¹ ኧጣጣ ኢጌቡርኴ አንጪ ዋጋ በሰርአአር እሁዋታ ሁዳ ዋኸትን፥ እንእቨንራ ኧኋርት አነንረኸ ንሂነ፤ እኋርት ያድ ጌያኲዝ ንመጀ ጭን ይትሽር ። ² ኢያ ኧሂር ይቭካ ሰቭ አቸ ኧኋርት አኖዳአህር አሀረዳ። ³ ጎይታ ኢረድካ ሰቭ ጭን በጎይታይ ኧትሄረዳናአር። ⁴ ባቴ ኧጣጣ ኢጌቡርኴ አንጪ ዋጋ በሰራአር እሁዋታ ዋኽትን ፥ በዋ አለም ጣጣ ዩኩዋ ሁዳ ማንእየአአር ኧኸረመኸዪ ጎይታ ባሀሬ ኧኛ አምላክ ኤነኸ ንሂነ። ⁵ ማንእየ ጎይታ ታይሆርን ጎይታ ዩሪዮታ ኖኦራ ጣጣቪ ሰቭ ኦጎዥኦማአር በሳቫይቪ ባአፈር አነውዋ ቢዩሪ፣ ⁶ ኢናይ ጎይታ ጭን እንእአአር ኧፈጠረቪ ኢናቭ ኧሁዳአር ኧኸነ እማት አቭ ጎይታን ፤ ህመኸቭ እንእአአር ኧፈጠረቪ ኢናቭ ኧሁዳአር ኧኸነ አት ጌታ ኢየሱስ ክርስቶስ አነንረ። ⁷ ዘንጋ ጭን ዋዳ ኢሂርካ እንእዎኋ ኣሀራ ፤ አታት ሰቭ ኧዋ ኢፍቲ ኧጣጣ ጌቦርም ኧወሸውዋይ ኧኸሬ፥ ዋአካቭ ስን ኧዋኸ በሰር ቲዋርኧታ ኧውረቭ ኧጣጣ አንጪያአር ኢቭስርኮምታ ፥በእምነት አቶፖዋይ ኧኸሬ ኢሰርሁዋ። ⁸ . ዘንጋ ጭን ሸረድ ኧጎይታይ አያቲእንቨንረዳ፤ ባንቨርአነ ኢቀቭርቨንረዳአር ኤነዳ ፤ ብንቨርአነቭ ኢተፐንረዳአር ኤነዳ ። ⁹ ዘንጋ ጭን ኧረከዂ መብት ብእምነትሁኗአትፖዋ ሰቭ እቁርፊት ባይኸሪ ተጠፑዋ። ¹⁰ ቢኸርቭ አኸ ኧኋርት አነኒ ባይተኸታ ኧጣጣ ኢጌቡርኴ አንጪ ዋጋ በሰር ኧጣጣ ቢጌቡርኰዳ ኤኤዲ ቸየንተኸ ትትቨርአካ ብእምነትኋ አንተፓ ክርስቲያን ብያዥኸ ሁድቭ አጋኋ ኧጣጣ ኧጌቦርኰ በሰር ንቭርአ አይካ? ¹¹ እመኸ ኧኸሬ ዋ ክርስቶስ ኧዎደነ በእምነትኋ አንተፓ ክርስቲያን ኧም ባኸ ኧቭአ ኧኘ ኧዋርትን። ¹² ብእመዳቭ ክርስቲያን ኧሰማታሁዋ ትቦድሉዋ፤አምባይተረቭ ሂንኋ መዘኝዐ ኤፐሁምታ ኧክርስቶስቭ ትቦድሊ። ¹³ እመኸ ኧኸሬ ኢያ ኧቨርአኩዳ ሸረድ በክርስቲያን ኧሰምኛ እቁርፊት ኢኸርወ በኸረ በኧሰምኛ እንርፊት ባይኸሪ በሰር አቸ አንቨርአካ።