭ ኤነዳ፤ያዥኩሜ ኢኸነዳ ሰቭ ኤንነዳ፤ ክብርቪ ደረግቭ ተዘላለም ዘላላም ስን ኧሁዳ ኧህር አሚን። ¹⁷ ኧዋ አለም ደንገኘ ሰቭ በገግሁኖዋ ባይትሻሞሁዋይ፤ኢና ኢሽረንረኸ እንእ አአር ደፐረ ቢዪቨንረዳ ብእግዜር ባኸሬ፤ተስፋሁኖዋ ቢየኧፋካ ዱኒያ አያዎሮዋኸ ኧዝዝኮዋ። ¹⁸ ወሄ ሜና ኢንኦዋኸ ሚራ ኢሆሩዋኸዪ፤ አነኖታቭ ሁዳ ኢሻኩጁዋይ አኪያ ዩዉሩዋኸ ኧዝዝኮዋ። ¹⁹ በዋ አይነትኧዉረሚየ ኧኸረ ሂዎት ኢረሁዉዋኸ ቢቫአካ ዘቨር አይቅረቅር ደንገኝነድ ኧገግሁኖዋ ቁጥቁጥ ኢንኦዋ። ²⁰ ኧረ ጢሞቲዎስ ባአደራ ኧቴኤፐርኸን ሁዳ እንእ ኧየ ፤እግዜር ታይከብርወ አታአር ታኸረ ዠረኝነድ ፤ ኧኃርት ቲቨስርካ ዘንጋኋ ጭን ኧኋርት ታኸረ፤ዉርጀ ሲህ። ²¹ ኧዋ አይነት ኧኋርት አነንረ ቲዩሩዋ ኧረፖሩዋ አታት ሰቭ ዋኸ ቦንኧትሁኖዋ ታአሞሪ ተክርስቶስ መያ ዎኦም። እእግዜር ጠጋ ታኸ ኧህር።