¹ Sana boodas, ergamaan inni shanaffaa xurumbaa isaa afuufe. Urjii waaqa keessaa lafatti kufe tokkos nan arge. Saaqxuun ujjumboo qilee boollaa keessa ittiin bu’aniis urjichaaf kenname. ² Urjichis ujjumboo qilee boollaa keessa ittiin bu’anii sana bane; aarri inni aara warshaa guddaa keessaa ba’u fakkaatus boollicha keessaa ol ba'ee aare. Biiftuu fi qilleensis aarichaatiin ni dukkanaa'ani. ³ Hawwaannisnis aaricha keessaa lafa irraatti ba'e; isaanis, humna (aangoo) akka humna ginxootaa (scorpions) ta’e lafa irratti akka qabaataniif isaaniif kennamee. ⁴ Isaanis namoota warra chaapaa Waaqayyoo adda isaanii irratti hin qabne malee, marga lafa irra jiru, biqiltuu magariisa yookiinis immoo muka kam iyyuu miidhuu akka hin qabne isaanitti himame. ⁵ Namoota sanas ji’a shaniif akka gidiraa argisiisaniif malee, ajjeesuun isaaniif hin eeyyamamne. Dhiphinni (Miidhaan) isaan irraa ga’us akka ginxiin yeroo nama iddeetti isaanitti dhaga’ama. ⁶ Guyyaawwan sanattis namoonni otoo du'anii barbaadu; du’a garuu hin argatani. Du’uuf baay’ee fedhu; duuni garuu isaan irraa baqata. ⁷ Hawwannistoonni sunis fardeen lolaaf (waraanaaf) qopha’an fakkaatu. Waanti gonfoo warqee fakkaatu mataa isaanii irraa qabu; fuulli isaanii immoo fuula namaa fakkaata. ⁸ Rifeensi isaanii rifeensa mataa dubartootaa fakkaata; ilkaan isaanii immoo akka ilkaan leencaa ti. ⁹ Laphee isaanii irratti waan akka diraa sibiilaa jabaatu diratanii qabu; huursaan baallee isaaniis akka huursaa gaarii fardeeniin harkifamanii waraanatti didichaa jiranii ti. ¹⁰ Eegeewwan akka ginxootaa nama iddan qabu; eegeewwan isaaniis humna ji'a shaniif nama miidhu qabu. ¹¹ Isaan mootii ofii isaaniis qabu; innis ergamaa boolla qilee sanaati. Maqaan isaas afaan Yihudootaattiin “Abadoon”, afaan Giriikiitiin immoo “Apxoliyoon” jedhama. ¹² Wayyoon inni duraa darbeera. Hubadhaa! Kana booddees, wayyoon lama amma iyyuu ni dhufa. ¹³ Ergamaan inni ja'affaan xurumbaa isaa afuufe; anis sagalee gaanfaa kan bakka aarsaa isa warqee irraa hojjetamee fuul dura Waaqayyoo taa’ee jiru biraatii dhufaa jiru nan dhaga’e; ¹⁴ Ergamaa isa ja'affaa xurumbaa baatee jiru sanaatiin, “Ergamoota arfan warra Laga Efiraaxes isa guddichatti hidhamanii jiran hiiki!” jedhe. ¹⁵ Ergamoonni arfan warri sanyii namaa harka sadii keessaa harka tokko ajjeesuudhaaf sa'aatii sanaaf, guyyaa sanaaf, ji'a sanaaf, akkasumas waggaa sanaaf qopheeffamanii turanis ni hiikamani.. ¹⁶ Lakkoofni loltoota farda yaabbatanii 200,000,000 akka ture ani dhaga’eera. ¹⁷ Akkaataan ani fardeen sanaa fi warra isaan yaabbatanii jiran sanas arges, akkasi: Biftiwwan dirannaa namoonni suni laphee isaaii irratti diratanii turani diimaa, bifa waaqaa fi bifa keelloo ti. Mataan fardeen isaanii immoo mataa leencaa fakkaata ture; afaan isaanii keessaas ibiddi, aarri fi ibidda qabsiistuun (dhagaan ibiddaa) ni ba’u ture. ¹⁸ Sababa dhaicha sadan kanaa, isaanis ibidda, aara fi ibidda qabsiistuu warra afaan fardeenii sana keessaa ba’anii, irraa kan ka’e namoota harka sadii keessaa harka tokkotu ajjeeffame. ¹⁹ Humni fardeen sanaas kan jiru afaani fi eegee isaanii keessa dha; eegeen isaanii bofa fakkaata; mataas ni qabu; isaaniitiinis namoota madeessu. ²⁰ Namoonni dha'icha kanneeniin otoo hin ajjeefamin hafan garuu hojii iaaniitti hin gaabbine ture; hojiiwwan harki isaanii hojjetetti gaabbuudhaan irraa hin deebine; afuura hamaa fi waaqayyolii warqee, meetii, sibiila diimaa, dhagaa fi muka irraa hojjetamanii fi arguus, dhaga'uus, deemuus (socho’uus) hin dandeenyeef sagaduus hin dhiifne. ²¹ Isaan lubbuu baasuu (ajjeesuu), namatti moruu, sagaagaluu, fi hanna isaanitti gaabbaniis irraa hin deebine.