¹ በግታሁዋ ኧወከዊኸ ሁጅር ኧድሙጅት አነኸ ኢትሰምአ፤ ኧዋ አይነት ባጢር በአረማዊ ሰቪ ስን ሲቭኧቶ አይሂሪዳናአር፤ ባሁዋ ግት አአባ ኋ ምሽት አአገፓ ሰቭ አነ። ² ባቴ ኧዋኸ ያቅቨጭካ ዘንጋ በግታሁዋ ታነ ምር ያድጋኪስሁዋ?ኢረእ በዋ ዘንጋ ቀጨ ባ ይተናሁዋታ ኧዋኸ ሜና ኤፐ ሰቭ ኦኦት ባነዎሁዋተ። ³ ማንእየ ኢያ ታሁዋ እማቲ ባነቭር በመንፈስ ጭን ታሁትንሁ፤ አታአር ታሁዋ እማቲ አነኋ አአር ሂንተሁታ ኧውውዋሀአር ኤፐ ሰቭ ዋአ ፈንድሁወ። ⁴ ትደሞጅታ ኢያቭ ታሁዋ ኣረቭሪ ኧኸሬ ፣ በጌታንራ በኢየሱስ ሹውቪ በግታሁዋ ባነዳ በጌታንራ በኢየሱስ ክርስቶስ ጦና፥ ⁵ በቫጢር ኧትቬንአ ኧሃ ሰቪ በሰር ሙጅተታ ነፍስኋ በክርስቶስ ፍርድ ቀረ ኢተርፈኸ ኧዋኸ ሰቭ ኧሴጣን ኦኦም አአይውሪ። ⁶ ኧድጋጌዥታሁዋ ወሄያአር አኸረንዳ፤ እንስየ እርሾ ኑኡየ ሊጥ ያፈእረኸ አትሂርታ? ⁷ ዋአካ እርሾ አይቫር ኧኸርሁዋመኸ፣ ብእምቴ እርሾ ኤነወ ሊጥ ትሆሩዋኸ ጉስ ሊጥ አፍኮዋ፤ ኧፋሲጋ ጣይንራ ታንጠንረ። ⁸ ብእም ኧቫአ ጋናጢነድቪ ፣ሙጥጥነድቭ በቬንአወ በጉስ እርሾ ታይኸር ፥ እርሾ ቤነወ አመኛትቪ ውነትቭ በቬንአዋአር ኧጠርወሸ ሙርአሁዋ ዋአሩዋ። ⁹ ኧዋ ኢፍቲ ጣፍሁ በኬሸነኩዋ ኪሽር ተረከውዋኸ ሁጅር ኢደምጅታ ሰቭ ኢሆሩዋኸ አትሁሩዋ ባኩም ባነደ። ¹⁰ እመዳ ኧዋርትኛ በዋ አፈር ፎር ቲረውርታ ኧረከውዋኸ ሁጅር ቲደሙጅታ ፣ ተጠርጥዐርተኘ ፣ ተፈንጌያ፣ኧጣጣ ቲጌቡርታ ሰቭ እማቲ አትቦሩዋ ኧዋርትኛ አኸረንዳ፤እኰኸ ተኸረ ተዋ አለም ኦኢት ያትሲኢሁዋ ኧዋርትን ። ¹¹ ኢያ ኝን ኧጠፍነሁዋታ ሁዳ ክርስቲያን ቲዩሩዋ ኧረከውዋኸ ሁጅር ቲደሙጅታ፣ ጠጠር ቲዩርታ ፣ ኧታጣ ቲጌቡርታ፣ኧሰቭ ሽው ቲያአፎታ፣ቲሰርኡታቭ ሰቭ አትኪራሞሹዋኸ ባሁ ታነዳን፤ተዋኸ ሰቭ ሸረድቭ እማቲ አትውርኦዋ። ¹² ክርስቲያን ባሆሩዋ ሰቭ ኧፈርዲ ኢያ ምር አገፓዪ? ክርስቲያን በሆሩዋ ሰቭሁ አሁህ አትፎርጅታ? ¹³ ክርስቲያን ባሆሩዋ ሰቭ ኢፈርድካ ጭን ጎይታን ባቴ ሙጥጥ ሰቭ ተግታሁዋ ኦኦም ቋሺ።