¹ ኧሰማትኞ አቦንራ ዳቨራ ተጉንኧሁኗይ ኸረ መያ ይትሽኮዋ ኧረፐረኸዪ ወይኦም ኧዎኦዋመኸ ትሂሩዋይ ኧሲእ። ² ሁኖም እንእ ተውሴ እማት ኢሆሩዋይ ቲዩሩዋ በዳቭራቪ በቫርቭ ተጠሞቁም ። ³ እንእዎሁኗ ታአት መንፈሳዊ ሸረድ ቦንኦም ⁴ እንእዎሁኗ ታአት መንፈሳዊ እሀ ሰጮም ፤ ኢትሄተርኮዋ ተረፐረ መንፈሳዊ እቭር ሰጮም ፤ህም እቭር ክርስቶስ ባነደ። ⁵ ቢኸርቭ ጎይታ ብሮኦራሁኗ አሳረኒ ኧኸሬ በቭረሃ ዎተኡም ሞጁም። ⁶ እመዳ ሁኗ ሙጥጣአር ኧትሜኘውዋመኸ ኢናቭ ሙጥጣአር ባንትሜኝኔ ዋ ዘንጋ ንትጬፕነኸ መርኸት ኸረንረ። ⁷ ሰቭ ሁኗ ኢወርኦዋሜዪ ኢሰጩዋሜ ቸኖም ፤ ኢጓሹዋሜ ተረሾም ቧርም ኧጣᎉመኸ ተሁኖም አታትሁኗ ኤፖዊመኸ አሁም ኧሁኖመኸ ኧጣጣ አትጎቡሩዋ። ⁸ ተሁኖም ኣታትሁኗ ኧረከውዋኸ ሁጅር ደሞጁምታ ብእማት ቀረ ሁይአ ሶኦስት ሺ ሰቭ አነኧመኸ፣ ኢናቭ ተረከቭኔ ሰቭ አድምድነ ። ⁹ ተሁኖም አታትሁኗ ኧጎይታ ኧፎትተሪመኽዪ ጭረ ነደፈኖምታ ኧዎጁዋመኸ ኢናቭ ጎይታ አንፍትርኔ። ¹⁰ ተሁኖም አታትሁኗ ቁጨጮምታ ጎይታ ቢያአይካ መላአይካ አአኘኖመኸ አሁም ኧሁመኸ አትቁጨጩዋ ። ¹¹ ዋዳ እንእ መርኸት ኢኸሪ በሁኗ ፎር ቴፐ ፤ እመዳ ኧጣᎉ ሁዳ በዘቨር አነኧወ አነነዳ ኢኢና ትምርት ኢኸረንረኔ ። ¹² እመኸ ኧኸሬ ሰቭ ተሸከሁ ቲይር አይወድኧኸ ኧጤፕ ። ¹³ በሰቭ ተሰንአወ ፈተና ኢረእካአር አንሰንአዎሁዋታ ፤ ጎይታ ሙርቴ ኧኸሬ አይኸነሁዋአህር አይፈትርሁዋታ ፤ዘንጋ ጭን ፈተና ቲሰርአዎሁዋታ ትፎርሁኰዳ ደረግቪ ትዎኦኰዳቭ መያ ሁዳ ኢገክነሁዋሴ። ¹⁴ ባቴ ኧሰማትኞ ኧጣጣ አትጎቡሩዋ ። ¹⁵ ዋዳ ኧዝሬክሁዋዳ ሁዳ ትዌስሩዋታአር ኧኸርሁዋቴ ፤ ዋ ኧዝሬኩዳ ዘንጋአር አሁም ፉርጁዋ ። ¹⁶ ዋ ጎይታ አሸኮነ ንሰጭኔዳ ኧቭረካ ጥዋ ተክርስቶስ ደቭ እማትነድ አነነዳአር አሀራ? እማቲ ፍረነቭነ ንትሻከድኔዳ ዳቦኧ ኢኢና ባረ ተትወካ ተክርስቶስ በሰር እማትነድ አነነዳሻአር አሀራ? ¹⁷ ዋ ንትሻከድኔዳ ዳቦኧ ኢናቭ ተዋ ተአት ዳቦኧ ንትሻከድኔ ኧኸሬ ማንእየ ኖኦራአር ብንኸነ እማት አካልንረ። ^{19 18} እንዴ እእስራኤል ሰቭ ኤፖውዋአር ኦዡዋ ፣ህትቭ ኤፐዊ ዋጋ በሰር ኧዎንኦዋ ሰቭ ህትቭ ቲንኧኰዳ ኤኤዲ እማትነድ አነፐረኖታ? 