¹ «ኧጎይታ ዴንጋ» ባይቶ ኢሆሮንሬ አቭ ጎይታ ምርአካአር ኧረመደንረኸ ኦዡዋ! ውረቭ ኢና ኧጎይታ ዴንጋንረ፤ኧዋ አለም ሰቭ ኧግይታ አኋሪ ኧኸሬ ኢናቭ አይሂንረዳ ። ² ማጂኞ! ኢና ዋአካ ኧጎይታ ዴንጋንረ፤ተዋ ቀጥወ ገና ምር ንኸነኸ እኋሪዳ፤ ቢኸር ቢቫአወዳ ቀረ ክርስቶስ ትናዥኔዳ ምር ንቨስንነኸ ንሀነሴ። ³ እመዳ ኢኸረኸ በክርስቶስ ተስፋ ኢንአካ ሰብ እንእ፣ ሁዳ ጥርርአአር ኧኸረመኸ ፣ገግኋ ጥርራአር ኢንአ።4 ⁴ ባጢር ኢንአካ ሰቭ እንእ ኧጎይታ ቂጫ ያአፋ፤ባጢርቭ ኧዋርት ቂቻ አአፎትን። ⁵ ክርስቶስ ባጢር ያፈካይ ኧቫአመኸዪ ሁድቭ ባጢር ኤኖኸ ትሂሩዋ ⁶ ብእም ኧቫአ ሁዳ አአመረ ሰቭ ባጢር አዬካ ፤ባጢር ዬካ ሰቭ ጭን ክርስቶስ አቸ አናሸንዳ፣ዌ አሀረንዳ። ⁷ ዴንጋኞ አትዎኋ አይቄቅሁዋኸ ተጦፑዋ፤ክርስቶስ ጥርራአር ኧኸሬ፣ ጥርራአር ኢንአካ ሰቭ ጥርርናአር። ⁸ ሼጣን አወተራቸሞኋ ባጢር ኢንአይ ኧኸሬ ባጢር ኢአካ ሰቭ እንእ ኧሼጣን ትከን፤ኧጎይታ ትከ ኧቫአ ሁዳ ኧሼጣን ሜና ያአፋኔ። ⁹ ኧጎይታ ቃር በሂንኋ አነዳቪ፣ ተጎይታቭ ኧቴኤኘ ሰቭ ተጎይታቭ ቴኤኘታ ኧጎይታ ትከ ኧኸረ ሰቭ እንእ ባጢር አዬካ፤ነንአ ቢይር አይኸነዳ። ¹⁰ ኧጎይታ ዴጋቪ ኧሼጣን ዴንጋ ᎆተርም ኢሂሪዮታ በዋዳን፤ጥርርአአር አዬቭቪ ኧሰሟኋ አይረንድ ሰቭ እንእ ኧጎይታ ትከ አኸረንዳ። ¹¹ አወተራቸ ኧሰምአዂ ኪሸር፥«ገግ ተገግንራ ንትራቨድነ» ይካናአር። ¹² ኧሼጣን አሳብ ተሄተረታ ኧሰምኋ ኧኧተረ ኧቃየለኸ ኧሁርት ኤነቨንረዳ፤ሁዳ ኧኧሰምኋ ኧቭር ኧተረን ? ኧሁዳይ ሜና ሙጥጣአር ኧኧሰምኋይ ሜና ቂጥያአር ኧረፐረዴ። ¹³ ኧሰማትኞ ኧዋ አለም ሰቭ ቢጠራሁዋ ወግ አይህርዎሁዋ ፤ ¹⁴ ኢና ኧሰማትንራ ንረንድኔ ኧኸሬ ተውንድ ተንነፍነታ ኧዘላለም አያ ኸነ ንንረቭነ።ንማጀ ኤነነ ሰቭ እንእ በውንድ ኢረቭር፤ ኧሰምኋ ኢጠራካ ሰቭ እንእ ደቨኘን፤ደቨኘቭ ሰቭ ጀነት አይጋአኸ ትሂሩዋ ¹⁵ ። ¹⁶ ኢየሱስ ክርስቶስ ኢኢና ቲይር ሉኋ አዋአ አኤፐሬ ኧኸሬ ንማጀ ምር ኧኸረኸ በዋዳ ንሂነ።ኢናቭ ሉህንራ ኧሰማትንራ ትንነ ኤኤተነ አኤውርት አነቨንረ። ¹⁷ ማንእየ ሰቭ ዱኒያ ታነነ ኧሰምኋ ቲያጀግርኩዳ ኧሽተታ ታያትቫትጥጥ «ጎይታ ኧረንድ» ይሪ ኧተኸ ይኸነ ? ¹⁸ ኧሰማትኞ በቬናቪ በውረቭ ባሀሬ እማት በቃር አንትራቨንድነ። ¹⁹ ውረምየ ኧነኸ በዋዳ ንሂነ፤በጎይታ ኢፍትሜ ፈራድ አይቫር ንቴኤነቭነኸ ንሂነ። ²⁰ ሂንንራ ባቦቀሰንረ ጎይታ ተሂንንራ ቦᎈረን፤ሁድ እንእአአር ኢሂር። ²¹ ኧሰማቶ ሂንንራ ኢወቅሰንረዳአር ቤነ፤በጎይታ ኢፍቲ ንትሸከቭኔ አንፈይነዳ። ²² ኧጎይታ ትዛዝ እየነታ ኧሁዳ ኢሽርኩዳአር ኔቭኔ ኧኸሬ፥ኧሳአኔያአር እንእ ተሁዳ ንረህቭነ። ²³ ኧጎይታቭ ትዛዝ በትከኋ በኢየሱስ ክርስቶስ ናአቭነመዪ አአመነዪ ክርስቶስ ኤኤዘዘንረመኸ ገግ ተገግንራ ንትራመድነነኸ። ²⁴ ኧጎይታ ትዛዝ ዩኡሮታ ሰቭ እንእ በጎይታ ኢረውርዋ፤ ጎይታቭ በሁኖዋ ኢረቭር፤ ጎይታ ቢና ኢረቭረኸ ንሂነዳ ሁዳ ሁድ ባበንረ መንፈስን።