¹ Yaa obbolootaa! Hawwiin garaa koo keessaas, Waaqayyootiinis kanan kadhadhus fayyina isaaniiti. ² Isaan beekumsaaf otoo hin taane, Waaqayyoof akka hinaafan dhugaan isaaniif nan ba'a. ³ Qajeelummaa isa Waaqayyo biraa dhufu baruu dadhabanii, qajeelummaa mataa isaanii uummachuu waan barbaadaniif, isaan qajeelummaa Waaqayyoof hin bulle (ajajamne). ⁴ Kiristoos nama amanu kamiifuu seericha qajeelummaa ni dhugoomsa (guuta). ⁵ Waa’ee qajeelummaa isa karaa seerichaa dhufuu, Muuseen akka barreessetti: “Namtichi inni waantota kana godhu (hojjetu), isaaniin ni jiraata”. ⁶ Qajeelummaan amantiidhaan dhufu garuu akkas jedha: “Garaakeetti ‘Eenyutu gara waaqaatti ol ba’a’ hin jedhiin. (Kana jechuun, Kiristoosiin gadi buusuudha); ⁷ ‘Eenyutu boolla bu’as’ hin jedhiin.” (Kana jechuun, Kiristoosiin du’aa kaasuudha.) ⁸ Garuu immoo maal jedha? “Dubbichi sitti dhi'oo jira: afaan kee fi, garaa kee keessa”. Innis dubbii amantii isa nuti lallabnuu dha. ⁹ Afaan keetiin, Yasuus gooftaa akka ta'e yoo dubbattee dhugaa baate, garaa keetiin immoo, Waaqayyo du'aa akka isa kaase yoo amante, fayyina ni argatta. ¹⁰ Inni garaa isaatti amanee qajeelaa ni ta'a; inni afaan isaatiin dubbatee ibse ni fayya. ¹¹ Kitaabni Qulqulluu, “Kan isatti amanu eenyumtuu hin qaana’u” jedha. ¹² Yihudaa fi Giriik gidduu garaa garummaan hin jiru; Gooftaa isuma tokkotu gooftaa hundumaati; warra isa waammatan hundumaafis ni qaqaba. . ¹³ Kan maqaa Gooftaa waammatu eenyumtuu ni fayya. ¹⁴ Egaa, isatti warri hin amanne, attamitti isa waammatu? Isa dhaggeeffatanii hin beekneenis attamitti itti amanu? Lallabaa malees, attamitti dhaga’u? ¹⁵ “Warri oduu gammachuu fidanii dhufan attam milkii qabeessota dha!” jedhamee akkuma barreeffamee jirutti, egaa yoo ergaman malee, isaan attamitti lallabu danda’u? ¹⁶ Hundumti isaanii garuu oduu gammachuu kanaaf hin abboomamne. Isaayaas, “Gooftaa, isa nuti dubbanne eenyutu amane?” jedha. ¹⁷ Kanaafuu, amantiin kan dhufu dhaga'uutiini; kan dhaga'amu immoo sagalee Kiristoosi. ¹⁸ Ani garuu kanan jedhu: “Isaan hin dhageenye ture?” Eeyyee, mamii tokko malee dhagahanii jiru. “Sagaleen isaanii lafa hundumaatti ga’eera; Waan isaan dubbatanis lafa namni jiraatu hundumaa ga'eera”. ¹⁹ Dabalataanis, “Warri Israa'el hin beekan turee?” Duraan dursee, “Warra saba koo ta’uu didan nan inaaffachisa; Saba koo ta’uu keessan yoo wallaaltanis, aariidhaan akka jeeqamtan isin godha”, gaabbitaniis saba wallaalaatti akka isin aartan nan godha" jechuun Muuseen dubbateera. ²⁰ Itti aansuudhaanis, “Warra ana hin barbaadnee tureef, ani argameera; Warra ana hin gaafanne tureefis, ani mul'adheera”, jechuudhaan Isaayaas jala muree dubbateera. ²¹ Warra Israa'eliitiin garuu kana jedha: “Warra hin abboomamneefi warra morman irratti guyyaa guutuu harka koo irrattan diriirsa”.