8

¹ ሓዲስ ኰዶ፡ ንሰና ያዅ ቆል ጃር ጻባኦቱዅ ይል እንቱዅ፣ ² ጃር ጻባኦቱዅ ንሰና የኵ፣ “ጽዮንዲ ሰበትድ ገሪዅ ረቐቦ ህምበኵን፣ ንር ሰበትድር ቀንአትድ ሓውየኵን እⶖኵዅ።

³ ጃር ንሰና የኵ፣ “ጽዮንትል ወንተርያ ግን፣ ኢዮሩስሌምትልር መንደርትያ ግን፣ ኢዮሩሳሌምኽር እምንዲ ዕርዲራ ይስትቶ ግን፣ እን ጊራ ጃር ጻባኦትሩዅር ሻትክ ጊራ ይስትሮ ግን።”

⁴ ጃር ጻባኦትዅ ንሰና የኵ እⶖኵዅ፣ “ግርው በህሊልዲ እኲን በህሊልዲ ደርፍፍ ኢዮሩሳሌምዱሊ ከፍ ይድኖ ግን፣ ናላዅክ ኰዶ፡ ቕድንትልድ ጐዅ ምርኵስ ሻኽሮ ግን። ⁵ እን ደርፍፍ ዕርዲረሩኽር፡ ኒል ማዕበው ቍርዲ እጝቃቕዲሲ እንታኽስሮ ግን።”

⁶ ጃር ጻባኦቱዅ ንሰና የኵ እⶖኵዅ፣ “እን ወክት እንድድ፡ እን ከብተው እክ እስራኤልዱውድ ፈከርዳዅ ኣኾ ቋልስትሮሎም ገረሰኵ፣ ይት ደአም ፈከርድሮለ ገረሰኵማ?” የኵ ጃር ጻባኦቱዅ።

⁷ ጃር ጻባኦቱዅ ንሰና የኵ፣ “ይእክሲ፡ እን ብሪክስጘዲ ኳሪ ለብዲር ገፍድ ህምባ በልደልድ ደአንድየሎም ግን። ⁸ ኢዮሩሳሌምሊ መንደርትድኖ ወንተስየሎም ግን፣ ናውኻ ይእክ ኣኽድኖ ግን፣ ኣጝር እምንዲ ጨዳቐትዲሲ ናጃር ኣኽያ ግን።”

⁹ ጃር ጻባኦቱዅ ንሰና የኵ፣ “እነሓን፡ እና ቆላት ነስ ዋሳ፡ ‘ልጝን ሻትክ ገበርስሮ፡ እንታ ናንትትሲ ሒለቲሳ።’ እን ሰረት ልጝን ሻትክ ጃሩዅ ሰረርሱ እን ኒል እርገው ነበዋት ጋቢነዅ ግን ኒን። ¹⁰ ንድ ጃብ፡ ኣዳምሲ መህየት፡ እንሱስድኻ እጃር ከፈልሱ እርግላ፣ ኣፋይቲ እርግነው ኣኽነውድኻ፡ ላዅ ድኳ ኒክድመትሲ ሰላምድ ድⶖሮ ገረስላ፣ ኰዶ ላዅክ ኒጎር ዳግ ጓት ሃበ እርግዅን። ¹¹ ናን መላኪን፡ እን እማና እሰዅሰና እና ከብተ ህምበው ይእክሊ ኒሰና እሰሊ” የኵ ጃር ጻባኦቱዅ።

¹² “ናፈደንሲ ሰላምድ ፈዲድኖ ግን፣ እን ካን ወይኒሩኽር ፍራ ኡሮ ግን፣ እን ብራኽር ንር ፍረስ ኡቶ ግን፣ ሰማኻ ስዋ እሲሮ ግን፣ እና ነስ ናትክ እን ከብተ ህምበው ከውድ ርስቲርሰና ሃበ እውየሎም ግን። ¹³ እንትን ያሁድዲ ኢስራኤልዱዲ! እን ቆምያታ ነበክል እሸና ኣኽድኖ፡ ርእያ ኣኽድኖ እርግድናዅሰና፣ ኒሰና ደአንድየኩም ግን፣ እንትንኽር በርከት ኣኽትኖ ግን። ጒኢትጋ፣ እንታ ናንትትስኽር ተብዳ።”

¹⁴ ጃር ጻባኦቱዅ ንሰና የኵ፣ “እንታ እክል ሓረቕድነሰነለ፡ ሰኸንትጊ፡ ናአወይሲ ጨዓት ገምድያ የመማዅሰና፣” የኵ ጃር ጻባኦቱዅ፣ ¹⁵ “ናን ደአም፡ ኢዮሩሳሌምዲ ይሁዳ ብረዲሲ ትክያዅ እስያ የመሞ ህምበኵን፣ ጒኢትጋ። ¹⁶ እን እንትን እሲትኖ ኣስተሀላዅኩም ጋር ኒን ግን፣ እንተሹር-እንተሹ እምን ጋባ፣ እንታ ኣፍያተልኽር ራትዕዲ እምንዅዲ ፍርድ ፈረዳ፣ ¹⁷ እኺርኺርሊ ምቝላ ሓሰብጋ፣ ብንድር ሸርነስ እጝከልጋ፣ ነስ ናትክ ፈንፈንተኵንሎም” የኵ ጃር።

¹⁸ ሓዲስ ኰዶ፡ ንሰና ያዅ ቆል ጃር ጻባኦቱዅ ይል እንቱዅ፣ ¹⁹ “እን ሹም ሰጀር አርቢዅዲ ኣⶖኰር አርቢዅዲ ለጘተር አርቢዅዲ ሽከር አርቢዅዲ፡ እን ከው ያሁዱውድ ፈርሕዳዅዲ ባህሳዅዲ ራይሓትዅዲ በዓል ኣኽሮሎም ግን፣በጋ፡ እምንዲ ኪሰሪዲት እጝከላ።”

²⁰ ጃር ጻባኦቱዅ ነዋ የኵ፣ “ቆምያትዲ ገሪ ዕርዲራታተል መንደርተው ከውዲ ልሳዕ እንትድኖ ግን፣ ²¹ እን ዕርዲራ ሓዲሲትል መንደርተው፡ እን ዕርዲራ አሪሪትል፣ ‘ላዃ አሸሻዅድ ፈርንን፡ ጃርሊ ሺዊኖ፡ ጃር ጻባኦቱዅሲ ጀረቢኖ፣ ኣይ ይላውድ ፈረኵን እⶖኵዅን’ ዩኑ ፈርድኖ ግን። ²² ከው ገሪውዲ እክ ሒለቱዲ ጃርሲ ጀረቢድኖኽር ኒል ሺዊድኖኽር ኢዮሩሳሌምሊ እንትድኖ ግን።” ²³ ጃር ጻባኦቱዅ ንሰና የኵ እⶖኵዅ፣ “እን ግርጋት እንደል፡ አይዪ ጋብዲ ብረዲትልድ ኣኸው ሽካ ኣዳም፡ ላ ያሁዲዅ ሰረና ቍጭንሲ ሻኽድኖ ግን እማ፣‘ጃር እንተዲ ዋነት ዋስኖ ህምብነኵን፡ ላት ፈርንን’ ይድኖሉ ግን።”