¹ አወተራቸሞኋ ኧረፐረ አያ ዬካ ኧጎይታ ቃርአአር ኧሰምአኔ፣ በኤርመንራ አሸኔይቪ፣ በኧጅመንራ ኧረከድኔ ሁዳ ንኢድነ። ² እም አያ ኧኸረ ሁዳ ተረከቨ ኢናቭ አሸነዪ፤ አሸኔመኸ ንኢድነ። ባአቭ ጎይታይ ኧረፐረ ሁዳ ኢናብቭ አአሸኔ ሁዳቪ ኧዘላአለም አያቭ ኧኸረ ሁዳ ንኢድኔኩዋ ። ³ አሁም ቲና እማት ትሆሩዋይ አሸነይቪ ኧሰምአነዪ ሁዳ ኒኢድኔኩዋ ፤እማት ኧሁርትመንራ ታአቭ ጎይታቪ ተትከሞኋ ተኢየሱስ ክርስቶስን ። ⁴ እመዳ ንጠፍኔነኩዋታ ሁዳ እንእቨንራ ኢሽረንረኔ። ⁵ ተሁድ ኧሰምአኔ አአሁም ኒኢድኔኩዋታ ኪሸር ጎይታ ብርሀንን፤በሁዳይ ስርም ጠነቫ ኤነዳ ይካናአር። ⁶ በጠነቫ ትነቭነ ተጎይታ እማቲ አነነ ብንነ ንፈጥነ፤ ቃርመንራቪ ሜናመንራ ፍጥርን ። ⁷ ዘንጋ ጭን ሁዳ በቭርሀን አነመኸ ኢናቭ በቭርሀን ብነቭነ ኢና ቲና እማት ኸነ፤ኧትከሞኋይ ኧኢየሱስ ክርስቶሲ ደቭ ተቫጢር እንእ ያቭጥረንረ። ⁸ ባጢር ኤነቨንረዳ በቫነ ኧገግንራ ንቄቅነ ፤ውረቭአአር ቢናይ ሂን ኤነዳ። ⁹ ባጢርንራ ኧጎይታ ብኒኢዳኔ ጭን ሁዳ ባጢርንራ አፉ ይረንሬ ተውጥጥቭ ዘንጋ ያተርፈንሬ ሁዳ ሙርቴቪ ጥርርምናአር። ¹⁰ ባጢር አኔፐነዳ በቫነ ጎይታ አሰተኘ ኒንአኔ፤ቃርሞኋ በሂንንራ ኤነዳ ኧዋርትን።