¹ ናማጂኞ በዋ አፈር ፎር ኖኦራ አሳሳች ነቢ ኧትረሾዋይ ኧኸሬ መንፈስ እንእ አቶኦዎሩዋ ፤ መንፈስ እንእ ተጎይታኔዪዌ አኸረንዳ ቧርም ᎀርሙሩዋ። ² ኧጎይታ መንፈስ ባይተርሁም ትሂርታ በዋዳን፤ ኢየሱስ ክርስቶስ ሰቭ ኸረ ኧቫአኸ ኢቴኤፐርካ መንፈስ እንእ ተጎይታኔ። ³ ኢየሱስ ክርስቶስ ሰቭ ኸረ ማአታ ኧታሸኸ አዪኢድ መንፈስ እንእ ኧጎይታ መንፈስ አኸረንዳ፤ እም መንፈስ ኢባአኴ ቲዩሪንዳ ኧሰምአዂ ኧክርስቶስ ጠራትን፤ሁዳ ዋአካቭ ቢኸር በዋ አለም አነ። ⁴ ዴንጎ አሁዋ ኧጎይታንሁዋአር፤ባሁዋ አነዳ ኧጎይታ መንፈስ ባአለም ታነዳ መንፈስ ኢረእ ። ⁵ ሁኖም ኧዋ አለማአር ኧሆሩዋይ ኢዝረኲዳቭ ሁዳ ኧዋ አለም ዘንጋን ፤እእም አለም ሰቭ ኧሁኖዋ ፣ኢሰቭአኮዋ ። ⁶ ኢና ኧጎይታንራአር፤ኧጎይታአአር ኧኸረ ሰቭ እንእ ኢሰቭአንረ፤ኧጎይታአር አኸረ ሰቭ ጭን አይሰቭአንረዳ ፤ኧውረ ኧኸረ መንፈስቪ አሰተኘ መንፈስቭ ባይቲትተነ ንሂኔዳ ሁዳ በዋዳን። ⁷ ኧሰማትኞ ንመጀ ተጎይታይ ኧኸሬ ፥ ገግ ተገግንራ ንትራቨድነ ፤ ኧሰቭ ኢረንድካ ሰቭ እንእ ኧጎይታ ትከን፤ ጎይታቭ ኢሂር፤ ⁸ ጎይታ ንመጀ ኧኸሬ ፥ ጎይታቪ ሰቭ ኢረንድካ ሰቭ እንእ ጎይታ ኢሂር ⁹ ጎይታ በትከኋ አያ ሂንተነ ንረቭኔ እማት ትከኋ ኧዋ አለም ሰቪ ኬሸን ፤ ጎይታ ኢና አነነዳ ንመጆኋ በዋዳ አቴሸ። ¹⁰ ንመጀቭ ኧዋርት ዋኸትን፤ ኢና ጎይታ ኧረመድኔዪ ታይኸር ፣ሁዳ ነመደንረታ ባጢርንራ ኢፈእንሬ እማት ትከኋ ኢናይ ኬሸን። ¹¹ ናማጂኞ ጎይታ ኢኢና ዋኸ በረመደንረጋ ፣ኢናቭ ገግ ተገግንራ ኧትራወጅት አነቨንረ። ¹² ጎይታ አሸ ሰቭ ስርም ኤነዳ፤ገግ ተገግንራ በትራመድነ ጭን ጎይታ ቢና ኢረቭር፤ ንመጀሞኋ ቢና ሙርአ ኢኸር። ¹³ ጎይታ ንመጀኋ አቨንሬ ኧኸሬ ፣ኢና በሁዳ ንረቭነመኸ ሁዳ ቢና ኢረቭረኸ ንሂነ። ¹⁴ አቭ ጎይታ ትከኋ ኧዋ አለም ሰቭ ያተርፊ ኧኬሸነኸ አሸነ ፤ሄቶንረ ። ¹⁵ ኢየሱስ ኧጎይታ ትከ ኧኸረኸ አመረታ ቢኢድካ ሰቭ እንእ ሂን ጎይታ ኢረቭር ፤ ሁድቭ በጎይታ ኢረቭር ። ¹⁶ ብእም ኧቫአ ጎይታ ኢኢና አነነዳ ንመጀ ንሂነ፤ናአቭርነቭ ። ¹⁷ ኢና በዋ አለም ክርስቶስ ንቨስኔ ኧኸሬ በፍርድ ቀረ ታንፈይነ ኢኢፍትኋይ ንቴኤነቭነኸ ንመጀንራ ሙርአአር ኧህር። ¹⁸ በርመጀ ፈራድ ኤነዳ፤ኧውረምየ ንማጀ ፈራድ ተሂን አዋአ ኢቃሽ፤ፈራድ ተቅጣት ኧጣበጣአር ኧኸሬ ኢፈይካ ሰቭ ንመጀኋ ሙርአአር አኸረንዳ። ^{19 20} ጎይታ በተረ ኧረመደንሬ ኧኸሬ ኢናቭ ንረንድኔ።«ጎይታ ኧረንድ» ቲይር ኧሰምኋ ኢጠራካ ሰቭ ኢፈጥር ፤አሸን ኧሰምኋ ታይረንድ አናሸን ጎይታ ኧተኸ ኢረንዲ ኢኸነ ? ²¹ ኧኸሬ ጎይታ ኢረንድካ ሰቭ እንእ ኧሰምኋ ኧርወጅት አነወ።