¹ ዴንጋኞ ዋዳ ኧጠፍነሁዋታ ሁዳ ባጢር አቲንኦዋነኸ ፤ዘንጋ ጭን ማንኢየ ሰቭ ባጢር ቢዬቭ፣ ባአቭ ጎይታይ አቦካቶ አነንረ፤ሁድ ጥርር ኧኸረ ኢየሱስ ክርስቶስን። ² ባጢርመንራ ኢትፋእካ በሁተን፤ እማት ኢናይ ባጢርቭ ታይኸር አአለምቭ ባጢር እንእ ኢትፋካ በሁተን። ³ ኧጎይታ ትዛዝ ንእየነዳ ሰቭ በኸነ፥ሁዳ ንሂኔኸ ናቲሽነ ^{4 5} «ጎይታ ኧሂር» ቲይር ፣ኧሁዳይ ትዛዝ አይእየ ሰቭ በረፐረ ሀ ሰቭ ኢፈጥር ።ዘንጋ ጭን ኧጎይታ ኢቴኤዘዝካ ሰቭ እንእ፣ ኧጎይታ አነነዳ ንመጀ ሙርአን። ኧጎይታአር ኧሁርትመንራ ኢሂሪዳ በዋዳን ። ⁶ «በጎይታ ኧረቭር »ይካ ሰቭ፥ ክርስቶስ ኧረፐረመኸ ኧምቦርት አነወ ። ⁷ ኧሰማቶ ዋዳ ኧጠፍነሁዋታ ሁዳ ተዋ ኢፍቲ ቆሺታ ኧረፐረ ኤኤኬሰ ዝዝን ባሀሬ ወያ ትዛዝ አኸረንዳ ፤ እም ኤኤኬሰ ትዛዝ እእም ኢፍቲ ኧሰምአዂዳናአር። ⁸ ቢኸርቭ ጠነቫ ፊኬተታ ኧውረምየ ብርሀን ኢዋአይ ኧኸሬ ፣ዘንጋ ጭን በክርስቶስቪ ባሁም ውረ ኧኸረ ኧትረከቨ ወያ ትዛዝ ጣፍነኩም። ⁹ በቭርሀን ኧረቭር ቲይር ኧሰምኋ ኢጠራካ ሰቭ ጭን በጠነቫ ኢረቭር። ¹⁰ ኧሰምኋ ኢረንድካ ሰቭ ጭን በቭርሀን ኢረቭር፤በሁድቭ ኧቫአ ሰቭ በቫጢር አይትክታተፍካ። ¹¹ ኧሰምኋ ኢጠራካ ሰቭ ጭን በጠነቫ ከስ ኢረቭር፤በጠነቫቭ ያር ፤ጠነቫቭ ኤርኋ አአፈንጠኒ ኧኸሬ ያርካ ኤኤዲ አይሂርካ። ¹² ዴንጋኞ ባጢራሁዋ በክርስቶስ ሹው አፉ ኧዋኩዋይ ኧኸሬ ኧጠፍነሁዋ። ¹³ አቭ ኧኸርሁዋ አሁዋ አወተራቸ ኧረፐረ ሁዳ ኧሀርሁዋይ ኧጠፍነሁዋ፤ዴንጎ አቭ ጎይታ ኧሀርዂ ኧጠፍነሁዋ፤ ¹⁴ አቭ ኧኸርሁዋ አሁዋ አወተራቸ ኧረፐረ ሁዳ ኧሀርዂ ኧኸሬ ኧጠፍነሁዋ፤ ዘርሞ አርወተኘ ኧኸርሁዋይ፥ በጎይታቭ ቃር ኧትቁሟᎀርሁዋይ ኧሼጣንቭ ኤኤመዂ ኧኸሬ ኧጠፍነሁዋ። ¹⁵ ዋ አለም ዌ በዋ አለም አነዳ ዘንጋ አትርወጁዋ ፤ ዋ አለም ኢረንድካ ሰቭ አቭ ጎይታ አይረንካ፤ ¹⁶ ኧገግ ተመኛትቪ ኤኤር ኧሳርት ፥በዱንያቭ ኧድጋጌዥት ኧዋ አለምናአር ባሀሬ ታአቭ ጎይታይ አኸረንዳ። ¹⁷ እም አለምቪ ተመኛትሞኋ ዮኦፎቴ፤ኧጎይታ ፍቃድ ኢኢየካ ሰቭ ጭን ዘላለም ኢረቭር ። ¹⁸ ዴንጋኞ ዋአካ ዘቨርኋ አነኧወ ግዝየን «ኧክርስቶስ ጠራት ኢቫአኴ » ቲዩሪዳ ሰምአሁም፤ ዋአካቭ ቢኸር ኖኦራ ኧክርስቶስ ጠራት ተረሾም፤ ብእም ኧቫአ ዘቨርኋ አነኧኸ ንሂነ። ¹⁹ ሁኖም ቲና ግት ኧዎኦዋ ሰቭኖዋ፤ቢኸር ሁኖዋ ድረሞኋ ቲና እማት አነፖርታ፤ቲና እማቲ ተረፖሩዋ ቲና እማቲ ተቁዋወይቶ ኢምቦሩዋ ባነደ ባነደ ። እመዳቭ ቲና እማት አነፖሩዋኸ ኢትሄሪ ቲና ተዋይተርም ዎኦም። ²⁰ አሁዋ ጭን ክርስቶስ በመንፈስ ቅዱስ ሟሸናሁም፤ብእም ኧቫአ እንእቫሁዋ ኧውረአአር ትሂሩዋ ። ²¹ አአሁዋ ዋዳ ኧጠፍነሁዋታ ሁዳ ዋዳ አትሂሩዋይ ኧኸሬ አኸረንዳ ፤አሁዋ ወረአአር ትሂሩዋ፤ ውረቭ በኸራአር ፍጥር ኤነኸ ትሂሩዋ ። ²² አካ ኢየሱስ መሲህ አኸረንዳ ቲይካ ሰቭ ኧኛአር አሰተኘ ማንተን?አቪ ትከቭ ኢኸዳካ ሰቭ ኧክርስቶስ ጠራትን ። ²³ ኢየሱስ ኧጎይታ ትከ አኸረንዳ ይካ ሰቭ እንእ አቭ ጎይታ ኤነነዳ፤በትከኋ በእኢየሱስ ክርስቶስ አአመረ ሰቭ ጎይታቭ አነነ ። ^{24 25} እአሁዋ ጭን አወተራቸ ኧሰምአዂ ቃር በሂናሁዋ አውሮም ኦሬ፤አወተራቸ ኧሰምአዂ ቃር በሂናሁዋ አውየተሁዋ ብእየዂ ተትከ ኢየሱስ ታአቭ ጎይታ እማትነድ ኢምበርሁዋሴ።እም ክርስቶስ አቨንረ ተስፋ ፣ኧዘላለም አያ ሂንቶ ኦምቦርትን። ²⁶ ቲቆኩዋታ ሰቭ ትትጬፑዋኸ ዋዳ ጣፍነኩም፤ ²⁷ ዘንጋ ጭን ተክርስቶስ ኧቴኤፐርዂ መንፈስ ቅዱስ ታሁዋ አኔ ኧኸሬ ፣ኧዋዳአር አትዎኋ ያትመርሁዋይ አያትሲእካ።ሁዳ እንእአአር ያትመርሁዋሴ፤ያትመርሁዋታቭ ሁዳ ፤ኧውረምናአር ባሀሬ ፍጥር አኸረንዳ፤ብእም ኧቫአ መንፈስ ቅዱስ ያትመርሁዋመኸ በክርስቶስ ንወርዋ። ²⁸ በሽቴ ዴንጋኞ ክርስቶስ ቲቫአካ ታንፈይነ ድፈይተነ ናዥኔመኽዪ ቢቫአወዳቭ ቀረ ቢኢፍትኋይ አንቅቨጭነመኸ በሁዳ ንወርዋ። ²⁹ ክርስቶስ ጥርር ኧኸረኸ በሀርሁዋ፣ጥርርአር ዬካ ስቭ እንእ ተጎይታ ኧቴኤኘኸ ኧኋርት አነወሁዋ።