¹ v 1. ኧሰማቶ አሁዋይ ኧቫአሁ ግዝየ ፣በጎይታ ሂን ኧረፐረ ምስጢር አትምብርኩም ባአሬ በገግኛይ ኧኋርትቪ ባአዮነድቭ ኢኢድሁዋይ አማአኋ። ² በግታሁዋ ታነሁ እማት ኢና ባረ ኧትሰኧረ ክርስቶስ ባሀሬ ኧኛአር አታአር ባንሂርይ አንጥሁወ። ³ አሁዋይ ኧቫአሁ ሁዳ በሮኦራ ቂጭናቪ በፈራድቭ ከስ ኸርሁታ ቲያረኧዴ ማአሁ ባነደ። ⁴ ቃርመኛቪ ትምርትመኛ በመንፈስ ቅዱስ ደረግን ባሀሬ ፣በሰቭ ሀሪነድቪ በሰቭሜ አዮነድ ኧቫአአር አኸረንዳ ። ⁵ ኧመዳቭ እምነታሁዋ በጎይታ ደረግ ባሀሬ በሰቭ ኧኋርት አይኸነኸ። ⁶ ኧጎይታ ቃር ቢዌስርታ ሰቭ ግት በሀሪነድ ንዝሬክነ፤ንዝሬኪኔዳቭ ቃር ኧዋ አለም ሰቪ፣ዌ ዮኦፈታ ኧዋ ኧዋ አለም ዳኘ ኧሆሩዋ ሰቪ ሀሪነድ አኸረንዳ ። ⁷ ኢና ጭን ጎይታ ተዘቨር ኢፍቲ በተረ ኧክብርንራ ወሰነ አወናን ታንሂነዪ ኧረፐረ ሀሪነድኋ አጬግነ ንኢድነ። ⁸ እመዳቭ ተዋ አለም ዳኘ አትዎሁኗ አኋሪዳ፤ተኋሪሽ ዋ ኧከበረ ጎይታ ባሶኦሪዳ። ⁹ ቢኸር ኤር አናሸናአር፣እንዝር አንሰምአናአር፣ኧሰቭ ሂን አናጫመጠናአር ጎይታ ኢረንጂዳ ሁኗ አወናኖም። ¹⁰ ጎይታ ጭን በመንፈስኋ ኸረታ ዋዳ ኢኢና አትሄረንረ፤መንፈስ ቅዱስ አትዎኋ አይሰርአወ ኧጎይታ ዘንጋ አታአር ታይተርፍ ጀፐረ ይሂር። ¹¹ በጎይታ ሂን ታነዳ ተጎይታይ መንፈስ ባሀሬ ፥በሰቭ ሂን አነዳ ጩመጨ ኢሂርካአር አትዎኋ ኤነዳ፤እመኸ ኧኸሬ ኧጎይታ መንፈስ ባሀሬ ኧጎይታ አሳብ ኢሂርካአር አትዎኋ ኤነዳ። ¹² ኢና ኧቴኤፐኔ ኧጎይታ መንፈስን ባሀሬ ኧሰቪ ሁዳ አከረንዳ፤እመዳቭ አቨንረ ሁዳ ፥ ኧቴኤፐኔ ተሁዳ ኧኸረኸ ንሂነኔ። ¹³ ኢናቭ አአሁዋ ንኢድኔኩዋታ ሁዳ ዋዳን ፤ተሰቭ ውቀት ተትማኔ ቃር ታይኸር፣ተጎይታ መንፈስ ኧትማርኔ ቃር ንዝሬኪነ፤መንፈሳዊ ትምርት ናትመነዳቭ ሁዳ ተጎይታ መንፈስ በረከቭኔ ኧኋርትን። ¹⁴ ኧጎይታ መንፈስ ኤነነ አናአመረ ሰቭ ፣ኧጎይታ መንፈስ ኢንካ ወሄ ዘንጋ ኢቴኤፐሪ አይኸነዳ።እመዳቭ አሀ ሰቭ ጋውነድ ኢቨስርኩ፤ዋዳ በጎይታ መንፈስ ኢረሁዊዳአር ኧኸሬ ኧወስርት አይኸነዳ። ¹⁵ መንፈሳዊ ሰቭ ጭን ኢምረምር ባሀሬ ሁዳ ባአትዎኋ አይትምረመርካ። ¹⁶ ፥«ኧጎይታይ ሂን ማን ይሂር?ሁድሁ ኢቨህሪ ማን ኢኸነ?»ቧርም ኧጣᎉምነኸ።