¹ ኢየሱስ መሲህ ኧኸረኸ ያአቭርኻ ሰቭ እንእ ኧጎይታ ትከን፤አቭ ሁዳ ኢረንድካ ሰቭ እንእ ትከሞኋ ኢረንድ። ² ጎይታ ትነድነዳቪ ትዛዝሞኋ ትንእየነዳቭ ኧጎይታ ዴንጋ ንረድነዳ ሰቭ ኧኸነኸ በዋዳ ንሂነ። ³ ጎታ ኣርወጅት ኧዋርት ፥ትዛዝኋ ኦኦሮትን፤ትዛዝሞሁኖዋ ያጀጉርታአር አሆርታ። ⁴ ኧጎይታ ትከ ኧኸረ ሰቭ እንእ ተዋ አለም ኢኢም፤ እም አለም ኒኢምኔዳ ሁዳ ብእምነትነንራ ። ⁵ ኧዋ አለም ኢኢምኩዳ እማት ኢየሱስ ኧጎይታ ትከ ኧኸረኸ ኢሂርካ ሰቭን። ⁶ ጥምቀትኋ ቢያቲሽካ እሀቪ ሙድሞኋ ቢያቲሽካቭ ደቭ ኧቫአ ዋ ክርስቶስን፤ሁድቭ ፥ ኧቫአ እማት ብእሀ ታይኸር ፣ብእሀቪ በደቭምን፤ መንፈስ ቅዱስ ውረ ኧኸሬ ዋ ዘንጋ ውረ ኧኸረኸ መንፈስ ቅዱስ ኢኢድ። ⁷ እእመዳ ሶኦስት ሄቶ አነውዋ፤ ⁸ ሁኖም መንፈስ ፣እሀቪ ደቭምኖዋ ፤እም ሶኦስትሁኖዋ ሄቶ ቲኢጅታ ኢትስሟምኦዋ። ⁹ ኧሰቭ ሄቶ ንቴኤፐነ፣ ኧጎይታይ ሄቶነድ ተሀ ኢረእ፤እመዳቭ ኧትከኋ ኤኤደነ ኧጎይታይ ህርቶነድን ። ¹⁰ በጎይይታ ትከ ያአቭርካ ሰቭ ዋ ሄቶ ኤኤደን ቃር በሂንኅኋ አነ። ጎይታ አያአቭር ሰቭ ጭን፥ጎይታ ኧትኋ ኤኤደነ ምስክርነድ አናአመሬ ኧኸሬ ኧጎይታ አሰተኘ ኤፐን። ¹¹ ሄቶነድ ቃርሞኋ ፥ጎይታ ኧዘላለም አያ ኤፐንረመኸዪ አያቭ ኢሆሪዳ በትከኋ በክርስቶስ ኢየሱስ ኧኸረኸ ኢኢድካናአር ። ¹² ኧጎይታ ትከ አነነዳ ሰቭ ጀነት ኢጋአ፤ኧጎይታ ትከ ኤነነ ሰቭ ጀነት አይጋአካ ። ¹³ በጎይታ ትከ ታአውርታ አሁዋ ጀነት ትጎኦዋኸ ትሂሩዋይ ዋዳ ኧጠፍነሁዋ። ¹⁴ ጎይታ ማንእያአር ኧሁዳ ፈቃደኸ ብንሰኧኔ ኢሰቭአንረኸ ንሂነ ፤ብእም ኧቫአ በጎይታ ኢፍቲ ድፈይተነ ንትሸከቭኔ ድፍረት አነንረ ። ¹⁵ ኧሳአኔ ሁዳ እንእ ኧሰምአንረኸ በሀነ ፥ተሁዳ ኧሳአኔ ሁዳ እንእ ዋአካ ንቴኤፐነኸ ንሂነ ። ¹⁶ ማንእየ ሰቭ ኧሰምኋ ኧውንድ አያሰርአ ባጢር ቲንአካ ባሸን ኧጸልይነ ፤ ህም ሰቭ ባጢርኋ ኧውንድ አያሰርአአር በኸረ ጎይታ አያ ኢንአኩ።ኧዘንጋ ጭን ኧውንድቭ አያሰርአ ባጢር አነ፤ኧዋ አይነት ባጢር ጭን ኧጠልይ አንካ። ¹⁷ ሙጥጥ ሜና እንእ ባጢርን፤ ቢኸርቭ ኧውንድ አያሰርአ ባጢር አነ። ¹⁸ ኧጎይታ ትከ ኢየሱስ ክርስቶስ ይእየኲ ኧኸሬ ኧጎይታ ትከ ኧኸረ ሰቭ እንእ ባጢር አዪንአኸ ንሂነ። ¹⁹ ኢና ኧጎይታአር ኧኸነኸ ፣ ዋ አለም ጭን ኧሼጣናአር ኧኸረኸ ንሂነ። ²⁰ ኧጎይታ ትከ ኧቫአመኸዪ ውረ ኧኸረቭ ሁዳ ንሂኔ ኢቬስርካ ሂን አቨንረኸ ንሂነ፤ኢናቭ ዋ ወረ በኸረ በኢየሱስ ክርስቶስ ንረቭነ፤ሁድቭ ውረ ኧኸረ ጎይታ ኧዘላለም አያቭ ዬካ ሁተን። ²¹ ዴንጎ አአሰተኘ ቅርኘ ተስጉጅት ገጋሁዋ ኦሮዋ።