19.ባቴ ዋኸ ኧዋርትኛ ኧቅርኘ ኢጌቡርኴ አንጪ በሰር ያጌኪርካናአር ኧዋርትነኛ ? ብዌ ቅርኘ ያጌኪርካናአር ኧዋርትነኛ? ^{20 21 22} 20.አኸረንዳ አረማዊ ሰቭ ህትቭ ያቲኢንውታ ሁዳ ኧሴጣንን ባሀሬ ኧጎይታ አኸረንዳ፤ተቅርኘቭ እማት ትሆሩዋይ አንሲእካ። 21. ኧጌታ ኧኢሱስ ክርስቶስ ጥዋዪ ኧሴጣን ጥዋቭ እማቲ ኧስጠውት ኤነዎሁዋታ፤ ተጌታ ኢየሱስ ክርስቶስ ሸረድ በቨንአሁዋጋ፣ ኧሴጣን ሸረድ ኧውርኧት ኤነዎሁዋታ ። 22. አካ ጌታ ኢየሱስ ናትቨኧችኔዪ? ኢናሁ ተሁዳ ኢረእካ ደረግ አነንሬ? ^{23 24} 23. « እንእአአር ተፈቀደረ ዘጋ ጭን እንእዎሁኗ አያጌኪርንረዳ ፤ » « እንእአአር ተፈቀደ» ዘንጋ ጭን እንእዎሁኗ ተፈቀደንረ ፤ ዘንጋ ጭንእንእአአር ኢ አያቁሟምረንረዳ። 24. ሰቭ እንእ እንእዎኋ ያጌኪርካአር ባሀሬ እማትት ኧገግኋ ጥቅም አይሴእ። ^{25 26 27} 25. በሂናሁዋ ታትሸኩኩም በገያ ያስሬዳ በሰር እንእ ሰሮም ቡርኦዋ ።26. አፈርቪ በከስሞኋ አነዳአር እንእ ኧጎይታናአር። 27. ክርስቲያን አኸረ ሰቭ ቢድኋይ ህየተናሁዋታ ታርዋይ ብትሱኡዋ፥ በሂናሁዋ ታጥራጠሩም አቴኤነውነኩዋአር እንእ ቡርኦዋ። ^{28 29 30} 28. ዘንጋ ጭን አት ሰቭ ዋዳ ኧቅርኝ ኢጌቡርኴ አንጪ ዋጋ በሰንር በቫረናሁዋ፥ ኤኤደናሁም ሰቪ ኧሂንማሁዋ ትቱርዋ አትውርኧዋ። 29. እመዳ ኧዋርትኛ ምስ ሁዳ በሂንኋይ ኢጥራጠሪ ኧኸረንዴ ባአሬ አኸ በሂናሄ ተጥራጠርኸ ኧዋትኛ አኸረንዳ።ኧኛ ሰብ ቢጥራጠርካአር ኢያ ነጣ ዋአሁ፤ ባቴ ቢያ ኢትፈንድቪዳ ሁዳ ኧቭርአፈድን? 30. ኢያ ጎይታ አቬ ሸረድ ጎይታ አትሸኲ ኧቨርአ፣ባቴ ጎይታ ባትሸኮርሁዋአር ኧቭር ኧትወቀስ ? ^{31 32 33} 31. ባቴ ትትወርኧታቪ ትትሰጭታቭ እንእዎሂኋኗ ኧጎይታ ክብር ኦንኧየዋ። 32. ኧይሁዳ ሰቭቪ ኧግሪክቭ ሰቭ ዌ ኧጎይታቭ ቤተክርስቲያን እቁርፊት አትሁርዋ። 33. ኢያ ሰቭ እንእ በቫንእየ አጋድኋ አአትሽሪ አትቫቅርመኸ አሁም ህመኸ ኦንኦዋ፤ ኖኦራሁኗ ኢተርፉዋኸ ትንር ኧገግኛ ያጌኪሬዳአር ታይኸር ኧሁኗ ኢፈዝኮታአር ኧሲእ።